Mana fa yuꞌpuye romaula noula wunini Sakias
19
Jisas pai plele taun Jeriko ka yupene rokoi e pai mokoi wongke.
Jesus and Zacchaeus (Luk 19:1-10)
2 Mana wongke e waiyeye taun Jeriko noula Sakias.
Sakias sa iramana e nu uma fa nuꞌpune romaula e gapman,
ka wu sa ommo mingklari.
3 Wu yire fa yuru Jisas,
wu sa mana fina.
Ka wu sa polam fane fi yuru Jisas e wiyeye rokoi,
e fika pinuma mingklari.
4 Fane wu priri pai risi pinuma ka pari ilo noula Sikamo Fik fa yire e yuru Jisas.
E fika,
Jisas ese wi rokoi e ilo namo yeriye.
5 E Jisas wi plele koii namo,
wu yinra pari wane Sakias ka yireni wu nanrona,
“Sakias,
wampane yolo.
Naminre ningki ki ese kawe yene maime mow yeneni.”
6 Wu woluporo wamo ka wampane yolo yumane Jisas yane painri mow woneni.
7 Pinuma mingklari nuru rona ka nokomi nire nanrona,
“Wu ke pai yane mana fa yangke ommo fafaile yane naine mow wunini.”
8 Sakias yemei ka yireni Manwamo nanrona,
“Yuru,
Manawamo Jisas!
Naminre ki e kepi ommo mingklari kinini,
plol plainren.
Plola wongke koneni,
ka plol wongke e kali pai nu uma e ommo onne.
Le ki isi peki kuꞌpuke ommo e nu uma,
ki e kali kore ka plola plainrikera ese ki kaunpalo plau.”
9 Ka Jisas yireni Sakias nanrona,
“Ki koloki mow poneni,
ka naminrele God yuꞌpu pone kore pu.
E fika,
mana namo wu re mela e Abraham.
10 Nomu e ki koloki mee,
e fika Auna e Mana e wi fa yapu ka yuꞌpu kore nu uma e fi nupenene rokoi uporo.”
Mi riri e uma 10pla nuꞌpune romaula
(Matyu 25.14-30)
11 E pinuma mingklari naine nupune mi e Jisas,
wu yopro mi riri wongke pai nu.
Wu yirengkle nu mi riri namo e fika wu wone e wi ekrene taun wamo Jerusalem pu,
ka pinuma mingklari wola nire nanrona kingdom e God e wi ekreneye ese yemei alele.
12 Wu yirengkle nu nanrona,
“Manawamo wongke yire pai kantri wongke e yeye amon,
fa nu e nina wu king,
se wu e yolowi kore fa yuru kantri woneni.a
13 Nanrona fane wu yumale 10pla uma fa nangke ommo e wone ka yali nu romaula wokwokera resukru 10pla fotnait.
Ka yirengkle nu nanrona,
‘Pone pem romaula mee ka paipi pangke bisnis pai plele taim e ki koloki kore.’
14 “Ka pinuma e mokoi woneni fi fa sam woluporone wu,
nanrona fane e wu pai,
nu mi pai mokoi e wu paiye nirengkle nu nanrona,
‘Mu mumplewa manawamo namo ese fei waiye king munini.’
15 “Ka manawamo namo,
nu nina wu king fane wu wi kore moile woneni.
Ka mi pai nu uma 10pla,
isi wone yali romaula,
wu yire fa yuru romaula,
ommo e nu nangkene wamo wee pitiri.
16 “Namba wan mana wi yireni wu nanrona,
‘Manwamo,
romaula e yene yake ki resukru 10 pla fotnait namo,
ki kangke ompla ka kem romaula resukru 100 pla fotnait kore.’
17 “Ka king yireni wu nanrona,
‘Yene mana uporo,
yene yangke ompla uporo.
Yene fa saimoye ompla pitiri.
Nanrona fane,
naminrele ki kina yene e waiye manawamo fa yuruye 10pla taun.’
18 “Mana wongke kore wi ka yireni king nanrona,
‘Manwamo,
romaula e yene isi yake ki namo,
ki kangke ommo ka kem resukru 50 pla fotnait kore.’
19 “Ka king yireni wu nanrona,
‘Yene e yuruye 5 pla taun.’
20 “Ka wongke kore ke wi yireni king nanrona,
‘Manwamo,
romaula e yene isi yake ki namo,
ki kuna kii kore yene.
Ki samo kuka amprapi plola ka kina waiye.
21 Ki kum yene,
e fika yene mana fa wolpuna neniye ommo yeneni e nu uma fi fa samo nangkene.
Yene fi fa yangke ompla wongke.
Yene mana fa yuꞌpuye nro ka woye ommo e uma plai noklene.’
22 “Ka king yireni wu nanrona,
‘Yen mana fafaile,
ki ese kotim yene mi namo e yene yireye.
Yene namale nanrona ki mana fa wolpuna neni ka fa kuꞌpuke ommo e nu uma ka koke ommo e uma plai noklene.
23 E fika ka yene fi yina romaula waiye benk,
e ki koloki kore,
ki e kem romaula plola kore?’
24 “Ka wu yirengkle nu uma e neri ekrene nanrona,
‘Pone pem romaula e wu 10pla fotnait ka paipi pane mana e yuna romaula resukru 100 pla fotnait.’
25 “Ka nu nireni king nanrona,
‘Manawamo,
mana namo e yuna romaula 100 pla fotnait pu.’
26 “Ka king yirengkle nu nanrona,
‘Ki kire mi alwone pone,
nu uma e nunari ommo pu,
nu ese nuꞌpu plai kore,
ka nu fopi e ommo onnele,
ommo fika pitpitiri e nu nunarine,
sa ki ese kuꞌpu kore.
27 Ka nu uma fopi iim kinini nire ki e fi kaike king nunini,
uma namo pone e pumale nu noloni mee ka pufro rili namapren e ki.’ ”
Jisas pai taun wamo Jerusalem yukaine king
(Matyu 21.1-9; Mak 11.1-10; Jon 12.12-15)
28 E Jisas yopro mi pekimo,
wu yemei pai fa pari taun wamo Jerusalem.
Jesus Enters Jerusalem (Luk 19:28-44)
29 E wu pari plele moul arwola fa nouwne Oliv,
ekrene taun Betfage ka Betani,
ka wu yawale disaipol plainrane woneni painri risi.
Ka yireli wuyane nanrona,
30 “Yenyane paipi mokoi e yeye nanri.
Le yenyane paipi plele mokoi namo,
sa yenyane e puru donki efapu wongke e nuka yeriye.
Donki namo,
mana wongke fei waiye riri ka yuna waraiyeye onnele.
Yenyane peingko kapa ka pumane pane polopi mee.
31 Le mana wongke yarine yenyane nanrona,
‘E fikami ka yenyane peingko donki namo.’
Sa yenyane ese pireni wu nanrona,
‘Manawamob yire e yangke ommo plai donki.’ ”
32 Mana plainrane painri,
nuru ka donki nayeriye yukaine mi e Jisas yireni wuyane.
33 E wuyane neingko kapa e donki namo,
nu uma ripile e donki namo narine wuyane nanrona,
“E fikami ka yenyane peingko donki mee?”
34 Ka wuyane nirengkle nu nanrona,
“Manwamo yire e yangke ommo plai donki.”
35 Wola wuyane numane donki noloni Jisas.
Nu ningkla amprapi e none kuma riri e donki namo ka mewmew Jisas yulpari waiye donki riri.
36 E wu waiye donki riri paiye rokoi,
pinuma mingklari ningkla amprapi noneni rokoi nole.
37 E wu pai plele ekrene rokoi fa panro moule arwola Oliv,
nu uma mingklari fa nupene Jisas nangke mi wamo ka wolpuna uporone ka nerernane noula e God.
Nu nangke nanrona e fika,
nu nuru mirakol mingklari e isi Jisas yangkeye.
38 Nu nangke mi kero wamo ka nire nanrona,
“God e yangke uporo wamo king mee.
King mee e wi noula e Manwamo.”
c
“E heven God wolpalo mone. Mone mereri noula e Manwamo waiye riri.” d
Jisas sa wiriye tanun Jerusalem
39 Nu Farisi e nakle nu nerine namo nireni Jisas nanrona,
“Tikse,
yene mi yuforo nu uma e nupene yene namo,
sa nu e fi nangke mi.”
40 Ka Jisas yirengkle nu nanrona,
“Ki kire mi alwone pone,
le nu miruru,
roma plai nanaine mee ese nangke mi kero ka nereri noula e Manwamo.”
41 E Jisas pai ekrene taun wamo Jerusalem,
wu yuru taun ka wiri.
42 Ka yire nanrona,
“Taun wamo Jerusaleme,
kaire naminrele ki wolyapa yene e namale ommo fa e yangke yene waiye woluporo.
Ka ommo e pekinenene namo sa yene e fi namale nu.
43 Ingke kaire wongke,
nu iim uma yeneni ese naku pike pari mamane banis wamo yeneni.
Ka nu e neinangkru yene reprepo.
44 Nu e nekrire yene ka nisnori yene.
Nu ese nangke nanrona yene yakle kongkom fopi e naine monre yeneni.
Ka nu e fi mew nimai roma wongke e raunwaiye wongke,
e fika,
yene fi namale God wi fa mewmew yene.”
Jisas pai pari waiye tempol
(Matyu 21.12-17; Mak 11.15-19; Jon 2.13-22)
45 Ka Jisas pai pari tempol ka yemyangkrupu uma e nenrune ommo.
46 Ka wu yirengkle nu nanrona,
“Mi e God yire nanrona,
‘Mow e ki ese waiye yukaine mow fa nesapune.’
Ka pone ke pangke yukaine koii e fa nu uma peki nuꞌpu ommo ka painri pekinainene.”