Miuporo
Mak
Yeꞌre
Jon Baptais yopro mi Miuporo
(Matyu 3.1-11; Luk 3.2-16; Jon 1.19-28)
1
Mi naimele sa miuporo e Jisas Krais Auna e God.
2 Mi mee isi profet Aisaia yeꞌre yoproye rokoi rongkele ese mi e Jisas Krais namo ese yemei.
Wu yeꞌre mi e God nanrona,
“Yene yupu.
Ki ese kawane mana wongke ese yungkam mi kinini ka wu ese pai risi yene ka yemplekuru rokoi yeneni.
3 Mi mongkoma e mana namo e waiye mokoi maipon yaupenro yangke mi kero ka yire mi nanrona,
‘Manawamo ese yolowi,
nanrona fane pone ese samo pemplekuru rokoi wunini.
Pone ese samo pemplekuru rokoi fa wu ese waraiye.a’ ”
4 Ka mi e profet Aisaia yere namo,
yemei alele ka nalelwa nale e taim Jon Baptais yemei ka waiye yukaine mana fa yungkam mi e God.
Wu yemei mokoi maipon yaupenro e uma fei nainene,
ka wu yoproye mi e nu pinuma mingklari ese nemplesoro wolpuna ka nupole ommo fafaire mingklari e none fa nangkene namo ka nem baptais,
sa God ese yuꞌpole nale fafaile nunini.
Jesus is Baptized (Mak 1:4-11)
5 Pinuma mingklari e mokoi mingklari e provins Judia ka pinuma mingklari e taunwamo Jerusalem namo fa painrine ka nupu mi e Jon.
Ka nu fa nirenine nale fafaile noneni ka Jon fa baptaisimye nu nupi Jordan.
6 Jon fa yana ommo papri e nu nangke kamel para,bc
ka wu fa yiperi let e nu narku ommo kuru papri.
Ka wu fa woye rala ka ani amu.
7 Ka wu yopro mi ka yirengkle nu pinuma nanrona,
“Mana fina ese yolowi wairu ki namo,
kero wunini ese rikepone kero kinini.
Nanrona fane ki sa fi resukru ese kangke ompla yukaine nu uma yaimare fa nangkene,
yukaine fa fufula pikari ka neingkro arpela e yeye sandel wunini.
8 Ki baptaisim pone mii siwolenro,
ka wu ese baptaisim pone Holi Spirit.”
Jon Baptaisim Jisas
(Matyu 3.13-17; Luk 3.21-22)
9 E taim namo,
Jisas yupone taun Nasaret e distrik Galili ka yolowi.
Wu yolowi plele Jon ka Jon baptaisim wu nupi Jordan.
10 Jisas yingkripalo nupi ka yemei,
wampane nro wu yuru nemi freingkyane ka Holi Spirit yolo wu yukaine rora ufu.
11 Ka mi wongke yolo heven yire nanrona,
“Yene auna kinini.
Ki fa wolake yene.
Ka wolpuna kinini woluporo yene wamo.”
Satan yeingkari Jisas
(Matyu 4.1-11; Luk 4.1-13)
12 Ka wampane nro Holi Spirit yawane wu pai kei koii maipon yaupenro.
13 Ka wu waiye resukru 40pla kaire koii maipon yaupenro e koii uma fei nainene.
Ka e taim namo,
Satan yeingkari wu.
E koii namo wu waiye plau ommo kuru amun.
Ka nu ensel nopane wu.
Jisas yangke ommo woneni distrik Galili
(Matyu 4.18-22; Luk 5.2-11; Jon 1.35-42)
14 E nu nina Jon pari kalabus se,
Jisas pai plele distrik Galili ese yopro miuporo e God.
15 Ka wu yirengkle nu nanrona,
“Taim God wone isi yina namo,
sa yolowi pu.
Kingdom e God sa yolowi ekrene pu.
Pone ese pemplesoro wolpuna ka bilipim miuporo.”
Jisas youw uma 4pla ese nupene wu
16 E wu pai piyewa e fun Galili,
wu yuru Saimon yane ino Andru.
Wuyane mana fa ningkirpanrone net fun.
Wuyane fa nangkene bisnis e firala.
17 Ka Jisas yireni wuyane nanrona,
“Yenyane polopi pupene ki.
Ki ese kangke yenyane ese pingkirneri nu uma e nupenene ki yukaine mana e yingkapaloye aworu ka yingkiryeriye firala.”
18 Ka wampaneye nro,
wuyane nupone net wonyane ka wuyane painri nupene Jisas.
19 Wu as pai ka wu yuru Jems auna e Sebedi,
yane ino woneni Jon.
Wuyane nainene bot ka narkunone net wonyaneni.
20 E Jisas yuru wuyane,
wampaneye nro wu youw wuyane.
Ka wuyane nupone nangka wonyane Sebedi yakle nu uma fa nangkene ommo woneni naine bot ka wuyane painri nupene Jisas.
Jisas yuꞌpole opola fafaile waiye mana wongke
21 Nu painri taun Kaperneam.
Ka kaire e Sabat yolowi,
Jisas pai mow kori ka yereryane wok woneni fa yukuleye nu pinuma mi e God.
22 Ka e nu nupu mi wunini,
nu ke wolnipanri mi wunini,
e fika,
mi e wu yopro ka yukuleye nu namo,
fi yukaine nu tikse e lo fa nangkene,
onnele.
Wu yopro yukaine mana e yuna noula ka kero.
23 Ka e taim namo,
mana wongke yakle naine plau mow kori namo,
opola fafaile fa konrare wu ka wu yangkromo mi kero ka yire nanrona,
24 Jisas e taun Nasaret,
yene yire yefeleye mu?
Anro yene yolowi ese yangke fafaile mu wee?
Ki namale pu yene fina.
Yene mana holi e God wone yawane yene yolowi.
25 Ka Jisas yenre opola fafaile namo ka yireni wu nanrona,
“Yene misaruru ka yupone wu.”
26 Ka opola fafaile namo yenyuye mana namo ka yangke mi kero wamo ka yupone mana namo.
27 Pinuma mingklari nuru ommo namo ka nu ke wolnipanri wamo ka nemnoku nopro none kore nanrona,
“Ompla mee sa yemei rongkele?
Mi mee sa keklepe,
wu yopro mi yukaine mana yuna noula wamo.
E wu yoproye nu opola fafaile nu fa nupu mi wunini.”
28 Ka wampaneye nro mi e ompla Jisas yangkeye namo,
yopri ka poupai mokoi mingklari e distrik Galili.
Jisas yemplekuru Saimon Pita puri moka e yenriye
(Matyu 8.14-15; Luk 4.38-39)
29 Jisas yakle nu uma plai nupone mow kori ka nolo painri mow e Saimon yane Andru.
Ka Jems yane Jon re nakle painri plau.
30 Saimon puri moka e nalraulo ka yenri fane wile monre.
Ka e Jisas yakle nu noloni plele mow namo,
wampane nro nu nireni Jisas e pin namo.
31 Ka Jisas pai yuru pin namo,
ka wu yuna mew wunini ka mewmew wu yemei yeri.
Ka nale wori wunini pekimo ka wu yumaro ommo fa nu ese no.
Jisas yemplekuru pinuma mingklari e nenrinine
(Matyu 8.16-17; Luk 4.40-41)
32 E kaire paipaloye yire namkureleye nu uma numale nu pinuma e nenrinine ka nu uma e opola fafaile fa konraloye nu noloni Jisas.
33 Uma mingklari e taun namo nupone mokoi noneni ka noloni nemnoku naine ekrene mow prerama.
34 Uma mingklari namo e nenri wongkwongkeni,
fane Jisas yemplekuru nu ka wu yuꞌpole opola fafaile mingklari.
Ka nu opola fafaile namo sa namale wu pu,
nanrona fane wu mi yaure nu ese fi nopro mi wongke.
Jisas pai distrik Galili
35 Ningkinamnole kureli plau Jisas yemei ka palo moile.
Wu yupone taun namo ka pai koii wongke e nu uma fi nainene ka wu waiye yesapuye.
36 Nanrona fane Saimon yakle nu fori woneni painri napu wu.
37 Ka e nu nane wu,
nu nireni wu nanrona,
“Uma mingklari wamo won napu yene.”
38 Ka Jisas yirengkle nu kore nanrona,
“Mone ese maimpi mokoi pitpitiri plai e naine ekrene namo se,
fa ki ese kopro mi e God nu mokoi namo.
Ki koloki mele fa kangke ommo namo.”
39 Nanrona fane wu waraiye mokoi mingklari e distrik Galili ka wu pai mow kori e nu ka yoprongkle nu mi e God.
Ka wu yuꞌpoleye opola fafaile fa konraloye plai e nu.
Jisas yemplekuru mana wongke e lepro
(Matyu 8.1-4; Luk 5.12-16)
40 Mana wongke e lepro yolowi wu ka yekri fufula ka wiri plau wolyaure ka yire nanrona,
“Le yene wola yire,
yene ese yangke nalpapri kinini namkire kore.”
41 Jisas wolyaure wu wamo ka mew raune wu ka yireni wu nanrona,
“Ki kire kemplekuru yene.
Mee nalpapri yeneni ese namkire kore.”
42 Ka wampane nro lepro namo yupone wu ka nalpapri wunini fa namkire kore.
43 Ka Jisas fa yawane wu wampane yupone mokoi namo,
ka yane mi kero wu nanrona,
44 “Yene samo yupu,
yene fa yireni mana wongke e ompla namo.
Sa nenrape!
Yene pai ka yuru pris e tempol ka yukune wu nalpapri yeneni.
Ka yene ese yangke ofa yukaine lo e Moses yeꞌreye nu uma ese nemei uporo kore.
E yene yangke nanrona,
nu pinuma ese namale nanrona nalpapri yeneni uporo kore.”
45 Ka,
mana namo pai ka yopro mi alele e ompla namo e mokoi mingklari e wu paiye.
Nanrona fane Jisas ese fei pai waraiye moile alele e taun ka nu uma ese nuru wu.
Nanrona fane wu fa waiye mokoi pitpitiri e nainene ai e uma fei fa nainene.
Ka,
nu uma e mokoi wongkwongkeni ke noloni mokoi e wu waiye namo.