Jisas yawale nu 12pla aposel painri
(Matyu 10.5-15; Mak 6.7-13)
9
Jisas youw 12pla aposel woneni,
ka yali namba ka kero fa nu e nuꞌpole opola ka nangke nu pinuma e nenrinine ese nemei uporo kore.
2 Ka wu yawale nu painri nopro mi kingdom e God ka nangke nu uma e nenrinine ese nemei uporo kore.
3 Ka wu yireli nu nanrona,
“Pone e fi puna ompla wongke e pone pire paipi.
Pone e fi puna ompoi,
ilo e pone fa perilepe,
ommo ploli e pone pope,
romaula,
ka ompla papri wongke kore.
4 Mow e pone paipi papripe,
pone e pakle paipe pai la pone pupone taun namo.
5 Le nu uma e mokoi namo fei woluporo pone,
pone ese pelefu rew fum e pone,
e pone pire pupone taun,
se nu e namale nale fafaire e none fi nupu mi e God.”
6 Nanrona fane nu aposel painri mokoi mokoi nopro miuporo e Manawamo ka nemplekurune uma e nenrinine nemei uporo kore.
7 E taim Herot fa yuruye mokoi namo,
wu yupu mi e ommo Jisas yangkeye,
ka wu wol mingklari,
e fika nu uma plai nire nanrona wu Jon Baptais mana e ri pu ro yemei kore.
8 Nu uma plai nire rona,
Jisas,
wu sa Elaija e yolowi kore,
ka plai nire rona Jisas sanro profet wongke e isi yemei kore.
9 Herot yire nanrona,
“Ki kire nu naure mongkoma e Jon ka ri pu,
ka mana e nu nopro mi mingkla namo,
wu sa fina?”
Ka wu yapu Jisas yire wane wu.
Jisas yali ommo e fa none nu 5,000 uma nakle pinkongkom
(Matyu 14.13-21; Mak 6.30-44; Jon 6.1-13)
10 E nu aposel noloni kore,
nu noproni Jisas mi e ommo e none nangkene.
Rongka wu yumale nu aposel yakle painri nupone pinuma namo ka none nro painri taun Betsaida.
11 Ka pinuma mingklari nupu rona wu e pai mokoi namo ka nu nupene wu.
Wu woluporo pinuma e nolonine ka wu yireli nu mi e kingdom e God ka wu yemplekuru nu uma e nenrinine nemei uporo.
12 Moule yire namkureli nu 12pla aposel noloni Jisas ka nireni wu nanrona,
“Yene yirengkle nu pinuma painri mokoi pitirpitiri e naine ekrene mee se nu e napule ommo fa no ka koii fa nile.
E fika,
koii mee uma onnele ka ommo re onnele.”
13 Jisas yirengkle nu aposel nanrona,
“Pone nro ese pali nu ommo fa no se nu e no.”
Ka nu fa nireni wu kore,
“Mu muna 5pla bret ka firala plainrane nro.
Anro mu ese muna romaula maimpi ka muꞌpu ommo e fa no,
e mali pinuma namo.”
14 Nu nire nanrona,
e fika nu pinuma mingklari naine mele,
namba e umalma ro sa resukru 5,000.a
Ka Jisas yirengkle nu disaipol woneni nanrona,
“Pone pireli nu painri ninan nai 5-pla 5-pla uma.”
15 Nu disaipol nangke yukaine e wu yireniye ka nu pinuma naine.
16 Jisas yuna 5pla bret ka firala plainrane ka wu yinrapari nemi riri ka yire tenkyu God ka yekri firala ka bret.
Ka wu yaliye nu disaipol ese nepi nali nu pinuma mingklari.
17 Nu pinuma mingklari namo no ommo namo pai la nu nemreingkini ka ommo plai sa naine.
Nu disaipol nirile ommo ploli naile pai la 12pla nekela wamfafai yimeri.
Pita yire mi alwone rona Jisas wu sa Krais
(Matyu 16.13-19; Mak 8.27-29)
18 Kaire wongke,
Jisas wonekere pai yesapuye.
Ka nu disaipol woneni naine ka wu yarile nu nanrona,
“Nu pinuma mingklari fa nirene ki sa fina?”
19 Ka nu nireni wu rona,
“Plai nire yene Jon e Baptais,
plai nire yene Elaija,
ka plai nire nanrona yene profet wongke e isi ka yemei kore.”
20 Ka wu yarile nu disaipol kore,
“Ka pone sa pire ki fina?”
Ka Pita yireni wu kore nanrona,
“Yene Krais e God.”
21 Ka Jisas yire nu mi kero,
e nu e fi nireni mana wongke mi namo.
22 Ka wu yirengkle nu nanrona,
“Auna e Mana ese yungkam eni mingklari ka nu uma wamfafai,
bikpris ka nu uma e namale lo ese kuma nane wu.
Ka nu uma ese nufu wu ri ka kaire plainrikera sa wu ese yemei kore.”
23 Ka wu yirengkle nu disaipol nanrona,
“Le mana wongke yire yupene ki,
wu ese samo kuma yane ommo e wone fa wolaye,
ka yongkole ilo kruse woneni ningki kaire ka yupene ki.
24 Le mana wolaye laip woneni,
laip woneni ese fafaile.
Mana e fi fa wolaye laip woneni,
ka yupene ki,
laip woneni ese uporo.
Le mana samo wolaye ommo ese yangke wone waiye uporo,
mana namo ese fafaile.
Ka mana fina e samo wolyumaro ommo e yangke wone waiye uporo ka yupene ki,
mana namo ese waiye uporo.
25 Le mana wongke fei bilip ka yunari ommo e pike,
ingke wu e waiye fafaile,
ka ommo namo ese saimoyane wu rongkele?
26 Le mana wongke yum ki ka mi e ki,
Auna e Mana wu re ese yum mana namo e wu yolowi plau noula wamo e wone ka Nangka woneni ka nu holi ensel.
27 Ki kire mi alwone pone nanrona,
pone plai e paipe mee sa e fei rili,
pone ese paipe rona ka puru kingdom e God se.”
Ungklama e Jisas yemei wongkeni
(Matyu 17.1-13; Mak 9.2-13)
28 Jisas yoprole mi namo pekimo,
8pla kaire kore se,
wu yumane Pita,
Jon ka Jems yakle painri panri koii arwola fa wu e yesapu.
29 E wu waiye yesapuye,
ungklama e wu wongkeni ka ommo papri e wu raileye namo wowyane ka nemrilene wamo.
30 Ai!
Mana plainren nane neri ka nopro mi.
Mana plainren namo,
Moses yane Elaija.
31 Wuyane neri plau ali e heven ka nane Jisas noprone mi.
Nu noprone mi e ommo ese nalelwa nale e Jisas pai Jerusalem ka yupone pike namo.
32 Pita yakle wone plai nama sam kire wamo nire nile,
e nu nile ka nemei,
nu nuru ali wamo e Jisas ka mana plainre neri plau.
33 E mana plainren namo nire nupone Jisas,
Pita yireni Jisas nanrona,
“Manwamo,
namo sa uporo e mu mawe yene maime mee.
Yene yire sa mu ese meꞌre mow aure plainrikera,
wongke yeneni,
wongke Mosesni ka wongke Elaijani.”
Pita yopro mi namo ka fei namale ommo e wone yoproye.
34 E Pita yireye mi namo,
kupu yolo ka yuforo nu ka nu nemnum.
35 Ka mi mongkoma e mana wongke yopro wiye kupu ka yire nanrona,
“Mana namo sa ki Auna,
ki kone kireni wu ese yangke ommo kinini.
Pone kosamo pupu mi e wu.”
36 E mana namo yopro mi pekimo,
Pita yane disaipol plainren nuru Jisas wonekere nro yeriye.
Nu disaipol plainrikera nuna mi namo yeye none nro ka fei noproni mana wongke ommo e none nuru.
Melaula e opola fa konrareye, yemei uporo kore.
(Matyu 17.14-21; Mak 9.14-29)
37 Moulpeprere Jisas yakle disaipol plainrikera nolo koii arwola ka pinuma mingklari noloni nane Jisas.
38 Mana wongke e yakle pinuma mingklari naine namo youw ka yire rona,
“Tikse,
ki kiri yene yolowi yuru auna kinini se,
wu sa mela wokeranro kinini.
39 Opola fa yinapouweye wu ka faflai yangke mi,
nale forwo ka rofo kaila yumaro reꞌfa.
Opola namo fa yisiyori nalpapri e wu ka fa yeye rona ka fi fa wampane yuponeye wu.
40 Ki karile nu disaipol yeneni,
fa ese nuꞌpole opola e yeyeye wu,
nu nangke ka nu fei nuꞌpole opola.”
41 Ka Jisas yire kore nanrona,
“Pone pinuma e naminre fi fa bilipne,
ka pone re fa paipipe rokoi wongkwongkeni.
Ki ese fi kape pone maime ka kungkam eni poneni.
Yene yuna mela yeneni yane polopi ki.”
42 E mela namo yolowiye Jisas,
opola namo yinapouwe mela kore ka yurome wu palo pike ka nale papri woneni forwori.
Ka Jisas yenre opola namo yupone wu ka yangke mela namo uporo kore.
Ka Jisas yaꞌne mela pai kore nangka woneni.
Jisas fa yire kore nanrona wu ese ri
(Matyu 17.22-23; Mak 9.30-32)
43 Ka nu pinuma mingklari namo wolnipanri kero wamo e God.
E pinuma namo noprolene ommo mingklari e Jisas yangkeye,
wu yireli disaipol woneni nanrona,
44 “Pone sam pupu mi ese ki kirepi pone:
Auna e Mana ese nu nane wu pai mew wola e nu uma.”
45 Ka nu fei namale mi namo e wu yirengkleye.
Manawamo pekiyina mi nomu namo sa nu ese fei namale.
Ka nu nemnum ka fei narine Jisas yopro yukule nu.
Fina ese waiye yukaine mana wamo
(Matyu 18.1-5; Mak 9.33-37)
46 Nu disaipol e Jisas naine nemnopu mi,
fina ese pai risiye none.
47 E Jisas yuru ommo e nu wolane,
wu yeima melaula wongke ka yirane wu yeri rere wone.
48 Ka wu yirengkle nu nanrona,
“Mana e wolaye mi kinini ka yangke uporo mela mee,
wu yangke uporo ki.
Ka mana e fa yangke uporo ki e yangke uporo mana e yireni ki koloki.
Yukaine mana e fi yereri noula woneni,
mana namo,
wu ese yem noula wamo yumaro nu uma.”
49 Ka Jon yireni Jisas rona,
“Manawamo,
mu muru mana wongke fa youwye noula yeneni yuꞌpole opola ka mu mire mi maure wu,
e fika wu seke fa yakle mu mupeneme yene.”
50 Ka Jisas yireni wu nanrona,
“Pone fa mi paurepe wu,
e fika mana fina e fi ouwyire pone,
mana namo sa pone oikenra.”
Nu Samaria fei woluporo Jisas
51 Ekreneye fa God ese yem Jisas pari heven,
nanrona fane Jisas samo wolyapa yire pai pari Jerusalem.b
52 Ka wu yirengkle nu uma nuna mi risi painrine.
Nu painri mokoi wongke e Samaria e nemplekuru ommo anro fa wu e wi.
53 Ka nu uma e mokoi namo fi samo woluporo wu,
e fika wu yire pai taun wamo Jerusalem.c
54 E disaipol plainrane Jems yane Jon nuru ompla namo,
wuyane narine Jisas nanrona,
“Manawamo,
yene wola rongkele,
mu ese mouw niꞌpi yolo heven ka yuꞌpole nu wee,
onne?”
55 Ka Jisas yensona ka yenre wuyane,
56 rongka wu yakle painri kei mokoi wongke.
Rokoi e fa nupenene Jisas
(Matyu 8.19-22)
57 E nu painrine rokoi,
mana wongke yireni Jisas nanrona,
“Mokoi mingklari e yene paiyiye ki re ese kupene yene.”
58 Ka Jisas yireni wu nanrona,
“Ampala fa nile mow noneni,
ka rora fa nile kori noneni,
ka Auna e Mana koii e fa wileye sa onnele.”
59 Ka wu yireni mana wongke rona,
“Yupene ki.”
Ka mana namo yireni wu rona,
“Manawamo,
yene yire sa ki kaiki kiꞌna aina kinini se.”
60 Ka Jisas yireni wu nanrona,
“Nu uma e rili pu ese niꞌri none kore,
yene pai ka yireli mi e kingdom e God.”
61 Ka mana wongke kore yireni Jisas nanrona,
“Manawamo,
ki ese kupene yene.
Yene yire sa ki e kaiki kakle kone oikenra munari mew se.”
62 Ka Jisas yireni wu nanrona,
“Mana yuna ommo e ki ka fei yuruye rokoi ka wolyapa ommo e pike,
wu sa fei resukru ese yuna ommo e kingdom e God.”