Jisas yali ommo 4,000 uma
(Matyu 15.32-39)
8
E taim namo,
pinuma mingklari wamo noloni ka nemnoku nainene kore.
Ka ommo ploli e fa nonene sa onnele.
Nanrona fane Jisas youw disaipol woneni noloni ka wu yirengkle nu nanrona,
2 “Ki samo wolkaure nu pinuma wamo.
Ki kakle nu maime kaire plainrikera ka mee nu fi nuna ompla wongke fa nu ese no.
3 Le ki fi kali ommo fa none ka ki kawale nu painri sa plai e nu ese nama kaka ka firipanro rokoi.
Plai e nu namo,
mokoi nunini sa amon feifei.”
4 Ka disaipol woneni nemei narine wu kore nanrona,
“Koii mee uma onnele!
Ka mu ese mapu ommo pei ka male uma mingklari namo?”
5 Ka Jisas yarile nu kore nanrona,
“Pone puna bret mingklari wee?”
Ka nu nire mi nanrona,
“Mu muna 7pla bret nro nainene.”
6 Wu yirengkle pinuma mingklari ese nai pike namo ka wu yem 7pla bret namo ka yire tenkyu God ka wu yekri bret.
Ka,
wu yaliye nu disaipol ese nepinali pinuma mingklari namo.
Ka nu disaipol nupene mi wunini.
7 Nu nuna firala aula plainrane nro.
Ka Jisas yire tenkyu God e firala namo,
ka yireni nu disaipol woneni ese nepinali nu pinuma.
8 Nu pinuma none pai ka nu rengki wamo ka ommo ploli sa nanaine.
Nu disaipol nemnoku ommo ploli namo ka naile panro 7pla nekela yimeri.
9 Ka namba e nu uma fopi nainene ka nonene namo sa resukru 4,000pla pinuma.
Se Jisas yawale nu painri.
10 Ka faflai nro,
Jisas yakle disaipol woneni namo,
nulpanri bot ka painri mokoi wongke nu nouw nanrona Dalmanuta.
Nu uma nire nuru mirakel
(Matyu 16.1-12)
11 Plai e nu Farisi noloni plele Jisas ka nu nane wu nopu mi.
Nanrona fane nu karnarine wu ese yangke mirakel wongke yolo heven e fika nu wola nanrona nu sa resukru ese rarnane wu fa e yuku alele nanrona wu seke yolowi God.
12 Jisas anine ka wu yire nanrona,
“E fikami ka nu uma e pike mee noloni mi kero nire nuru mirakol?
Ki kire mi alwone pone nanrona,
ese onnele.
Ki ese fi kangke ommo namo nananrona pone uma e pike naminre ese puru.
Onnele!”
13 Ka wu yupone nu ka pai yulpari bot fa yakle disaipol woneni ese painri kore mokoi repo e fun Galili.
Yis e nu Farisi ka e Herot
14 Nu disaipol e Jisas samo wolnumaro fi nuꞌpu bret plai kore ese resukru nu none.
Nu nuna bret wokera nro waiye bot noneni.
15 Ka Jisas yire mi alele nu nanrona,
“Pone poo.
Pone ese samo purupe yis e nu Farisi ka yis e Herot.”
16 Ka nu nopro mi iplele none kore ka nire nanrona,
“Mone bret onnele,
nanrona fane wu yire mi namo.”
17 Jisas namale mi nunini ka wu yirengkle nu nanrona,
“E fikami ka pone ke popro mi pone kore ka pire pone bret onnele?
Pone fi nama freingkyane ka re pone fi namale wee?
Ka poneni sa nro kero wamo fane?
18 Pone uma e nama plau,
ka nama poneni fei samo yuru ommo wee?
Pone uma e ripi plau ka ripi pone fei samo pupu mi wee?
Pone ro wolpumaro ommo pu wee?
19 E ki kekri 5pla bret ka pone pepi nu 5,000pla uma none namo,
nekela hamaspla sa pone paile ommo ploli nainene namo?”
Ka nu nire mi nanrona,
“12pla nekela yimeri.”
20 Ka Jisas yarile nu kore nanrona,
“E ki kekri 7pla bret ploli ka pone pepali 4,000pla uma namo ka nu rengki ka bret plai sa nanaine,
pone paile nekela hamaspla yimeri?”
Ka nu nireni wu kore nanrona,
“7pla nekela yimeri.”
21 Ka wu yarile nu nanrona,
“Ka pone fi saimo namale ompla namo wee?”
Jisas yemplekuru mana namawowo e Betsaida uporo kore
22 Jisas yakle disaipol woneni namo noloni taun Betsaida ka uma plai numane mana wongke nama wowo noloni plele wu ka narine plau wol naure fa Jisas ese mew yaune wu.
23 Jisas yuna mew wunini ka yumane wu painri naine as amon e mokoi namo,
ka wu rofoyefu nama wowo e mana namo ka wu mew yaune wu ka yarine wu nanrona,
“Yene ese yuru ommo wee onnele?”
24 Ka mana nama wowo namo yinrapari riri ka yireni Jisas nanrona,
“Yei,
ki kuru uma.
Ka nu ke yukaine ilo poinpanrene.”
25 Ka Jisas mew yoku nama wunini kore.
Ka taim namo nama wunini freingkyane ka samo yuru ommo.
26 Ka Jisas yireni wu ese pai mow wunini ka wu re yire mi kero wu nanrona,
“Naminrele yene ese fi pai kore mokoi Betsaida ka yuru pinuma mingklari nanri.”
Pita yire mi alwone nanrona Jisas wu sa Krais
(Matyu 16.13-16; Luk 9.18-20)
27 Jisas yakle nu disaipol woneni nemei ka painri mokoi e nainene ekrene e taun Sisaria Filipai.
Ka e nu painrine rokoi namo,
Jisas yarile nu disaipol woneni nanrona,
“Pone pire ki,
nu uma fa nire ki sa fina?”
28 Ka nu disaipol nireni wu kore nanrona,
“Plai fa nire nanrona yene sa Jon E Baptais.
Ka plai fa nire yene profet Elaija.
Ka plai fa nire nanrona yene sa profet wongke e isi.”
29 Ka Jisas yarile disaipol woneni nanrona,
“Ka pone sa pire ki sa fina?”
Ka Pita yire wu kore nanrona,
“Yene sa Krais.”
30 Ka Jisas yali nu mi kero nanrona,
“Pone ese fi pireni mana wongke e mi mee.”
Jisas yopro mi e wu ese ri ka yemei kore
(Matyu 16.21-28; Luk 9.22-27)
31 Ka e kaire namo,
Jisas yopro yukule nu disaipol woneni eni mingklari ingke nemei wu.
Wu yoprongkle nu nanrona,
“Auna e Mana ese yungkam eni mingklari ka nu iramana,
ka nu bikpris e tempol,
ka nu tikse e lo ese samo kuma nane wu wamo.
Ka uma ese nufu wu ri ka kaire plainrikera se,
wu ese yemei kore.”
32 Wu samo yeingkyane mi alele namo nu.
Ka Pita yumane wu painri repo ka wu yenre Jisas.
33 Ka Jisas yensona ka yuru nu disaipol plai namo ka yenre Pita ka yireni wu nanrona,
“Satan,
yene yimaine ki!
Ki kire alwone yene,
e fika yene fi wolaye ommo e God,
wolpuna e yene sa wolaye ommo e mana nro.”
34 Ka Jisas youw nu disaipol nakle nu uma mingklari namo noloni wu ka yirengkle nu nanrona,
“Mana yire yupene ki,
ese wolyumaro wone ka yongkole kruse woneni ka yupene ki.
35 Le mana yukaire laip woneni,
sa laip woneni ese fafaile.
Ka le mana fi yukaire laip woneni ka yupene ki ka wolrufu miuporo,
sa laip wunini ese samo uporo ka waiye nanrona.
36 Le mana yunari ommo mingklari e pike namo,
ka ingke ommo namo ese nangke wu pekiyi nro,
ommo mingklari e pike ese nangke ommo fika uporo wu?
37 Mi nomu e ki kire namo sa nanrona,
mana ese fi yem ompla wongke ka yane God ese yem laip ese samo waiye nanrona nanrona.
38 E pike naminrele nu uma mingklari fa samo kuma nane God ka nangke nale plai fi uporo nama e God,
ka nale fafaile namo e nu nangke namo samo yisiyori nu ka yangke nu naine faifaile yukaine nu uma fa pamokne.
Le mana wongke sem ki ka mi kinini,
Auna e Mana re ese sem mana namo taim e nu holi ensel ka nu ese noloni plau glori e Aina wunini namo.”