Nu nunari Jisas namba ka kero wunini
(Matyu 21.23-27; Mak 11.27-33)
20
Kaire wongke,
Jisas waiye yopro yukule uma tempol monre ka yopro miuporo e God,
nu bikpris e tempol ka nu uma e namale lo,
nakle nu irauma noloni plele Jisas.
2 Ka nireni wu nanrona,
“Yene yire mu,
fina sa yawe yene noula ka kero fa yangke ommo namo?
Yene yem kero namo pei?”
3 Ka Jisas yirengkle nu nanrona,
“Ki re e karile pone mi wongke mee sa pone ese pireni ki.
4 Taim e Jon Baptais baptaisimye nu uma,
ompla namo e yolo heven wee,
yemei uma e pike?”
5 Nu nopro none kore ka nire nanrona,
“Le mone mire nanrona,
‘Ompla mee e yolo heven,’
wu ese yarile mone nanrona,
‘E fikami ka pone fei bilip?’
6 Le mone mire nanrona,
‘Ompla mee e nu uma pikeni,’
uma mingklari ese roma nople mone,
e fika,
nu bilip rona Jon Baptais wu sa profet.”
7 Nanrona fane nu nireni wu nanrona,
“Mu fi namale ompla namo e yolowi pei.”
8 Ka Jisas yirengkle nu rona,
“Nanrona fane ki re e fi kirewi pone fina e yake ki noula ka kero fa kangke ommo namo.”
Mi riri e nu uma fa nuralene nengkrele
(Matyu 21.33-46; Mak 12.1-12)
9 Ka Jisas yirengkle uma mingklari mi riri wongke nanrona,
“Mana wongke pai yokle wain nengkrele.
E wu yokle pekimo,
wu yali nengkrele namo pai nu uma plai ese nopane ka wone sa pai waiye ripkikri mokoi wongke.
10 E wain namo nalelwa nale wu yawane mana fa yangke ompla woneni pai nu uma e fa nopanene wain nengkrele yirengkle nu ese nane wu wain nale plai.
Ka nu uma fa nopanene wain nengkrele namo sam nufu wu ka nawane wu pai kore mewlen nro.
11 Nengkrele ripile namo yawane mana wongke kore fa yangke ompla woneni pai kore nu.
Mana namo re nu sam nufu ka minrinane wu ka nawane wu karpai mewlen nro.
12 Wu yawane wongke kepe pai ka wu re nu naurnekri wu ka neingke wu palo nengkrele piyewa.
13 “Ka nengkre ripile e wain yire nanrona,
‘Ki ese kangke fika?
Ki ese kawane auna koneni pai.
Auna kinini namo ki fa wolake wu wamo,
ese nu e nupu mi wunini.’
14 “Ka nu uma e fa nopanene wain nengkrele namo nuru mela wunini namo ka nu nuka mi none kore nanrona,
‘Mela namo ese yem koii e nangka woneni ka wu ese yuꞌpu ommo mingklari e nangka woneni kore.
Mon mufu wu ri sa mone ese muꞌpu ommo mingklari namo.’
15 Nanrona fane nu neingke wu palo nengkrele piyewa ka nufu wu ri.
“Ka nengkrele ripile ese yangke ompla fika nu uma e fa nopanene nengkrele namo?
16 Nanrona fane wu ese yolowi ka yuꞌfro nu uma e nopanene nengkrele woneni rili ka wain nengkrele namo wu ese yuka yali nu uma plai ke nurune.”
E nu uma mingklari nupu mi namo ka nire nanrona,
“Es onne!
Wu e fi yangke ompla namo sa nenrape.”
17 Jisas kiryuru nu ka yarile nu nanrona,
“E fikami ka nu neꞌre mi mee wiye buk e God yire nanrona,
‘Roma e nu uma fa neꞌre mow num
ka nire roma mee sa fafaile
pai la nu kepe namale rona,
roma
namo sa kero rikepone roma plai fa yeima mow.’?
18 Nu uma fopi e firipanro roma namo,
roma namo ese yaurere nu peprere pitirpitiri.
Ka uma fopi e roma namo firyolo ka yisoro nu,
nu ese sam kikiyele.”
19 Nu uma e namale lo e Moses ka nu bikpris e tempol napu rokoi nire fa ese wampane nuna Jisas,
e fika nu namale nanrona wu yire mi namo sa pai none.
Ka nu ke numne uma mingklari namo.
Nu uma nane romaula pai Sisar
(Matyu 22.15-22; Mak 12.13-17)
20 Nu uma e namale lo ka nu bikpris samo nurune Jisas ka nirengkle nu uma namo ese sam ripi naranane mi e wu.
Nu uma e nupune mi e Jisas namo karnire nanrona,
nu nire ese samo nupu mi wunini.
Nu samo ripi naranane mi wunini ka nire nanrona nu ese nupu mi plai fei uporo e wu yoproye sa nu ese kotim wu pai mana e fa yopaneye gapman e none.
21 Nanrona fane nu narine wu nanrona,
“Tikse,
mu namale rona mi e yene yoproye ka yukuleye nu uma namo sa uporo wamo.
Ka mi e yene fa yirengkleye nu uma,
yene yirengkle nu uma uporo ka uma fafaile plau.
Ka mi e yene fa yukuleye nu namo,
yene fa yupene mi e God nro.
22 Le yene sa wola rongkele,
mu ese mina romaula pai Sisar,
ese uporo wee onnele?”
23 Ka Jisas namale pu,
ommo e nu karifle narine wu namo,
ka wu yirengkle nu nanrona,
24 “Pone pukune ki romaula wongke.
Fela ka noula finani wiyeye romaula namo?”
Ka nu nireni wu nanrona,
“Sisarni.”
25 Ka wu yirengkle nu nanrona,
“Le nanrona,
ompla fika e Sisarni,
pone pane Sisar,
ka e Godni re pone pane God.”
26 Nanrona fane nu fei iflenari wu ompla e wu yirengkleye nu nama e nu pinuma mingklari.
Ka nu wolnipanri mi e wu yire namo ka nu samo mi ruru.
Mi e nu uma isi rili nemei kore ka mi e uma nemnuꞌpune
(Matyu 22.23-33; Mak 12.18-27)
27 Nu Sadyusi fa nire nanrona nu uma e rili namo ese fei nemei kore.
Plai e nu noloni Jisas nire narine wu mi wongke.
28 Ka nu narine wu nanrona,
“Tikse,
Moses e isi reꞌre mi wongke munini yire nanrona,
‘Le mana wongke yem pin ka fei yuꞌpu kongkom ka wu ri,
ka wongke e wone ese yem pin namo ese yuꞌpu kongkom yaureni rani e isi riye.’
29 E isi nu 7pla inomp ranimpi nainene.
Rani e nu yem pin ka fei yuꞌpu kongkom ka wu ri.
30 Ino ke yem pin namo.
31 Ka ino wongke yupene wuyane namo re yem pin namo,
ka nu nangke nanrona nro pai ka nu rili kei.
32 E nu rili pekimo,
wola pin namo ke ri.
33 Nu 7-pla inomp ranimpi isi nem pin namo,
nanrona fane e nu rili ka nu pinuma e rili nemei kore,
pin namo sa ese waiye pin finani?”
34 Ka Jisas yirengkle nu nanrona,
“Nu pinuma e werme,
uma painri nuꞌpune pinmana ka pinmana painri nuꞌpune uma.
35 Ka pinuma e God wone yuru nu samo uporo ese nemei kore ka ingke ese nane naine plau,
nu uma namo ese fi nemnuꞌpu kore.
36 E fika nu ese fi rili kore.
Nu ese naine resukru ensel e God.
God wone yangke nu nemei matmat fane nu ese naine yukaine nu kongkom woneni.
37 La namee mi e niꞌpi yuꞌpoye ilo pitiri namo,
Moses yukune mone nanrona nu uma e rili ese nemei,
e fika,
Moses youw Manawamo nanrona,
‘God e Abraham,
Aisak ka Jekop.’
38 God namo,
wu seke God e uma rili namo.
Wu sa God e nu uma fa naine laip,
e fika nama wunini fa yuruye uma mingklari yukaine e naine laip.”
39 Nu uma plai e namale lo nire nanrona,
“Tikse,
mi yeneni namo sa uporo wamo.”
40 Nu fi wolkero fane wongke e none fei yarine wu mi wongke.
Krais wu sa man fina auna?
(Matyu 22.41–23.7; Mak 12.35-40)
41 Ka Jisas yirengkle nu nanrona,
“E fika ka nu nire nanrona Krais wu sa auna e King Devit?a
42 King Devit wone e yopro mi wiye Buk Song yire nanrona:
‘Manawamo e yireni Manawamo kinini nanrona,
“Yene ese waiye mewmenrulpo kinini,
43 pai la ki ese kangke nu uma fa nangke fafaile yene
ese naine rew ruwe e yene.” ’b
44 King Devit fa youw wu nanrona,
‘Manawamo.’
Nanrona fane wu ese waiye yukaine auna wunini kore rongkele?”
45 E uma mingklari naine nupune mi,
Jisas yirengkle nu disaipol woneni nanrona,
46 “Pone kosamo purupe nu uma e namale lo.
Nu fa niperwane amprapi angkangkren ka naraine poinpanrene ka wola uporo wamo,
fa nu uma ese nakle nuna mew e koii e fa maketne,
ka nu fa naine sia upupu e nerine mow kori,
e kaire e kola wamo ese nu uma nuru nu nanrona,
nu sa nuna noula wamo.
47 Nu fa nesapu angkren sa nu uma ese nire nu sa uporo wamo,
ka nu re fa karnirene pinmana e impi rili nupole ka iimnolone ommo e mow nunini.
Nu uma nanrona,
God ese kotim nu,
nu ese nungkam eni wamo.”