Nalfafaire fa yangke bilip fafaile
(Matyu 18.6-7; 18.21-22; Mak 9.42)
17
Jisas yirengkle nu disaipol woneni nanrona,
“Ommo plai ese nemei e nangke nu uma e firipanro nale fafaire ka nangke ommo fafaile nama e God.
Le yene fina fa yangke ommo uma firipanrone nale fafaile ka nu nangke eni nama e God,
yene poo.
2 Le mana wongke yukune mela wongke yangke ompla fafaile nama e God,
sa ese uporo,
mana namo ese yungkam eni wamo nu e nuka plau roma wamo wongke waingkemuru mongkoma ka ningkapalo yaikowo furu ka ri.
Ka ompla namo,
e fi yukaine ompla fafaile e wu isi yangkeye.
Eni e God yane wu e rikepone eni namo.
3 Nanrona fane pone e saimope pone.
“E yene wongke mana yangke eni,
yene mewmew wu ka sam yoproni sa wu e fi yangke kore ommo namo.
E wu yupu mi e yene ka yensona wolpuna ka yupone ommo fafaile e wu fa yangkeye,
yene wolpalo wu.
4 Le wu yangke eni 7pla e kaire wokera ka 7pla taim wu wi kore ka yireni yene nanrona,
‘Ki kensona wolpuna e ommo fafaile e ki kangkeke namo,’
sa yene wolpalo wu.”
5 Nu aposel nireni Manawamo nanrona,
“Yene e keryame bilip munini kore.”
6 Ka Jisas yirengkle nu nanrona,
“Le pone puna bilip pitiri nro yukaine ilo mastet nalale,
ese pone pireni ilo wamo wongke nanrona,
‘Yingklam yeri yene prumele plau ka pai yeri furu.’
Ka ilo namo e yupene mi e pone.
7 “Le wongke e pone yuna mana e fa yangke ompla woneni,
ka yireni wu pai lelefu nengkre wee pai yauno sipsip,
e mana wi kore monre,
wu ese yireni wu wampane wi ka wo wee onnele?
8 Es onne!
Wu ese yireni mana namo nanrona,
‘Yene pai raile ompla papri e fa nampolene ommo ka yampo ompla yuma yuna wi ki ko se,
sa yene ke wo.’
9 Ka wu ese yire tenkyu mana namo e yupu mi e wu wee onnele?
Es onnele!
10 Ka pone re,
e pangke ommo mingklari e God yirepi pone,
pone e pire nanrona,
‘Mone uma nale siwole nro fa mangkeme ommo e wu.
Ompla namo e mone mangkeme,
sa ompla e Manwamo e mone yire mone e mangke.’ ”
Uma 10pla lepro e uporo kore
11 Jisas yire paiyi yupene rokoi e pai taun wamo Jerusalem.
Wu waraiye pai plele iplele pike e distrik Samaria ka Galili.
12 Wu pai plele mokoi wongke ka uma 10pla lepro noloni nane wu.
Nu neri as amon.
13 Ka nouw mi kero ka nireni wu nanrona,
“Jisas,
Manwamo,
yene wolpalo mu.”
14 E wu yuru nu ka yirengkle nanrona,
“Pone paipi puku nalpapri poneni pai nu pris nuru.”
E nu painrine,
nalpapri e nu namkire kore.
15 Wongke e nu yuru rona nalpapri woneni uporo,
wu wi kore ka yangke mi kero yereri noula e God.
16 Wu wi firalo ka yensona ungklama palo pike ekrene rew e Jisas ka yire tenkyu Jisas.
Mana e yolowiye Jisas namo,
wu sa mana e distrik Samaria.
17 Ka Jisas yarine,
“Anro,
mana wokera nro nalpapri namkire wee?
Ka 9pla namo sa painri pei?
18 Uma plai fei noloni ka nerernane noula e God.
Mana wokera e mokoi wongke nro.”
19 Ka Jisas yireni Samaria mana nanrona,
“Yene yemei pai,
bilip yeneni nro yangke nalpapri yeneni uporo kore.”
Kingdom e God e wi
(Matyu 24.37-39)
20 Nu Farisi plai narine Jisas e rongkele se Kingdom e God e wi,
ka Jisas yirengkle nu nanrona,
“E kingdom e God e wi,
ompla wongke e fei yemei ka yuku pinuma ese nuru ka namale.
21 Ka nu e fei nire nanrona,
‘Ompla e yemei mee,’
wee ‘E yemei nanri,’
e fika,
kingdom e God sa yukaine ompla e yeye pone wolpuna.”
22 Ka Jisas yirengkle nu disaipol woneni nanrona,
“Taim ese wi fa pone pire fa samo puru kaire wongke e Auna e Mana.
Ka pone e fei puru.
23 Nu uma ese nirepi pone nanrona,
‘Puru.
Wu e yemei nari!’
wee ‘Wu e yemei mee!’
Pone e fei paipi ka pupele nu.
24 E Auna e Mana e wi,
wu e yemei alele yukaine nemi e rariyaneye ka aliyane pai mokoi mingklari se pinuma mingklari e nuru.
25 Ka pinuma e naminrele ese samo kuma nane wu,
ka wu e yungkam eni wamo.
26 “Ommo isi nemei taim e Noa,
ese yukaine Auna e Mana e wi.
27 Nu pinuma isi none ka naikolnone,
ka nemnuꞌpune,
pin pai yem mana,
ka mana pai yem pin pai plele taim e Noa pari sip.
E Noa pariye sip,
nupi yopu wamo ka yumaryekri pinuma rili kei.
28 “Sa yukaine taim e Lot re.a
Nu pinuma none,
ka naikolnone,
ka nuꞌpune ommo e pinuma,
ka nenru ommo uma nuꞌpune,
ka nura nengkrele ka neꞌrene mow.
29 Ka e Lot yupone taun Sodom,
niꞌpi ka roma wori nolo heven yukaine riple yumaryekri pinuma mingklari rili kei.
30 “Ka nale nanrona sa ese yemei Auna e Mana re ese yemei alele sa pinuma mingklari e nuru wu.
31 E kaire namo pinuma e nainene mow ririb e none e fi panro ka panri mow monre ka nuꞌpu ommo.
Nanrona nro,
pinuma e nerine nengkrele e none e fei painri kore monre ka nuꞌpu ommo e none.
32 Pone ro wolrufupe mi e Lot puri!c
33 Le mana yunaye laip woneni kero,
se laip woneni e fafaile.
Ka mana e yane laip woneni pai nu uma plai ka fei fa wolaye laip woneni,
sa laip woneni ese uporo.
34 “Ki kire mi alwone pone,
e ningki Auna e Mana ese yolowi,
uma e nile nama koii wokera,
nu e mewnem wongke ka wongke ese wileye.
35-36 Pin plainre e naine norirene wit,
nu e mewnem wongke ka wongke e waiyeye.”
37 Ka nu disaipol narine Jisas nanrona,
“Manwamo,
ommo namo ese nemei koii pei?”
Ka Jisas yirengkle nu kore nanrona,
“Koii e ompla ri waiyeye,
koii namo sa rora kumu ese nukane.”d