Jisas yawale nu 72 uma painri
10
Se,
Manawamo yuꞌpu 72 uma kore ka wu yawale plain plainren risi painri taun ka mokoi e wone yire paiye.
2 Ka wu yirengkle nu nanrona,
“Ommo mingklari e nengkrele sa punone pu,
ka nu uma e fa naurerene,
sa fei mingklari fa nuꞌpu.
Nanrona fane pone parine Manawamo e ommo e nengkrele namo,
sa wu e yawale nu uma painri naurere ommo woneni.
3 Pone paipi!
Pupu,
ki kawale pone paipi yukaine sipsip aure,a
paipi koii e ampala fa nainene.
4 Pone e fi pungkam ommo e fa nailene romaula poneni,
pone pungkam ompoi ka pungkam sandel poneni.
Ka pone re ese fei pakle uma popro mi e pone paipipe rokoi.
5 “Le pone paipi papri mow wongke,
emen plau pone ese pire nanrona,
‘Uma e mow mee ese waiye woluporo!’
6 Le mana e mow namo woluporo yeye wu,
wu ese yem mi e pone pirepe.
Le onnele,
mi e pone pirepe ese wi kore pone.
7 Pone ese paipe mow namo nro,
po ka paikolpo ommo fika e nu nape pone,
e fika mana e yangke ommo namo ese yem ommo resukru ommo e wone yangkeye.
Pone fa papri mowmow.
8 “E pone paipi taun wongke ka nu uma woluporo pone,
pone po ommo fika e nu nape pone.
9 Pone pemplekuru nu uma e nenrinine nemei uporo,
ka pirengkle,
‘Kingdom e God yolowi ekrene pone.’
10 Le pone paipi taun wongke ka nu fi woluporo pone,
paraipe rokoi e nu ka pire nanrona,
11 ‘Pike roli e taun poneni yangkaro rew munini,
mu ese melefu pike roli e nenene rew,
e mukune pone rona pone fei wolyapa mi e God.
Pone e kosamo namale ommo mee,
kingdom e God yolowi ekrene pu.’
12 Ki kire mi alwone pone nanrona,
ingke God ese yali eni pai nu uma e taun Sodom,b
ese fi wamo yukaine eni e nu pinuma e taun namo ese nungkam.
Nu pinuma e fi nemplesoro namo ese wolnaure wamo
(Matyu 11.20-24)
13 “Pone pinuma e taun Korasin ka taun Betsaida,c
pone poo,
eni ese yemei pone.
E fika,
mirakol ki kangke namo,
la mana wongke isi pai yangke mirakol namo taun Tair ka Saidon,d
sa nu pinuma ese nemplesoro wolpuna e none ka nafram ampori ka naine ekrene niꞌpi kuse
14 God ese roinsa eni e nu uma mingklari e taun Tair ka Saidon sa fei wamo yukaine eni ese pone pungkam.
15 Ka pone uma e taun Kaperneam,
nu ese nereri pone papri heven,
alwone wee?
Es onne!
Pone ese paplo koii e uma rili panrone.
16 “Mana e yupu mi poneni,
sa yupu mi e ki,
ka mana e kuma yape pone,
sa kuma yake ki.
Ka mana e kuma yake ki,
sa kuma yaꞌne God,
fina e yawane ki koloki.”
Nu 72 mana noloni kore
17 Se 72 uma namo fa noloni kore,
ka nu woluporo wamo ka nireni Jisas nanrona,
“Manawamo,
nu opola re nupu mi e mu,
e mu mouw noula yeneni.”
18 Ka Jisas yirengkle nu nanrona,
“Ki kuru Satan firyolo yukaine nemi e rariye,
yolo nemi riri.
19 Pupu.
Ki kape pone kero fa punrama umele,
elmane,
ka pumaro mana yire yangke fafaile pone,
ka ompla wongke ese fei yangke fafaile pone.
20 Nu opola nupu mi poneni,
pone fi woluporope,
pone e samo woluporo God e reꞌre noula poneni waiye heven.”
Jisas woluporo ka tenkyu God
21 E Jisas yireli nu,
Holi Spirit yangke Jisas wolpuna uporo wamo ka yesapu nanrona,
“Ki kereri yene Aina,
Manawamo e heven ka pike,
e fika nu uma e namale ka nu uma e ikakro uporo,
yene pekyenru ommo mingklari nu,
ka yene yukule nu uma e fa naine yukaine kongkom aure.
Yei!
Aina.
Yene yire yangke ommo namo wolpuna yeneni,
sa yangke kei.”
22 Ka Jisas yirengkle nu 72 disaipol nanrona,
“Ommo mingklari Aina yake ki pu.
Mela namo,
mana wongke fei namale wu,
Aina nro.
Aina re,
mana wongke fei namale wu,
Auna nro ka nu uma e Auna yuꞌpuye,
ese yopro yukule ka nu e namale Aina.”
23 Ka wu yensona yuru nu disaipol woneni nro ka yireli nu mi nanrona,
“Nu uma nuru ommo yukaine pone purupe,
nu woluporo wamo.
24 Ki kirepi pone nanrona,
e fika,
nu profet ka nu king mingklari nire nuru ommo yukaine e pone purupe ka nu fi nuru.
Ka nu nire nupu mi yukaine e pone pupupe ka nu fi nupu.”
Mi riri e man uporo e distrik Samaria
25 Kaire wongke,
mana wongke e namale lo yemei ka ifle yarine Jisas mi wongke.
Ka wu yarine Jisas nanrona,
“Tikse,
ki ese kangke ompla fika uporo se ki kaike uporo nanrona nanrona?”
The Good Samaritan (Luk 10:25-37)
26 Ka Jisas yireni wu nanrona,
“Nu e neꞌre mi fika wiye lo?
Yene yuru ka yene yem mi nomu rongkele?”
27 Ka mana namo yireni Jisas nanrona,
“ ‘Manawamo wu God yene,
yene e samo wolyane wu wamo puna yene ka spirit yene ka kero yene ka wola yene.’
Ka,
‘Yene samo wolyali nu uma e naine ekrene yene wamo yukaine yene fa wolayaneye yene kore.’ ” e
28 Ka Jisas yireni wu nanrona,
“Mi e yene yireye namo sa won alwone.
Nanrona fane,
yene yangke rona sa yene e waiye nanrona nanrona.”
29 Ka man e namale lo yangke nanrona sa nu uma e nuru wu uporo wamo,
ka wu yarine Jisas nanrona,
“Fopi sa naine ekrene ki?”
30 Ka Jisas yireni wu nanrona,
“Mana wongke waiye taun wamo Jerusalem ka palo pai taun Jeriko,
ka uma fafaire e pekinaine rokoi nuꞌpuni ommo.
Ka ningko ommo papri wunini ka nufu wu pai la wu yire yangke le ri ka nupone waiye ka painri.
31 Pris wongke palo paiyiye rokoi namo,
ka wi koii e mana waiyeye namo,
nama pitiri nro yuru ka pai rokoi repo ka pai kei.
32 “Ka Livai wongke re yolowi rokoi namo,
wu yolowi koii e mana waiyeye,
nama pitiri nro yuru ka pai rokoi repo ka pai kei.
33 Ka mana wongke e distrik Samariaf re yolowi rokoi namo,
wu yolowi koii e mana yire yangke riye namo.
Ka wu yuru wu,
wu wolyaure wamo mana namo.
34 Wu pai ekrene mana namo ka yasiro ori e wu,
yaiku wel ka wain palo muꞌku e wu ka yukaro.
Ka wu yereri mana namo ka yaune donkig e wone ka yurune pai hotel wongke ka saimoro wu.
35 Ningkinama wu yem romaula silva plainrane ka yaꞌne hotel ripile ka yireni wu nanrona,
‘Yene ese saimoro wu.
La e yene yem romaula yeneni ka saimoro wu,
e ki koloki kore,
ki e kawe yene romaula e yene saimoro mana namo.’ ”
36 Ka Jisas yarine mana e namale lo kore nanrona,
“Nu uma plainrikera namo,
fina sa wi ekrene ka yangke uporo mana namo e isi uma nufune?”
37 Ka mana e namale lo yireni Jisas nanrona,
“Mana e wolyaureye ka saimo yaneye.”
Ka Jisas fa yireni wu nanrona,
“Nanrona fane yene re pai yangke nale nanrona.”
Jisas waiye mow e Marta yane Maria
38 E Jisas yakle nu disaipol woneni painri,
nu painri mokoi wongke.
Mokoi namo pin wongke noula Marta woluporo Jisas e yolowi mow woneni.
39 Marta rino wokera noula wunini Maria.
Maria wi waiye ekrene rew e Manawamo ka yupu mi e wu yoproye.
40 Marta sa nawolaye ommo mingklari e wone yangke fane wu wi Jisas ka yireni wu nanrona,
“Manawamo,
yene fei wolpalo ki wee?
Ki kangke ommo Maria yupone ki,
ka ki konekere nro kangke ommo fa none,
yene yireni wu wi mewmew plau.”