Nu uma e Nasaret kuma nane Jisas
(Matyu 13.53-58; Luk 4.16-30)
6
Jisas yupone mokoi namo ka pai mokoi woneni.
Ka disaipol woneni re nupene wu.
2 E kaire e Sabat,
wu yangke ommo fa yukule nu uma monre e mow kori.
Uma mingklari nupu mi wunini,
ka mi namo ke yangke nu wolnipanri ka nu nire nanrona,
“Mana namo sa yem ira uporo namo e mokoi pei?
Ira uporo ka kero fa yangke mirakel namo,
sa fina yane wu?
3 Wu sa nro kapenta namo wee?
Wu sa mela e Maria ka inompi wunini sa,
Jems ka Josep ka Judas ka Saimon.
Ka pinmela wunini re fa nane mone maimeme plau.”
Mi namo e Jisas yoproye nu ke yangke nu wolpuna fafaile wu wamo ka mi namo yangke nu nire mi wongkwongkeni wu.
4 Ka Jisas yire mi kore nu nanrona,
“Nu profet namo,
nu uma e mokoi wongke fa samo nereri noula nunini e mokoi mingklari nu fa painrine.
Ka,
e mokoi ka mow nunini,
nu uma noneni ka uma plai re fi fa nereri noula nunini.”
5 Nanrona fane wu fi yangke mirakel wongke e mokoi namo.
Nu uma e nenrinine nro,
sa wu mew rauneri plai nro ka yangke nu uporo kore.
6 Wu wolmingklari wamo nu pinuma namo fi bilipim wu.
Jisas yali ommo fa nu 12pla disaipol ese nangke
(Matyu 10.5-15; Luk 9.1-6)
Ka Jisas pai waraiye mokoi mokoi, yopro yukuleye nu pinuma mi e God.
7 Wu youw 12pla uma fa nupenene wu noloni nane wu nemnoku,
yawale nu painri plainre plainre mokoi wokwokera.
Ka wu yali kero nu e nuꞌpole opola fafaile.
8 Wu yirengkle nu nanrona,
“E pone pire paipi,
pone ese fi pem ompla wongke.
Pone ese pem ilo fa perile nro.
Pone ese fi pungkam ommo e fa none o ompoi poneni.
Ka romaula re pone ese fi panpalo poket poneni.
Sa nenrape!
9 Pone pana sandel poneni,
ka paile siot wokera nro ka ese fi pem siot wongke kore.”
10 Ka wu yirengkle nu nanrona,
“Le pone paipi plele mokoi wongke ka pone papri mow wongke,
sa pone ese paipe mow namo nro resukru kaire e pone pire pupone taun namo.
11 Le e pone paipi plele taun wongke ka nu fi woluporo pone wee nu numplewa fi nupu mi poneni,
sa pone ese pupone taun namo ka paipi.
E pone pire pupone taun namo,
pone ese pufro pike fuma e nene rew poneni e taun namo.
Ompla namo ee yuku nu e namale nanrona nu isi nangke nale fafaile e kuma nane mi e God.”
12 Ka nu disaipol woneni nupone mokoi namo ka painri nopro mi e Manawamo nanrona,
nu pinuma ese nemplesoro wolpuna ka nupone nale fafaile nu fa nangkene.
13 Ka nu nuꞌpole opola fafaile e nene uma mingklari,
ka nenru wel riri nu uma e nenrinine ka nu uporo kore.
Jon Baptais ri
(Matyu 14.1-12; Luk 3.19-20; 9.7-9)
14 King Herot yupu mi e ompla namo,
e fika,
noula wamo e Jisas pai mokoi mingklari pu.
Ka plai nire nanrona,
“Wu anro Jon Baptais fane,
wu ri namo ka yemei kore pu.
Nanrona fane wu yuna kero fa yangke mirakol namo.”
15 Uma plai nire nanrona,
“Jisas namo wu sa Elaija.”
Ka plai sa nire nanrona,
“Wu profet wongke yukaine profet plai e isi namo.”
16 E Herot yem mi namo,
wu yireye nanrona,
“Ki kirengkle nu naure mongkoma e Jon fane wu ri pu,
ka mee wu yemei kore ka waiye laip!”
17 Herot wone isi yali mi kero nu polis ese nuna Jon ka nuka wu sen ka nina wu kalabus.
Herot yangke ommo namo e fika,
wu isi yem pin e rani woneni Filip.
18 Isi Jon yopro mi mingklari Herot nanrona,
“Lo e mone yire,
yene ese fi yem pin e yene rani.”
19 Herot puri noula wunini sa Herodias,
e wolpuna neni Jon,
ka wu yapu rokoi ese yufu Jon ri.
Ka wu fi resukru e fika,
Herot samo yum ese fi yufu Jon.
20 E fika,
Herot yumye Jon.
Wu namale nanrona Jon wu mana fa yangke nale uporo nama e God ka wu holi.
Nanrona fane Herot fa samo yopaneye wu.
Ka e Herot fa yupu mi e Jon namo,
wolpuna wunini fi waiye uporo.
Ka wu fa samo wola yire yupu mi e Jon.
21 Ingke se,
kaire uporo e Herodias yemei fa wu ese yangke ompla wongke e none ese nufu Jon ri.
Wu namale nanrona Herot yampole ommo wamo fa wolrufuye kaire e moka yem wu.
Herot yampole ommo namo fa nu irauma fopi fa mewmew wu fa nangke ommo e gapman,
ka nu opisa e ami,
ka nu irauma e distrik Galili.
22 Ka mela pin e Herodias yeri monre ka yeri yokuleye koii e Herot yakle nu irauma naine nonene namo.
Ka e nu nuru wu,
nu samo woluporo wu.
Ka king Herot yire pin mangkrama nanrona,
“Ompla fika yene wolaye,
yire ki nro sa ki ese kawe yene.”
23 Herot yuka mi wu nanrona,
“Yene yire yari ompla fika yene wolaye sa ki ese kawe yene.
Le yene wola yire ki ese kaure kingdom plola kinini,
sa ki ese kawe yene.”
24 Ka pin namo palo moile ka yarine moka woneni nanrona,
“Ki ese kireni king ompla fika wee?”
Ka moka woneni yire kore wu ka yire nanrona,
“Yene yireni king nanrona yene wolaye ikakro e Jon Baptais.”
25 Ka e taim namo,
pin mangkrama namo wampane nro pai king ka yireni wu nanrona,
“Ewerme ki wola kire yene ese yaure ikakro e Jon Baptais ka yanpalo plet wongke ka yake ki.”
26 E pin mangkrama yire mi namo,
king Herot yupu ka wolpuna wunini fafaile wamo.
Ka wu wolrufu kore mi namo isi wu yuka mi pin mangkrama namo,
ka wu re wolrufu nu uma e wone yakle naine none ommo wamo namo e nu isi nupu wu yuka mi namo pu e wu yire pin mangkrama namo.
Nanrona fane Herot fi yangkrumo mi e pin mangkrama namo.
Wu yangke ompla yukaine isi wu yariye.
27 Ka wampane nro wu yane mi kero soldia wongke,
mana fa yaurere mongkoma e nu uma namo,
e pai mow kalabus ka yaure mongkoma e Jon Baptais ka yuna ikakro wunini yolowi nu.
Nanrona fane soldia namo pai mow kalabus ka yaure mongkoma e Jon.
28 Ka wu yina ikakro e Jon Baptais waiye plet wongke riri ka yuna yolowi ka yane pin mangkrama namo.
Ka pin mangkrama namo yane moka woneni.
29 Ka nu disaipol e Jon nupu mi namo wola nu noloni nem pulo wunini nuna painri ka niꞌna roma pulale koii e fa niꞌrine uma e riline.
Jisas yali ommo fa none e 5,000 uma
(Matyu 14.13-21; Luk 9.10-17; Jon 6.5-13)
30 Nu aposel e Jisas namo,
noloni ka nane Jisas nemnoku ka noproni wu ommo mingklari e nu nangkene,
ka skul e nu nopro nukule nu pinuma.
Jesus feeds 5000 (Mak 6:30-44)
31 Ka pinuma mingklari ke painri nine fane Jisas yakle nu aposel fi no ommo.
Nanrona fane Jisas yirengkle nu nanrona,
“Sou,
mone nro maimpi koii wongke uma fi nainene ka pone as pai se.”
32 Ka nu nulpanri bot ka nu painri koii e uma fi nainene.
Nu nro painri.
33 Ka uma mingklari nuru nu ka namale koii namo nu ese painri.
Nanrona fane nu pinuma e taun mingklari namo risi painri plele mokoi namo e Jisas yakle nu aposel woneni nire painrine.
34 E Jisas pai yulpari pike riri,
wu yuru pinuma mingklari wamo nemnoku nainene.
Nu sa yukaine sipsip,
uma e fa nopane sa onnele.
Nanrona fane wu wolyaure nu wamo ka yopro yukuleye nu ommo mingklari wongkwongkeni.
35 Ka e kaire yire pai paloye nu disaipol e Jisas noloni wu ka nireni wu nanrona,
“Mokoi mee uma onnele ka ompla fa nonene re onnele.
Ka kaire paipalo ka yire nama kureli namo.
36 Yene ese yawale nu pinuma mee painri.
Nu ese painri mokoi wee nengkrele e uma naine ekrene namo ka nuꞌpu ommo noneni fa no.”
37 Ka Jisas yirengkle nu nanrona,
“Pone nro ese pali nu ommo fa no.”
Ka nu nire mi kore wu nanrona,
“Yene wola yire mu ese maimpi ka muꞌpu ommo resukru 20pla fotnait ka male nu no wee?”
38 Ka wu yirengkle nu nanrona,
“Pone paipi ka ponsaro bret ploli rongkele sa pone punape.”
Ka e nu painri ka nuru pekimo wola nu nireni wu nanrona,
“Mu muna 5pla bret ka firala plainre.”
39 Ka Jisas yirengkle nu nanrona,
“Nu pinuma e nemnoku nainene namo pone ese penru nu naine grup,
ka pirengkle nu ese naine kiprela uporo namo.”
40 Ka nu pinuma namo painri ka naine grup.
Plai nemnoku naine 100pla ka plai sa nemnoku naine 50pla.
41 Ka Jisas yem 5pla bret namo ka wu yinra pari heven ka tenkyu God ka yekri bret ka yaliye nu disaipol woneni namo ese nepinali nu pinuma.
Ka firala plainre namo,
wu yekri ka nu nepinali pinuma mingklari.
42 Ka pinuma mingklari namo none ommo pai ka nu rengki wamole.
43 Ka nu disaipol nemnoku ommo ploli e bret ka firala e nu pinuma no ka puna reingki ka nuplen naine namo resukru 12pla nekela yimeri.
44 Nu uma e naine ka nonene ommo namo namba nunini resukru 5,000pla uma.b
Jisas pai nupi riri
(Matyu 14.22-32; Jon 6.15-21)
45 E kaire namo,
Jisas yirengkle nu disaipol woneni ese nulpanri bot ka painri risi wu ka painri plele koii repo e fun namo ka painri naine norine wu taun Betsaida.
Wu wone ese waiye ka yawale nu pinuma namo painri kenkenra se.
46 Ka e wu miyuye pinuma mingklari namo painri pekimo se,
wu pai pari koii arwola wongke fa e yesapu.
47 Ka e moule kureliye,
bot namo yapa fun iplele ka Jisas wonekere waiye maipon.
48 Ka Jisas yuru nanrona rapu sa yolowiye wolale e nu ka yangke furu yuna bot ka bot fei priri.
Ka namo yangke nu amparpunu pulne pai ekrene moule yire peprere.
Ka Jisas yupone koii wu waiye namo ka waraiye pai fun riri ese pai plele nu.
Wu yire rikepone nu.
49 Nu nuru wu waraiye fun riri namo ka nu wolnire wu sa opola wongke,
ka nu nangkromo mi fafaile wamo.
50 E fika nu nuru Jisas ka nu samo num wu wamo.
Ka wampane nro Jisas yirengkle nu nanrona,
“Pone paipe kero!
An ki fane pone fa pumpe.”
51 Wu yulpari bot yakle nu ka rapu yiwri kei ka nupi samo wiyeye.
Nu nuru namo ka nu wolnipanri wamo.
52 E fika nu fi namale nomu e ommo namo Jisas isi yangke e wu yekri bret ka nu nepinali nu pinuma.
Ira nunini samo wauwiri.c
Jisas yemplekuru uma mingklari e nenrinine taun Genesaret
(Matyu 14.34-36)
53 Nu naure fun Galili ka noloni neri repo se,
nu painri kore pike plola e Genesaret.
Ka nu nufena bot e none yapaye koii namo.
54 Ka e nu nupone bot ka nulpanri pike riri namo,
wampane nro nu uma namale Jisas.
55 Uma mingklari nempriri painri mokoi pitpitiri ka nu nina uma e nenrinine nile ilaki riri ka nongkole noloni.
Ka nu nupu mi nanrona Jisas wiye koii pei,
nu nongkole uma nenrinine namo painrine wu.
56 Mokoi pei Jisas yire pai o taun o mowmow re nu uma fa nongkole uma e nenrinine painri ka nenru nu naine koii fa maketne.
Nu fa narine Jisas ese nu mew nuna piyewa e amprapi wunini.
Ka nu uma fa mew nuna amprapi wunini namo,
sik nunini fa pekimo ka nu uporo kore.