Pamak babejchowpox
12
Jesús jiw naewʉajan wʉt,
wʉajantat jʉm-aechon:
“Kaen aton uva mʉtha.
Do jawʉx,
uvalul chaxajajial iaꞌtat.
Isbejpon uva-ʉfan jukax uvalulxot.
Do jawʉx,
isbejpon japalultat cha-aelbach,
athʉpox,
uvalul tataeflaliajwa,
uva foi wʉt.
Do jawʉt,
uvalulpijin asew pamakjiwliajwa wʉljaet pejlul piach wetataeflaliajwas,
japon pejwʉlela.
Japi bʉꞌpat wʉt,
jʉm-aechon:
‘Xan fʉlaeyaxaelen asatʉajnʉlel atʉaj.
Xan ajinil wʉt,
xamal tajlul chiekal nawetataeflaxaelam’ —aech uvalulpijin.
Do jawʉx,
chijialison.
Marcos 12.1-17
2 “Asamatkoi,
uva foi wʉt,
uvalulpijin kaen pamakan toꞌa,
japon wʉljaesliajwa uva pejpaklonliajwa.
Do jawʉt,
fʉlaenlison uvalul poxadin.
3 Pe pat wʉton uvalul tataefʉlpixot,
japi jaelt fʉlaenpon uva wʉljaesliajwa.
Do jawʉt,
baespon.
Do jawʉtbej,
ke-etat nawiasax toꞌaspon.
4 Do pejme uvalulpijin asan pamakan toꞌa.
Jawʉt japon fʉlaenlison uvalul poxadin.
Pat wʉton uvalul tataefʉlpixot,
japi jaelt fʉlaenpon uva wʉljaesliajwa.
Jawʉt xabich matnaeboesaspon.
Jʉmtisbejpon babejjamechan.
Do jawʉt,
ke-etat nawiasax toꞌason.
5 Do pejme uvalulpijin asan pamakan toꞌa japon wʉljaesliajwa uva.
Dolison,
pat wʉt uvalul tataefʉlpixot,
uvalul tataefʉlpi boesa fʉlaenpon uva wʉljaesliajwa.
Do jawʉt,
uvalulpijin asew pamak toꞌa.
Japi pat wʉt uvalul tataefʉlpixot,
japibej baes.
Asew japixot tʉp,
fʉlaeni uva wʉljaesliajwa.
6 “Do jawʉt,
uvalulpijin kaen wenamans toꞌaliajwa.
Wenamanspon uvalulpijin paxʉlan,
xabich nejxasinkpon.
Do jawʉt,
japon taxdukakolaxtat toꞌapon paxʉlan.
Uvalulpijin nejchaxoel paxʉlanliajwa:
‘Uvalul tataefʉlpi,
japi taen wʉt taxʉlan nawesitaeyaxaelipon’ —aechon uvalulpijin,
nejchaxoel wʉt.
7 Pe uvalul tataefʉlpi taen wʉti uvalulpijin paxʉlan,
nakaewa najʉm-aechi:
‘¡Taeꞌnik uvalulpijin paxʉlan!
Asamatkoi pax naetʉp wʉt,
japon pijax wʉlxael,
uvalul.
Samata,
ma amwʉt boesaxaeson uvalul wajaxkal chiekal namanaliajwa’ —na-aechi nakaewa.
8 Uvalulpijin paxʉlan pat wʉt japixot,
japi jaeltason.
Do jawʉtbej,
boesaspon.
Jawʉt jutipon uvalulxot” —aech Jesús jiw naewetiliajwa.
9 Do jawʉt,
Jesús wʉajnachaemt jiw naeweti japawʉajan.
Jʉm-aechon:
“¿Achaxkat xamal nejchaxoelam uvalulpijinliajwa?
¿Achaxkat isaxael uvalulpijin uvalul tataefʉlpiliajwa?
Xan tajut jʉm-an.
Uvalulpijin chakifʉlaeyaxael uvalul tataefʉlpi kastikaliajwa,
beliajwabejpon.
Do pejme asew jiw tataeflax toꞌaxaelon uvalul” —aech Jesús.
10 Jesús pejme jʉm-aech:
—Xamal bej xaljowambej Dios pejjamechan,
chajia lelspox,
jʉm-aech wʉt xanliajwa:
‘Jiw iaꞌba is wʉt,
kaet iaꞌtliajwa nakaewa najʉm-aechi:
“Ampot iaꞌt chaemil” —na-aechi iaꞌtliajwa.
Do jawʉx,
asan aton japot iaꞌt fit.
Japon jʉm-aech japot iaꞌtliajwa:
“Ampot iaꞌt,
puexa iaꞌxot,
kaes pejme xabich pachaem taxsoꞌtpijtliajwa,
ba chiekal mamnikaliajwa” —aechon.
11 Samata,
japox xabich pachaem xatisliajwa’ —aech Dios pejjamechan,
chajia lelspox,
xanliajwa —aech Jesús,
jiw naewʉajan wʉt.
12 Do jawʉt,
paklochow pajut matabija,
Jesús jiw naewʉajan wʉt uvalul tataefʉlpiliajwa,
japox jʉm-aechon paklochowliajwa.
Samata,
jawʉt Jesús jaelsasias bʉflaeliajwas,
Jesús jiw jebatat jeliajwas.
Pe paklochow pejlewla jiwliajwa.
Samata,
Jesús waelti tamach.
Do jawʉt,
fʉlaechlisi pejlel.
Impuesto mosaxliajwa, Jesús wʉajnachaemtaspox
13 Do jawʉx,
paklochow toꞌa Jesús poxade,
kaesʉapich fariseos,
Herodes pejmʉtpijiwbej,
Jesús asax jʉm-aech wʉt,
tasalaliajwapi Jesús.
14 Do jawʉt,
pat wʉti Jesúsxot,
jʉm-aechi:
—Jiw chanaekabʉanan,
xanal matabijax xam diachwʉajnakolax chiekal jʉm-am.
Xam bʉxdala-elbej diachwʉajnakolaxpox naewʉajnaliajwam puexa jiwliajwa,
nejlewla-el xot jiw nejchaxoelpox xamliajwa.
Xam naewʉajnam diachwʉajnakolaxpox jiw chiekal duilaliajwa,
me-ama Dios nejxasink.
Samata,
xanal matabijasian.
¿Pachaemkat xatis mosliajwas impuesto Roma tʉajnʉpijiw tatoꞌlan?
¿Mosaxaeskat?
O,
¿mosaxilsalkat?
—aech paklochow,
wʉajnachaemt wʉti Jesús.
15 Jesús pajut matabijt tasalaxaespox,
jʉmnot wʉton asaxtat wʉajnachaemtaspoxliajwa.
Samata,
Jesús jʉm-aech japiliajwa:
—¿Ma-aech xotkat xan naxapaejtam?
¡Nawexalaeman kaekafef xan taeliajwan!
—aech Jesús.
16 Do jawʉt,
xalaenlisi kaekafef Jesúslel.
Jawʉt Jesús wʉajnachaemt wʉt,
jʉm-aechon:
—¿Achan pejxu-aelkat ampakafeftat?
¿Achan pejwʉlbejkat ama lelspox ampakafeftat?
—aech Jesús japiliajwa.
Do jawʉt,
japi jʉmnot wʉt,
jʉm-aechi:
—Roma tʉajnʉpijiw tatoꞌlan,
japon pejxu-ael,
pejwʉlbej —aechi.
17 Do jawʉt,
Jesús jʉm-aech:
—¡Roma tʉajnʉpijiw tatoꞌlan,
japon pejewpi japon chaxduim,
motam wʉt impuesto!
¡Pe Dios pejewpi,
Dios chaxduim!
—aech Jesús.
Do jawʉt,
japi jiw xabich natachaemana,
Jesús chiekal jʉmnot xot.
Asamatkoi mat-eyaxaespox tʉpi pejme duilaliajwa
18 Saduceos asanejchaxoelax.
Japi jʉm-aech:
“Jiw tʉp wʉt,
kaelel chiekal napelt.
Asamatkoi mat-eyaxisalbej pejme duilaliajwa” —aechi asbʉan jʉmch.
Do asamatkoi,
kaesʉapich saduceos pat Jesús taeliajwa.
Pat wʉti,
japi wʉajnachaemt Jesús.
Marcos 12.18-44
—Jiw chanaekabʉanan,
Moisés chajia lelpox jʉm-aech:
‘Aton pijow naetʉp wʉt naxʉwla-elaxtat,
patʉpan pakoewan naman wʉt,
japon japow fisaxael.
Ja-aech wʉt,
japon naxʉwlaxael japowtat pakoewan tʉponliajwa’ —aech Moisés chajia lelpox —aechi Jesúsliajwa.
20 Do jawʉt,
japi kaes jʉm-aech:
“Kaen aton seis pakoew.
Matxoelapijin pawis fit.
Pe baxael japon tʉp naxʉwla-elaxtat pijowxot.
21 Do jawʉtbej,
wʉchakalpijin japow fit.
Pe baxael japonbej tʉp naxʉwla-elaxtat japowxot.
22 Puexa japon pakoew,
seispi,
nadaepti nakjiyaxtat japowtat.
Pe chinax kaen japixot naxʉwla-el japowtat.
Do jawʉx,
taxdukakolaxtat japowbej tʉp.
23 Tʉpi mat-ias wʉt pejme duilaliajwa,
jawʉt sietepixot,
¿achankat pijowaxael japow?”
—aech saduceos Jesúsliajwa.
24 Jesús jʉmnot wʉt,
jʉm-aechon saduceosliajwa:
—Xamal japox jʉm-am wʉt,
nejmach jʉm-am,
matabija-emil xot Dios pejjamechan,
chajia lelspox,
jʉm-aechpox.
Matabija-emilbej Dios xajʉppox puexa isliajwa.
25 Tʉpi mat-ias wʉt japi duilaxael Diosxotse.
Jaxotse poejiw,
wathoꞌbej,
pejme nakjiyaxil.
Me-ama Dios pej-ángeles nakjiya-el,
jachiyaxaelbej,
tʉpi mat-ias wʉt pejme duilaliajwa.
26 ¿Xamalkat xaljoe-emil Moisés chajia lelpox,
tʉpi mat-eyaxaespoxliajwa pejme duilaliajwa?
Japawʉajanxot Dios chajia jʉmdʉt wʉt,
jʉm-aechon boejtachnaechxotdin.
Jawʉt Dios jʉm-aech tʉpi mat-eyaxaespoxliajwa pejme duilaliajwa.
Do jawʉt,
Dios jʉm-aech Moisésliajwa:
‘Xanfʉk amwʉtjel Abraham,
Isaac,
Jacobbej,
japi pejDiosnan’ —aech Dios.
27 Samata,
Dios naexasiti matabija,
asamatkoi tʉp wʉti pejme duilaxaelpox.
Japi chiekal matabijabej,
chajia wʉajna tʉpi,
japi napels-elpox.
Samata,
Abraham,
Isaac,
Jacobbej,
japi amwʉtjel duilafʉl Diosxotse.
Xamal saduceos chiekal matabija-emil,
jʉm-am wʉt:
‘Jiw tʉp wʉt,
chiekal kaelel napelt.
Tʉpi mat-eyaxisal pejme duilaliajwa’ —am wʉt,
—aech Jesús saduceosliajwa.
Dios pejtatoꞌlaxanxot, masox kaes pejme pachaem
28 Jesús chiekal jʉmnot wʉt,
saduceos,
fariseosbej,
jawʉtbej kaen judíos chanaekabʉanapon jʉmtaen.
Samata,
japonbej mox soepan Jesúsxot wʉajnachaemsliajwa.
Do jawʉt,
jʉm-aechon:
—Jiw chanaekabʉanan,
Dios xabich tatoꞌal jiw naexasisliajwa.
¿Achatatoꞌlaxxotkat kaes pejme pachaem Dios tatoꞌalpox jiw naexasisliajwa?
—aech judíos chanaekabʉanan.
29 Jesús jʉmnot wʉt,
jʉm-aechon:
—Ampawʉajan kaes pejme pachaem jiw chiekal naexasisliajwa:
‘Israel pamojiwam,
¡jʉmtaem chiekal!
WajDios,
japon kaen wajpaklokolan.
30 Samata,
¡chiekal nejxasinkde Dios wajpaklokolan!
¡Xabich nejxasinkdebej Dios puexa nejnejchaxoelaxtat!
¡Xabich tanbichfʉldebejpon puexa nejpamamaxtat!’
—aechox.
31 Asawʉajan,
wʉchakal pejwʉajan,
Dios tatoꞌalpox,
japox jʉm-aechbej:
‘¡Chiekal nejxasinkde jiw!
Me-ama xam najut nanejxasinkam wʉt,
¡ja-amde asew jiwliajwa!’
Kolewʉajan,
Dios tatoꞌalpoxan,
japawʉajanxot,
do kaes asawʉajan ajil,
xabich kaes pachaemwʉajan —aech Jesús judíos chanaekabʉananliajwa.
32 Do jawʉt,
judíos chanaekabʉanan jʉm-aech Jesúsliajwa:
—Jiw chanaekabʉanan,
xam naksiyam diachwʉajnakolaxpox.
Dios pejjamechan,
chajia lelspox,
jʉm-aech:
‘Dios kaen.
Kaes asan Dios ajil’ —aechox.
33 Diachwʉajnakolax pachaem xatis Dios chiekal nejxasinkaliajwas puexa wajnejchaxoelaxtat.
Pachaembej Dios tanbichliajwas puexa wajpamamaxtat,
nejxasinkas xot Dios.
Pachaembej asew jiw nejxasinkaliajwas.
Me-ama xatis wajut nanejxasinkas wʉt,
jachiyaxaes asew jiwliajwa.
Japoxanlap xabich pachaem xatis isliajwas.
Japoxlap kaes pejme pachaem Diosliajwa,
naexasich wʉt japoxan.
Me-ama choef chabowaspoxan altarmatwʉajtat Dios pej-ofrendaliajwa,
jachi-el japoxan —aech judíos chanaekabʉanan.
34 Jesús jʉmtaen wʉt judíos chanaekabʉanan chiekal jʉmnotpox,
jawʉt Jesús jʉm-aech judíos chanaekabʉananliajwa:
—Xamfʉk kaesʉapich weweꞌp chiekal naexasisliajwam Dios —aech Jesús.
Dolisdoꞌ jawʉt,
jiw pejlewla kaes asax wʉajnachaemsaxtat xapaejsliajwapi Jesús.
Cristo, rey David pamonpox, pe Cristo paklonbej Davidliajwa
35 Jesús jiw naewʉajan wʉt Dios pejtemplobatat,
Jesús wʉajnachaemt wʉt,
jʉm-aechon japi naewetiliajwa:
—¿Ma-aech xotkat judíos chanaekabʉanapi jʉm-aech:
‘Cristo nalaelt wʉt,
japon rey David pamonaxael’ —aechkat judíos chanaekabʉanapi?
36 David pajut jʉm-aech wʉt Espíritu Santo pijaxtat,
jʉm-aechon Cristoliajwa:
‘Dios jʉm-aech tajpaklokolanliajwa:
“¡Ekde tajpoklalel jiw tatoꞌlaliajwam,
xan sʉapich!
Ekam wʉtfʉk tajpoklalel,
xan malechaxaelen nadaelmajiw.
Malechax wʉt,
japi jiw naexasisfʉlaxael xam tatoꞌlampoxan” —aech Dios tajpaklokolanliajwa’ —aech rey David chajia lelsxot Cristoliajwa.
37 David chajia jʉm-aechbej Cristoliajwa:
‘Tajpaklokolan’ —aechon Cristoliajwa.
Samata,
Cristo,
diachwʉajnakolax rey David pejpaklokolanpon.
Pe Cristo David pamonbej —aech Jesús pajutliajwa,
jʉm-aech wʉt jiw chiekal jʉmmatabijaliajwa japon Dios paxʉlanpon.
Xabich jiw nejchachaemil,
jʉmtaen wʉti Jesús jʉm-aechpox.
Jesús jʉm-aechpox jiw matabijaliajwa fariseos, judíos chanaekabʉanapibej, pejbʉꞌwʉajanpox
38 Jesús pejme jiw naewʉajan wʉt,
jʉm-aechon:
—¡Chiekal taem!
Me-ama judíos chanaekabʉanapi,
¡nabej ja-aecheꞌ xamal!
Japi nejxasink pakchownaxoeyaxan jiw chiekal sitaeliajwas.
Nejxasinkbejpi jiw saludaliajwas xabich sitaeyaxtat,
xabʉꞌkʉlas wʉt paklowaxthialaxanxot.
39 Japi judíos naewʉajnabachantat wʉt,
wʉajna tʉachalakaxan nuilpi paklochow kaes sitaenspi chalakaliajwapitat,
japatʉa-ekaxantat japi chalak puexa jiw taeliajwas.
Ja-aechbejpi,
fiestanxot wʉt.
Japi nejxasink chalakaliajwa kaes pachaempoxantat.
40 Japi naekichachajba wathoꞌ,
pamaljiw naetʉpspi,
wenosliajwa japi wathoꞌ pejew.
Lowpi judíos naewʉajnaba piach Dios kawʉajnaliajwa,
jiw taens wʉt jʉmchiliajwas:
‘Diachwʉajnakolax ampi jiw xabich pachaem’ —chiliajwas.
Samata,
Dios xabich kastikaxaesi —aech Jesús judíos chanaekabʉanapiliajwa.
Pamal naetʉpspow, kejilpow, chaxdutpox ofrenda Diosliajwa
41 Asamatkoi Jesús mox ek ofrenda jiaxot Diosliajwa,
templobatat.
Jaxot Jesús taen,
jiw jia wʉt plata.
Xabich kimaeya plata xabich jiapi.
42 Do jawʉt,
jaxot patbej pamal naetʉpspow.
Japowbej jek kolekafef Dios pej-ofrendaliajwa.
Japakafefaex,
cobrefaex,
xabich omjillejen.
43 Jesús japox taen wʉt,
lalison pejnachala kaes moxaliajwadin japonxot.
Jaxot wʉti,
Jesús jʉm-aech pejnachalaliajwa:
—Diachwʉajnakolax xan jʉm-an.
Ampow,
pamal naetʉpspow,
xabich kejil.
Pe Dios kaes pejme nejchachaemil japow pej-ofrendaliajwa.
Japow,
me-ama kaes pejme chaxdut wʉt,
ja-aechow Diosliajwa.
Me-ama puexa asew jiw,
chaxduw wʉt,
jachi-elow japow.
44 Puexa asew jiw chaxduw ofrenda wenamaspoxantat.
Japowlax weweꞌpaspoxanliajwa,
puexa chaxdutow Diosliajwa —aech Jesús.