Jesús wʉajnachaemtaspox, achan toꞌaspon choef mowapi nakolax toꞌaliajwapon Dios pejtemplobatat
20
Asamatkoi Dios pejtemplobaxot Jesús jiw naewʉajan chimiawʉajan,
jiw bʉꞌweyaxaesox.
Ja-aech wʉt,
sacerdotespaklochow,
judíos chanaekabʉanapi,
ancianosbej,
mox soepapi Jesúsxot.
Lucas 20.1-19
—¡Xanal najʉm-amde ampox!
¿Achan pijaxtatkat xam toꞌam choef mowapi nakolaliajwa Dios pejtemplobaxot?
¿Achankat xam toꞌa japox isliajwam?
—aechi Jesúsliajwa.
3 Jesús jʉmnot wʉt,
jʉm-aechon japiliajwa:
—Xan-is xamal asax wʉajnachaemsaxaelen.
¡Pe xamal majt najʉmnoꞌe!
4 ¿Achankat Juan toꞌas jiw bautisaliajwa?
¿Dioskaton toꞌas?
O,
¿jiwkaton toꞌas?
—aech Jesús.
5 Jesús japox jʉm-aech wʉt,
japi nakaewa najʉm-aechna:
“Jʉmnoch wʉt,
‘Juan Dios toꞌas jiw bautisafʉlaliajwa’ —tis wʉt,
Jesús nakjʉmchiyaxael:
‘¿Ma-aech xotkat xamal Juan jʉm-aechpoxan naexasis-emil?’
—nakchiyaxael xatis Jesús.
6 Jʉmtis wʉtlax:
‘Juan jiwkal toꞌas jiw bautisafʉlaliajwa’ —tis wʉt,
puexa jiw xatis iaꞌtat nakdadaepaxael nakmatkaejabaliajwa,
palalaxael xoti xatisliajwa.
Jasox isaxaeli xatisliajwa,
puexa jiw jʉm-aech xot Juanliajwa:
‘Diachwʉajnakolax Juan,
jiw bautisan,
jʉm-aech Dios pijaxtat’ —aech xot jiw Juanliajwa” —na-aechi nakaewa.
7 Samata,
japi jʉmnot wʉt,
jʉm-aechi Jesúsliajwa:
—Jalape.
Xanal matabija-enil,
achan Juan toꞌas jiw bautisaliajwa —aechi.
8 Do jawʉt,
Jesús jʉm-aech japiliajwa:
—Xan-is xamal jʉmchiyaxinil,
achan pijaxtat xan japox isx —aech Jesús.
Pamak babejchowpox
9 Jesús pejme jʉm-aech,
jiw naewʉajan wʉt ampawʉajan:
“Aton mʉtha uva.
Do jawʉx,
uvalulpijin asew jiw wʉljaet,
japi jiw piach tataeflaliajwa japon pej-uvalul,
japon ajil wʉt.
Japi bʉꞌpat wʉt,
jʉm-aechon:
‘Xan piach kijlaxaelen asatʉajnʉlel atʉaj.
Xan tajwʉlela tajlul chiekal xamal nawetataeflaxaelam’ —aech uvalulpijin.
Do jawʉx,
chijialison japatʉajnʉ poxade.
10 Do baxael,
uva foi wʉt,
uvalulpijin kaen pamakan toꞌa pej-uvalul wetataeflaspi poxadin,
wewʉljaesliajwaspon uva.
Uvalul tataefʉlpi jaelti uvalulpijin pamakan.
Jawʉt baeson.
Do jawʉt,
toꞌason ke-etat nawiasliajwa pejpaklon poxade.
11 Do jawʉx,
uvalulpijin toꞌa asan pamakan.
Uvalul tataefʉlpi babejjamechan jʉm-aech japonliajwa.
Do jawʉt,
japonbej baes.
Ke-etat nawiasax toꞌason pejpaklon poxade.
12 Do pejme jawʉt,
uvalulpijin asan pamakan pejme toꞌa.
Japonbej baes wʉt,
xakolbalas.
Do jawʉt,
uvalul tathoetlel foꞌason.
13 “Dolisdoꞌ,
uvalulpijin nejchaxoel wʉt,
jʉm-aechon:
‘¿Machiyaxaelenkat xan?
¡Aa,
xan matabijtax isaxaelenpox!
Taxʉlan toꞌaxaelen,
xabich nejxasinkaxpon.
Japi bej nawesitaeyaxaelbejpi taxʉlan’ —aech uvalulpijin,
nejchaxoel wʉt.
14 Do jawʉt,
paxʉlan toꞌalison japi poxade.
Uvalul tataefʉlpi taen wʉti,
japon atʉaj fʉlaen wʉt,
nakaewa najʉm-aechi:
‘¡Taeꞌnik uvalulpijin paxʉlan!
Asamatkoi pax tʉp wʉt,
japon pijax wʉlxael ampa-uvalul.
Samata,
xatis amwʉt ampon boesaxaes,
uvalul wajaxkal namanaliajwa’ —na-aechi nakaewa uvalul tataefʉlpi.
15 Do jawʉt,
paxʉlan pat wʉt uvalulxot,
jaeltason.
Jawʉt juchpon uvalulxot.
Do jawʉx,
boesaspon” —aech Jesús jiw naewetiliajwa.
Do jawʉt,
Jesús wʉajnachaemt jiw naeweti japawʉajan.
Jʉm-aechon:
“¿Achaxkat xamal nejchaxoelam uvalulpijinliajwa?
¿Achaxkat japon isaxael uvalul wetataeflaspiliajwa?
16 Uvalulpijin chakifʉlaeyaxael beliajwapon uvalul wetataeflaspi.
Do pejme asew tataeflax toꞌaxaelon” —aech Jesús.
Naeweti matabija wʉt Jesús jʉm-aechpox,
japi jʉm-aech Jesúsliajwa:
—¡Dios jasox nej is-eleꞌ xanalliajwa!
—aechi.
17 Jesús chiekal natachaemt wʉt,
jʉm-aechon japi jiwliajwa:
—Xamal chiekal matabijam,
Dios pejjamechan,
chajia lelspox,
jʉm-aech wʉt,
jʉm-aechox xanliajwa:
‘Jiw iaꞌba is wʉt,
kaet iaꞌtliajwa nakaewa najʉm-aechi:
“Ampot iaꞌt chaemil” —na-aechi nakaewa.
Samata,
mastaenipot.
Do jawʉx,
asan aton japot iaꞌ fit wʉt,
jʉm-aechon:
“Ampot iaꞌt,
puexa iaꞌxot kaes pejme pachaem tʉaksoꞌpijtaliajwa,
ba chiekal mamnikaliajwa” —aechon’ —aech Dios pejjamechan xanliajwa,
chajia lelspox.
18 Jiw fiap wʉt kaet iaꞌt pinjitxot,
xabich naxthuya wʉt,
naxkolaxaelbejpi.
Pelax kaet iaꞌt,
pinjit,
athʉlelsik jiw matwʉajasik jopik wʉt,
japi jiw matkaeyaxaes iaꞌt.
Jasoxtat xamal xan nanaexasis-emilpim xabich nabijasaxaelam,
xan nanejwesla xot.
That toep wʉt,
Dios xamal pomatkoicha kastikaxael infiernoxot —aech Jesús.
19 Jesús japox jʉm-aech wʉt,
sacerdotespaklochow,
judíos chanaekabʉanapibej,
nejchaxoel:
“Jesús japawʉajan jʉm-aech wʉt,
nakjʉm-aechon xatisliajwa” —aechi,
nejchaxoel wʉt.
Samata,
jawʉt japi jaelsasiapi Jesús.
Pe jaels-eli Jesús,
pejlewla xoti jiwliajwa.
Impuesto mosaxliajwa, Jesús wʉajnachaemtaspox
20 Asamatkoi sacerdotespaklochow,
judíos chanaekabʉanapibej,
toꞌapi jiw maliach tataeflaliajwapi Jesús.
Japi pat wʉt Jesúsxot,
me-ama pachaem wʉt,
kabʉan-aechi.
Samata,
japi chiekal naewet,
Jesús jʉm-aech wʉt babejjamechan gobiernoliajwa,
jawʉt tasalaliajwapi Jesús gobernador pejwʉajnalel,
Jesús kastikaliajwasbej.
Lucas 20.20-26
—Jiw chanaekabʉanan,
xanal matabijtax xam jiw naewʉajnampox diachwʉajnakolax.
Kejila naewʉajnam wʉt,
chiekal naewʉajnam.
Najʉpanaewʉajnam kejila,
kemaenkpibej.
Xam naewʉajnam japi jiw chiekal duilaliajwa,
me-ama Dios nejxasink.
22 Samata,
xanal chiekal matabijasian.
¿Pachaemkat xanal mosliajwan impuesto Roma tʉajnʉpijiw tatoꞌlan?
—aechi,
xapaejt wʉt Jesús.
23 Pe Jesús matabijt japi xapaejtaspox.
Samata,
jʉm-aechon:
24 —¡Kaekafef nawexalaeman na-itpaeliajwam!
—aech Jesús.
Jawʉt kaekafef,
pawʉlox denario,
xalaenlisi Jesúslel.
Jawʉt Jesús wʉajnachaemt wʉt,
jʉm-aechon:
—¿Achan pejxu-aelkat ampakafeftat?
¿Achan pejwʉlbejkat ama lelspox ampakafeftat?
—aech Jesús japiliajwa.
Japi jʉmnot wʉt,
jʉm-aechi:
—Roma tʉajnʉpijiw tatoꞌlan,
japon pejxu-ael,
japon pejwʉlbej —aechi.
25 Do jawʉt,
Jesús jʉm-aech:
—¡Roma tʉajnʉpijiw tatoꞌlan,
japon pejewpi moꞌe,
impuesto motam wʉt!
Pe Dios pejewpi,
japox xatis Dios xanaboejaspoxan,
wajnejxasiyaxbej,
japoxanlap xatis Dios chaxduiyaxaes —aech Jesús.
26 Jesús chiekal jʉmnot xot,
Jesús bʉꞌwʉajanjil jiw pejwʉajnalel tasalaliajwas.
Samata,
maliach tataeflaspi asbʉan jʉmch boejlach nejchaxoelanuili.
Asamatkoi mat-eyaxaespox tʉpi pejme duilaliajwa
27 Saduceos asanejchaxoelaxan.
Japi jʉm-aech:
“Jiw tʉp wʉt,
kaelel chiekal napelt.
Asamatkoi mat-eyaxisal pejme duilaliajwa” —aechi asbʉan jʉmch.
Do asamatkoi wʉt,
asew saduceos pati Jesús taeliajwa.
Jesúsxot wʉt,
kaen japixot ampawʉajan jʉm-aech Jesús jʉmtaeliajwa:
Lucas 20.27-47
28 —Jiw chanaekabʉanan,
Moisés chajia lelpox jʉm-aech:
‘Aton,
pijowpon,
japon aton tʉp wʉt naxʉwla-elaxtat pijowxot,
tʉpon pakoewan naman wʉt,
japon japow fisaxael naxʉwlaliajwapon japowxot,
pakoewan tʉponliajwa’ —aech Moisés chajia lelpox.
29 Kaen aton seis pakoew.
Matxoelapijin pawis fit.
Pe baxael,
japon tʉp xijilaxtat.
30 Do jawʉt,
wʉchakalpijin,
japow fit,
pakoewan naetʉpow.
Pe baxael,
japonbej tʉp xijilaxtat.
31 Do jawʉtbej,
trespijin,
japow fit.
Japow fit wʉton,
japonbej baxael tʉp xijilaxtat.
Do jawʉx,
cuatro namapi,
japibej jasoxtat natoet nakjiyaxtat japowtat.
Pe chinax kaen japowxot naxʉwla-el.
32 Do baxaelbej,
japowbej taxdukakolaxtat tʉp.
33 Puexa japi poejiw nakjiya japowtat.
Baxael,
tʉpi mat-eyaxaes wʉt,
sietepixot,
¿achankat pijowaxael japow?
—aech saduceos.
34 Jesús jʉmnot wʉt,
jʉm-aechon:
—Ampathatat poejiw wathoꞌ not.
35 Dios makanochpi pasliajwa japonxotse,
jaxotse pomatkoicha duilaxaeli.
Japi tʉp wʉt ampathatat,
asamatkoi mat-eyaxaesi pejme duilaliajwa Diosxotse.
Mat-eyaxaes poejiw,
wathoꞌbej.
Pe japi pejme nakjiyaxil.
36 Diosxotse wʉt,
japi pejme tʉpaxil.
Me-ama Dios pej-ángeles,
jachiyaxaeli.
Dios taen wʉt japi jiw,
me-ama paxi wʉt,
jachiyaxaelon,
mat-ia xoton japi pejme duilaliajwa.
37 Moisés chajia lel Dios jʉm-aechpox tamdadusaxtat boejtachnaechxot.
Samata,
Moisés lelpoxtat matabijas tʉpi mat-esaxaespox pejme duilaliajwa.
Moisés lelpoxtat jʉm-aech Dios jʉm-aechpox:
‘Xanfʉk Abraham,
Isaac,
Jacobbej,
japi pejDiosnan’ —aech Dios.
Samata,
xatis chiekal matabijas,
baxael tʉps wʉt pejme duilaxaespox.
38 Xatis chiekal matabijas chajia tʉpi,
japi napels-el.
Samata,
Abraham,
Isaac,
Jacobbej,
japi amwʉtjel nakiowa duilafʉl Diosxotse.
Puexa Dios pejjiwspis tʉps wʉt ampathatat,
duilafʉlaxaes Diosxotse —aech Jesús saduceosliajwa.
39 Asew,
judíos chanaekabʉanapi,
jʉm-aechi Jesúsliajwa:
—Jiw chanaekabʉanan,
xam chiekal jʉmnotam saduceos —aechi.
40 Do jawʉt,
saduceos padala pejme wʉajnachaemsliajwapi Jesús.
Cristo, rey David pamonpox, pe Cristo paklonbej Davidliajwa
41 Jesús wʉajnachaemt wʉt,
jʉm-aechon judíos chanaekabʉanapiliajwa:
—¿Ma-aech xotkat jiw matabija-el Cristo Dios paxʉlan?
Diachwʉajnakolax jiw jʉm-aech wʉt,
jʉm-aechi Cristoliajwa:
‘Cristo nalaelt wʉt,
japon rey David pamonaxael’ —aechi.
Pe Cristo rey David pamonkala-el.
Pe Cristo asanbej.
42 David chajia lel wʉt Salmosfʉtat,
jawʉt pajut jʉm-aechon Cristoliajwa:
‘Dios jʉm-aech wʉt tajpaklonliajwa,
jʉm-aechon:
“¡Ekde tajpoklalel jiw tatoꞌlaliajwam,
xan sʉapich!
43 ¡Ekde jaxot,
hasta xan malechaxaelen wʉt nadaelmajiw!
Malechax wʉt,
japi jiw xam namakjiwaxael tatoꞌlaliajwam” —aech Dios tajpaklonliajwa’ —aech rey David,
chajia lel wʉt Cristoliajwa.
44 David chajia jʉm-aech Cristoliajwa:
‘Tajpaklon’ —aechon.
Samata,
Cristo diachwʉajnakolax David pamonkala-elon.
Pe pejpaklonbejpon —aech Jesús,
pajut najʉm-aech wʉt,
jiw chiekal matabijaliajwa japon Dios paxʉlanpon.
Jesús jʉm-aechpox jiw chiekal matabijaliajwa judíos chanaekabʉanapi pejbʉꞌwʉajanpoxliajwa
45 Puexa jiw jaxot naewet wʉt,
Jesús jʉm-aech pejnachalaliajwa:
46 “¡Chiekal taem!
Me-ama judíos chanaekabʉanapi,
¡xamal nabej ja-aecheꞌ!
Japi nejxasink pakchowaxan,
naxoeyaxan,
jiw chiekal sitaeliajwas.
Nejxasinkbejpi jiw moichiliajwas xabich sitaeyaxtat,
paklowaxthialaxanxot xabʉꞌkʉlas wʉt.
Judíos naewʉajnabachanxot wʉt,
wʉajna tʉachalakaxan nuili paklochow kaes sitaenspiliajwa,
japoxantat japi chalak puexa jiw taeliajwas.
Ja-aechbejpi,
fiestaxot wʉt.
Nejxasink chalakaliajwa kaes pachaempoxantat.
47 Japibej naekichachajba wathoꞌ,
pamaljiw naetʉpspi,
natkowaliajwa japi wathoꞌ pejew.
Do jawʉx,
judíos naewʉajnaba lowpi Dios piach kawʉajnaliajwa,
asew jiw jʉmchiliajwasi:
‘Diachwʉajnakolax ampi xabich pachaem’ —chiliajwasi.
Samata,
Dios xabich kastikaxaesi” —aech Jesús.