Mi riri e pin ini ri yupone, yun mi yangkuru mana e fa yupuye kot ese mewmew wu
18
Ka Jisas yirengkle nu disaipol woneni mi riri wongke ese yuku nu nanrona nu ese nesapu ningki kaire,
nu fa numne sa nenrape.
2 Wu yirengkle nu nanrona,
“E taun wongke,
mana wongke fa waiye yupuye kot.
Mana namo fi fa yumye God ka fa fi wolpaloye nu pinuma.
3 Ka pin wongke,
ini ri yupone,
waiye taun namo,
wu fa pai wiye ka yuna mi yangkuruye mana e fa yupuye kot ka yireni wu nanrona,
‘Mana wongke fa yangke nale fafaile ki,
nanrona fane ki kire yene ese saimoro ki.’
4 “Isi wu yumplewa mi e pin ini ri yupone namo.
Ingke wu yopro wone kore nanrona,
‘Ki fi fa kumke God ka fi fa wolake uma.
5 Ka pin e ini ri yupone namo,
ningki kaire wu yuꞌyari mingklari fa ki e kuru wu.
Nanrona fane,
ese uporo e ki kupu kot wunini sa wu ese fei yolowi ki kore ka yangke ki kumplewa mi namo.’ ”
6 Ka Manawamo Jisas yirengkle nu nanrona,
“Mana namo fa yupuye kot wu sa mana fafaile ka pone e sam pupu mi e wu yireye namo.
7 Ka God ese fi saimoro nu pinuma e wone yaure woneni,
wee?
Ningki kaire nu fa nuꞌnarine wu mi ka nirine ka wu ese pape wee?
8 Ki kire mi alwone pone,
God ese wampane saimoro nu.
Ka,
Auna e Mana yolowi,
wu ese samo yuru nu pinuma e pike mee bilipne wee onne?”
Mi riri e Farisi wongke ka mana fa yuꞌpuye romaula e gapman nesapune God
9 Jisas yirengkle nu mi riri namo sam pai nu uma fa wola nire nanrona none sa uporo nama e God ka nu uma plai sa fei uporo.
10 Wu yirengkle nu nanrona,
“Mana plainre painri tempol fa nesapu.
Wongke sa Farisi ka wongke sa mana fa yuꞌpu romaula e gapman.a
11 Farisi namo yemei yeri ka yesapu wone kore ka yire nanrona,
‘God,
ki kire yene uporo e fika ki seke yukaine nu uma plai.
Ki seke fa kangke ommo fafaile,
peki kuꞌpu ommo ka kangke nale fafaile pinmana.
Ki seke yukaine mana namo fa kuꞌpu romaula e gapman.
12 Kaire plainre e wik wokwokera ki fa kaike punale nro ka ommo mingklari ki kuꞌpu,
ki fa kepi 10pla ploli ka plola wongke ki fa kawe yene.’
13 “Ka mana fa yuꞌpuye romaula e gapman yeri as amon ka fei yinrapari heven,
onne!
Wu yeri ka mew yari wol poku woneni ka yire nanrona,
‘God wolpalo ki.
Ki sa mana fa kangke nale fafaile.’
14 “Ki kire mi alwone pone nanrona mana fa yuꞌpuye romaula pai kore mow woneni,
God yuru wu rona wu sa uporo nama e wu.
Farisi sa onnele.
E fika,
nu uma fa nereri noula noneni,
God ese yumaralo nu,
ka nu uma fi fa nereri noula nonengkle,
God ese yereri nu.”
Jisas ka kongkom aure
(Matyu 19.13-15; Mak 10.13-16)
15 Nu uma neirele kongkom aure noloni fa Jisas ese mew rauneri nu.
E nu disaipol nuru nu uma namo,
nu nenrele nu.b
16 Ka Jisas youw nu kongkom aure pitpitiri namo noloni wu,
ka yirengkle nu disaipol nanrona,
“Kongkom aure namo ese noloni ki ka pone e fi mi paurepe nu.
E fika,
nu uma e yukaine kongkom aure mee,
kingdom e God sa nunini.
17 Ki kire mi alwone pone nanrona,
le mana wongke fei yem kingdom e God yukaine kongkom aure namo,
sa ese fi pari monre,
onnele.”
Mana e yuna ommo mingklari yarine Jisas
(Matyu 19.16-30; Mak 10.17-31)
18 Wongke e nu uma fa pai risiye,
yarine Jisas nanrona,
“Tikse uporo,
ki ese kangke fika sa ki ese kem laip uporo waiye nanrona nanrona?”
19 Ka Jisas yireni wu nanrona,
“E fika ka yene ke youw ki mana uporo.
Mana wongke sa fei uporo.
God wokera nro sa uporo.
20 Yene namale lo e God:
‘Pone e fi pangke nale pamok,
ka pufu mana ri,
ka peki puꞌpu ommo,
pone e fi karpire ka kotim mana wongke.
Pone kosamo pupupe mi e mokanangka poneni ka pupene wuyane.’ ”
21 Ka mana namo yireni Jisas nanrona,
“Ommo namo ki kupene isi ki mela aula wi plele naminre.”
22 E Jisas yupu mi namo,
wu yireni mana namo nanrona,
“Ompla wongke nro e yene fi yangke.
Yene pai ka yuꞌpu ommo e yene ka yali nu uma nuꞌpu ka romaula namo,
yene ese yali nu uma e ommo onne.
Yene yangke rona sa yene e yuꞌpu ommo mingklari upupu e nainene heven.
Nanrona fane yene yolowi ka yupene ki.”
23 E mana namo yupu mi namo,
wolpuna wunini eni wamo.
E fika wu yunari ommo mingklari.
24 Jisas yuru wu ka yire nanrona,
“Nu uma e nunari ommo mingklari,
e fi panri kingdom e God,
e fika rokoi rerile.
25 Kamelc sa ese fi raraine,
wu ese pari nitel pulale,
ka mana e yunari ommo mingklari sa raraine wamo e fi pari kingdom e God.”
26 Nu uma e naine nupune mi namo narine rona,
“Le nanrona,
sa fina ese waiye uporo nanrona nanrona?”
27 Ka Jisas yirengkle nu nanrona,
“Ompla fika e nu uma ese fi nangke,
God sa kero,
ese yangke.”
28 Ka Pita yireni Jisas nanrona,
“Mu mupole ommo munini pu ka mupene yene.”
29 Ka Jisas yirengkle nu nanrona,
“Ki kire mi alwone pone nanrona,
nu uma wolane kingdom e God ka nupone mokoi,
ka purpi nonengkle,
inompranimpi,
moka nangka ka kongkom nonengkle,
30 e nu naine pike mee,
God ese yali ommo mingklari rikepone ommo e isi none narine.
Ka kari kikla ese yolowi,
nu ese naine uporo nanrona nanrona.”
Jisas yopro mi yire wone ese ri ka yemei kore
(Matyu 20.17-19; Mak 10.32-34)
31 Jisas yumale 12 pla aposel woneni ka yirengkle nu nanrona,
“Mone mampri taun wamo Jerusalem ka mi e ommo mingklari nu profet neꞌre wiye nire Auna e Mana sa ese alwone.
32 Nu ese nina wu pai mew e nu uma e fi Juda.d
Nu ese nupo ka minrinane wu ka rofo nefu wu
33 Ka nu ese samo nufu wu wip ka nufu wu ri ka e kaire plainrikera,
sa wu e yemei kore.”
34 Ka nu disaipol fi samo namale mi e wu yirengkleye.
Mi nomu namo sa peki yeye,
nanrona fane nu fi namale mi e wu yirengkleye nu.
Mana nama wowo fa yuyariye ommo umangkle, yuru kore
(Matyu 20.29-34; Mak 10.46-52)
35 E Jisas yolowi ekrene taun Jeriko,
mana wongke nama wowo waiye piyewa e rokoi yuyariye uma romaula.
36 E mana nam wowo yupu mi e nu pinuma nolonine ka wu yarile,
nu sa nangke fika.
37 Ka nu nireni wu nanrona,
“Jisas e taun Nasaret e yolowi.”
38 Mana nama wowo namo yangke mi ka yire nanrona,
“Jisas,
yene anim e king Devit,
yene samo wolpalo ki.”
39 Nu uma e painri risi,
nenre wu ka nireni wu,
“Yene mi ruru.”
Ka wu yangke mi faki ka yire rona,
“Anim e king Devit,
yene wolpalo ki.”
40 Jisas yeri ka yirengkle nu nuna mana namo noloni wu.
E mana namo yolowi ekrene,
Jisas yarine wu nanrona,
41 “Yene yire ki ese kefele yene?”
Ka mana namo yireni wu nanrona,
“Manawamo,
ki kire kuru kore.”