Lo e God rikepone ira e mana
(Matyu 15.1-20)
7
Nu Farisi nakle nu tikse plai e lo e taunwamo Jerusalem noloni Jisas namo,
nane Jisas nemnokune.
2 Ka nu nuru plai e nu disaipol woneni none plau mew kiina nama e God.
Namo e fika,
nu fi nupene nale fa naklele mew noneni se sa no ommo
3 E fika,
nu Farisi ka nu Juda namo fa nupene nale e flili noneni,
nu ese fi no ommo e nu fi naklele mew noneni.
4 E nu painri maket ka noloni kore,
nu e fi no ommo paila nu naklele mew noneni.
Nu fa nupene lo mingklari plai plau e nu flili noneni,
sa nanrona,
nu ese naklele kap ka mangkam,
dis ka koii e nu fa naine ka none ommo.
5 Nanrona fane nu Farisi ka nu tikse e lo namo narine Jisas nanrona,
“E fika ka nu disaipol yeneni fi nupene nale e flili moneni?
Mew nunini kiina nama e God ka nu nonene ommo.”
6 Ka Jisas yire kore nu nanrona,
“Profet Aisaia yire mi alwone pone uma namo.
Pone uma ira fa wongkwongkeni,
nanrona fane wu yeꞌre mi nanrona,
‘God yire nanrona,
“Uma namo fa karnosinane ki reꞌfa nro,
ka wolpuna nunini sa waiye amon ki.
7 Nanrona fane e fika nu fa nosinane ki?
Nu fa nukule nu uma lo e nu uma nro.” ’ ”
8 “Pone pupone lo e God ka pone puna nale ka kero e mana nro.”
9 Ka Jisas yirengkle kore nu nanrona,
“Pone samo fa pumpe lo e God ka pupene rokoi poneni.
10 Moses yire nanrona,
‘Yene ese yangke nale uporo yene aina ka ama yeneni.’
Ka ‘fina fa yire mi fafaile nangka ka moka wunini,
pone ese pufu wu ri.’
11 Ka,
pone fa pire nanrona,
‘Le mana wongke yumplewa fi fa yuruye nangka ka moka woneni,
sa wu ese yireni wuyane nanrona,
“Ommo mingklari kinini namo,
ki kire kane pai God.a” ’
12 Nanrona fane taim namo ka pai,
pone fa mi paure wu fa yuru nangka ka moka woneni.
13 Ka nale e pone fa pupene nale e pone pem nu flili e oiy isi,
fa yangke pone purule mi e God pai amone.
Ka pone fa pangke nale mingklari yukaine namo.”
Ommo fa yangke nu uma kiina nama e God
14 Jisas youw pinuma mingklari fopi e nemnoku nainene namo ese nalnoloni ekrene wu ka wu yirengkle nu nanrona,
“Pone mingklari ese samo pupu mi mee ki ese kopro ka pem nomu e mi mee.
15-16 Ompla fika e naine moile ka mana yuꞌpu panri naine wolpuna e mana namo,
ompla namo fi yangke mana kiina nama e God,
onnele.
Ka,
ommo e naine wolpuna e mana ka nolo moile namo,
plai e ommo namo sa fa yangke mana kiina wamo nama e God.b”c
17 Ka e wu yoprongkle nu pinuma pekimo,
wu yupone nu ka paipari mow monre.
Ka e taim namo,
disaipol woneni narine wu ese yirengkle nu nomu e mi riri namo.
18 Ka wu yirengkle nu nanrona,
“Pone fi pem nomu e mi kinini wee?
Ommo fika e nene moile ka yene wo o yaikowo,
ommo namo ese fi yangke yene kiina nama e God.
19 Ompla namo fi fa palo waiye wolpuna e mana,
onnele.
Ompla namo fa waiye puna ka fa yolo moile rokoi e fa naile pon.”
Ka mi plola namo Jisas yopro alele mone nanrona ommo wongkwongkeni mingklari fa none namo,
God yuru ompla nanrona sa namkire nama e wu.
20 Ka Jisas yirengkle kore nu nanrona,
“Ommo fika e nene mana ka yolo moile namo,
ommo namo ese yangke mana kiina nama e God.
21 Ommo fika e waiye wolpuna e mana ommo namo e yereryane mana ese yangke nale yukaine,
nale pamok,
peki yuꞌpu,
yufu mana ri,
wola fafaile,
22 nampalo ka,
nale wongkwongkeni fafaile,
nale fa karnire,
wewela ka fongkrolene,
wolpuna fafaile,
yoko mi uma plai,
nereri noula noneni,
nale fa naraine riri nro.
23 Nale fafaile wongkwongkeni namo fa naine mana ka yolo moile ka yangke mana kiina nama e God.”
Pin e distrik Fonisia e provins Siria fa bilipim Jisas
(Matyu 15.21-28)
24 Jisas yemei ka pai mokoi wongke ekrene taunwamo nu nouw Tair.
Wu pai waiye mow wongke,
ka wu yumplewa fa nu uma ese fi namale nanrona wu e waiye mow namo.
Ka wu fi peki waiye,
onnele.
25 Pin wongke fa samo wolyane wamo nona wonenei e opola fafaile fa konraloye wu.
Ka e pin namo yupu mi nanrona Jisas sa waiye mow namo,
wampane nro wu pai plele Jisas ka yekri fufula ekrene rew e wu.
26 Pin namo fi Juda.
Uma mingklari woneni namo,
fi namale mi e God.
Nu nem wu distrik Fonisia e provins Siria.
Ka wu fa yopro mi “Grik.”
Wu yire mi kero Jisas ese yuꞌpole opola fafaile fa yeye mela pin woneni namo.
27 Ka Jisas yire kore wu nanrona,
“Mone ese mali ommo kongkom no se.
Fi uporo e mone mem ommo e nu kongkom ka mingkirpanro pala.d”
28 Ka pin namo yire kore Jisas nanrona,
“Manawamo,
pala nanerine angkrumoile e tebol nonene ommo rola e kongkom nangkle ka firipanro angkrumoile e tebol.”
29 Ka Jisas yire wu kore nanrona,
“Mi yene yireye namo,
sa alwone wamo.
Nanrona fane yene ese pai kore mow yeneni.
Opola fafaile namo fa yisiyori mela pin yeneni namo,
yupone wu ka pai pu.”
30 Pin namo,
pai kore monre ka yuru mela pin woneni namo,
samo wile koii woneni ka opola fafaile namo yupone wu ka pai.
Jisas yemplekuru mana e refkungku ka ripi uku
(Matyu 15.29-31)
31 Jisas yemei ka yupone koii e taun Tair,
ka pai distrik e taun Saidon.
Ka wu pai mokoi plola e Dekapolis,
ka pai plele fun wamo Galili.
32 Ka mokoi namo,
uma plai nongkole mana wongke e ripi uku ka fi samo yopro mi namo noloni Jisas.
Ka nu nire plau wolyaure Jisas ese mew yaune mana namo sa wu ese uporo kore.
33 Ka Jisas yumane wu ka yane painri naine amon e uma plai namo,
ka wuyane nro nainene.
Ka wu yina mewmempi plainre wunini pai ripi pulale plainren e mana namo.
Se wu rofoyefu mew woneni ka yoku nongkora e mana namo.
34 Ka Jisas yinra pari heven ka yiyene wiin kero ka yire mana namo nanrona,
“Efata.”
Nomu e mi namo “Efata” sa nanrona,
“Ripi ka reꞌfa yeneni sa uporo kore.”
35 Ka wampane nro,
mana namo ripi ka reꞌfa wunini uporo kore ka wu samo yopro mi.
36 Ka Jisas mi yaure uma mingklari nuru ommo namo ese fi nopro mi uma plai e ompla namo isi wu yangke namo.
Wu yopro mi mingklari wamo ese mi yaure nu ese fi nopro mi e ompla namo.
Ka nu neingkyane mi ka uma mingklari nupu.
37 E uma mingklari nupu mi e ompla wu yangke namo,
nu mi onnele.
Ingke se,
nu nire mi nanrona,
“Ommo mingklari wongkwongkeni wu yangke namo,
wu fa samo yangke uporo.
Wu fa yemplekuru nu uma ripi uku fa nupu mi ka uma reꞌfa kungku fa nopro mi kore.”