Jesús n̄ꞌdáaⁿ yā cuerpo yeⁿꞌe maaⁿ yā
17
Chóꞌōo jaāⁿ nguuvi, ní Jesús candɛ́ɛ yā Pedro ndúúcū Jacobo ndúúcū Juan chi ꞌdíínū Jacobo. Ní Jesús cueⁿꞌé yā ndúúcū saⁿꞌā sꞌeeⁿ na ꞌáámá yiīcū yaacu. 2 Ní Jesús n̄ꞌdáaⁿ yā cuerpo yeⁿꞌe maáⁿ yā nanááⁿ saⁿꞌā sꞌeeⁿ. Ní chínꞌgai naaⁿ yā tanꞌdúúcā ꞌyáⁿꞌā ꞌiicu catecai yā ní nduuvi cuɛ́ɛ̄ tanꞌdúúcā dɛɛvɛ. 3 Cuinꞌdiichí nī. Tuuꞌmí nūuⁿ cheꞌenaāaⁿ Moisés ndúúcū profeta Elías. ꞌIiⁿꞌyāⁿ sꞌeeⁿ chi nꞌdíí ndíí cuaaⁿ vmnaaⁿ ní nndeé yā ndúúcū Jesús miiⁿ. 4 Tuuꞌmi ní Pedro caⁿꞌa sá chii sa Jesús: Señor, dɛꞌɛ chúúcā nꞌdáacā yeⁿꞌe yú chí ꞌcuɛɛtinée yú ꞌmuuⁿ. Ndúútī chí neⁿꞌé nī dinꞌdaí ꞌnū ná ꞌiīnū vaꞌai nꞌgaiyáā, ꞌáámá ní yeⁿꞌé nꞌdiī, táámá ní yeⁿꞌe Moisés, táámá ní yeⁿꞌe profeta Elías.5 Taachí Pedro ngaⁿꞌa sá chuū, ꞌáámá meēeⁿ cuɛ́ɛ̄ chí ngii yáⁿꞌāa ndii snꞌdíī ꞌiiⁿꞌyāⁿ sꞌeeⁿ ní discípulos chꞌiindiveéⁿ yā ꞌáámá nduudu ná meēeⁿ miiⁿ chí ngaⁿꞌā: Sáⁿꞌa ꞌcūū Daiyá chí neⁿꞌe taaví ní yeenú cáávā sáⁿꞌa ꞌcūū. ꞌCuꞌneeⁿ veéⁿ nī yeⁿꞌē sa.
6 Taachí discípulos chꞌiindiveéⁿ yā nduudu ꞌcūū candiitínꞌdii yā ní diiꞌyaa nꞌdái yā chiī. 7 Tuuꞌmi ní Jesús miiⁿ ndaa niiⁿnuúⁿ yā ní tuuꞌví yā discípulos ní caⁿꞌa yā: Nducueeⁿ nī. Nguɛ́ɛ́ ꞌvaꞌa nī.
8 Taachí nducueeⁿ discípulos ꞌāā ntɛ́ɛ́ nꞌdiichí yā duꞌū vɛɛ caati ꞌāā dámaāaⁿ Jesús miiⁿ nꞌdiichi yā.
9 Taachi nanguaꞌá yā yeⁿꞌe yiīcū miiⁿ ní na yúúní naachí cunaⁿꞌa yā, Jesús caⁿꞌa yā chii yā ꞌiiⁿꞌyāⁿ sꞌeeⁿ chi nguɛ́ɛ́ cuuví yā mar ꞌáámá ꞌiiⁿꞌyāⁿ yeⁿꞌe chi nꞌdiichí yā ndíí taachi Saⁿꞌā chi Daiya Ndyuūs nduuchí yā yeⁿꞌe nguaaⁿ tináⁿꞌā.
10 Tuuꞌmi ní discípulos ntiinguunéeⁿ yā Jesús ní caⁿꞌa yā: ¿Dɛꞌɛ̄ cúúví chí ngaⁿꞌa maestros yeⁿꞌe ley chi canéé chí profeta Elías miiⁿ nndaa sa vmnaaⁿ?
11 Jesús miiⁿ nánꞌguɛɛcútaⁿꞌa yā ní caⁿꞌa yā chii yā discípulos: Cuaacu nííⁿnyúⁿ profeta Elías miiⁿ nndaá sá vmnááⁿ vmnaaⁿ ní ꞌcuundiyāaⁿ sa tanducuéⁿꞌē. 12 Naati ꞌúú ní ngaⁿꞌá ngií ndísꞌtiī chi profeta Elías miiⁿ ní ꞌāā ndaá yā. Ní ꞌiiⁿꞌyāⁿ sꞌuuⁿ nguɛ́ɛ́ tuumicadíínuuⁿ yā yeⁿꞌe yā duꞌu chi Elías miiⁿ naati diíⁿ yā ndúúcū Elías miiⁿ tanꞌdúúcā chi neⁿꞌe yā ní nꞌgeenu sá ngii. ꞌTiicá ntúūⁿ Saⁿꞌā chi Daiyá Ndyuūs ꞌcueenu sá cuuvi yeⁿꞌe ꞌiiⁿꞌyāⁿ sꞌuuⁿ.
13 Tuuꞌmi ní discípulos tuumicádíínuuⁿ yā chí Jesús ngaⁿꞌa yā ngii yā discípulos yeⁿꞌe Juan chi chɛɛdínuūⁿnīⁿ.
Jesús idiíⁿ yā chi nduūvā yeⁿꞌe ꞌáámá saⁿꞌā ꞌdííⁿ chí ndii sa ataques
14 Taachí ndaá Jesús ndúúcū discípulos yeⁿꞌe yā naachi snéé nꞌdeee nꞌdáí ꞌiiⁿꞌyāⁿ, tuuꞌmi ní ndaā ꞌáámá saⁿꞌā nanááⁿ Jesús ní chiintiiꞌya sá ní caⁿꞌa sá: 15 Señor, nnéé yaꞌai ꞌiinú nī daiyá ti staꞌa ataques daiyá ní neené nꞌgeenu sá ngii. Nééné nꞌdeee cuūvi inꞌdáa nuūⁿ sa na yaⁿꞌā ní ꞌāā neené nꞌdeēe cuūví chí inꞌdáa nuūⁿ sa nguaaⁿ nuūⁿnīⁿ. 16 Ní ꞌāā chi nguú saⁿꞌā nanááⁿ discípulos yeⁿꞌe nī naati nguɛ́ɛ́ ngii diíⁿ yā chi nduūvā yeⁿꞌe sa.
17 Jesús nanꞌguɛɛcútaⁿꞌa yā ní caⁿꞌa yā chii yā saⁿꞌā: Ndísꞌtiī ꞌiiⁿꞌyāⁿ chi nguɛɛ iꞌtéénu nī ndíí nguɛ́ɛ́ ndúú idiiⁿ nꞌdaacá nī. ¿ꞌÁá ꞌnaaⁿ tiempo cánéé chi cuneé ndúúcu nī? ¿ꞌÁá ꞌnaaⁿ cuchɛɛ́ ndúúcū ndísꞌtiī? Candɛ́ɛ nī ꞌmuuⁿ saⁿꞌā ꞌdííⁿ.
18 Jesús miiⁿ yaaꞌvi neeⁿ yā espíritu yeⁿꞌe yááⁿnꞌguiinūuⁿ ní espíritu miiⁿ nanꞌdáa yeⁿꞌe saⁿꞌā ꞌdííⁿ miiⁿ ní tuuꞌmí nūuⁿ ndúuvā yeⁿꞌe sa.
19 Tuuꞌmi ní discípulos ní ndaa yā nanááⁿ Jesús na ꞌáámá lado naachi nguɛ́ɛ́ snéé ꞌiiⁿꞌyāⁿ ní caⁿꞌa yā chii yā Jesús: ¿Dɛꞌɛ̄ cúúví chí núsꞌuū nguɛ́ɛ́ chiī tunꞌdáa ꞌnū espíritu yeⁿꞌe yááⁿnꞌguiinūuⁿ miiⁿ yeⁿꞌe saⁿꞌā ꞌdíí?
20 Jesús miiⁿ ní caⁿꞌa yā chii yā discípulos: Nguɛ́ɛ́ chꞌɛɛtɛ vaadī iꞌtéénu yeⁿꞌe nī. Cuaacu nííⁿnyúⁿ ngaⁿꞌá ngií ndísꞌtiī chi nduuti chi vɛ́ɛ́ vaadī iꞌtéénú yeⁿꞌe nī ní tanꞌdúúcā ꞌáámá duuti yeⁿꞌé yiīvɛ̄ ntíiꞌyaá chi ꞌlííⁿ ca cuuvi nī yiīcū ꞌcúū: Yiīcū, cuvíi ndii ꞌmuuⁿ ni cuéⁿꞌé ndíí taama lugar. Ní yiīcū ní caⁿꞌā. Tanducuéⁿꞌē cuuvi diíⁿ nī nduuti chi cuaacu chi iꞌtéénu nī. 21 Naati tanducuéⁿꞌē espíritus yeⁿꞌe yááⁿnꞌguiinūuⁿ chi ꞌtúúcā nguɛ́ɛ́ nanꞌdaā yeⁿꞌe ꞌiiⁿꞌyāⁿ chi ꞌtiicá nūuⁿ caati dámaāⁿ ndúúcū chi ngaⁿꞌanguaꞌa yā ndúúcū chi nguɛɛ ꞌāā caꞌdiiⁿnúⁿ yā nguuvi chi ngaⁿꞌanguaꞌá yā.
Jesús caⁿꞌa ntuúⁿ yā táámá yeⁿꞌē chí ꞌcuūvi yā
22 Taachi ꞌiiⁿꞌyāⁿ sꞌeeⁿ snée yā na yáⁿꞌāa Galilea Jesús caⁿꞌa yā chii yā discípulos yeⁿꞌe yā: Saⁿꞌā chi Daiya Ndyuūs ní ꞌiiⁿꞌyāⁿ canéé chi caꞌa yā saⁿꞌā na táꞌā ꞌiiⁿꞌyāⁿ. 23 Ní ꞌiiⁿꞌyāⁿ ꞌcaaⁿꞌnuⁿ yā saⁿꞌā miiⁿ naati saⁿꞌa miiⁿ ndii chííⁿ ndii ꞌíínú nguuvi nduuchi sa yeⁿꞌe nguaaⁿ tináⁿꞌā. Discípulos ní sꞌneeⁿ ndaachi yiinú yā.
Yeⁿꞌē chi nadííꞌvɛ yā yeⁿꞌē yáacū templo
24 Taachí ndaa Jesús ndúúcū discípulos yeⁿꞌe yā na yáāⁿ Capernaum, ꞌiiⁿꞌyāⁿ sꞌeeⁿ chi indaaca tuumī yeⁿꞌe yaācū templo ní ndaá yā nanááⁿ Pedro miiⁿ. Ní caⁿꞌa yā chii yā saⁿꞌā: ¿ꞌÁá nguɛ́ɛ́ nadííꞌvɛ̄ maestro yeⁿꞌé nī tuūmī chi cáávā yeⁿꞌē yaācū templo?
25 Pedro miiⁿ ní caⁿꞌā sa chi ꞌtíícā va. Taachí sndaa yā vaꞌai yeⁿꞌe sa Jesús miiⁿ caⁿꞌa yā ndúúcū Pedro: ¿Táácā chi ngíí yeⁿꞌe di, díí Simón Pedro? ¿Duꞌú nadííꞌvɛ̄ impuestos yeⁿꞌē yáⁿꞌāa nanááⁿ reyes yeⁿꞌē iⁿꞌyeeⁿdí ꞌcūū? ¿ꞌÁá daiya ꞌiiⁿꞌyāⁿ yeⁿꞌe yáⁿꞌāa naachi rey ngaⁿꞌa ntiiⁿnyúⁿ yā nadííꞌvɛ sa o ꞌiiⁿꞌyāⁿ chi cuchii táámá lado?
26 Pedro miiⁿ nanꞌguɛɛcútaⁿꞌa sa ní caⁿꞌa sa chii sa Jesús: ꞌIiⁿꞌyāⁿ chi chiica táámá lado nadííꞌvɛ yā. Jesús caⁿꞌa yā chii yā Pedro: Daiya ꞌiiⁿꞌyāⁿ yeⁿꞌe yáⁿꞌāa naachi rey ngaⁿꞌa ntiiⁿnyúⁿ yā miiⁿ ní nguɛ́ɛ́ canéé chí nadííꞌvɛ sa. 27 Nguɛ́ɛ́ neⁿꞌe yú chi nduuvi taaⁿ yā. Maaⁿ ní cueⁿꞌe di ná nuūⁿnīⁿꞌyáⁿꞌā ní caꞌnuuⁿ di ꞌáámá gancho yeⁿꞌē ꞌyaacā nguaaⁿ nuūⁿnīⁿ. ꞌYaācā chí ndaācā di vmnááⁿ vmnaaⁿ cutáꞌa di ní nnꞌguaaⁿ di cheendí tī. Mííⁿ ní ndaāca di ꞌaama tuūmī. Ndúúcū tuūmī miiⁿ ní caⁿꞌa di cáꞌā di yeⁿꞌē ꞌúú ndúúcū yeⁿꞌe maaⁿ di chí nadííꞌvɛ yú yeⁿꞌe yaācū templo.