Jisas yemplekuru mana e mew ka rew rili yemei uporo kore
(Matyu 9.1-8; Luk 5.17-26)
2
Kaire plai pai pekimo se,
sa Jisas pai kore taun Kaperneam.
Ka wampane nro nu pinuma nupu mi nanrona wu yolowi kore waiye mow.
2 Uma pinuma mingklari noloni nemnoku naine mow monre namo ka mow yimerwa wamo pinuma namo.
Ka mow monre namo yolowi plele rama namo yimeri wamo.
Ka Jisas won yopro mi e God pai nu.
3 Ka 4pla uma nongkole mana wongke rew wunini rili noloni.
4 Pinuma mingklari yimeri kei,
fane koii rola wongke fi yeye fa nu ese nongkole wu pai plele Jisas.
Nanrona fane nu nongkole wu panri mow riplala riri ka kaki pulale riri e mow namo.
Ka nu kapa nuka iloaki e mana wiye namo ka risinane wu palo Jisas ungklama.
5 Ka Jisas yuru rona nu samo bilip wamo fane wu yireni mana e rew rili namo nanrona,
“Auna,
ki kuꞌpole pu nale fafaile yeneni.”
6 Ka plai e nu tikse e lo nakle nu naine namo,
ke nupu mi namo ka naine wolrufune wolpuna noneni nanrona,
7 “E fika mana namo ke yopro mi nanrona?
Anro wu yire yem koii e God ka ouwyire wu.
Mana wongke ese fi yuꞌpole nale fafaile e nu uma fa nangkene!
Sa onnele,
God wokera nro fa yangke ommo namo.”
8 Wampane nro Jisas namale ompla fika e yeye wolpuna e nu uma namo ka wu yarile nu nanrona,
“E fika ka pone ke pem wolpuna nanrona?
9 Mi uporo rongkele sa ki ese kireni mana namo?
‘Ki kuꞌpole nale fafaile yeneni,’
wee ki ese kireni,
‘Yene yemei ka yongkole iloaki yeneni ka waraiye’?
10 Ka ki sa wola kire pone ese namale nanrona Auna E Mana sa yuna noula ka kero ese waiye pike mee ka wu ese yuꞌpole nale fafaile e nu pinuma.”
Ka wu yireni mana rew rili namo nanrona,
11 “Ki kirewi yene,
yemei ka yongkole iloaki yeneni ka yene pai mow yeneni.”
12 Uma mingklari nuru wu yeri ka wampane wu yina mew palo ka yem iloaki woneni ka yemei palo moile.
Ka pinuma mingklari wolnipanri wamo ka nu nereri noula e God ka nu nire nanrona,
“Isi mu fi muru ompla wongke nanrona.
Sam onnele!”
Jisas youw Livai
(Matyu 9.9-13; Luk 5.27-32)
13 Ka Jisas pai kore piyewa e fun Galili.
Ka uma mingklari wamo noloni wu ka wu wona yopro yukuleye nu mi e God.
14 Ka e wu waraiye paiye,
wu yuru Livai,
Alfius auna,
fa waiye mow takis.a
Ka Jisas yireni wu nanrona,
“Yene yolowi yupene ki.”
Ka Livai yemei ka yupene wu.
15 Ingke se Jisas yakle nu disaipol woneni painri no ommo mow e Livai.
Ka e taim namo re mingklari e nu uma fa nuꞌpune romaula e nu pinuma ka nu uma fa nangkene nale fafaire,
nakle naine none ommo plau.b
E fika,
mingklari e nu uma nananrona fa nupenene Jisas.
16 Ka nu tikse plai e lo sa uma Farisi,
nuru Jisas ke yakle nu uma fa nem romaula ka nu uma fa nangkene nale fafaile namo none ommo ka nu narile nu disaipol wunini nanrona,
Fikami ka wu ke yakle nu uma fa nuꞌpune romaula ka nu uma fa nangkene nale fafaile namo none ommo?
17 E Jisas yupu mi nunini namo,
wu yirengkle nu nanrona,
“Nu uma fi nenrinine namo,
fi fa painri nurune dokta.
Ka nu uma fa nenrinine nro sa fa painri nurune dokta.
Pone ese namale nanrona,
ki fi koloki ese kouw nu uma uporo e fa nupene nale uporo.
Sa onnele.
Ki koloki fa kouw nu uma fa nangkene nale fafaile.”
Jisas yire nale fa neinangkrune ommo fa none
(Matyu 9.14-17; Luk 5.33-39)
18 E kaire wongke,
nu disaipol e Jon ka nu Farisi re neinangkru ommo fa none.
Ka uma plai noloni plele Jisas ka narine wu nanrona,
“Fikami ka nu disaipol e Jon ke nakle nu disaipol e nu Farisi namo neinangkru ommo fa none,
ka nu disaipol yeneni namo,
fi fa neinangkru ommo?”
19 Ka Jisas yopro mi riri wongke nu nanrona,
“E nu nangke kola wamo e mana ese yem pin,
nu uma woneni ese neinangkru ommo fa none wee onne?
Samo onnele!
E mana namo yakle nu naine,
sa nu ese fei neinangkru ommo fa none.
20 Ka kaire ese yolowi sa nu uma plai ese nem mana namo ka wu ese yupole nu uma woneni ka pai.
Sa taim namo nu ese neinangkru ommo fa none.
21 “Mana fi fa yem amprapi plol keklepe wongke ka yakru plau amprapi plol oya e peperi namo.
Sa onnele!
Le wu yangke nanrona,
sa amprapi plol keklepe namo ese yangke oya,
ka ese yangke amprapi oya namo ese peperi wamo.
22 Mana ese fei rairiri wain keklepe palo meme papri oya.
Sa onnele!
Le wu yangke nanrona,
e wain keklepe ese yeri ka yuu meme papri oya namo ese yopri.
Ka wain namo re papri ese fafaile.
Nanrona fane,
mana ese yaikule wain keklepe palo meme papri keklepe.”
Mi e kaire Sabat
(Matyu 12.1-8; Luk 6.1-5)
23 E Sabat wongke,
Jisas yakle nu disaipol woneni naraine iplele e wit nengkre.
Ka nu disaipol woneni nangkru wit nale ka nenelene papri fa nu ese no.
24 Ka nu Farisi nireni Jisas nanrona,
“Yene yuru,
lo e mu sa yire nanrona nu uma ese fei nangke ommo kaire e Sabat.
Fina yirengkle nu disaipol yeneni ke nangke nanrona?”
25 Ka wu yirengkle nu nanrona,
“Anro pone fi puru mi e Devit wee?
E wu ommo fa nonene sam onnele ka nu uma fa nupene wu namo re ponrinile.
26 E taim namo Abiatar waiye hetpris e tempol.
David pari mow monre e God,
ka woye bret e nu nangke ofa pari God ka nenru nainene.
Bret namo nu pris nro sa none,
ka uma nale siwole sa onnele.
Ka Davit sa wo kei,
ka nu uma woneni re wu yepi plai yali nu.”