Pin wongke ini ri yupone wu yina ofa
21
E Jisas yereri ungklama woneni,
wu yuru uma nuna romaula wamfafai yukaine ofa e none nenru panro bokis e romaula yeriye tempol.a
2 Ka wu yuru pin e ini ri yupone wu yanpalo romaula plainrane panro bokis e romaula.
Pin namo sa ommo onnele.
3 Ka wu yireli nu nanrona,
“Ki kire mi alwone pone,
pin namo yina romaula rikepone uma mingklari e nenrune.
4 Uma mingklari namo nenru plol pitiri nro ommo mingklari none nunane yukaine ofa e none.
Ka pin namo sa singke yina ommo e wone yunaye,
ka fei yuna plola ese yuꞌpu ommo woneni.”
Ommo ese nuku taim e pike pekimo
(Matyu 24.1-2; Mak 13.1-2)
5 Disaipol plai woneni nuru tempol ka nire nanrona,
“Nu nuꞌpu roma upupu ka ommo plai e nu uma nenrune yukaine ofa pai God ka samo mewpanrone tempol ka nangke uporo wamo.”
6 Ka Jisas yirengkle nu nanrona,
“Ki kire kopro mi e ompla namo e pone pire fa puru,
kaire wongke e wi e nu e nemneki roma kenkenra ka wongke ese fi raune wongke riri.
Ese onne!”
Jisas yopro eni ese wi
(Matyu 24.3-14; Mak 13.3-13)
7 Ka nu narine Jisas nanrona,
“Tikse,
e rongkele ese ommo namo nemei?
Ka ompla fika ese yuku rona ompla namo sa ekrene ese wi?”
8 Ka Jisas yirengkle nu nanrona,
“Pone kosamo puru nu uma ese raryale pone mi.
Pinuma mingklari ese noloni noula kinini ka nire nanrona,
‘Ki mana namo,’
ka ‘Taim sa wi ekreneye.’
Uma namo,
pone fa pupelepe.
9 E pone pupu mi e woa ka nu uma e nakle gapman nopune,
pone fa pumpe ka forworipe.
Ommo namo ese nemei se,
sa las de ese fi faflai wi.”
10 Ka wu yirengkle nu nanrona,
“Kantri plai ese nakle kantri plai nopu.
Kingdom ese nakle kingdom plai nopu.
11 Klai wamfafai ese nemei ka mokoi plai ommo fa none ese sam pekimo ka sik wamfafai ese nemei.
Ommo namo ese nemei mokoi mingklari e pike.
Ka ommo fa nangke uma nemnum wamo ese nemei.
Ka pinuma ese nuru ommo wongkwongkeni nemi.
12 “Ommo mingklari namo ese nemei,
emen nu ese neimare pone ka nisnori pone fafaire wamo.
Nu ese kotim pone mow kori e nu Juda ka nenru pone kalabus.
Nu ese nuꞌpu pone paipi peri ungklampren e nu king ka uma e fa nurune gapman,
nu ese nangke ommo namo pone,
e fika,
pone fa pupenepe ki.
13 Ka ommo namo ese naine yukaine rokoi fa pone pirengkle mi uporo e God pai nu.
14 Ka pone fa pumpe,
ka paipe wolape mi rongkele ese pone pirengkle nu.
Pone wolpumaro ommo namo.
15 E fika,
ki kone ese kape pone ira uporo ka mi rongkele ese pone popro,
ka nu uma e kotim pone e fi nangkrumo mi poneni ka mi e nu ese fi yumaro mi e pone.
16 Moka nangka ka inomp ranimpi ka ori oikenra poneni ka fori poneni re ese nina pone pai mew e nu uma ese nangke fafaile pone.
Ka nu uma e fa nangke fafaile pone ese nuꞌfro plai e pone rili.
17 Pinuma mingklari wamo ese wolneni pone,
e fika pone fa pupenepe ki.
18 Ka ira para wongke poneni ese fi fongkro ka firalo.
19 Pone e samo peri kero sa pone ese pem laip fa waiye nanrona nanrona.
Jisas yoproye taunwamo Jerusalem ese fafaile wamo
(Matyu 24.15-21; Mak 13.14-19)
20 “E pone puru soldia neri mamane taunwamo Jerusalem,
pone ese namale rona nu ese nisnori taunwamo Jerusalem sa yolowi ekreneye.
21 E taim namo nu uma fa naine distrik Judia nemropri painri naine koii arwola.
Nu uma fa naine taun wamo namo nemropri panro moile ka nu uma naine moile e fi neri taun wamo namo.
22 E fika taim namo,
ommo fafaire wamo ese nemei e nuku ommo mingklari yukaine nu neꞌre wiye buk e God.
23 Taim namo ese sam fafaile wamo e nu pinmana e reingkinine ka nu pinmana e naline kongkom roro.
Ommo fafaile namo ese nemei pike ka God ese wolpuna neni wamo uma namo.
24 Nu uma e fa nangke fafaile,
nu iim uma ese bainat nokle ka nu ese rili ka plai nu ese numale nakle painri naine kantri mingklari e pike ka neinangkru nu ese fi noloni kore kantri noneni.
Nu uma e fi Juda ese nurune taunwamo Jerusalem ka poinpanrene pai la taim God wone yaure nu ese nurune mokoi namo pekimo se.
Ingke, Auna e Mana ese wi kore
(Matyu 24.29-31; Mak 13.24-27)
25 “Ka pone ese puru mak nene kaire,
kari ka kikla.
Pinuma e pike ese nemnum wamo ka e fi namale ompla fika ese nu nangke e nu nupu furu wamo pikari ukuye.
26 Nu uma mingklari ese nuru ka ese wolane ommo ese nemei pike mee ka nu ese nemnum wamo,
nam kaka ka ri malma e fika ommo kero mingklari e nemi ese forworine.
27 Se nu ese nuru Auna e Mana yuna kero ka glori wamo ese yolo plau kupu.
28 E ommo namo ese nemei,
pone pemei peri ka pinrapari puru,
e fika taim e God yuꞌpu pone kore sa yolowi ekrene pu.”
Pone e samo namale mi e ilo fik
(Matyu 24.32-35; Mak 13.28-31)
29 Ka wu yirengkle nu mi riri wongke nanrona,
“Pone puru ilo fikb namo ka ilo mingklari.
30 Taim e nu korone pone namale rona moulyufu sa yolowi ekreneye.
31 Won es nanrona nro e pone puru ommo namo nemei,
pone e namale rona kingdom e God sa yolowi ekreneye.
32 “Ki kire mi alwone pone,
nu uma e naminre ese fi rili,
nu ese nuru ommo namo se nu e rili.
33 Nemi ka pike ese pekimo,
la mi e ki sa ese fei pekimo.
Nu disaipol kosamo nuru
34 “Pone kosamo puru,
pone e fi paikolpo mii kero yukaine wain ka bia ka pangke ira enini,
ka pone e fi wolape ommo mingklari e pike ese nangke pone paipe uporo.
Pone pangke rona sa taim namo ese yolowi yeimare pone yukaine misiri.
35 Nanrona fane pone poo.
E fika ompla namo ese yemei nu uma e pike mee.
36 Pone kosamo purupe ompla namo ningki kaire ka pesapupe nanrona ese pone peri kero e ommo namo nemei pone,
ka pone ese peri nama e Auna e Mana.”