Mi riri e sipsip pekiyi
(Matyu 18.12-14)
15
Kaire wongke nu uma fa nuꞌpune romaula e gapman ka nu uma fa nangke ommo fafaire noloni nuka Jisas e nupu mi e wu.
2 Nu Farisi ka nu uma e namale lo wolpuna neni ka nire rona,
“Mana namo fa woluporo e nu uma e fa nangke ommo fafaire noloni wu ka yakle naine plau ka none.”
3 Ka Jisas yirengkle nu mi riri nanrona:
4 “Le wongke e pone yuna 100 sipsip,
ka wongke peki pai.
Ka nangka e sipsip namo,
ese yupone sipsip plai neri none ka wu ese pai yapu pai la wu waꞌne,
se?
5 Ka e wu waꞌne,
wu ese woluporo wamo ka yaune sipsip namo wiye kaula riri ka yongkole wi moile.
6 E wu wi moile,
wu ese mi pai nu fori woneni ka uma e mokoi woneni ese noloni ka wu yirengkle nu nanrona,
‘Pone ka ki woluporo sipsip kinini e pekiyi namo,
ki kapu wu pu.’
7 Ki kire mi alwone pone,
woluporo namo sa yukaine fa yemeiye heven.
Alwone nu fa woluporone 99 pla e fa samo naine uporo pu e fi nensoro wolpuna kore.
Ka mana e yangke nale fafaire yensona ka kumayane ommo fafaire namo nu ese woluporo wamo.”
Mi riri e romaula firalo
8 Ka Jisas yirengkle nu kore nanrona,
“Le pin wongke yuna 10pla silva romaula ka wongke firalo.
Wu ese yesana lam ka yurul yangkrumo ommo ka yeprene uruawa ka kosamo yapu pai la wu wane se.
9 Ka e wu yapu romaula e firalo namo,
wu e yireli fori woneni ka uma e mokoi woneni noloni nai ka wu yirengkle nu nanrona,
‘Pone ka ki woluporo,
romaula kinini namo isi firpalo namo ki kem kore pu.’
10 Ki kire mi alwone pone,
nale namo nro,
God fa yakle ensel woneni fa woluporone mana wongke e yangke nale fafaile yensona wolpuna ka yupone ommo fafaire.”
Mi riri e auna pekiyi
11 Ka Jisas yire kore nanrona,
“Mela mana plainren e mana wongke.
The Prodigal Son (Luk 15:11-32)
12 Ka auna pitiri yireni nangka woneni nanrona,
‘Aina,
yene yepi ommo yeneni rep plainren ka repo kinini sa yake ki se.’
Nanrona fane nangka yepi ommo e wu auna plainrane.
13 “Fei pape auna pitiri yuꞌpu ommo woneni e nangka yane ka pai kantri wongke waiye as amon.
Ka wu waiye kantri namo.
Wu waiye mokoi namo yangke nale fafaire wongkwongkeni ka yufla romaula woneni ka ommo mingklari woneni sam pekimo kei.
14 Ka e ommo mingklari wunini sam pekimo,
eni wamo yemei kantri namo,
ka ommo e fa none re sam pekimo.
Ka wu re ommo samo onne.
15 Nanrona fane wu pai yuru mana wongke e mokoi namo ka yarine wu fa wu e yangke ommo wunini.
Ka mana namo yireni wu pai yaunole pori wunini.
16 Wu ponrini wamo,
ka fei wo ompla rola wongke e mana wongke.
Nanrona fane e wu yuru pori none bin papri,
wu re wola yire yakle pori no bin papri.
17 “Wu waiye pai ka wu namale nanrona wu fafaile wamo,
ka wola kore nangka woneni ka yire rona,
‘Uma mingklari fa nangke ommo e aina kinini,
ommo e fa none sa mingklari ka ploli fa nainene.
Ki kaike mokoi mee,
ommo e fa none samo onnele fane ki samo ponrini wamo kire kangke ri.
18 Ki ese kemei ka kaiki aina kinini kore,
ka ki ese kireni wu nanrona,
“Aina,
ki isi kangke nale fafaile wamo God ka yene.
19 Namele sa ki fei uporo ese yene youw ki auna yeneni.
Yene yangke ki kaike yukaine nu uma e fa nangke ommo yene.” ’
20 Nanrona fane wu yemei ka pai aina woneni.
“E wu yolowiye amon,
aina wunini yuru wu ka wu wolyaure wamo.
Ka wu priri pai yukaire auna woneni ka youkene wu.
21 “Ka auna yireni wu nanrona,
‘Aina,
ki isi kangke ommo fafaile wamo God ka yene.
Ki fei uporo ese yene youw ki auna yeneni.’
22 “Ka nangka yirengkle nu uma e nangke ommo woneni nanrona,
‘Pone wampane nro pem ompla papri uporo wongke kinini puna polopi panani wu.
Pone pinapare ring mew ka panani sandal rew wunini.
23 Pone paipi pem bulmakau aula wongke kempile polopi ka pufu ri.
Mone ese mane mo ka woluporo.
24 E fika auna kinini ri pu.
Nammee wu yemei kore,
wu e pekiyi pu,
nammee mu mapu wu pu.’
Nanrona fane nu nangke kola wamo ka woluporone wu.
25 “E nu none ka woluporone,
auna iramana e waiye nengkrele.
E wu yolowi ekrene mow e nangka woneni,
wu yupu nu neilene rai ka nokulene.
26 Nanrona fane wu youw mana wongke e fa yangke ommo e nangka ka yarine wu nu sa nangke fika.
27 Ka mana e fa yangke ommo e nangka yireni wu nanrona,
‘Ino yeneni e yolowi kore pu,
ka yene aina yufu bulmakau wongke,
e fika ino yeneni e yolowi uporo kore.’
28 “Auna wamo yupu mi namo ka wu samo wolpuna neni wamo,
wu yum fane wu fei pari monre.
Nanrona fane nangka yolo moile ka kosamo yoproni,
e yangke wolpuna wunini raulo.
29 Ka wu yireni nangka woneni nanrona,
‘Yuru!
Kikla mingklari painri pu,
ki kangke ommo wamfafai yeneni ka kaike yukaine nu uma fa nangke ommo yeneni ka kupu mi yeneni.
Ka yene fei yake ki ompla wongke yukaine meme ese ki kakle kone fori mo sa ki ese woluporo.
30 Mee,
auna yeneni namo pai yufla ommo mingklari yeneni pai nu pinmana fa narainene rokoi,
wu yolowi kore moile,
ka yene yoprine bulmakau uporo ka woluporoye wu.’