9
Ka Jisas yirengkle nu kore nanrona,
“Ki kire mi alwone pone,
plai e pone uma peri plau ki mee sa ese paipe laip ka pone ese puru kingdom e God ese yolowi plau kero wamo wunini se sa pone ese rili.”
Nale e Jisas yemei wongkeni
(Luk 9.28-36; Matyu 17.1-13)
2 6pla kaire pai pu ka Jisas yem Pita,
Jems ka Jon painri panri moule arwola ka painri naine non keila.
Ka e nu naine,
nu nuru nale papri e Jisas namo sa yensona ka yemei wongkeni.
3 Ka amprapi wunini namo wouwyane ka yople nama nunini.
Mana wongke e pike mee sa fei resukru e yaklele amprapi samo wouwyane nanrona,
onnele.
4 Ka nu nuru Elaija yane Moses neri ka nane Jisas noprone mi.
5 Pita yuru namo ka wu yireni Jisas nanrona,
“Tikse,
ese uporo wamo e mu plainrikera molomi mauwe yene namo.
Mone ese meꞌre mow sel plainrikera poneni.
Wongke yeneni,
ka wongke Mosesni ka wongke Elaijani.”
6 Mana plainrikera e nane Jisas painri namo ke num,
nanrona fane Pita wampane yingkapalo mi namo.
7 E taim namo,
kupu wongke yemei mamane nu ka nu nupu mi mongkoma wongke e kupu namo yire nanrona,
“Mana namo,
sa Auna kinini!
Ka ki wolkane wu wamo.
Pone ese pupene mi wunini.”
8 Ka wampane nro,
Elaija yane Moses karpekiyi ka mana plainrikera e nane Jisas painri namo ke napu wuyane ka nu fi nuru wuyane.
Nu nuru Jisas nro sa yakle nu naine.
9 E nu nolone kore moule arwola,
Jisas yali mi kero nu ese fi nopro nanrona,
“Ompla pone puru namo,
pone ese fei pireni mana wongke e Auna e Mana ese ri ka wu ese yemei kore.”
10 Nu nuna mi wunini namo ka nina mi namo yeye none nro.
Ka nu wona nopro mi namo none kore ka napu mi nomu namo “mana ese ri ka yemei kore.”
11 Ka nu narine Jisas nanrona,
“Fikami ka nu tikse e lo fa nire nanrona Elaija ese wi se sa Krais ese yolowi?”
12 Ka Jisas yireli nu kore nanrona,
“Mi namo sa alwone rona:
Elaija isi yolowi risi Krais ka naimele nayemplekuru kore ommo.
Ka mi e wileye Buk e God sa yire nanrona Auna e Mana ese yungkam eni mingklari ka uma ese samo ouwnire wu.”
13 Ka ki kire mi alwone pone nanrona,
“Elaijaa sa yolowi pu,
ka uma isi nangke fafaile wu wamo e wola noneni,
yukaine mi wileye buk e God.”
Jisas yuꞌpole opola fafaile e yangkana mela mana wongke
(Matyu 16.14-19,22-23; Luk 9.37-45)
14 E Jisas yane Pita ka Jems ka Jon noloni plele nu disaipol plai namo,
nu nuru pinuma mingklari wamo ke mamane nu ka nu tikse e lo namo nopu mi nakle nu disaipol plai.
Jesus Heals a Boy with an Unclean Spirit (Mak 9:14-29)
15 Ka e nu pinuma nuru Jisas namo,
nu samo woluporo wamo ka nempriri painri nuru wu.
16 Ka Jisas yarile disaipol woneni namo nanrona,
“Pone ke pakle nu nopu mi e ompla fika?”
17 Mana wongke yeri iplele nu pinuma namo yangke mi Jisas ka yireni wu nanrona,
“Tikse,
mela mana kinini,
opola fafaile fa waiye wu ka fa yaukiri wu e fi yopro mi.
Nanrona fane ki kumane wu wi yene.
18 E opola fafaile namo fa konrareye wu,
wu fa firpaloye pike ka fa yangke wu yangkuru nela woneni ka rofo wouw fa okonolene reꞌfa wunini ka nale papri wunini kinre nempriri ka rinra kero wamo.
Nanrona fane ki karile nu disaipol yeneni ese nuꞌpole opola fafaile namo,
ka nu fi resukru nangke.”
19 Ka Jisas yirengkle nu nanrona,
“Pone uma e pike naminrele,
sa bilip onnele!
Seke kaire mingklari ese ki kakle pone maime ka kungkam eni poneni.
Ommo mingklari e ki kangke pone pu ka ki ese kangke ompla fika kore pone?
Pone pem mela aula namo polopi mee.”
20 Nanrona fane nu numane mela efapu namo noloni wu.
Ka e opola fafaile namo yuru Jisas,
wampane nro wu yulpari mela namo ka yingkaplo wu palo pike ka rikaklaye pike namo,
ka rofo wouw re yimerwa reꞌfa wunini.
21 Ka Jisas yarine mela nangka nanrona,
“Ompla namo isi yem wu wee,
naminrele?”
Ka mela nangka namo yire kore nanrona,
“Ompla namo yemei e wu pitiri kom ka yolowi.
22 Ningki kaire,
opola fafaile fa yire yingkaplo wu palo niꞌpi ka yire yumanralo wu palo mii ka ri.
Le yene resukru ese yangke ompla wongke,
samo wolyaure mu ka mewmew mu.”
23 Ka Jisas yireni wu mi kore nanrona,
“E fika ka yene yire mi rona ‘Le yene resukru’?
Ommo mingklari resukru e nemei le mana samo bilip.”
24 Nangka e mela aula namo wampane youw ka yireni Jisas nanrona,
“Ki bilip,
ka bilip kinin fi samo wamo.
Yene ese mewmew ki ese kangke bilip kinini yemei wamo.”
25 E Jisas yuru uma mingklari wamo nempriri noloni koii namo wu yenre opola fafaile namo ka yire mi kero wu nanrona,
“Yene opola fa yangke nu uma ripi uku ka mireꞌf kungku.
Yene yupone wu ka pai kei ka fi wi kore wu.”
26 Ka opola fafaile namo yangke mela namo ke yangke mi kero fafaile wamo,
ka wu yangke wu sukarwale rinra wunini ka wu yupone mela namo ka pai kei.
Ka mela namo yukaine e ri pu.
Ka uma mingklari nuru wu ka nire nanrona,
“Mela namo sa ri pu.”
27 Ka Jisas yina mew palo ka wu yuna mew wunini ese yereri wu yeri ka mela namo yemei ka yeri.
28 Se Jisas pai monre ka nu disaipol woneni nro sa nane wu nainene ka nu narine wu nanrona,
“Fikami ka mu fi resukru muꞌpole opola fafaile namo?”
29 Ka wu yirengkle nu kore nanrona,
“Yene ese yesapu se sa yene ese yuꞌpole opola fafaile nananrona.
Le onne,
sa ese onne.”
Jisas yopro mi wu ese ri ka yemei kore
30 Jisas yakle nu disaipol woneni nemei ka nupone koii namo ka painri distrik Galili.
Ka Jisas fi woluporo fa nu uma ese namale wu waiye pei,
31 e fika wu wona yopro yukule nu disaipol woneni.
Wu yirengkle nu nanrona,
“Auna e Mana namo,
nu ese nane wu pai mewwola e nu uma ese nufu wu ri.
Ka e kaire plainrikera wu ese yemei kore.”
32 Ka nu fi samo namale mi nomu namo ka nu ke num fane fei narine mi plai pai wu.
Fina sa resukru ese pai risi
(Matyu 18.1-5; Luk 9.46-48)
33 Jisas yakle nu disaipol woneni namo painri taun Kaperneam.
Nu painri panri ka naine mow wongke ka Jisas yarile nu disaipol woneni nanrona,
“E mone molomime rokoi ka pone ke poprope fika?”
34 Nu samo sem wamo ka fi nire mi wongke wu.
E fika,
e nu naraine nolonine rokoi namo,
nu nopu mi fina ese pai risi nu.
35 Nanrona fane Jisas waiye ka youw nu 12pla uma e nupene wu noloni ka yirengkle nu nanrona,
“Mana samo wola yire ese waiye lida e nu plai wu,
ese yumanralo wone kore ka waiye wairu ka waiye yukaine mana e fa karyangkeye ommo mingklari e nu uma.”
36 Ka wu yem mela aula wongke ka yina wu waiye iplele e nu.
Wu yeima mela namo ka wu yirengkle nu nanrona,
37 “Le fina yire yupene ki yangke nale uporo nu kongkom aurele yukaine mela aula mee e noula kinini,
mana namo yangke nale uporo namo ki kone.
Ka nale uporo wunini e yangkeye ki namo,
fi yangke ki wokera,
wu yangke fina e isi yawane ki koloki.”
Fina fi fa yangke fafaile mone, wu sa uma e mone
38 Ka Jon yireni wu nanrona,
“Tikse,
mu muru mana wongke fa youw noula yeneni fa yuꞌpole opola fafaile.
Ka mana namo wu seke mana wongke moneni nanrona fane mu mi maure wu ese fi yangke ompla namo kore.”
39 Ka Jisas yirengkle nu nanrona,
“Pone ese fi mi paure wu.
Le mana wongke youw noula kinini ka yangke mirakel wongke,
wu ese fi yire mi wampane koroyane ki.
40 Nanrona fane la e nu uma fei iimne mone,
sa nu uma namo e naine plau mone.
41 Naminrele ki kire mi alwone pone,
le mana wongke namale rona pone sa uma fa pungkam noula e Krais ka wu yape mii kukro pone,
ki kire mi alwone pone nanrona ingke God ese yane wu ompla uporo.”
Nale fafaile fa yisiyori bilip e mana
(Matyu 18.6-9; Luk 17.1-2)
42 “Nu kongkom namo e bilipim ki.
Le mana wongke yangke wongke e nu kongkom namo nangke nale fafaile nama e God,
sa mana namo ese yem eni wamo.
Mone mire eni namo wamo le nu nuka roma wamo wongke mongkoma wunini ka ningkapalo furu ka wu yaikowo furu ka ri.
Ka eni wu ese yem namo e rikepone eni e nu nuka roma waingkemuru mongkoma wunini.
43-44 La e mew yeneni yeingke yene yangke nale fafaile,
sa yene yaure ka yingkapalo mew namo.
Ese uporo wamo e yene yuna mew wokera nro sa yene ese pari mokoi e laip fa waiye nanrona nanrona.
Ka ese fafaile wamo e yene yuna mew plainrane,
ka God ese yingkapalo yene palo hel.
Ka hel sa mokoi fa niꞌpi waiye ali nanrona nro.
45-46 La e rew yeneni yeingke yene ka yangke nale fafaile,
sa yene yaure ka yingkapalo rew namo.
Ese uporo wamo e yene yuna rew wokera nro ka yene ese waiye monre mokoi e laip fa waiye nanrona nanrona namo.
Ka,
ese fafaile yene yuna rew plainrane ka God ese yingkapalo yene pai palo hel.
47 Le nama yeneni yeingke yene ka yangke nale fafaile,
sa yene yingklame wongke.
Sa ese uporo e yene nama wokera nro ka yene ese pari kingdom e God.
Ka,
ese fafaile wamo e yene nama plainrane sa God ese yingkapalo yene palo hel.
48 E koii namo,
marila aure fa none ka naurnekri ompla unu namo,
fa naine nangke ommo namo nanrona nro.
Niꞌpi namo re fa yupoye nu,
ka ali waiye nanrona nro.”
49 “Nu fa nina sol e ofa mingklari e nu fa nangkene fa yangke nu namkire nama e God.b
Nanrona nro,
eni ese nemei yukaine niꞌpi e laip e pinuma mingklari.”
50 “Sol sa ompla uporo wamo.
Le kiꞌre wunini pekimo,
sa ese fi yem kore kiꞌre wunini.
Kiꞌre e sol namo,
ese waiye pone ka yangke pone ese paipe wolpun wokera wongkwongke.”