Jisas yopro mi e nale e mana yupone pin
(Matyu 19.1-12; Luk 16.18)
10
Jisas yemei ka yupone koii namo ka pai mokoi plola e distrik Judia ka pai kei ka yaure nupi Jordan ka pai plele koii repo.
Pinuma mingklari wamo noloni ka nane wu nemnoku ka wu yopro yukule nu mi e God yukaine wu fa yangke e kaire mingklari.
2 Ka Farisi plai noloni Jisas ka kariflenari ka napu eni wunini e mi rongkele wu ese yangke.
Ka nu narine wu nanrona,
“Lo moneni sa yire mi fika,
ese uporo e mana ese yumplewa pin woneni ka yupone wu wee onne?”
3 Ka Jisas yire nanrona,
“Isi Moses yane lo pone ka lo namo sa yire mi rongkele?”
4 Ka nu nire wu kore nanrona,
“Moses yire yei,
mana ese yeꞌre piprola wongke fa wu ese yupone pin wunini.”
5 Ka Jisas yire mi kore nu nanrona,
“Pone uma fa wewela,
nanrona fane Moses isi yeꞌre lo namo pone.
6 Pone pupu,
emen e God yangke ommo mingklari namo,
wu yangke mana nale.
‘Wu isi yangke mana wongke ka pin wongke.’a
7 ‘Nanrona nro uma e nuꞌpu uma,
nu fa nupone nangka ka moka nunini ka painri nane pin naine noneni
8 ka nu ese nemei yukaine nale wokera.’b
Wuyane ese fei ninanai none kerila nanrona,
wuyane ese naine yukaine nale wokera nro.
9 Nanrona fane ompla e God wone yukaye namo,
mana wongke ese fei yekri.”
10 Ka ingke Jisas yakle nu disaipol woneni painri ka e nu naine mow pu,
nu disaipol woneni narine wu mi namo.
11 Ka Jisas yire nu nanrona,
“Le mana wongke yupone pin woneni ka yem pin wongke,
mana namo yangke nale pamok.
Ka e rokoi namo,
wu yangke nale fei uporo nama e God e wu yangke fafaile ira pin woneni.
12 Le pin wongke re yupone ini woneni ka pai yem mana wongke kore,
sa pin namo yangke nale pamok.”
Jisas blesim kongkom
(Matyu 19.13-15; Luk 18.15-17)
13 Nu pinuma numale kongkom noloni Jisas ese mew yauneri nu.
Ka nu disaipol woneni nuru nu ka nu ke nenrele nu pinuma namo.
14 Jisas yuru nu disaipol woneni nangke ompla namo ka wu wolpuna neni nale fafaile e nu nangkene namo.
Ka wu yireni nu disaipol woneni namo nanrona,
“Pimane kongkom noloni ki.
Pone faa mi paure nu e noloni ki.
E fika,
kingdom e God namo,
sa nu uma namongkle yukaine kongkom namo.
15 Ki kire mi alwone pone nanrona,
mana samo wola yire fa waiye kingdom e God namo,
ese samo wolyane ka wolpun wokera mi mingklari e God yukaine kongkom e fa samo wolnane ka wolpun wokera mi mingklari e mokanangka noneni.
Le onne sa,
mana namo ese fei waiye kingdom e God.
Ese onnele wamo!”
16 Ka wu yeimare kongkom namo ka mew raune nu ka yarine God ese blesim nu.
Mana efapu fina e yuna ommo mingklari
(Matyu 19.16-30; Luk 18.18-30)
17 Jisas yemei waraiye kore ka mana wongke yempriri yolowi plele wu ka yekri fufula ungklama pren wunini.
Ka wu yarine Jisas nanrona,
“Tikse uporo,
ki ese kefele ka kem laip fa waiye nanrona nanrona namo?”
18 Ka Jisas yireni wu kore nanrona,
“E fikami ka yene youw ki tikse uporo?
Mana wongke fei uporo.
God wokera nro sa uporo.
19 Yene e namale lo:
‘Yene faa yufu mana ri,
ka yene faa yangke nale pamok,
ka yene faa peki yuꞌpu,
ka yene faa karmiyoloye pinuma plai,
ka yene faa yeingke ommo uma plai,
ka yene ese yangke nale uporo e nangka ka moka yeneni ka yumanralo yene waiye ruwe ka yupene wuyane.’ ”c
20 Ka mana namo yireni Jisas nanrona,
“Tikse,
e ki kone mela aula yolowi plele mee,
ki kupene lo mingklari namo.”
21 Jisas sam yuru wu ka wolayane wu wamo ka yireni wu kore nanrona,
“Ompla wongke nro sa yene onne namo.
Yene ese pai ka yenru ommo yene yunaye namo fa nu uma ese nuꞌpu ka romaula namo yene ese yane nu uma e ommo onne.
Le e yene yangke nanrona,
sa God ese yawe yene ommo uporo fa waiye yoru yene heven.
Ka yene yolowi ka yupene ki.”
22 Ka e mana namo yupu mi namo Jisas yireye namo ka ungklama wunini fafaile ka samo wolpuna fafaile ka wu pai.
E fika,
wu yuna ommo mingklari.
23 Jisas nama ronsane nu disaipol woneni ka yirengkle nu nanrona,
“Nu uma e nuna ommo mingklari namo,
sa ese raraine wamo e panri kingdom e God.”
24 Nu disaipol woneni nupu mi namo ka nu wolnipanri wamo.
Ka Jisas yirengkle nu kore nanrona,
“Kongkom kinini,
nu uma nire panri kingdom e God namo sa nu ese raraine wamo.
25 Le kamel wongke yire pari nidel pulale,
sa ese fi raraine wu.
Ka,
le mana wongke e yuna ommo mingklari yire pari kingdom e God,
namo sa e raraine wamo.”
26 Nanrona fane nu disaipol e Jisas namo sa mi onnele kei ka nu naine ka nopro mi komafre iplele e none nro nanrona,
“Le nanrona ka fina ese resukru waiye nanrona nanrona plau God?”
27 Jisas samo yuru nu ka yirengkle nu nanrona,
“E mana,
ompla namo ese raraine wu ka wu ese fei yangke,
ka e God ompla namo sa pitiri ka ese fei raraine wu ka wu ese yangke ompla namo.”
28 Nanrona fane Pita yemei ka yireni Jisas nanrona,
“Yuru!
Mu mupone ommo mingklari munini ka mupene yene!”
29-30 Ka Jisas yirengkle nu kore nanrona,
“Ki kire mi alwone pone,
fina yire yupene ki ka miuporo,
ka yupone mow,
ka ommo mingklari woneni,
ka inomranimpi,
pinofe,
moka,
nangka,
kongkom,
ka ommo nengkrele woneni,
e wu waiye laip pike mee,
God ese yane 100pla ommo kore wu,
rikepone ommo e isi wu yunaye:
Ommo yukaine mow,
ka ommo mingklari woneni,
ka inomranimpi,
pinefe,
mokapi,
kongkom,
ka ommo nengkre woneni.
Ka e kaire mee rona nu uma ese nangke fafaile ka ownire wu.
Ka taim ingke yolowi wu ese waiye nanrona nanrona.
31 Ka uma mingklari nuna noula wamo naminrele,
ingke noula wamo noneni ese firipanro ka nu ese samo naine kumalpo.
Ka fopi e noula onnele e naminrele,
ese nuna noula ka nu ese naine risi.”
Jisas yopro mi kore e wu ese ri ka yemei kore
(Matyu 20.17-19; Luk 18.31-34)
32 Jisas yakle 12pla disaipol wunini painrine rokoi fa pai taunwamo Jerusalem ka Jisas sa pai risi nu.
Ka ompla namo yangke nu disaipol woneni wolnipanri wamo,
ka nu uma plai fa nupene nu namo,
ke num.
Ka Jisas youw nu 12pla disaipol woneni noloni wu ka nu painri naine koii wongke fa wu e yoprongkleye nu ommo fika nu uma ese nangke wu.
33 Wu yirengkle nu nanrona,
“Pone pupu.
Naminrele mone maimpi plele taunwamo Jerusalem,
nu ese nane Auna e Mana pai mew e nu bikpris nane nu tikse e lo.
Nu ese kotim wu ka nuka mi fa wu ese ri.
Ka nu ese nina wu pai mew e nu uma fei Juda.
34 Ka nu uma namo ese ownire wu ka rofonefu wu ka ese nufu wu wip ka nufu wu ri.
Ka kaire plainrikera se wu ese yemei kore ka waiye laip.”
Jems yane Jon nire naine wamo
(Matyu 20.20-28)
35 Ka mela mana plainrane e Sebedi,
Jems yane Jon noloni Jisas ka nireni wu nanrona,
“Tikse,
kikane samo wola mire yene ese yangke ompla wongke e kikane ese marine yene ese yangke.”
36 Ka wu yarine wuyane nanrona,
“Yenyane wola pire ki ese kangke ompla fika yenyane?”
37 Ka wuyane nimpone mi wunini nanrona,
“E yene waiye sia king yeneni ka yene yopane kingdom e God ka ommo mingklari namo,
kikane samo wolame nanrona yene ese yane namba wongke kikane ese maime mew menrulpod yeneni ka wongke ese waiye mew aiyalpo yeneni.”
38 Ka Jisas yane mi riri wuyane nanrona,
“Yenyane fei namale mi fika e yenyane popro ka paripe ki namo.
Yenyane ese paikolpo kap namo e ki ese kaikoko wee?
Ka yenyane resukru ese nu baptaisim yenyane yukaine nu ese baptaisim ki namo wee?”
39 Ka wuyane nirene wu kore nanrona,
“Yei,
kikane resukru.”
Ka Jisas yireni wuyane kore nanrona,
“Kap namo ki ese kaikoko ka yenyane re ese paikolpo plau.
Ka baptais namo naminrele ki ese kem namo,
sa yenyane ese pem.
40 Ka fina ese waiye mew menrulpo ka mew aiyalpo seke ommo kinini ese kane mana.
Samo onne!
Sia plainrane namo sa e mana fina God wone yina pu.”
41 E 10pla disaipol plai nupu mi namo e Jems ka Jon,
nu wolpun neni ka nenre wuyane.
42 Ka Jisas yemyoku nu ka wu yirengkle nu nanrona,
“Pone namale nanrona nu uma nu fa nouwne nu nanrona irauma e nu uma fi Juda namo,
fa nereri none ka numanralo nu plai.
Ka nu uma fa painri risi nu lida namo fa nire mi kero nu pinuma ese nupu mi nunini.
43 Ka pone e fi pupene nale e nu.
Mana yire yemei manawamo poneni,
sa ese waiye yukaine wokboi poneni.
44 Ka mana yire pai risi pone namo,
ese waiye yukaine wokboi siwole e uma mingklari.
45 E fika,
mi e God yire nanrona,
mana ese ri nale fafaile woneni.
Ka Auna e Mana ese yane wone ese ri ka yem nale fafaile uma mingklari fa nangke fa nu ese fei ri.
Wu seke yolowi fa nu uma ese mewmew wu.
Onne!
Wu yolowi ese mewmew pinuma mingklari e pike mee.”
Jisas yemplekuru mana namfai
(Matyu 20.29-34; Luk 18.35-43)
46 Jisas yakle disaipol woneni painri plele taun Jeriko.
Ka Jisas yakle nu disaipol nupone taun Jeriko nire painri ka pinuma mingklari re nakle nu painri.
Ka mela mana e Timeus,
noula wunini Bartimeus,
waiye piyewa e rokoi namo.
Nama wunini wowole.
Ka wu fa waiye ka yariye nu uma ese nane romaula wu.
47 Wu yupu nanrona Jisas e taun Nasaret yolowiye rokoi namo ka wu yangke mi faki wamo ka yire nanrona,
“Jisas,
Auna e Devit,
yene wolpalo ki!”
48 Nu uma mingklari nenre wu ka nire mi kero wu nanrona,
“Misaruru!”
Ka wu yangke mi faki kore ka yire nanrona,
“Auna e Devit,
yene wolpalo ki!”
49 Jisas yolowi yeri ka yirengkle nu nanrona,
“Pone pireni wu yolowi.”
Ka nu nireni mana nama wowo namo nanrona,
“Yene woluporo ka yemei yeri,
Jisas youw yene ese pai wu.”
50 Wu usu yingkapalo saket woneni ka wampane nro yemei ka yolowi Jisas.
51 Ka Jisas yarine wu nanrona,
“Yene yire ki ese kefele yene?”
Ka mana nama wowo namo yimpone mi wunini nanrona,
“Tikse,
ki kire kuru.”
52 Ka Jisas yireni wu kore nanrona,
“Yene pai.
Bilip yeneni yemplekuru yene pu.”
Ka wampane nro,
nama wunini uporo ka wu yuru.
Ka wu yupene Jisas pai rokoi.