3 Cundɛ́ɛ ndísꞌtiī cuidado. Ndúúti ꞌdíínu nī dinuuⁿndí sa contra yeⁿꞌe ꞌaama nī, yaaꞌvi neéⁿ nī saⁿꞌā. Ndúútī chi ndaacadaami sa yeⁿꞌē nuuⁿndi yeⁿꞌē sa nadichꞌɛɛcú nī yeⁿꞌē sa. 4 ꞌÁárá chí ndɛɛ̄chɛ̄ cuuvi idinuuⁿndí sa contra yeⁿꞌe nī ꞌáámá nguuvi ní ndɛɛ̄chɛ̄ cuuvi ndaa sa nanááⁿ ndísꞌtiī ní caaⁿꞌmaⁿ sa cuuvi sá ndísꞌtiī: Ndaacadaāmí yeⁿꞌē nuuⁿndi yeⁿꞌé, tuuꞌmi ní nadichꞌɛɛ̄cu nī yeⁿꞌē sa.

5 Apóstoles caⁿꞌa yā chii yā Señor Jesús: Nꞌdiī, Señor, diíⁿ nī chi núsꞌuu cuuvi cuꞌtéénu cá ꞌnū.

6 Tuuꞌmi Jesús caⁿꞌa yā chii yā apóstoles: Ndúútí chi ndísꞌtiī duuꞌvi iꞌtéénu nī, tuuꞌmi ní vaadī iꞌteenu yeⁿꞌé nī ní tanꞌdúúcā ꞌáámá nduutí yeⁿꞌē yiīvɛ̄ ntííꞌyaá. Ní cuuvi caaⁿꞌmaⁿ nī ꞌtíícā ndúúcū yáⁿꞌá: Díí yáⁿꞌá cuvíi dí ꞌmuuⁿ ní cueⁿꞌe di ná nuūⁿnīⁿꞌyáⁿꞌā. Ní ꞌcaandiveeⁿ yáⁿꞌá miiⁿ yeⁿꞌe dii.

7 Ngaⁿꞌa Jesús: Duꞌu ndísꞌtiī ndúútī chi vɛɛ ꞌáámá mozo chi diꞌcuūndú ꞌiiti o diiⁿ sa cuidado ꞌiiti cuūchī yeⁿꞌe nī taachi nguɛɛcunée sa yeⁿꞌe campo miiⁿ, ¿ꞌáá hora mííⁿ nūuⁿ caaⁿꞌmaⁿ nī cuuvi nī saⁿꞌā?: Choꞌo di ꞌcuūndī di na mesa. 8 ¿ꞌÁá nguɛ́ɛ́ vmnááⁿ vmnaaⁿ caaⁿꞌmaⁿ nī cuuvi nī mozo miiⁿ ꞌtíícā?: Nꞌnuuⁿ di chi cheꞌe nguiīnu yú. Ní ꞌcuiinduū di yeⁿꞌé na mesa, ꞌcuiī di ní ꞌúú cuꞌú cheꞌé. ꞌCuiinu cheꞌé ꞌcuiinu cuꞌú tuuꞌmi ní dii cuuvi chéꞌe di cuꞌu di. 9 ¿ꞌÁá aama patrón ncaꞌa yā gracias mozo miiⁿ ti diiⁿ sa mandados chi cāⁿꞌa patrón yeⁿꞌē sa? Nguɛ́ɛ́ diíⁿ yā ꞌtíícā. 10 ꞌTiicá ntúūⁿ, ndísꞌtiī, taachí ꞌcuiinu diíⁿ nī tanducuéⁿꞌē ntiiⁿnyuⁿ chí ngaⁿꞌá Ndyuūs ndísꞌtiī, tuuꞌmi ní caaⁿꞌmaⁿ nī ꞌtiicā: Ndyuūs, núsꞌuu ní mozos yeⁿꞌe nī naati núsꞌuu ní diíⁿ ꞌnū dámaāaⁿ chi canee chi diíⁿ ꞌnū.

11 Taachí Jesús miiⁿ canúuⁿ yā yúúní chí cueⁿꞌe yā na yáāⁿ Jerusalén, choꞌó yā naavtaⁿꞌā yeⁿꞌe na ꞌuuvī yáⁿꞌāa chi Samaria ndúúcū Galilea. 12 Ní taachí Jesús sndaa yā ꞌáámá yáāⁿ ꞌlííⁿ snéé ndiichi saⁿꞌā chí induuti yuūtɛ̄ yeⁿꞌē sa chi ndii sa caꞌai lepra. Ndaā sa nanááⁿ Jesús miiⁿ ní chꞌɛ́ɛ́tíndii yaⁿꞌai sa. 13 Ní ꞌcai sa: Nꞌdiī, ꞌiivú Jesús, nnéé yaꞌai ꞌiinu nī núsꞌuu.

14 Taachí Jesús nꞌdiichi yā saⁿꞌā sꞌeeⁿ, tuuꞌmi ní yaaꞌvi yā: Ndísꞌtiī, cueⁿꞌe nī ní ꞌcuuⁿꞌmiⁿ nī nanááⁿ chiiduú sꞌeeⁿ. Chꞌíínú caⁿꞌa Jesús ndúúdú ꞌcūū saⁿꞌā sꞌeeⁿ ní nduuvá yeⁿꞌe sa. 15 Tuuꞌmí ꞌáámá chɛ́ɛ́ saⁿꞌā sꞌeeⁿ taachí nꞌdiichi yā chi ꞌāā nduuvá yeⁿꞌe yā, nguɛɛcunée yā ní cheⁿꞌe yā naachi canéé Jesús miiⁿ ní caⁿꞌa yuudu yā: Dɛꞌɛ̄ chúúcā chꞌɛɛtɛ Ndyuūs. 16 Ní chiintiiꞌyá yā nanááⁿ Jesús ní chi snaaⁿ na yáⁿꞌāa, ní caꞌa yā gracias ꞌiiⁿꞌyāⁿ. Saⁿꞌā miiⁿ ní ꞌáámá saⁿꞌā yeⁿꞌe yáⁿꞌāa Samaria. 17 Tuuꞌmi ní Jesús miiⁿ caⁿꞌa yā: ¿ꞌÁá nguɛɛ ndiichi saⁿꞌā chí nduūvā yeⁿꞌē sa? Ta nuuⁿ sa, ¿tii snéé sa? 18 ¿ꞌÁá nguɛɛ táámá yā chí canéé chi caaⁿꞌmaⁿ yā chi chꞌɛɛtɛ Dendyuūs? Dámaāⁿ saⁿꞌā miiⁿ chi canuuⁿ yúúní chi caꞌa sa gracias.

19 Tuuꞌmi ní Jesús caⁿꞌa yā chii yā saⁿꞌā chi ngiīta miiⁿ: Nducueeⁿ dí. Cúnaⁿꞌā di. ꞌĀā nanduuva yeⁿꞌē di caati iꞌtéénu nī.

20 Taachí ꞌiiⁿꞌyāⁿ fariseos intíínguúneeⁿ yā Jesús miiⁿ: ¿Tií cuaꞌa ndáá naachí Ndyuūs ngaⁿꞌa ntiiⁿnyúⁿ yā? Jesús miiⁿ ní nanꞌguɛɛcútaⁿꞌa yā: Naachí Ndyuūs ngaⁿꞌa ntiiⁿnyúⁿ yā nguɛ́ɛ́ ndaa tanꞌdúúcā ꞌáámá manera chi ndísꞌtiī cunee ngiinú nī yeⁿꞌē. 21 Ní nguɛ́ɛ́ ndúú ꞌiiⁿꞌyāⁿ caaⁿꞌmaⁿ ra yā ꞌtíícā: ꞌMuuⁿ canee o miiⁿ canee ti Ndyuūs ꞌāā ngaⁿꞌa ntiiⁿnyúⁿ yā nguaaⁿ ndísꞌtiī.

22 Tuuꞌmi ní Jesús caⁿꞌa yā chii yā discípulos yeⁿꞌe yā: Tiempo miiⁿ ndaa nguuvi taachi ndísꞌtiī neⁿꞌe nī snaaⁿ nī taachi canéé Saⁿꞌā chi Daiya Dendyuūs, naati nguɛ́ɛ́ snaaⁿ nī saⁿꞌā miiⁿ. 23 Ní ꞌiiⁿꞌyāⁿ caaⁿꞌmaⁿ yā cuuvi yā nduudu yaadi ndísꞌtiī: ꞌMuuⁿ canéé Saⁿꞌa chi Daiya Dendyuūs, o miiⁿ canee sa. Nguɛ́ɛ́ caⁿꞌa nī ndíí nguɛ́ɛ́ ndúú canꞌdáa nī ꞌiiⁿꞌyāⁿ cuayiivi. 24 Tanꞌdúúcā chi inaaⁿ yú chí ngéⁿꞌé ꞌcuai maaⁿ nchɛɛtɛ́ nūuⁿ ngiiyā, ꞌtiicá ntúūⁿ cuuvi taachi ꞌúú chi Saⁿꞌā chi Daiya Dendyuūs ndaá nguuvi miiⁿ. 25 Naati vmnááⁿ vmnaaⁿ ꞌúú chi Saⁿꞌā chi Daiya Ndyuūs ní neené ꞌcueenú cuuvi. Ní ꞌiiⁿꞌyāⁿ chi maaⁿ snéé iⁿꞌyeeⁿdí ꞌcūū diíⁿ yā condenar ꞌúú. 26 Tanꞌdúúcā chi canee tiempo chi ꞌāā chóꞌōo taachí canee saⁿꞌā Noé iⁿꞌyééⁿdi ꞌcūū, ꞌtiicá ntúūⁿ cuuvi tiempo yeⁿꞌē Saⁿꞌa chi Daiyā Dendyuūs taachi ndaa sa. 27 Tiempo yeⁿꞌe Noé ꞌiiⁿꞌyāⁿ sꞌeeⁿ ngéꞌe yā ngiꞌi yā ní nꞌgííndivaacu yā. Ní caꞌa yā daiya yā chí nꞌgiindivaacu ndii nguuvi chi Noé sndaá yā na arca. Tuuꞌmi ní chee taaⁿ cuūvī ní chiitu iⁿꞌyeeⁿdí ꞌcūū ndúúcū nuūⁿnīⁿ ní chꞌiī nducyaaca ꞌiiⁿꞌyāⁿ. 28 ꞌTiicá ntúūⁿ chiī tiempo chi ꞌāā chóꞌōo taachi canee saⁿꞌa Lot iⁿꞌyeeⁿdí ꞌcūū. ꞌIiⁿꞌyāⁿ sꞌeeⁿ ngeꞌe yā ngiꞌi yā. Ngai yā ní nꞌdiicui yā. Ní ngiinú yā ní idinꞌdái yā vaacu yā. 29 Taachi canꞌdaā saⁿꞌā Lot miiⁿ ná yáāⁿ Sodoma chi cheeⁿ nguuchi yaⁿꞌā ndúúcū azufre chí tuūú chí ngiichi chí yeⁿꞌe nanguuvi. Cáávā chuū chꞌiī nducyaaca ꞌiiⁿꞌyāⁿ na yáāⁿ miiⁿ. 30 ꞌTíícā cuuvi nguuvi miiⁿ taachi ꞌúú Saⁿꞌā chi Daiya Dendyuūs ndaá taama vmnéⁿꞌēe.

31 Ní nguūvī chi ndaá, taachí ꞌiiⁿꞌyāⁿ chi snée yā tiíⁿ vaꞌāī nꞌdaacā ca chi ꞌiiⁿꞌyāⁿ miiⁿ ní nguɛ́ɛ́ nchꞌéeⁿ yā ní cutaꞌa yā denduꞌū chi vɛ́ɛ́ yeⁿꞌe yā chɛɛtí vaꞌāī. ꞌTiicá ntúūⁿ ꞌiiⁿꞌyāⁿ chi snée yā cuɛɛti nꞌdaacā ca chi nguɛ́ɛ́ naⁿꞌa yā nduvaacu yā. 32 Nanꞌgáácú nī tanꞌdúúcā chí chꞌiī nꞌdaataá yéⁿꞌē saⁿꞌā Lot. 33 ꞌĀā duꞌú nūuⁿ ꞌiiⁿꞌyāⁿ chí neⁿꞌe cá yā vida yeⁿꞌe yā nguɛ́ɛ́ ti ꞌúú, dindaí yā táámá vida yeⁿꞌe yā. ꞌĀā duꞌú nūuⁿ ꞌiiⁿꞌyāⁿ chi dichííꞌvɛ yā ꞌúú ní díndaí yā vida yeⁿꞌe maáⁿ yā cucáávā ꞌúú, ní nndaacá yā táámá vida yeⁿꞌe yā.

34 ꞌÚú ngaⁿꞌá ngií ndísꞌtiī chi nguiīnū miiⁿ ꞌuuvi yā chi ndiiti yā na ꞌáámá cama, ꞌaama yā ní ndaā naáⁿ ní taama yā ní canée yā. 35 Níícú naachi ꞌuuvi nꞌdaataá daama snee ta ingúu tá, ꞌaama ta ní ndaā naáⁿ tá ní taama tá ní canee ta. 36 Naachí ꞌuūvi yā snée yā cuɛɛti, ꞌáámá yā ni ndaā naáⁿ yā, níícú taama yā ní canee yā.

37 Taachí ꞌiiⁿꞌyāⁿ sꞌeeⁿ chꞌiindiveéⁿ yā chuū itinguuneéⁿ Jesús: Señor, ¿tií cuuví chuū? Jesús miiⁿ ní caⁿꞌa yā yeⁿꞌe tiempo miiⁿ: Naachi candiití cuerpo yeⁿꞌe tináⁿꞌā, miiⁿ ní nduuvidaamá luutí ní cheꞌe tī, tuuꞌmi ní cuuví chuū.