Jesús patpox Jerusalén paklowaxxot
11
Jesús,
pejnachala sʉapich,
pat mox Jerusalén paklowaxxot.
Japi pat Betfagé paklowaxachxot,
Betania paklowaxachxotbej.
Jaxot olivonaechan nuil mʉaxleltat.
Jaxot Jesús kolenje pejnachalan wʉajna toꞌachon.
Marcos 11.1-14
—¡Xabʉaꞌde japapaklowaxach wʉajnadexot!
Jaxotde paꞌmach wʉt,
taeyaxaelam bur jeltiꞌsan,
wʉkeꞌtaspon.
Japabur chinax aton tʉa-eka-esalfʉk.
¡Jolde!
Do jawʉt,
¡nawebʉflaeman!
3 Jaxotpijin xamal wʉajnachaemt wʉt,
jʉm-aech wʉton:
‘¿Ma-aech xotkat bur joltam?’
—aech wʉt,
¡jʉm-amo japon aton:
‘Wajpaklon weweꞌpas bur.
Toet wʉt,
pejme wiasaxaelon’ —amo japon aton!
—aech Jesús,
bʉxtoꞌa wʉt kolenje pejnachalanliajwa.
4 Do jawʉt,
japi kolenje fʉlaechlisi.
Patlisi japapaklowaxachxot.
Jaxot bafafatabijla bur jeltiꞌsan taeni.
Bur keꞌtas nʉamtat.
Do jawʉt,
joltipon bʉflaeliajwadin Jesús poxadin.
5 Do jawʉt,
jaxot nuili jʉm-aechi japiliajwa:
—Xamal,
¿achaxkat isam?
¿Ma-aech xotkat bur joltam?
—aechi.
6 Jesús pejnachala jʉmnot wʉt,
jʉm-aechi Jesús bʉxtoꞌaspox.
Do jawʉt,
jaxot nuili,
japi tapaei Jesús pejnachala bur bʉflaeliajwa Jesús poxadin.
7 Do jawʉx,
japi bʉꞌpat wʉt Jesúsxot,
tam-owalisi thʉch naxoeipoxan Jesús tʉa-ekaliajwa.
Do jawʉt,
Jesús tʉa-eklison bur.
8 Jesús fʉlaeyaxaech poxade,
xabich jiw thʉch naxoeipoxan baꞌa nʉamtat.
Asew japixot cha-aelnaedalan tasiapa,
pa-ʉafpi,
owaliajwa nʉamtat Jesús pejwʉajnalel,
sitaen xoti Jesús.
9 Asew japixot matxoela fol.
Asew jiw wʉchakal folbej.
Puexa jiw nejlasfʉl,
xabich nejchachaemil xoti Jesúsliajwa.
Nejlasfʉl wʉt,
jʉm-aechfʉlbejpi:
—¡Aleluya!
¡Ampon fʉlaenpon Dios pijaxtat!
Samata,
¡xabich pachaempon!
10 ¡Pachaempon,
Israel tʉajnʉpijiw pejrey!
¡Ampon rey chiekal tatoꞌlaxael!
Me-ama wajwʉajnapijin,
rey David,
chiekal tatoꞌal wʉt,
jachiyaxaelon.
¡Dios,
athʉpijin,
japon xabich pachaem!
—aechfʉli.
11 Jasoxtat Jesús pat Jerusalén paklowaxxot.
Dios pejtemplobaxot lech wʉt,
puexa chiekal taenpon.
Do jawʉt,
Jesús nawiat,
doce pejnachala sʉapich,
Betania paklowaxach poxade,
xabich tuila xotlisox.
Jesús jʉm-aechpox, higonae baechjil wʉt
12 Kandiawa wʉt,
Jesús,
pejnachala sʉapich,
nakola Betania paklowaxachxot.
Do jawʉt,
Jesús litaxaela.
13 Atʉajxach wʉt,
taenon higonae xabich pa-ʉafpox.
Samata,
mox taechon,
pabaech wʉt tʉsliajwa,
xaeliajwabej.
Pe mox taech wʉt,
japanae xabich pa-ʉafkal,
naebaech naboesmatkoiya-el xotfʉk.
14 Do jawʉt,
Jesús jʉm-aech higonaeliajwa:
—¡Kaes naboesaximil!
¡Jiw kaes nejbaech xaeyaxilbej!
—aech Jesús.
Pejnachala jʉmtaen Jesús jʉm-aechpox.
Jesús toꞌapox nakolaliajwa Dios pejtemplobatat mowapi, wʉajtibej
15 Do jawʉt,
Jesús,
pejnachala sʉapich,
pejme pat Jerusalén paklowaxxot.
Do jaxotde wʉt,
Jesús low Dios pejtemploba.
Jaxot Jesús taen jiw mowapi,
wʉajtibej.
Jesús toꞌa japi jiw nakolaliajwa tathoetade.
Plata xanafokpi pejmesan wefʉliaxabapon.
A-u mowapi,
japi pejtʉa-ekaxan wewʉlaejababejpon.
Marcos 11.15-33
16 Jesús tapae-elbej jiw xalaeliajwa pejew Dios pejtemplobatathoetlel.
17 Naewʉajan wʉt,
jʉm-aechon japi jiwliajwa:
—Dios pejjamechan,
chajia lelspox,
jʉm-aech Dios jʉm-aechpox pejtemplobaliajwa:
‘Tajba kawʉajnaba wʉlxael,
pothatapijiw xan nakawʉajnaliajwa’ —aech Dios jʉm-aechpox.
Pe xamallax Dios pejtemploba kethaka pejba padofam —aech Jesús.
18 Sacerdotespaklochow,
judíos chanaekabʉanapibej,
japi jʉmtaen Jesús jʉm-aechpox.
Samata,
nakaewa najʉm-aechi:
“¿Machiyaxaeskat Jesús boesaliajwas?”
—na-aechi nakaewa.
Pe paklochow pejlewla Jesúsliajwa,
puexa jiw xabich nejxasink xot Jesús naewʉajanpoxan.
19 Tuila wʉt,
Jesús Jerusalén paklowaxxot nakolt,
pejnachala sʉapich.
Higonae majowpox
20 Kandiawasap wʉt,
Jesús,
pejnachala sʉapich,
xena wʉt,
taenlisi higonae.
Japanae chiekal majow.
Tathinbej chiekal majow.
21 Pedro nejchafaet Jesús jʉm-aechpox higonaeliajwa.
Samata,
jʉm-aechon Jesúsliajwa:
—Jiw chanaekabʉanan,
¡natachaemde higonae!
Kaeliw xam jʉm-ampox higonaeliajwa,
diachwʉajnakolax ja-aechlisox.
Amwʉtjel chiekal majow —aech Pedro.
22 Do jawʉt,
Jesús jʉm-aech pejnachalaliajwa:
—¡Dios chiekal xanaboejim japon xamal kajachawaesliajwa!
23 Diachwʉajnakolax xamal Dios chiekal xanaboejam wʉt,
jʉm-am wʉt ampamʉaxliajwa:
‘¡Napiaꞌe amxot mar poxamik!’
—am wʉt,
japamʉax napiasaxael jaxot.
Pelax xamal kolenejchaxoelaxam wʉt Diosliajwa,
ja-am wʉt,
japamʉax napiasaxil.
24 Samata,
xamal jʉm-an.
Dios kawʉajnam wʉt,
¡chiekal xanaboejim japon wʉljowampoxan xamal chaxduiliajwa!
Jasoxtat kawʉajnam wʉt,
diachwʉajnakolax Dios xamal chaxduiyaxael wʉljowampoxan.
25 Xamal Dios kawʉajnam wʉt,
nalala wʉtfʉk asan aton ispoxliajwa,
¡xamal japon aton beltaem!
Ja-am wʉt,
waj-ax Dios,
athʉpijin,
xamal beltaeyaxaelbej babijaxan isampoxanliajwa.
26 Xamal beltae-emil wʉt asew jiw,
Diosbej xamal beltaeyaxil babijaxan isampoxanliajwa —aech Jesús pejnachalaliajwa.
Jesús wʉajnachaemtaspox, achan toꞌaspon choef mowapi nakolax toꞌaliajwapon Dios pejtemplobatat
27 Jesús,
pejnachala sʉapich,
pejme pati Jerusalén paklowaxxot.
Do jawʉt,
Dios pejtemplobaxot laelpi.
Jaxot sacerdotespaklochow,
judíos chanaekabʉanapibej,
ancianosbej,
japi mox soepa Jesúsxot.
28 Do jawʉt,
Jesús wʉajnachaemtas wʉt,
jʉm-aechi:
—¿Achankat xam toꞌam choef mowapi nakolax toꞌaliajwam Dios pejtemplobatat?
—aech paklochow,
wʉajnachaemt wʉti Jesús.
29 Jesús jʉmnot wʉt,
jʉm-aechon:
—Xan-is xamal wʉajnachaemsaxaelen asax.
¡Majt chiekal najʉmnoꞌe!
Chiekal najʉmnotam wʉt,
do jawʉx,
xamalbej jʉmnosaxaelen xan nawʉajnachaemtampox.
30 ¿Achankat Juan toꞌas jiw bautisaliajwa?
¿Dioskaton toꞌas?
O,
¿jiwkaton toꞌas Juan bautisaliajwa jiw?
¡Najʉmnoꞌe!
Chiekal najʉmnotam wʉt,
do jawʉt,
xamal jʉmchiyaxaelen,
achan natoꞌapoxtat japox xan isx —aech Jesús paklochowliajwa.
31 Do jawʉt,
japi nakaewa najʉm-aechi:
“Xatis jʉmtis wʉt:
‘Juan Dios toꞌas jiw bautisafʉlaliajwa’ —tis wʉt,
Jesús nakjʉmchiyaxael:
‘¿Ma-aech xotkat xamal naexasis-emil Juan jʉm-aechpox?’
—nakchiyaxael Jesús xatisliajwa.
32 Jʉmtis wʉtlax:
‘Juan jiw toꞌas jiw bautisafʉlaliajwa’ —tis wʉt,
japox jʉmtis wʉt,
jiw xabich palalaxael,
puexa jiw jʉm-aech xot pejnejchaxoelaxantat Juanliajwa:
‘Diachwʉajnakolax Juan,
jiw bautisan,
jʉm-aech Dios bʉxtoꞌaspoxan’ —aech xoti” —aech paklochow nakaewaliajwa.
Samata,
japi paklochow xabich pejlewla jʉmchiliajwa japox Jesúsliajwa.
33 Do jawʉt,
paklochow jʉmnot wʉt,
jʉm-aechi:
—Jalape.
Xanal matabija-enil,
achan Juan toꞌas jiw bautisaliajwa —aechi.
Do jawʉtbej,
Jesús jʉm-aech:
—Xan-is xamal jʉmchiyaxinil,
achan natoꞌa xan japox isliajwan —aech Jesús paklochowliajwa.