Jisas yumale disaipol plainrikera.
(Matyu 4.18-22; Mak 1.16-20)
5
Kaire wongke,
Jisas yeriye piyewa e fun Genesaret,a
ka pinuma mingklari noloni neri nemnangkaro mamane wu,
fa nupu wu e yirengkle nu mi e God.
2 Wu yuru bot plainrane e nu uma fa napulene firala,
e nuplen napalene nupi piyewa ka none neri naklelene net e none.
3 Jisas pai yulpari bot e Saimon ka yireni Saimon e yiyene bot as pai yapa rira.
Rongka Jisas waiye bot ka yali mi nu pinuma.
4 Wu yali nu mi pekimo wola wu yireni Saimon nanrona,
“Yiyene bot pai nupi rira ka pingkipanro net e pone ka puꞌpu firala.”
5 Saimon yireni wu kore nanrona,
“Manwamo,
mu meingkari ningki,
pai la moulpeperi kei ka mu fei mem firala wongke.
Souw,
e yen yire fane ki e kingkirpanro net wane.”
6 Nu ningkipanro net nupi,
ka nuꞌpu firala mingklari wamo yimerwa net ka net sa peprerene.
7 Nanrona fane nu mew nangkome none plai e nainene bot wongke ni ka mewmew plau.
Nu noloni ka nakle neingke firala neri riri pai la bot plainrane nire eniralo.
8 Saimon Pita yuru ompla namo,
ka wu angkrenpalo waiye wolale e Jisas ka yireni wu nanrona,
“Manwamo,
yupone ki ka pai,
ki mana fa kangke ommo fafaile.”
9 E fika wu yakle wone plai wolnipanrini wamo,
e nu nuru firala e none nuꞌpune.
10 Mela mana plainren e Sebedi,
Jems ka Jon,
wuyane wolnipanri plau.
Jems yane Jon,
wuyane fa nane Saimon napulene firala.
Ka Jisas yireni Saimon nanrona,
“Yene fa yumye.
Naminre ka pai,
yene e yumale uma.”
11 Rongka nu neingke bot plainrane panri naine pike riri,
ka nupole ommo mingklari e none ka nupene Jisas.
Jisas yemplekuru mana e lepro uporo kore
(Matyu 8.2-4; Mak 1.40-44)
12 Jisas pai waiye taun wongke ka mana wongke yolowi wu.
Mana namo,
nalpapri e wu lepro sam yaurere.
Wu yuru Jisas,
ka fufulyokle pike,
kulpalo ka yarine Jisas nanrona,
“Manwamo,
le yene yire yemplekuru ki,
yene yuna kero fa yangke nalpapri kinini namkireb kore.”
13 Jisas mew pai yaune mana namo ka yireni wu nanrona,
“Ki kire.
Yene namkire.”
Rongka wampane nro lepro e mana namo pekimo.
14 Ka Jisas yaꞌne wu mi kero nanrona,
“Yene fa yoproni mana wongke mi e ompla namo.
Yene e pai pris e tempol ka yireni wu yuruno nalpapri yeneni,
ka yene e yangke ofa,
ommo e isi Moses yireni yene e yangke,
e yene yemei uporoye.
Yene yangke ompla namo se nu uma e nuru ommo isi nemei yene.”
15 Rongka mi e Jisas yopri poupai mokoi mingklari.
Nanrona fane pinuma mingklari noloni nupu mi e wu ka wu e yemplekuru nalepapri e nenrinine se,
nu e nemei uporo kore.
16 Kaire plai Jisas fa yupole nu ka pai koii e nu uma fei nainene ka yesapuye.
Jisas yemplekuru mana e merew rili yemei uporo kore
(Matyu 9.2-8; Mak 2.3-12)
17 Kaire wongke,
Jisas waraiye yopro mi nu pinuma,
nu Farisi ka nu uma namale lo nainene mokoi namo.
Nu Farisi ka nu uma e namale lo,
e noloni mokoi mingklari e taun wamo Jerusalem,
distrik Galili ka distrik Judia.
Kero e Manwamo yeye Jisas,
fa wu e yemplekuru nu uma e nenrinine.
Jesus Heals a Paralytic (Luk 5:17-26)
18 Nu uma plai nongkole mana wongke wiye ilaki,
merew rili pu,
ka nu nire fa nongkole wu painri panri monre,
nina ekrene Jisas.
19 Nu noloni ka nuru nanrona uma mingklari wamo ka nu fei nongkole wu painri Jisas,
nanrona fane nu nongkole wu panri mow riplala riri,
kaki pulale ka nina wu sam palo iplele,
wolale e Jisas yeriye.
20 Jisas yuru bilip e nu ka wu yireni mana namo nanrona,
“Konmana,
ki kuꞌpole nale fafaire yeneni.”
21 Nu Farisi ka nu uma e namale loc ke wola nanrona,
“Mana namo wu sanro fina ka yire yem koii e God fane yire mi namo?
Mana wongke ese fi yuꞌpole nale fafaire.
Onnele.
God wonkere nro,
ese yangke ompla namo.”
22 Jisas namale wolpuna e nu pu ka wu yarile nu nanrona,
“E fika ka pone ke wola rona,
yeye wolpuna poneni?
23 Mi fika alele rongkele sa ki e kire?
Ki ese kireni wu nanrona,
‘Ki kuꞌpole nale fafaire yeneni’,
wee ki e kireni wu nanrona,
‘Yene yemei ka pai’?
24 Ki e kukule pone ka pone ese namale rona,
e pike mee,
Auna e Mana sa kero fa yuꞌpole nale fafaire.”
Ka wu yensona yuru mana e merew rili ka yireni wu nanrona,
“Ki kireni yene,
yemei ka yongkole ilaki yeneni ka pai mow yeneni.”
25 Ka wampane nro mana namo yemei namapren e nu uma ka yongkole ilaki e wone wileye ka wu yereri noula e God ka pai mow woneni.
26 Ka nu uma e nainene namo nuru ompla namo ka nu wolnipanri ka nereri noula e God.
Nu wola numnum ka noprole none kore nanrona,
“Naminrele mone muru ompla wongkeni!”
Jisas youw Livai
(Matyu 9.9-13; Mak 2.14-17)
27 Ommo namo pekimo rongka Jisas yolo moile ka yuru mana wongke fa yuꞌpuye romaula e gapman noula wunini Livai,d
waiye mow e fa nuꞌpune romaula.
Ka Jisas yireni wu nanrona,
“Yupene ki.”
28 Livai yemei ka yupole ommo mingklari ka yupene wu.
29 Ingke se Livai yangke kola wamo Jisasni,
mow e wone.
Uma mingklari fa nuꞌpune romaula e gapman ka nu uma plai re naine plau ka nakle no.
30 Se nu Farisi nakle none plai e namale lo wolpuna kire ka narile nu disaipole e Jisas nanrona,
“E fika ka pone ke pakle nu uma fa nuꞌpune romaula e gapman ka nu uma fa nangkene nale fafaire pope ka paikolpope plau?”
31 Ka Jisas yirengkle nu nanrona,
“Nu pinuma e fei nenrinine fi fa painrine dokta.
Nu uma e nenrinine,
sonore sa painri dokta.
32 Ki seke koloki fa kumale nu pinuma e upupu nama e God.
Ki koloki fa e kumale nu uma e fa nangkene nale fafaire ese nensoro wolpuna.”
Nu narine Jisas mi e fa neinangkrune ommo fa none
(Matyu 9.14-17; Mak 2.18-22)
33 Ka nu uma plai nireni Jisas nanrona,
“Nu uma e fa nupene Jon ka nu uma e fa nupelene nu Farisi,
kaire plai nu fa karnai punale ka nesapune nro.
Ka nu uma fa nupene yene sa ke none ka naikol none.”
34 Ka Jisas yirengkle nu nanrona,
“Ne pone ese pangke nu uma e mana wer yem pin namo e karnai punale,
e wu yakle naine plau wee,
onne?
35 Ingke se,
nu e numane mana e wer yem pin pai yupole nu uma woneni,
sa sonore,
nu e karnai punale.”
36 Ka Jisas yirengkle nu mi riri wongke:
“Nu uma fi fa naure amprapi plol pitiri wongke e amprapi keklepe ka narku plau oya.
E nu nangke nanrona amprapi keklepe ese peperi,
ka plol pitiri ese fei yukaine amprapi oya namo.
37 Ompla wongke re,
mana wongke e fei yaiku wain keklepe palo plau meme papri oya e narku fa nairirine mii.
E wu yangke nanrona,
se wain keklepe rofo ese yopu ka yuu meme papri oya ese yopri ka wain ese okolpanro ka meme papri ese fafaile.
38 Nanrona fane wain keklepe namo,
nu e naiku palo meme papri keklepe.f
39 Ka nu uma e naikolno wain oya,
nu ese numplewa wain keklepe,
e fika nu namale ka nu ese nire nanrona,
‘Wain oya sa uporo.’ ”