Jisas yemplekuru mana e fa yangkeye ommo e kepten e ami
(Matyu 8.5-13)
7
Jisas yoprongkle nu disaipol ka nu uma plai re nupu mi wunini pekimo ka wu pai taun Kaperneam.
2 Kepten wongke e 100 soldia waiye,
ka wu yuna mana wongke e fa yangkeye ommo e wone.
Wu fa yereri noula e mana e fa yangke ommo e woneni wamo,
mee mana namo yenri ka yire yangke ri.
3 Kepten yupu mi e Jisas wiye,
nanrona fane wu yawale nu iramana e nu Juda,
painri narine Jisas yolowi e yemplekuru mana e fa yangke ommo woneni.
4 Nu painri nane Jisas,
ka nopro mi wu yukaine nire nirilnale rona,
“Kepten namo uporo ka yene as saimoyane wu,
5 e fika,
wu fa wolyane mone pinuma e Juda ka yeꞌre mow kori munini.”
6 Nanrona fane Jisas yakle painri.
Wu yolowi ekrene mow ka kepten yawale nu fori plai e wone painri nireni Jisas nanrona,
“Manawamo,
yene ke yolowi kei,
ki seke mana uporo le yene wi yeri mow e ki.
7 Nanrona fane ki wola nanrona ki seke mana uporo,
ki nro ese koloki yene.
Nanrona yene yire nro sa mana e fa yangke ommo e ki ese uporo kore.
8 Ki re fa kaike mew wola e mana risi ki.
Ka ki re,
nu soldia fa naine mew wola e ki.
Ki kireni soldia wokera nanrona,
‘Yene pai,’
ka wu pai.
Ki kireni wongke nanrona,
‘Yene wi,’
ka wu wi.
Ki kireni mana e fa yangkeye ommo e ki namo nanrona,
‘Yene yangke ompla namo,’
ka wu yangke.”
9 Jisas yupu mi namo ka wu wolnipanri,
nanrona fane wu yensona yuru nu pinuma mingklari e nupenene wu ka wu yirengkle nu nanrona,
“Ki kirepi pone,
ki fei kuru mana wongke e Israel bilip wunini sa wamo nanrona.”
10 Ingke se nu uma e kepten yawale painri Jisas,
noloni kore monre ka nuru mana e fa yangke ommo e kepten uporo kore pu.
Jisas yemplekuru mana efapu e taun Nain yemei uporo kore
11 Ingke se Jisas pai taun Nain,
ka nu disaipol e wone ka nu pinuma mingklari nane painri.
12 Wu pai ekrene prerama e taun,a
ka nu uma nongkole puꞌlo e mana wongke e ri nolo moile.
Wu sa mela wokera nro mokani.
Nangka wunini sa ri pu ka moka nro sa waiye.
Ka pinuma mingklari wamo e taun nane pin namo painri.
13 Manawamo yuru pin namo,
ka wu wolyaure wu ka yireni wu nanrona,
“Yene fa wiriye.”
14 Ka Jisas pai ka mew yaune iloaki ka nu uma e nongkole iloaki neri.
Ka Jisas yire rona,
“Mel efapu,
ki kirewi yene,
yene yemei!”
15 Mana e ri,
yemei ka yopro mi kore.
Ka Jisas yaꞌne pai kore moka.
16 Nu uma mingklari nuru ompla namo wola numnum ka nu nereri noula e God.
Nu nire nanrona,
“Profet wamo wongke yemei mone pu.”
Ka nu fa nire kore nanrona,
“God wi pu e saimoro nu uma e wone.”
17 Mi e ompla Jisas yangke namo yopri poupai mokoi e distrik Judia ka mokoi plai e naine mamanene.
Jisas yane Jon e Baptais
(Matyu 11.2-19)
18 Nu disaipol e Jon Baptaisb nireni wu ommo mingklari namo,
ka wu youw plainrane e nu noloni wu.
19 Ka wu yawane wuyane painri Manawamo narine wu nanrona,
“Yene mana e God yire e wi wee,
mu e moru mana wongke kore?”
20 Mana plainren painri Jisas,
ka wuyane nireni wu nanrona,
“Jon Baptais yawane kikane molomi marine yene nanrona,
‘Yene mana e God yire e wi wee,
mu e moru mana wongke kore?’ ”
21 Wuyane noloni Jisas,
ka Jisas sa yemplekuruye nu pinuma mingklari e nenrinine,
nama wowole ka nu uma e opola fa nisnorine,
nemei uporo kore.
22 Nanrona fane wu yireni mana plainrane e nuna mi nolonine nanrona,
“Yenyane paipi kore ka pireni Jon ommo e yenyane puru ka pupu.
Ommo yukaine uma nama wowole nuru kore,
ka nu uma e rew rili naraine kore,
ka nu uma e lepro nemei uporo ka namkire nama e God,c
ka nu uma ripi uku fa nupu mi kore,
ka nu uma e rili fa nemei kore,
ka nu uma fafai nupu miuporo e God.d
23 Mana fina e yupu mi kinini,
ka bilip e wu fi firpalo,
wu ese woluporo wamo.”
24 Mana plainren e nuna mi e Jon noloni namo painri se,
sa Jisas yopro nu pinuma mingklari e ommo e Jon,
“Pone paipi koii e uma fei naine e pone pire puru fika?
Pone paipi ese puru akrala wokera e yeriye ka rapu yenyuye?
25 Le onne,
pone paipi pire puru fika?
Pone paipi e puru mana raile ommo papri upupu,
alweone?
Onnele.
Nu uma e fa naile ommo papri upupu,
e fa nuꞌpu romaula wamfafai fa nainene mow e king.
26 Mee pone paipi pire puru fika?
Pone paipi e puru profet wongke,
wee?
Yei!
Ki kirepi pone,
mana namo seke profet nro,
onne.
27 Buk e God yire mi e wu nanrona,
‘Ki ese kawane mana yuna mi e ki pai risi yene,
ka wu ese saimoro rokoi yeneni se sa yene.’ f
28 Ki kirepi pone nanrona,
pinuma e mokapi nuꞌpu namo,
fei numaro Jon.
Mana fina e waiye noula pitiri e nu uma plai,
kingdom e God,
mana namo sa yumaro Jon.”
29 Pinuma naine namo ka nu uma e fa nuꞌpu romaula e gapman,
nupu mi ka nire nanrona ompla e God yire yangke nu sa sam uporo wamo.
Nu nopro rona,
e fika Jon baptaisim nu.
30 Ka nu Farisi ka nu uma fa samo namale lo kuma nane ompla e God yire yangkeye none,
e fika nu fei painri nuꞌpu baptais e Jon.
31 Ka Jisas fa yire kore nanrona,
“Nu uma e wremee,
ki ese kire rongkele e kukule nale e nu?
Nu anro yukaine fika?
32 Nu sa yukaine kongkom e naine maket ka nemneikene ka nouwne plai e none ka nireli nu nanrona,
‘Mu mine nenra ese pone pokule
ka pone fei pokule,
mu meile rai e uma riline,
ka pone fei piri.’
33 “Jon Baptais e wi ka waiye punale ka fei wo ka yaikowo wain,
ka pone pire nanrona,
‘Jon Baptais namo,
wu sa opola konrare.’
34 Auna e Mana wi ka wu wo ka yaikowo wain ka pone pire nanrona,
‘Puru mana namo,
wu mana fa woraileye ka fa yaikowo mingklari.
Wu sa fori e nu uma e fa nuꞌpu romaula e gapman ka nu uma e fa nangke nale fafaire.’
35 Ka nu uma e fa nupenene wolpuna e God sa yukaine kongkom woneni,
nu nukule mone rona wolpuna wunini sa alwone.”
Pin e fa yangke nale fafaire yina sanda rew e Jisas
36 Farisi wongke youw Jisas yolowi ka wo mow e wone.
Nanrona fane Jisas pai pari mow e Farisi ka yane naine no.
37 Pin wongke fa yangke nale fafaire waiye taun namo.
Wu yupu rona Jisas ese pai wo mow e Farisi namo.
Ka wu pai mow namo,
yungkam botol sanda uporo e nangke roma.
38 Wu yolowi ka pai yeri kumalepo e Jisas ekrene wu rewyen ka nama kuru e wu peprer panro yangke rew e Jisas rekle.
Wu wiriye ka yuna ira para woneni ka yasiroye rew e Jisas,
ka ungkla youkeneye rew e Jisas ka yaikuye sanda palo rew wunini.
39 Farisi isi yarine Jisas yolowi mow e wone,
wu yuru ompla namo ka wolanro yeye wolpuna woneni,
“E mana namo profet se wu e namale fina e mew yaune wone ka wu sa pin rongkele.
Wu ese namale nanrona,
wu pin fa yangke nale fafaire.
Nanrona fane profet wongke ese fi yuruye nro,
e pin nanrona yangke nale namo wu.”
40 Ka Jisas yireni wu kore nanrona,
“Saimon,
ki kire kirewi yene ompla wongke.”
Ka Saimon yire rona,
“Tikse,
yene yireni ki.”
41 Ka Jisas yireni wu nanrona,
“Mana plainren e karnuꞌpu romaula e mana wongke,
mana namo fa karyali romaula uma fa e nangke bisnis.
Mana wongke,
romaula e wu sa yukaine 50pla fotnait ka wongke,
romaula e wu sa yukaine 5pla fotnait.
42 Wuyane napu rokoi e romaula raraine,
e nane mana namo kore.
Rongka mana namo wolpalo ka fei yem romaula e wuyane kore.
Nanrona fane fina e wuyane ese wolyane mana namo wamo?”
43 Ka Saimon yireni wu nanrona,
“Wola e ki sa,
mana fina e yuna romaula wamo.”
Ka Jisas yire nanrona,
“Mi e yene yire namo sa resukru.”
44 Ka wu yensona pai pin ka yireni Saimon nanrona,
“Yene yuru pin mee?
Ki keri mow yeneni,
yene fei yake ki mii fa ki e kaklele rew kinini,
pin mee yaklele rew kinini plau nama kuru woneni ka yuna ira para woneni ka yasi rew kinini.
45 Yene fei ungkla youkene ki,
pin mee e ki keri mow yeneni wi plele mee,
wu wona ungkla youkeneye rew kinini.
46 Yene fei yem wel ka yasi ikakro kinini,
pin mee nro yem sanda ka yaiku rew kinini.
47 Nanrona fane ki kirewi yene rona,
pin wolyapa ki wamo,
e fika ki kuꞌpole nale fafaire mingklari wunini.
Ka mana fina e ki kuꞌpole ommo pitiri,
wu e wolyane ki pitiri nro.”
48 Ka Jisas yireni pin nanrona,
“Ki kuꞌpole nale fafaire yeneni pu.”
49 Nu uma plai e nane wu naine ka none,
noprole none kore nanrona,
“Wu sa mana fina ka yuꞌpole nale fafaire e nu uma fa nangkene?”
50 Ka Jisas yireni pin nanrona,
“Bilip yeneni nro,
wola God yem yene kore;
nammee yene pai woluporo.”