2 Jesús ꞌcai yā ꞌáámá saⁿꞌā ꞌlííⁿ ní chꞌííndi yā saⁿꞌā ꞌlííⁿ náávtaⁿꞌa yeⁿꞌe discípulos. 3 Ní caⁿꞌa yā: Cuaacu nííⁿnyúⁿ ngaⁿꞌá ngií ndísꞌtiī. Ndúúti chi ndísꞌtiī nguɛ́ɛ́ diíⁿ nī tanꞌdúúcā ꞌáámá saⁿꞌā ꞌlííⁿ nguɛ́ɛ́ cuuvi ndaa nī naachí Ndyuūs ngaⁿꞌa ntiiⁿnyúⁿ yā na vaꞌai chɛɛti nguuvi. 4 ꞌTíícā ꞌāā duꞌú nūuⁿ ꞌiiⁿꞌyāⁿ chi ndiicúūⁿ maáⁿ yā tanꞌdúúcā saⁿꞌa ꞌlííⁿ ꞌcūū, ꞌiiⁿꞌyāⁿ ꞌcúū chi chꞌɛɛtɛ ca yā naachí Ndyuūs ngaⁿꞌa ntiiⁿnyúⁿ yā na vaꞌai chɛɛti nguuvi. 5 ꞌĀā duꞌú nūuⁿ ꞌiiⁿꞌyāⁿ chi ꞌcuaáⁿ yā ꞌáámá saⁿꞌā ꞌlííⁿ ndúúcū chi duuchí, tuuꞌmi ní ꞌcuaáⁿ yā ꞌúú.

6 Ní caⁿꞌa Jesús: ꞌĀā duꞌú nūuⁿ ꞌiiⁿꞌyāⁿ chi diíⁿ yā chí ꞌáámá chɛɛ chí nꞌgaiyáā chi iꞌtéénu yā ꞌúú dinuuⁿndí yā nꞌdaācā ca cáávā ꞌiiⁿꞌyāⁿ miiⁿ chi ꞌiiⁿꞌyāⁿ sꞌeeⁿ cāchiichí yā ꞌáámá tuūu yúúdú chí íngúú ꞌiiⁿꞌyāⁿ na daandú yā ní canuúⁿ yā ꞌiiⁿꞌyāⁿ miiⁿ naachi yáanūuⁿ yeⁿꞌe nuūⁿnīⁿꞌyáⁿꞌā ní ꞌiiⁿꞌyāⁿ miiⁿ cunꞌdáá nuúⁿ yā. 7 Dɛꞌɛ chúúcā ndaachií yeⁿꞌe ꞌiiⁿꞌyāⁿ yeⁿꞌe iⁿꞌyeeⁿdí ꞌcūū cáávā denduꞌū chi ꞌtúúcā chi diiⁿ chí cuuvá yā na nuuⁿndi. ꞌĀā vɛ́ɛ́ nūuⁿ cosas chi ꞌtíícā naati dɛꞌɛ chúúcā ndaachií yeⁿꞌe ꞌiiⁿꞌyāⁿ chi diíⁿ yā chi táámá ꞌiiⁿꞌyāⁿ cuuva yā na nuuⁿndi.

8 Ní nduuti chi taꞌa di o caꞌa di idiīiⁿ chí dinuuⁿndí nī, ꞌcaacá nī taꞌa di o caꞌa di ní divíi di. Nꞌdáacā ca chi ndaa di lóꞌō taꞌa di o lóꞌō caꞌa di na vida cueⁿꞌe daāⁿmaⁿ ní nguɛ́ɛ́ chi caⁿꞌa di ndúúcū ꞌuūvi taꞌa di o nduu ꞌuūvi caꞌa di na infierno naachí nguuchi yaⁿꞌā chí ꞌáámá cūnee. 9 Nduutí chí nduutináaⁿ di idiīiⁿ chi idinuuⁿndí di, tunꞌdáa di ní divíi di. Nꞌdaācā ca chí cunee di ndúúcū ꞌáámá nduutináaⁿ di nguɛ́ɛ́ ti chí cunee di ndúúcū nduu ꞌuūvi nduutináaⁿ di ní caⁿꞌa di ná nguuchi yaⁿꞌā chí ꞌáámá cānee cueⁿꞌe daāⁿmaⁿ.

10 Ní caⁿꞌa Jesús: Tandii ra diíⁿ nī ndúúcū mar ꞌáámá daꞌcaiyāa nꞌgaiyáā ní diíⁿ nī chi cuuvi dinuuⁿndí nī. Nguɛ́ɛ́ cunncáā diíⁿ nī yeⁿꞌē ti ꞌúú ngaⁿꞌá ngií ndisꞌtiī chi ángeles yeⁿꞌē daꞌcaīyaá snée yā ná vaꞌai chɛɛti nguuvi nanááⁿ Chiidá ni īnaaⁿ yā cucáávā daꞌcaīyaá. 11 Ti Saⁿꞌā Daiyá Ndyuūs miiⁿ ní ndaa sa chi nadinguáⁿꞌai sa chííⁿ chí níndáí.

12 ¿Dɛꞌɛ̄ inadicádiinuuⁿ ndísꞌtiī? Nduuti chi ꞌáámá saⁿꞌā vɛ́ɛ́ ꞌáámá ciento ꞌiiti cuūchī yeⁿꞌē sa ní cuuvi ndáí ꞌáámá tī ¿ꞌáá nguɛ́ɛ́ cūꞌneeⁿ sa ꞌiiti chí cuūⁿ ngɛɛcú ndítiiⁿꞌyuⁿ cuúⁿ tī ní caⁿꞌa sa cuááⁿ yiīcū miiⁿ ní cunꞌnuuⁿ sa ꞌáámá ꞌiiti chi nindáí miiⁿ. 13 Ndúúti chí ndaācā sa ꞌiiti, cuaacu nííⁿnyúⁿ ngaⁿꞌá ngií ndísꞌtiī ti yeenú taavi sa cáávā ꞌiiti chi níndai nguɛ́ɛ́ ti nduꞌū chí cuūⁿ ngɛɛcú ndítiiⁿꞌyuⁿ cuúⁿ tī chi nguɛ́ɛ́ chi nindaí tī. 14 ꞌTíícā Chiidá yú chi canée yā ná vaꞌai chɛɛti nguuvi nguɛ́ɛ́ neⁿꞌe yā chi mar ꞌáámá chi nꞌgaiyáā sꞌūuⁿ cuuvi ndáí.

15 ꞌTiicá ntúūⁿ ngaⁿꞌá ngií ndísꞌtiī: Ndúúti chi ꞌdíínū di diiⁿ sa chi nguɛ́ɛ́ nꞌdaācā ndúúcu di, cueⁿꞌe di ní ndee di ndúúcu sa nguaaⁿ maáⁿ nī yeⁿꞌe chi nguɛɛ nꞌdaācā chi diiⁿ sa. Nduuti chi cuꞌneeⁿ veeⁿ sa yeⁿꞌe di, ꞌāā nanꞌdáā nꞌdaí di ndúúcū ꞌdíínū di. 16 Naati nduuti chi nguɛ́ɛ́ cuꞌneeⁿ veeⁿ sa yeⁿꞌe di ꞌcuai di ná ꞌuūvi o ꞌiīnu ꞌiiⁿꞌyāⁿ. Ní chīi yā na ꞌuūvi yā o na ꞌiīnu yā chi ꞌcaandiveéⁿ yā tanducuéⁿꞌē chí caaⁿꞌmaⁿ di ní vɛ́ɛ́ testigos yeⁿꞌé di tanꞌdúúcā chi canéé nguūⁿ na ley. 17 Ndúúti chi ꞌdíinu di nguɛ́ɛ́ cuꞌnēēⁿ veeⁿ sa yeⁿꞌé yā ndúúcu yeⁿꞌe di cúúví dí ꞌiiⁿꞌyāⁿ chi ngaⁿꞌa ntiiⁿnyúⁿ yā yeⁿꞌē ꞌiiⁿꞌyāⁿ chi iꞌtéénu yā Ndyuūs. Ndúúti chi ꞌdíinu di miiⁿ nguɛ́ɛ́ cuꞌnēēⁿ veeⁿ sa yeⁿꞌé ꞌiiⁿꞌyāⁿ chi ngaⁿꞌa ntiiⁿnyúⁿ yā yeⁿꞌe ꞌiiⁿꞌyāⁿ chi iꞌtéénu yā Ndyuūs, cuꞌneeⁿ di ꞌdíinū di tanꞌdúúcā ꞌáámá ꞌiiⁿꞌyāⁿ ndiica yáⁿꞌáí chi nguɛ́ɛ́ yeⁿꞌē ndaata yeⁿꞌe di o tanꞌdúúcā chi ꞌaama saⁿꞌā chi innꞌguɛɛ sa yeⁿꞌē yáⁿꞌāa.

18 Cuaacu nííⁿnyúⁿ ngaⁿꞌá ngií ndísꞌtiī: Tanducuéⁿꞌē chi nguɛ́ɛ́ ꞌcuaaⁿ nī chi ꞌiiⁿꞌyāⁿ diíⁿ yā na iⁿꞌyeeⁿdí ꞌcūū Ndyuūs chi canéé ná vaꞌai chɛɛti nguuvi nguɛ́ɛ́ ꞌcuaaⁿ ntuúⁿ yā. Tanducuéⁿꞌē chi ꞌcuáaⁿ nī chi ꞌiiⁿꞌyāⁿ diíⁿ yā na iⁿꞌyeeⁿdí ꞌcūū Ndyuūs chi canéé ná vaꞌai chɛɛti nguuvi ꞌcuaaⁿ ntuúⁿ yā.

19 Taama vmnéⁿꞌēe ngaⁿꞌá ngií ndísꞌtiī: Nduuti chi ná ꞌuūvi ndísꞌtiī nduuvidaamá nī ná yáⁿꞌāa ꞌcūū yeⁿꞌe ꞌāā dɛꞌɛ́ nūuⁿ chi caacá nī yeⁿꞌē Chiidá chi canée yā na vaꞌai chɛɛti nguuvi, Chiidá tée yā ndísꞌtiī. 20 Tiī naachí snéé ꞌuūvī o ꞌiīnu ꞌiiⁿꞌyāⁿ chi nduuvidaama yā cucáávā chi duuchí, miiⁿ caneé nduucú yā.

21 Tuuꞌmi ní ndaā Pedro miiⁿ nanááⁿ Jesús ní caⁿꞌa yā chii yā ꞌiiⁿꞌyāⁿ: Nꞌdií Señor, ¿ꞌáá nꞌdeēe cuūví caneé chí nádichꞌɛɛ̄cú yeⁿꞌē ꞌdiīnú chi nguɛ́ɛ́ nꞌdaācā idiiⁿ sa nduucú? ¿ꞌÁá ndɛɛ̄chɛ̄ cuūví?

22 Jesús caⁿꞌa yā chii yā Pedro: Nguɛ́ɛ́ ngaⁿꞌá ngií dii chi ndɛɛ̄chɛ̄ cuuvi tiī ꞌiīnū ngɛɛcu ndiichi veces chi ndɛɛ̄chɛ̄ ngaⁿꞌá ngií dii.

23 Ní caⁿꞌa Jesús: ꞌTíícā naachí Ndyuūs ngaⁿꞌa ntiiⁿnyúⁿ yā ná vaꞌai chɛɛti nguuvi ní tanꞌdúúcā ꞌáámá rey chí neⁿꞌe yā tunꞌdáa yā cuenta ndúúcū mozos yeⁿꞌé yā. 24 Taachí neⁿꞌe yā tucaꞌa yā tunꞌdaa yā cuenta, candɛ́ɛ yā ꞌáámá mozo yeⁿꞌé rey nanáaⁿ yā chi canꞌdiicū sa nꞌdeee nꞌdáí mil tuūmī. 25 Mozo miiⁿ ní nguɛ́ɛ́ cuuvi diiⁿ sá nadííꞌvɛ̄ sa. Tuuꞌmi ní rey chi ꞌiiví sa caⁿꞌa yā chii yā táámá mozo miiⁿ chí nꞌdiicui sa mozo ndúúcū nꞌdaatāá yeⁿꞌē sa ndúúcū daiya sa ndúúcū tanducuéⁿꞌē chi vɛ́ɛ́ yeⁿꞌē sa ní nadííꞌvɛ̄ mozo miiⁿ chi canꞌdíícū sa yeⁿꞌé yā. 26 Tuuꞌmi ní mozo miiⁿ candiitinꞌdíī sa nanááⁿ ꞌiivi sa ní diꞌcuíítu sa ꞌiiⁿꞌyāⁿ ní caⁿꞌa sa chii sa ꞌiiⁿꞌyāⁿ: Nꞌdií Señor, cunee ngíínú nī ꞌáámá tiempo ní ꞌúú ní nadííꞌvɛ́ tanducuéⁿꞌē yeⁿꞌé nī. 27 ꞌIivi sa miiⁿ ní nneé yaꞌai ꞌiinu yā saⁿꞌā ní caⁿꞌa yā chii yā saⁿꞌā: Cunaⁿꞌā di ní ꞌāā ntɛ́ɛ́ cunꞌdiīcū di yeⁿꞌé. 28 Sáⁿꞌa ꞌcūū cuínaⁿꞌa sa ní nanꞌdaā sa ní ndaācā sa mozo chi daama idiiⁿ sa ntiiⁿnyuⁿ ndúúcū sa. Táámá mozo miiⁿ canꞌdíícu ntúūⁿ sa ꞌaama ciento tuūmī yeⁿꞌē sa. Ní mozo miiⁿ chitaꞌā sa daandu sáⁿꞌā miiⁿ ní tucáꞌa sa chiī sa yaācū sa ní caⁿꞌa sa: Nadííꞌvɛ̄ di chi canꞌdíícu di. 29 Tuuꞌmi ní mozo miiⁿ candiitínꞌdiī sa nanáaⁿ sa ní caⁿꞌa sa chii sa: Cunee ngíínú dí ꞌtɛ́ɛ́ ní nadiiꞌvɛ́ yeⁿꞌē di. 30 Naati saⁿꞌā miiⁿ nguɛ́ɛ́ ꞌcuūⁿ sa. Cheⁿꞌe sa chiica sa nuūⁿndī yeⁿꞌe mozo miiⁿ ndúúcū sa ní sꞌnuúⁿ yā mozo vácūū ndíí nadííꞌvɛ̄ sa chi cánꞌdíícū sa. 31 Tanáⁿꞌā mozos ndúúcū sa nꞌdiichi yā chi chiī ní sꞌneeⁿ ndaachi yiinú yā. Ní cheⁿꞌe yā nanááⁿ ꞌiivi yā ní caⁿꞌa yā chii yā ꞌiiví yā tanducuéⁿꞌē chí chiī. 32 Tuuꞌmi ní ꞌiiví mozos ꞌcai yā mozo ꞌcūū chi ndaa sa nanáaⁿ yā. Ní caⁿꞌa yā chii yā mozo miiⁿ: Dii mozo, nguɛ́ɛ́ nꞌdaācā di. Tanducuéⁿꞌē chí canꞌdíícū di yeⁿꞌé ꞌāā chií dii chi ꞌāā ntɛ́ɛ́ nadííꞌvɛ̄ di ti diꞌcuíítu di ꞌúú. 33 ¿ꞌÁá nguɛ́ɛ́ nnee yaꞌāī ꞌiinu di mozo ndúúcū di tanꞌdúúcā chi ꞌúú nneé yaꞌai ꞌiinú dii? 34 Tuuꞌmi ní nduuvi taáⁿ ꞌiivi sa ní chiicá yā nuūⁿndī yeⁿꞌē sa. Ní cueⁿꞌe sa vácūū chi chꞌeⁿꞌé yā saⁿꞌā ní miiⁿ canee sa ndii nadííꞌvɛ̄ sa tanducuéⁿꞌē chi canꞌdíícū sa yeⁿꞌe yā.

35 ꞌTiicá ntúūⁿ Chiidá chi canéé na vaꞌai chɛɛ̄ti nguuvi ꞌtíícā diíⁿ yā ndúúcū ndísꞌtiī nduuti chi ndísꞌtiī ní nguɛ́ɛ́ nadichꞌɛɛcú nī ndúúcū nuuⁿmaⁿ staava yeⁿꞌe nī yeⁿꞌe ꞌáámá ꞌáámá ꞌdíínu nī yeⁿꞌe chi nguɛ́ɛ́ nꞌdaācā n̄diíⁿ yā ndúúcu nī.