Mi riri e bosboi fafaile
16
Jisas yirengkle nu disaipol woneni nanrona,
“Bosboi wongke e mana fa yunari romaula wamo nawaiye.
Nu nireni mana e fa yunari romaula wamo nanrona bosboi wunini fa peki yuꞌpuye ommo ka yupapake ommo mingklari wunini.
2 Nanrona fane mana e fa yuna romaula wamo namo youw bosboi woneni yolowi ka wu yireni wu nanrona,
‘E fika ka ki kupu mi e yene?
Yene pai ka yeꞌre piprola yire alele ki mi e romaula,
e isi yene yangke ommo fika.
E fika,
yene e fi waiye yukaine bosboi e romaula kinini kore.’
3 “Ka bosboi yire wone kore nanrona,
‘Ki ese kangke fika?
Bos kinini yire ki ese fi kaike bosboi wunini kore.
Ki fi kero e kangke ompla e mana wongke ka kompo pike.
Ki fa kum wamo e ki karike uma ompla.
4 Namele ki kem ira uporo pu fane ki namale ommo fika ki ese kangke,
e ki pekimo,
pinuma mingklari ese nouw ki e kaiki mow e nu.’
5 “Nanrona fane wu yemyoku uma e karnuꞌpu ommo e bos woneni.
Ka wu yarine mana wongke nanrona,
‘Yene yuꞌpu ommo e bos kinini mingklari wee plainre nro?’
6 Ka mana namo yireni wu nanrona,
‘Dinau kinini 800pla galen oil e oliv.’
Ka bosboi namo yireni wu nanrona,
‘Yene yem piprola mee e nu neꞌre ommo e yene isi yem,
naime yene waiye ka wampane yeꞌre dinau yeneni 400 galen nro.’
7 “Ka bosboi yarine mana wongke nanrona,
‘Dinau yeneni wamo wee pitiri?’
Ka mana namo yireni bosboi nanrona,
‘Dinau kinini 1000 bek wit.’
Ka bosboi yireni,
‘Yene yem piprola mee e nu neꞌre dinau e yene,
ka yene yeꞌre resukru dinau yeneni 800 nro.’a
8 “Bos e bosboi fafaile fei woluporo,
wu kon yereri noula e bosboi fafaile namo e fika bosboi yangke ompla e yukaine mana e ira uporo.
Nu uma fa nupenene ommo e pike mee sam namale rokoi pitirpitiri fa nangke ommo fa saimoro none,
ka e rokoi namo nro nu rikepone ikakro e nu uma fa nupenene ommo uporo e God.
9 Ki kire mi alwone pone,
pone e puꞌpu ommo upupu e pike mee ka pangke nu uma ese nemei fori poneni.
Ka e ommo upupu e pike mee pekimo,
nu ese nouw pone paipi paipe mow e fa neri nanrona nanrona.
10 “Mana e fa sam yuruye ommo pitirpitiri e mana wongke,
mana namo,
nu uma ese namale rona ommo wamo re wu ese kosamo yuruye.
Ka mana e fa yangke nale fafaileye ommo pitirpitiri,
mana namo,
ommo wamo re wu ese yangke nale fafaile.
11 Nanrona fane le pone fei samo purupe ommo upupu e pike mee,
fina ese yape pone ommo sam uporo wamo ese pone purupe?
12 Le pone fei sam purupe ommo e nu uma plai,
fina ese yape pone ommo yukaine ommo poneni?
13 “Nu uma fa nangke ommo e mana wongke,
wongke e nu e fi yangke ommo e bosman plainrane,
sa onnele.
Mana ese wolyane wongke wamo ka wongke wu e fei wolyane.
Wu ese yupu mi e wongke,
ka kuma yane mi e wongke.
Nanrona fane pone e fei pangke ommo e God ka romaula plau.”
14 Nu uma Farisi fa wolnapane romaula.
Nanrona fane nu nupu mi e Jisas ka nu ungkla nelref angkren.
15 Ka Jisas yirengkle nu nanrona,
“Pone fa pire puku pone ese nu pinuma mingklari nuru pone ka nire pone sa uporo.
Ka God sa namale ommo e pekinene wolpuna e pone.
Ommo e mone uma muru uporo,
ka God yuru sa fafaire wamo nama e wu.
Jisas yopro mi e lo ka kingdom e God
16 “Mi e lo ka nu profet,
nu nopro wi plele e Jon yolowiye.
Ka,
e Jon yolowiye,
miuporo e kingdom e God nu na noprone.
Ka pinuma mingklari neingkari nire panri kingdom namo.
17 Nemi ka pike mee ese pekimo,
ka mi rol pitiri e God sa ese fi pekimo.
Onnele!
18 “Mana fina e yupone puri woneni ka yem pin wongke kore,
mana namo sa yangke nale pamok.
Ka mana fina e yem pin e mana yupone waiyeye,
mana namo re yangke nale pamok.”
Mi e mana yuna romaula mingklari yane Lasarus
19 “Isi mana wongke fa yunariye romaula mingklari,
ningki kaire wu fa raile siot upupu ka yiperi amprapi kaka uporo.
Mana namo yunari ommo upupu mingklari.
Ka ningki kaire wu fa woyeye ommo upupu nro.
20-21 Yaimari mana muꞌku yokoro fa wiye ekrene mow prerama e mana namo,
noula wunini sa Lasarus.
Nalpapri wunini sa muꞌku wamfafai ka kurala karokolnolone,
ka pala fa nolonine ka nongkor nepelnone.
Ka Lasarus wola yire yem ommo roli e mana fa yunari romaula mingklari woyeye ka firpanro naine tebol ruwe.
22 “E Lasarus ri,
nu ensel nolo ka nongkole wu panri nirane wu yane Abraham naine.
Ka mana e yuna romaula mingklari namo re ri ka niꞌna.
23 Wu pai waiye hel ka yungkam eni wamo.
Wu yinrapari riri ka wane Lasarus yane Abraham nainene.
24 Ka wu youw Abraham yireni wu nanrona,
‘Aina Abraham,
yene wolpalo ki ka yireni Lasarus pai mew yoku mii ka kukro nro yolo ka rauloyane nongkora kinini se,
e fika ki kungkam eni wamo e niꞌpi mee.’
25 “Ka Abraham yireni wu nanrona,
‘Mela!
Yene wolrufu rona e yene waiye pike,
yene isi yunari ommo upupu mingklari.
Lasarus sa fa yuꞌpu ommo fafaire nro.
Naimele wu waiye woluporo ka yene sa yungkam eni wamo.
26 Ka ompla wongke re God yangke koii raraine wamo yeye iplele e pone ka mu.
Nanrona fane,
le nu uma naine riri ka nire panro pone,
nu e fi panro.
Le pone re pire peri mu,
pone e fi peri.’
27 “Wu yireni Abraham nanrona,
‘Le rona,
aina,
ki karine yene yireni Lasarus pai kore mow e aina kinini.
28 Ki inompranimpi 5pla nro naine.
Lasarus ese pai ka yirengkle nu mi mee se nu re e fi noloni koii mee.
Koii mee fafaire wamo ka eni wamo.’
29 “Ka Abraham yireni wu nanrona,
‘Nu inomranimpi yeneni nuna mi e Moses ka nu profetb pu fane nu e nupu mi namo.’
30 “Ka wu yireni Abraham nanrona,
‘Onnele!
Aina Abraham,
le mana wongke e mu isi ri pai yireni nu se nu e nemplesoro wolpuna e nu ka bilip.’
31 “Ka Abraham yireni wu nanrona,
‘Le nu fei nupu mi e Moses ka nu profet,
nu e fi bilipim.
Ka wongke e mu uma isi rili yemei kore ka pai yirengkle nu,
nu re e fi bilipim.’ ”