Jisas yire nale e fa nangke ommo e kaire Sabat, sa nenrape
(Matyu 12.1-14; Mak 2.23–3.6)
6
Kaire wongke e Sabat,
Jisas yakle disaipol woneni naraine painrine iplele e nengkrele wongke e wit.
Ka nu disaipol nuꞌpu wit nalale ka mew nenele papri ka no wit nale.
2 Ka nu Farisi plai ke narile nu nanrona,
“E fika ka pone ke pangke ompla namo,
lo e mone yire mone ese fei mangke ompla namo kaire e Sabat?” a
3-4 Ka Jisas yirengkle nu nanrona,
“E Devit yakle wone uma naine namo nem ponriline.
Wu pai pari mow e God ka yuꞌpu bret e nu nanene God.
Nu pris nro fa none bret namo,
ka wu sa wo kei.
Ka wu yali bret plai nu uma e nane wu nainene ka no.
Mi namo pone puru pu,
ka pone fi wolrufupe,
wee?”
5 Ka Jisas yirengkle nu nanrona,
“Auna e Mana,
wu sa waiye yukaine Manawamo e kaire Sabat.”
6 Ingke kaire Sabat wongke,
wu pai pari mow kori e nu Juda ka yopro yukuleye mi nu pinuma.
Ka mana wongke e waiye namo mewmenrulpo wunini e isi ri pu.
7 Nu Farisi nakle nu uma e namale lo napu rokoi,
nire fa naku mi palo Jisas.
Nanrona fane kaire e Sabat nu e samo nurune wu,
ese yemplekuru mana e yenriye wee onne.
8 Ka Jisas sa namale pu ommo e nu wola rufune,
ka wu yireni mana mew wunini e ri nanrona,
“Yene yemei yeri ka uma mingklari mee ese nuru yene.”
Nanrona fane mana namo yemei ka yeri.
9 Ka Jisas yirengkle nu nanrona,
“Ki karile pone,
kaire e Sabat lo e mone yire,
mone ese mangke ommo uporo wee ommo fafaile?
Ese mone mewmew nu uma naine laip wee mone ese muꞌfro nu rili e kaire e Sabat?”
10 Wu nama ronsane uma mingklari namo ka wu yireni mana namo nanrona,
“Sukaryane mew yeneni.”
Ka mana sukaryane mew woneni ka mew woneni uporo kore.
11 Ka nu wolpuna neni wamo ka nifrilpanro napu mi,
ompla fika nu ese nangke Jisas.
Jisas yuꞌpu nu 12pla Aposel
(Matyu 10.1-4; Mak 3.13-19)
12 Kaire wongke,
Jisas pai pari koii arwola wongke,
ka ningki wu waiye ka yesapuye God pai la moulpeprere kei.
13 Ningkinama nole wu youw nu disaipol fa nupenene wone ka wu yuꞌpu nu 12pla nro ka yali nu noula aposel:b
14 Saimon,
wu sa Jisas youw noula wongke Pita,
ka ino Andru,
ka Jems,
Jon,
Filip,
Batolomyu,
15 Matyu,
Tomas ka Jems wongke,
wu sa Alfias auna,
ka Saimon,
wu sa mana wongke e uma Selot,c
16 ka Judas,
wu sa Jems auna,
ka Judas Iskariot.
Judas Iskariot namo,
wu ese yina Jisas pai mew e nu uma nangke fafaile wu.
Jisas yemplekuru nu pinuma mingklari
(Matyu 4.24-25; Mak 3.7-12)
17 Jisas yakle disaipol panro painri neri koii ru nakle disaipol mingklari e wone nemnoku naine koii namo.
Nu uma e mokoi mokoi e nu Juda ka taun wamo Jerusalem,
ka nu uma e mokoi mingklari e furmaipon e taun Tair ka Saidon nu re noloni.
18 Nu noloni e nupu mi e Jisas ka wu ese yemplekuru nu e nenrinine.
Ka nu uma e opola fafaile fa nisinorine nu,
wu yangke nu nemei uporo kore.
19 Ka uma mingklari namo neingkari nire mew nina pai nuna Jisas,
e fika,
kero e wu pai nu uma mingklari e nenrinine ka nemei uporo.
Jisas yire nu uma fafai ese woluporo
(Matyu 5.1-12)
20 Wu yuru nu disaipol woneni ka wu yirengkle nu nanrona:
“Pone uma fafai,
pone ese woluporo wamo.
Kingdom e God sa poneni.
21 Pone uma e pemponrilipe,
pone ese woluporo wamo,
ingke pone ese po ka rengki.
Pone uma e pempiripe,
pone ese woluporo wamo,
ingke pone ese pupo.
22 Pone uma,
nu pinuma fa wolpuna fafaile pone
ka numplewa pone ka nire mi fafaile pone
ka nekrinouwne noula poneni ka nire pone sa uma fafaile wamo,
e fika,
pone fa pupenepe Auna e Mana,
pone ese woluporo wamo.
23 “Le nu uma nangke nale namo pone,
pone fa wolpaurepe.
E fika nu alma flili e nu isi nangke nale namo nu profet.
Nanrona fane,
pone woluporo wamo ka pulpulpapri,
e fika ingke God e yape pone ommo upupu wamo e heven.
24 Ka pone uma e punari ommo mingklari namo,
pone poo,
e fika pone e puꞌpu ommo upupu poneni pu.
25 Pone uma e fa pope ka rengki namo,
pone poo,
ingke pone ese ponrini.
Ka pone uma fa pupope namo,
pone poo,
e fika pone ese wolpaure ka pempiri wamo.
26 E nu uma nereri noula e pone,
pone poo,
e fika isi nu alma flili nunini nereri noula e nu profet fa karnirene mi.
Yene e sam wolyale nu iimuma yeneni
(Matyu 5.39-42)
27 “Ka ki kirepi pone uma e pupupe mi e ki mee,
pone sam wolpale nu iimuma poneni ka pangke nale uporo nu uma e fa wolpuna fafaile pone.
28 Ka nu uma fopi e fa nemnosi pone,
pone e sam parine Manawamo e yangke uporo nu.
Ka pone pesapu God,
e saimoro nu uma fa nangke fafaile pone.
29 Le mana wongke yufu euw yeneni,
yensona ka wu yufu repo plau.
Le mana wongke yem amprapi yeneni,
yuruye nro e wu yem siot yeneni plau.
30 Yene yali ommo nu uma yukaine e nu nari yene.
Le mana wongke yem ommo yeneni,
yene e fi yire wu yawe yene kore.
31 Nale e pone pire fa nu uma ese nangkene pone,
nale namo sa pone pangke nu se.
32 “Le pone fa samo wolpalepe nu uma nro e fa wolape pone,
ese God ke blesim pone rongkele?
Nu uma e fa nangke nale fafaire nu re wolnale nu uma e fa wolnale none.
33 Le pone pangke uporo nu uma fa nangke uporo pone nro,
ese God blesim pone rongkele?
Nu uma fa nangke nale fafaire nu re fa nangke nanrona.
34 Le pone karpali ommo pai nu uma e pone pire nu ese nape kore pone,
ese God ke blesim pone rongkele?
Nu uma e fa nangke nale fafaire,
nu re fa nali nu oikenra e none ka nire nanrona nu ese nuꞌpu ommo kore.
35 Ka pone sam wolpale iimuma poneni,
ka samo pangke uporo uma,
ka pali ommo uma reprikera ka pone fa wolape kore rona nu ese nape pone ompla wongke kore.
Ka ompla upupu God ese yangke pone wamo,
ka pone ese paipe yukaine kongkom e God Riri.
E fika wu fa samo yangke uporoye nu uma e fi fa nire mi uporo wu ka nu uma fa nangke nale fafaire.
36 Pone samo wolpalo nu uma yukaine Aina poneni fa wolpaloye.
Pone e fei weikerpurupe nu uma plai wolpuna neni plau
(Matyu 7.1-5)
37 “Pone e fi karweikerpuru nu uma plai,
ka pire nu uma sa fafaile,
sa God re ese fi weikeryuru pone wolpun neni plau.
Pone e fi karmipolope nu uma plai,
nanrona nu nangke nale fafaire pu ka nu ese nem eni.
Le pone fi pangke rona ka God re ese fi karmiyolo pone.
Pone samo puplen ompla fafaile e nu uma sa God re ese yuplen ompla fafaile e pone.
38 Pone pali ommo uma plai sa God re ese yape pone ommo.
God ese samo yepi ommo upupu pone,
yukaine mana e raile ommo yimeri,
ka wu ese samo raile ka yumanralo panro,
ka raile kore,
ka yemyuye pai la ommo okolpanro,
ka yape pone.
Ompla rongkele pone pane,
pone ese pem resukru ompla namo.”
39 Ka wu yirengkle nu mi riri nanrona,
“E mana wongke namwowo yuna wongke e namwowo ka yane painri rokoi,
ese yane painri uporo wee?
Onnele,
wuyane ese firipanro pulale plau.
40 Mana e namaleye ompla ese fei rikepone mana e yukuneye wu,
ka nu uma e namale pu ese nemei yukaine mana e yukuleye none.
41 “Fikami ka yene yuru uru pitiri waiye nama e wongke mana yeneni ka yene fei namale ilo rola wamo waiye nama yeneni?
42 Ka e yene namale ilo rola waiye nama yeneni,
e fikami ka yene yireni wongke mana yeneni nanrona,
‘Mela,
yene yolowi ka ki kangkome uru waiye nama yeneni.’
Yene mana fa karyireye,
emen yene yangkome ilo rola waiye nama yeneni se sa yene ese samo yuru ka yangkome uru waiye nama e yene wongke mana.
Ilo ka nale wunini
(Matyu 7.16-20; 12.33-35)
43 “Ilo uporo fei fa nalelwa nale fafaile,
yukaine e ilo fafaile re fei fa nalelwa nale uporo.
44 Nu uma fa namalene ilo wokwokera ka nale noneni.
Nu uma fi fa painrine kapa rin ka nangkru ilo fik nalale,
ka ilo aure fafaile e rin plau fei fa nalelwa wain nalale.
45 Mana uporo re yuna ommo uporo naine wolpuna woneni,
nanrona fane wu yangke nale uporo nro.
Ka mana fafaile fa yangke ommo fafaile nro yimerwa wolpuna woneni.
Ommo e yimerwa nene wolpuna woneni fane nolo reꞌfa woneni.
Nale plainre fa neꞌre mow
(Matyu 7.24-27)
46 “E fika ka pone pouw ki nanrona,
‘Manawamo,
Manawamo,’
ka pone fei pupene mi e ki?
47 Le mana wongke yire yolowi ki,
ka yupu mi kinini ka yupene,
sa ki es kopro pone mana namo wu sa rongkele.
48 “Mana namo fa yangke yukaine mana wongke e yeꞌre mow.
Wu yompo pike palo ruwe ka yeꞌre mow yeri roma riri.
E nupi yopu wamo yekri mow ka mow fi farwaka,
e fika,
mow e wu samo yeꞌre.
49 Ka mana wongke e yupu mi e ki ka fei yupene,
wu ese yukaine man e yeꞌre mow e waiye pike riri nro fi yokle ilo panro pike ruwe.
Ingke nupi yopu kero ka yekri mow,
ka wampane nro mow firpalo ka pikpikare kei.”