Jisas pai taunwamo Jerusalem yukaine king
(Matyu 21.1-11; Luk 19.28-40; Jon 12.12-19)
11
Jisas yakle disaipol woneni noloni ekrenene taun wamo Jerusalem.
Nu noloni plele mokoi plainrane nouw Betfage ka Betani.
Mokoi pitiri plainrane namo naine ekrene moul arwola Oliv.
Ka Jisas yawale disaipol plainrane woneni risi painri.
2 Wu yireni wuyane nanrona,
“Yenyane paipi mokoi namo nro e mone maimpime namo.
E yenyane paipi plele mokoi namo ka paipi papri,
sa yenyane ese puru donki pitiri wongke e mana wongke fi isi parwaiye riri namo,
e nuka yeriye.
Ese yeneyane peingko kapa wu ka pumane pane polopi mee.
3 Le mana wongke yarine yenyane,
‘E fika ka yenyane ke pangke namo,’
sa yenyane ese pireni wu nanrona,
‘Manawamo yire yangke ompla donki namo.
Ka e ommo wunini pekimo,
wampane nro wu ese yawe yene kore.’ ”
4 E wu yopro mi wunini pekimo ka wuyane painri.
Ka e wuyane pairi plele koii namo,
wuyane nuru donki pitiri yeri ekrene rama e mow wongke yeri ekrene rokoi.
Wuyane painri donki namo ka neingko kapa e nu nuka donki.
5 Ka nu uma plai e neri ekrene namo nuru wuyane ka narine wuyane nanrona,
“Yenyane peri peingko kapa e donki pitiri namo fa pefere?”
6 Ka wuyane nireni nu nanrona Jisas isi yireni wuyane.
Ka nu uma mewnimane donki ka wuyane numane donki pitiri namo painri.
7 E wuyane numane donki pitiri namo noloni Jisas,
wuyane nuꞌpu ommo ampapri e wonyane ka ningkla riri e donki kuma ka Jisas yulpari ka waiye donki.
8 Uma mingklari ningkla ommo ampapri e none poinre rokoi ka plai sa naurere ommo ilo para ka nenru rokoi plau.
9 E Jisas yupene rokoi pouweye namo,
plai e nu pinuma risi poinre ka plai sa nairu wu.
Mingklari awail poinre ka nangke mi kero ka nire nanrona,
“Mu mereri noula e yene,
God ese yuꞌpu kore mu!
God ese samo yangke mana namo fina e yolowi noula e Manawamo.
10 God ese samo yangke kingdom ese ingke yemei namo.
Kingdom namo,
sa kingdom e aina moneni,
Devit.
Wu ese yuruye mone.
Mone mereri God waiye riri wamo!”
11 E Jisas pai pari taunwamo Jerusalem,
wu pai pari kei tempol ka wu samo yuru ommo mingklari.
Ka ekreneye yire kureli,
nanrona fane wu yakle nu 12pla aposel woneni painri kore Betani.
Jisas rofo refu ilo fik ese fi nalelwa
(Matyu 21.18-19)
12 Nu nile moulpeperi ka nupone Betani ka painri kore taunwamo Jerusalem,
ka Jisas ponrini.
13 Ka wu yuru ilo fik wongke yeri as amon para plau yuforo ilo fik namo.
E taim namo,
ilo fik nale fi fa puno.
Nanrona fane e wu pai plele ilo fik namo ka yuru,
wu fei yapu wongke fa wu ese wo.
Wu yuru ilo fik para siulen nro.a
14 Ka Jisas rofo refu ilo fik namo ka yireni ilo nanrona,
“Ese yene waiye nanrona nro ka e fi nalelwa nale kore.
Nu uma ese fei no kore nale yeneni.
Ese sam onnele!”
Nu disaipol woneni nupu mi namo.
Jisas yangkrupu nu uma e nangke bisnis tempol monre
(Matyu 21.12-17; Luk 19.45-48; Jon 2.13-22)
15 E Jisas yakle disaipol woneni noloni plele taunwamo Jerusalem,
wu won pai kei ka pai pari tempol.
Ka e wu yuru nu uma e naine maketne tempol monre namo,
wu yemei ka won yangkrupu nu ka yensoro tebol e nu uma fa senisimne romaula ka sia e nu uma fa nenrune rora ufu namo.
16 Ka wu reinangkru nu uma mingklari ese fi nungkam ommo e none fa nenrune maket namo e fei nauri panri tempol monre.
17 Ka e wu yukuleye nu namo,
wu yirengkle nu nanrona,
“Buk e God yire nanrona,
‘Mow e ki ese samo waiye yukaine mow fa nesapune e nu pinuma e mokoi mingklari.’
Ka anro pone wolpuma wee?
Ka pone pangke koii namo yemei yukaine koii e nu uma fa peki nuꞌpu ommo nainene.”
18 E nu bikpris ka nu tikse e lo nuꞌpu mi namo,
nu nemei ka napu rokoi wongkwongkeni fa nufu Jisas ri.
Nu num wu,
e fika,
nu namale nanrona uma mingklari wolnipanri wamo mi e Jisas yangke namo.
19 E kaire mingklari,
e kureli yire yolowi,
Jisas yakle disaipol woneni namo,
fa nupone taunwamo Jerusalem namo ka painri kore koii e none fa nainene.
Ilo fik ri
(Matyu 21.20-22)
20 E ningkinama nole wamo Jisas yakle disaipol woneni nemei ka painri kore taunwamo Jerusalem namo,
nu nuru ilo fik e Jisas isi rofo refu namo samo rouw pai plele kinrela woneni.
21 Ka Pita wolrufu ommo e Jisas isi yangke namo ka wu yire nanrona,
“Tikse,
yuru ilo fik e yene isi rofo refuye wu namo rouw pu.”
22 Ka Jisas fa yimpone mi e nu disaipol woneni namo nanrona,
“Pone ese samo bilipim God.
23 Ki kire mi alwone pone,
le mana wongke yireni moule arwola namo nanrona,
‘Yene yemei ka pai yingkapalo yene iplele e furu.’
Ka mana namo fi wolpuna plainren ka wu samo bilipim ompla namo ee yemei yukaine e wu yireye.
Ki kire mi alwone pone nanrona,
God ese yangke ompla namo ese yemei yukaine e wone wolaye.
24 Nanrona nro,
ki kire mi alwone pone,
le pone puna kero wolpuna ka pesapu fa puꞌpu ommo sa,
pone samo bilip kero nanrona pone pem pu ompla namo e pone fa mesapupe ka God ese yawe pone.”
25-26 “E pone pesapu ka pone wolrufu ompla wongke fafaile e mana wongke isi yangke pone,
sa pone ese samo puꞌpole ommo fafaile namo e wu isi yangke pone.
Resukru nro ese Aina waiye heven namo,
ese yuꞌpole ommo fafaile pone re isi pangke namo.”
Nu narine Jisas e wu yem kero namo pei
(Matyu 21.23-27; Luk 20.1-8)
27 Jisas yakle disaipol woneni namo noloni kore taun wamo Jerusalem.
Ka Jisas pai pari ka waraiye poupare tempol monre.
Ka nu bikpris ka nu tikse e lo ka nu ira uma namo noloni plele wu.
28 Ka nu won nirenine wu nanrona,
“Yene yireni mu,
fina yawe ikakro uporo namo ka ommo namo?
Ka kero namo yolowi pei?”
29 Wola,
Jisas yimpone mi e nu nanrona,
“Ki re kire karine pone mi wongke se.
Le pone samo pimpone mi e ki karike,
sa ki re ese kopro alele fina yane namba ki fa kangke ommo namo.
30 Pone pireni ki,
e Jon baptaisimye nu uma mii namo,
God e heven isi yane namba ka kero wu wee nu uma isi nane wu?”
31 Nu nufu mi iplele none kore nanrona,
“Mone ese mire fikayen?
Le mone mire nanrona kero namo yolowi God,
wu ese yirewi mone nanrona,
‘E fika ka pone fei bilipim mi e Jon?’
32 Ka le mone mire nanrona ‘Namo sa ommo e mana nro,’
ka mi namo ese yensona wi mone kore.”
Nu nire nanrona e fika,
nu num nu pinuma.
Pinuma mingklari fa nire nanrona Jon wu sa profet runu.
33 Nanrona fane nu nimpone mi wunini nanrona,
“Ooo,
mu fei namale.”
Ka Jisas re yimpone mi e nu nanrona,
“Ki re ese fei kire mi alwone pone e fina isi yane namba namo ki ka ki kangke ompla namo.”