Jisas pai waiye mow e Farisi wongke
14
Sabat wongke,
Jisas pai wo ompla mow e iramana wongke e nu Farisi.
E wu waiye mow namo,
nu farisi kosamo nuru ommo mingklari e wu yangkeye mow namo.
2 Mana wongke merew wunini popongko wi waiye ekrene Jisas.
3 Ka Jisas yarile nu Farisi ka nu uma e namale lo nanrona,
“Ese uporo e mone memplekuru nu uma e nenrinine kaire e Sabat wee onne?”
4 Ka nu fei nire mi wongke wu.
Nanrona fane Jisas mew raune mana e nale papri popoku,
yemplekuru wu ka yawane pai.
5 Ka Jisas yarile nu nanrona “Le wongke e pone,
auna wunini wee bulmakau firalo mii pulale e kaire Sabat,
ese yene waiye yuruye nro wee wampane nro yene ese pai ka yeingke wu yeri riri?”
6 Ka nu fi nireni mi plol wongke wu.
Jisas yire nanrona mana yire waiye yukaine kongkom aure wu ese yumaralo wone se
7 E wu yuru nu uma e noloni fa no ommo painri naine sia e nu uma wamfafai neri risi ka wu yirengkle nu mi riri:
8 “E mana wongke youw pone paipi kola wamo e pin yane mana nemnuꞌpune,
pone fa paipi ka pai sia e neri risi.
E fika,
nu uma e nuna noula wamo rikepone pone ese nai sia namo,
e kola ripile yireli nu noloni.
9 Se,
mana e isi youw yenyane polopipe namo ese yirewi yene rona,
‘Yene yane sia namo pai mana mee.’
Ka yene ese sem wamo ka pai waiye sia e neri kumale.
10 Nanrona e nu nouw yene pai kola wo ommo,
yene pai waiye sia e neri kumale,
e kola ripile yolowi,
wu ese yireni yene nanrona,
‘Konmana,
yene wi wai koii uporo mee.’
Wu yangke nanrona yene ese yem noula wamo nama e nu pinuma e nainene kola namo.
11 Nu uma e nereri noula noneni God ese yumaro nu panro.
Ka nu uma e fei nereri noula e none God ese yangke nu noula wamo.”
Mone e mangke uporo nu uma ese fi name ommo kore
12 Ka Jisas yireni mana e isi youwye wu paiye mow wunini nanrona,
“E yene yangke kola wamo wongke,
yene e fei youw fori yeneni,
ka yene inomranimpi ka nu ori oikenra e yene ka nu uma e nunari romaula mingklari e nane yene naine.
Le yene yangke rona,
nu re ese nouw yene kore e nu nangke kola.
13 E yene yangke kola wamo,
yene ese yumale nu uma e ommo onnele,
nu uma e merew fafaire,
nu uma e rew kurili ka nu uma e nama wowole.
14 Nu uma namo e fei nangke kola ka nouw yene kore.
Nanrona fane yene woluporo,
e fika ingke God ese yawe yene ompla kore,
e nu uma e naine uporo nama e God e rili pu ese nemei kore.”
Mi riri e kola wamo
(Matyu 22.2-14)
15 E wongke e none naine none plau Jisas,
yupu mi e Jisas yireye,
ka yireni Jisas nanrona,
“Nu pinuma fopi naine ka none ommo kingdom e God e woluporo,
e fika God ese saimoyale nu.”
16 Ka Jisas yireni wu nanrona,
“Mana wongke yire yangke kola wamo,
wu youw pinuma mingklari e noloni ka no ommo namo.
17 E wu yire yangke kola,
wu yawane mana e fa yangke ommo woneni pai yirengkle nu uma e isi wone yirengkle pu.
Ka yireli nanrona,
‘Pone polopi po,
mu mampole pu.’
18 “Ka nu uma e wu yirengkle nu namo nireni wu nanrona,
nu e nangke ommo mingklari wamo fane nu e fi painri.
Mana wongke yire nanrona,
‘Ki kem pike rola kowerme ka ki ese kaiki kuru.
Nanrona fane ki e fi kaiki.’
19 “Man wongke re yire rona,
‘Kowerme ki kem 10 pla bulmakau fane ki ese kaiki kangke ka sam kuru ommo e nu nangkene.
Nanrona fane ki e fi kaiki.’
20 “Ka wongke kore yire rona,
‘Kowerme ki kem pin,
fane ki e fi koloki.’
21 “Mana e fa yangke ommo e kola yuna mi yolowi kore ka yireni kola ripile mi namo.
Kola ripile wolpuna neni wamo ka wu yawane mana e fa yangke ommo woneni ka yireni nanrona,
‘Naminre,
yene e wampane nro pai rokoi pitirpitiri ka rokoi wamfafai e taun namo ka yuꞌpu uma e ommo onnele,
ka uma e merew rerenro ka nu e rew kurili ka nama wowole,
ka yumale yakle polopi mow kinini.’
22 “Ka mana e fa yangke ommo wunini yireni wu nanrona,
‘Manawamo,
ommo e yene yireye,
ki kangke pu,
ka mow yeneni fei yimeri.’
23 “Ka bos wunini yireni wu nanrona,
‘Yene yupone taun mee ka palo pai rokoi wamo ka rere pai nengkrele ka e yene yuru nu pinuma,
yene mi kero nu se nu e noloni mow kinini ka mow ese waingkemuru ka no ommo namo.
24 E fika,
ki kire mi alwone pone,
uma e isi ki kouw nu namo,
nu e fi no ommo rola kinini.’ ”
Mana yire waiye yukaine disaipol wu ese yangke ommo naimele
(Matyu 10.37-38)
25 Nu pinuma mingklari nane Jisas painri ka Jisas yensona ka yirengkle nu nanrona:
26 Mana e yolowi ki ka wolyapa ki nro,
ka fei wolyapa moka nangka e woneni,
puraure,
manefe ka pinefe woneni ka wone.
E onne,
sa wu e fi waiye yukaine disaipol kinini.
27 Le mana fei yongkole ilo kruse woneni ka yupene ki,
wu re e fi waiye yukaine disaipol kinini.a
28 “Le pone wongke yire yeꞌre mow angkren wongke fa nu uma ese naine ka nurune ommo wunini,
mana namo ese kosamo waiye ka yuru romaula woneni ese resukru mow namo wee,
onne?
29 E wu yokle ilo nro ka wu fei yeꞌre mow pekimo,
uma mingklari ese nuru mow namo ka nu ese ouwnire wu.
30 Nu ese nokomi wu nanrona,
‘Mana namo yeꞌre mow,
ka wu fei yeꞌre pekimo.’
31 “Le king wongke yupu mi rona king wongke ese yane nopu,
wu e pai waiye ka yapu rokoi rongkele ese wu yumale 10, 000 iim uma woneni painri nakle 20, 000 iim uma e king wongke nopu.
32 Le wu namale nanrona wu ese fei yopu,
sa wu ese yawale nu uma painri king wongke namo,
wu nayeye amon sa nu ese nuka mi fa e fei nopu.
33 Nanrona fane,
le pone wongke fei kuma yane ommo mingklari e wone,
wu e fi waiye disaipol kinini.
Jisas yire mi riri e sol yupone kire wunini
(Matyu 5.13; Mak 9.50)
34 “Sol sa ompla uporo.
Le kiꞌre wunini pekimo,
sa ese mone mangke kire wunini yolowi rongkele?
35 Solb nanrona ese fei uporo ommo nengkrele.
Ka ese fei menru plau bulmakau pon,
ka nenru ompla nomu e nengkrele sa onne.
Nanrona fane mone e mingkirpanro.
“Mana e ripi plau sa yupu mi namo.”