2-3 E wu yupone bot ka yulpalo ka yeri pike riri,

wampane nro mana wongke e opola fafaile fa konrare wu yolowi ka wane Jisas.

Mana namo fa waiye roma pulale e nu fa niꞌri uma rili.

Ka wu sa mana kero wamo fane sen ka nu uma re fi fa nukaneirene wu.

4 Ningki kaire nu fa nemne sen ka nukaro mewrew wunini.

Ka wu fa yekri sen namo.

Ka nu uma re fi fa samo nuna wu e fika,

wu sa mana kero wamo.

5 Ningki ka kaire,

wu fa waiye roma pulale nu fa niꞌrine uma rili namo.

Ka wu fa yangke mi fafaile wamo ka yem roma ka yaure nalpapri woneni.

6 Koii e wu waiye namo sa as amon.

Ka e wu yuru Jisas,

wu yempreri yolowi Jisas ka angkrenpalo ka yekri fufula Jisas rewyen.

7 Ka wu yangke mi kero wamo ka yireni Jisas nanrona,

“Jisas,

yene Auna e God Waiye Riri Wamo.

Yene yire yefeleye ki?

Ki kire mi kero yene noula e God yene ese fi yangke fafaile ki!”

8 Wu yangke mi kero rona e fika,

isi Jisas yireni wu nanrona,

“Yene opola fafaile.

Yimane mana namo.”

9 Ka Jisas yarine opola fafaile namo nanrona,

“Yene noula fina?”

Ka opola fafaile namo ke yire mi kore wu nanrona,

“Noula kinini Ami.

E fika,

mu sa mingklari wamo.”

10 Ka opola fafaile namo yire mi kero Jisas ese fi yuꞌpole nu painri ka nupone pike plola namo.

11 Moule arwola wongke yeye ekrene mokoi namo.

Sa pori mingklari e neri none ommo repo e moule arwola namo.

12 Ka nu opola fafaile namo nire mi kero Jisas nanrona,

“Yene ese yawale mu minarpoinre pori namo.”

13 Ka Jisas yawale nu painri.

Ka opola fafaile nupone mana namo ka painri ninapoinre pori.

Ka pori wampane nempriri painri panro koii wongke fafaile.

Ka nu firipanro repo e koii arwola ka firipanro fun rira,

ka nu naiko mii ka nu rili.

Namba e pori mingklari namo sa resukru 2,000.

14 E nu uma fa nauno pori nuru ommo namo nemei,

nu nempreri poipainri ka nopro mi e ompla namo pai taun ka mokoi mingklari e koii namo.

Ka pinuma mingklari noloni koii namo nire nuru ompla namo.

15 Ka e nu noloni plele koii Jisas waiye,

nu nuru mana namo,

isi opola fafaile mingklari namo fa konralone wu.

Mee ira wunini yopri ka yiperi amprapi ka waiye.

Ka nu pinuma nuru ommo namo ka nu num.

16 Ka nu uma fopi e nuru ompla e Jisas yangkeye namo noprongkle nu pinuma plai e ommo mingklari Jisas isi yemplekuru mana namo e opola fafaile fa waiye wu.

Ka nu noprongkle nu ompla fika e nemeine pori.

17 E uma mingklari namo nem mi namo,

nu mi kero nire ese nawane Jisas e yupone pike nunini ka pai mokoi wongke.

18 Nanrona fane Jisas pai yulpari waiye bot,

mana namo isi opola fafaile fa konraloye wu namo,

yire plau wolyaure Jisas ka yireni wu nanrona,

“Yene e yem ki kaiki plau wee?”

19 Ka Jisas mi yaure wu ka yireni wu nanrona,

“Yene ese pai mow yeneni ka ori oikenra yeneni ka yirengkle nu ommo mingklari Manawamo isi wolpalo yene wamo ka mewmew yene.”

20 Wola,

mana namo pai ka waraiye yoproye ommo mingklari Jisas isi yemplekuru wone.

Wu waraiye yopro mi namo mokoi mingklari e distrik Dekapolis.^a

Ka pinuma fopi nupu mi wunini namo wolnipanri wamo.

21 Ka Jisas yulpari kore bot ka nu painri kore repo e fun wamo Galili.

Ka e taim namo,

pinuma mingklari noloni ka nemnoku mamane wu.

22 Ka iramana wongke e mow kori namo noula wunini sa Jairus yolowi plele nu koii namo.

Wu yuru Jisas ka yolowi angkrenpalo ka yekri fufula ekrene Jisas rewyen.

23 Ka wu wolyaure kero wamo ka yire Jisas nanrona,

“Mela pin kinini yire yangke ri.

Ki wolyaure nanrona yene ese yolowi ka mew raune wu ka wu ese uporo kore ka waiye laip.”

24 Nanrona fane,

Jairus yane Jisas painri.

Pinuma mingklari re nakle nu painri plau.

Ka e taim namo nu mingklari wamole ka nu nemnoku ka nemnangkaro naraine reprepo wunini ka painri.

25 Ka e taim namo,

pin wongke fa sik mun re waiye plau.

Ka sik namo isi waiye wu resukru 12pla kikla.

26 Kikla mingklari wu isi pai ka yuru dokta mingklari wongkwongkeni ka nu fi nemplekuru wu ka nane rere mingklari wu.

Ka wu yale nu romaula wamfafai ka romaula wunini samo pekimo.

Ka sik namo fi yupone wu ka fi as uporo,

onnele.

Sik namo naiye wu ka pai fafaile kei.

27 E wu yupu mi nanrona Jisas yolowi ka yemplekuru nu uma e nenrinine,

wu yolowi ka pai iplele e nu pinuma ka waraiye ekrene Jisas kumalpo.

Ka e wu waraiye paiye namo,

wu samo waraiye ekrene Jisas kumalpo ka yokuye amprapi wunini.

28 E fika wu wola wone kore pu nanrona,

“Le ki mew kaune amprapi wunini nro,

sa ki ese uporo.”

29 E wu mew raune amprapi e Jisas pekimo,

taim namo,

wu yuru rona ori e fa yeye nale wunini namo pekimo ka wu uporo kei.

30 E taim namo nro,

Jisas re namale nanrona kero plai wunini nupone wu.

Nanrona fane wu yensona ka yarile nanrona,

“Fina ke mew yuna amprapi kinini?”

31 Ka nu disaipol woneni nireni wu nanrona,

“Yene yuru pinuma seke pisiraula nemnangkaro painrine yene.

E fika yene ke yarile mu nanrona,

‘Fina mew yuna ki?’ ”

32 Ka Jisas pouwpai yapu pin fina e mew yuna amprapi wunini.

33 Ka pin namo namale nanrona wu e mew yuna amprapi e Jisas ka sik wunini namo yupone wu.

Nanrona fane wu yum ka forwo plau ka yolowi firpalo wiye rew e Jisas yen ka yopro mi alele ompla e wu yangkeye.

34 Ka Jisas yireni wu nanrona,

“Mela pin,

yene pai plau woluporo.

Bilip yeneni nro yemplekuru yene pu ka sik namo ese fi yolowi kore.”

35 E Jisas nayoproye mi,

uma plai nuna mi wongke noloni mow e Jairus.

Ka nu nireni Jairus nanrona,

“Mela pin yeneni ri pu.

Nanrona fane yene fa yane eni tikse.”

36 Ripi e Jisas yem mi nunini ka wu yireni Jairus nanrona,

“Yene fa yum.

Yene bilip nro.”

37 Jisas mi yaure nu uma plai ese fi nupene nu.

Wu yem Pita ka Jems yane ino wunini,

Jon nane wu painri.

38 Nu noloni ekrene mow e Jairus ka Jisas yuru plai e nu pinuma namo nemniri ka plai sa poinpanrene ka wu re yupu nu niri ka nangke uku wamo.

39 Ka wu paipari monre ka yirengkle nu nanrona,

“Pone piri rikaklape ka mi ukupe ompla fika?

Mela namo fi ri,

wu wiye nama fane.”

40 Ka nu pinuma namo samo nupo wu wamo.

Nanrona fane wu yawale nu panro moile ka wu yem moka nangka e pin aula namo ka Pita yane Jems ka Jon ka nu panri monre koii e pin aula ri ka nina wiye namo.

41 Wu mew yuna mela pin aula namo ka yireni mi Juda nanrona,

“Talita kum.”

Nomu e mi namo sa nanrona,

“Pin aula,

ki kire yene yemei.”

42 Ka wampane nro mela pin namo yemei ka waraiye.

(Mela pin namo,

kikla wunini sa 12pla kikla.)

Ka nu nuru ompla namo,

nu wolnipanri wamo.

43 Wola Jisas yire mi kero nu nanrona,

“Pone e fi pireni mana wongke mi e ompla yemei namo.”

Ka wu yirengkle nu nane ommo plai fa none pai pin aula namo fa wu ese wo.