Jesús ndaa yā na yáāⁿ Jerusalén
11
Taachí Jesús ndúúcū discípulos ndaa yā niiⁿnuúⁿ na yáāⁿ Jerusalén, ndaa yā na yáāⁿ Betfagé, ndúúcū yáāⁿ Betania, niiⁿnuúⁿ na yiīcū chi nguuvi Olivos. Ní Jesús dichóꞌo yā na ꞌuūvī discípulos yeⁿꞌe yā. 2 Ní caⁿꞌa yā: Cuéⁿꞌe nī na yáāⁿ ꞌlííⁿ chi canéé niiⁿnuúⁿ ní taachí ndaa nī miiⁿ ndaaca nī ꞌáámá burro nꞌdɛɛ̄chiīchí tī. Burro miiⁿ ní mar ꞌáámá ꞌiiⁿꞌyāⁿ ꞌāā cuɛ́ɛ́ cunduú yā ꞌiiti. Nꞌdaatí nī ꞌiiti ní candɛ́ɛ nī ꞌiiti ꞌmúúⁿ. 3 Ndúúti chi ꞌáámá ꞌiiⁿꞌyāⁿ tíínguuneeⁿ yā ndísꞌtiī: ¿Dɛꞌɛ̄ cúúví chí ꞌtíícā idiíⁿ nī? Caaⁿꞌmaⁿ nī cuuvi nī ꞌiiⁿꞌyāⁿ tí Señor yeⁿꞌe yú neⁿꞌe yā ꞌiiti miiⁿ. Ní caama nadichoꞌó yā ꞌiiti.4 ꞌIiⁿꞌyāⁿ sꞌeeⁿ ní ꞌtíícā cheⁿꞌe yā, ní ndaāca yā burro miiⁿ nꞌdɛ́ɛ́chiīchí tī na cyúúní niiⁿnuúⁿ cheendivaꞌāī. Ní nꞌdaātí yā ꞌiiti. 5 Nꞌdúúví ꞌiiⁿꞌyāⁿ chi snée yā miiⁿ ní caⁿꞌa yā chii yā discípulos: ¿Dɛꞌɛ̄ idiíⁿ nī? ¿Dɛꞌɛ̄ cúúví chí inꞌdaatí nī burro?
6 Tuuꞌmi ní discípulos ní nanꞌguɛɛcútaⁿꞌa yā tanꞌdúúcā chi Jesús caⁿꞌa yā chii yā ꞌiiⁿꞌyāⁿ. Ní ꞌcuuⁿ yā chi discípulos cueⁿꞌe yā ndúúcū burro miiⁿ. 7 Tuuꞌmi ní cueⁿꞌe yā ndaá yā ndúúcū burro miiⁿ nanááⁿ Jesús miiⁿ. Ní snꞌduú yā cotón yeⁿꞌe yā vmnááⁿ yeⁿꞌē burro miiⁿ ní Jesús canduú yā ꞌiiti. 8 Taachí ꞌāā cueⁿꞌe yā cuaaⁿ cyúúní miiⁿ, nééné ꞌyaaⁿ ꞌiiⁿꞌyāⁿ nꞌdoó yā cotón yeⁿꞌe yā cuaaⁿ cyúúní miiⁿ. Tanáꞌa yā chꞌiicá yā dúuⁿnɛ̄ yáⁿꞌá ní chintaaví yā cuaaⁿ cyúúní.
9 Nééné ꞌyaaⁿ ca yā chí cueⁿꞌe yā cuááⁿ vmnaaⁿ miiⁿ yeⁿꞌe Jesús ndúúcū ꞌyaaⁿ nꞌdaí yā chí cuchii yā cuaaⁿ daami yā ꞌcaí yā: Dɛꞌɛ̄ chúúcā chꞌɛɛtɛ Ndyuūs. Ndyuūs diꞌviicú yā ꞌiiⁿꞌyāⁿ chi cuchii yā ndúúcū chi dúúchí Señor miiⁿ. 10 Dɛꞌɛ̄ chúúcā nꞌdai naachi ngaⁿꞌa ntiiⁿnyuⁿ Ndyuūs. Cúchiī tiempo maaⁿ chí tanꞌdúúcā yeⁿꞌē chiida yú David ngaⁿꞌa ntiiⁿnyúⁿ yā ndii cuááⁿ vmnaaⁿ. Hosanna. Nduudu miiⁿ ní nduudu Israel chi neⁿꞌe caaⁿꞌmaⁿ na nduudu yeⁿꞌe yú, chi chꞌɛɛtɛ nꞌdai Ndyuūs chí canéé na vaꞌai chɛɛti nguuvi.
11 ꞌTíícā sndaā Jesús na yáāⁿ Jerusalén. Ní ndaá yā na yaacū templo yeⁿꞌē yáāⁿ Jerusalén miiⁿ. Chꞌíínu yā tanducuéⁿꞌē denduꞌū nuuⁿmáⁿ cuaaⁿ ꞌdiituú yā. Cueⁿꞌe ntúuⁿ yā na yáāⁿ Betania ndúúcū nduꞌū ndiichuuví discípulos caati ꞌāā chi chiiⁿnū.
Jesús ngaⁿꞌa yā ngii yā yáⁿꞌá nꞌguíídīi yaaⁿ nguuví miiⁿ
12 Chidɛɛvɛ táámá nguuvi miiⁿ, taachí Jesús ndúúcū discípulos yeⁿꞌé yā canꞌdaa yā na yaāⁿ Betania, Jesús miiⁿ chí cuiicu yā. 13 Ní nꞌdiichi yaⁿꞌáí yā ꞌáámá yáⁿꞌá yeⁿꞌe nꞌguíídīi yaaⁿ nguuvi chi vɛ́ɛ́ táꞌāa. Ní cueⁿꞌé yā nꞌdiichi yā chí ꞌáá snéé nꞌguiꞌi yeⁿꞌē. Nꞌdiichí yā chi nguɛ́ɛ́ ndaācā nꞌguiꞌi yeⁿꞌē ti taꞌá nūuⁿ, ti nguɛ́ɛ́ tiempo yeⁿꞌē. 14 Tuuꞌmi ní Jesús miiⁿ caⁿꞌa yā chii yā yáⁿꞌá mííⁿ, ꞌtúúcā: Dii yáⁿꞌá, mar ꞌáámá ꞌiiⁿꞌyāⁿ nguɛ́ɛ́ chéꞌe yā nꞌguiꞌi yeⁿꞌē di, tanducuéⁿꞌē tiempo. Discípulos yeⁿꞌe yā chꞌiindiveéⁿ yā tanducuéⁿꞌē chi caⁿꞌa yā.
Jesús nadɛɛvɛ́ yā yaācū chꞌɛɛtɛ
(Mt. 21.12-17; Lc. 19.45-48; Jn 2.13-22)
15 Cuayiivi mííⁿ ꞌiiⁿꞌyāⁿ sꞌeeⁿ ndaá yā na yáāⁿ Jerusalén miiⁿ. Taachí Jesús ndaá yā na yáacū templo miiⁿ, tucáꞌa yā tunꞌdáa yā ꞌiiⁿꞌyāⁿ na yaācū miiⁿ, ꞌiiⁿꞌyāⁿ chi inꞌdiicui yā ndúúcū ꞌiiⁿꞌyāⁿ chi ngai yā. Chꞌɛɛcundáa yā mesas yeⁿꞌe ꞌiiⁿꞌyāⁿ chi n̄ꞌdáaⁿ yā tuūmī. Ní chꞌɛɛcundáa yā sillas yeⁿꞌe ꞌiiⁿꞌyāⁿ chí inꞌdiicui yā palomas. 16 Ní diíⁿ yā chí ꞌāā ntɛ́ɛ́ candɛ́ɛ ꞌiiⁿꞌyāⁿ na yaācū miiⁿ mar ꞌáámá cosa. 17 Ní chiꞌcuéeⁿ yā ꞌiiⁿꞌyāⁿ ní caⁿꞌa yā: Naachi canéé nguūⁿ na libro yeⁿꞌé Ndyuūs ní ꞌtúúcā ngaⁿꞌā: Vaꞌai yeⁿꞌé canéé chí duuchi vaꞌai naachi caaⁿꞌmaⁿnguaꞌá ꞌiiⁿꞌyāⁿ yeⁿꞌē nducuéⁿꞌē nación. Naati ndísꞌtiī ní diíⁿ nī chí yiivɛ yáává yeⁿꞌe ꞌiiⁿꞌyāⁿ chí diduucu.
18 Chiiduú nꞌgɛɛtɛ chí ngaⁿꞌa ntiiⁿnyuⁿ ndúúcū maestros yeⁿꞌe ley chꞌiindiveéⁿ yā chuū, ní tucáꞌa yā nꞌnuuⁿ yiinú yā taacā chi ꞌcaaⁿꞌnuⁿ yā Jesús, naati ꞌvaꞌá yā ꞌiiⁿꞌyāⁿ. Ní nducyaaca ꞌiiⁿꞌyāⁿ ngeⁿꞌe yiinú yā yeⁿꞌē chi ngiꞌcueeⁿ Jesús miiⁿ. 19 Taachí chi ꞌdaꞌa, Jesús miiⁿ canꞌdáa yā na yáāⁿ Jerusalén miiⁿ ní cueⁿꞌé yā táámá yáāⁿ ꞌlííⁿ chi niiⁿnuúⁿ.
Yáⁿꞌá inꞌguíídīi miiⁿ ntíꞌi
20 Chidɛɛvɛ táámá nguuvi, ní Jesús ndúúcū discípulos choꞌó yā na yúúní ní nꞌdiichí yā ꞌáámá yáⁿꞌá nꞌguíídii yaaⁿ nguuvi chí ꞌāā ntíꞌi ndii dííꞌyú yeⁿꞌē. 21 Tuuꞌmi ní Pedro miiⁿ ní nnꞌgaacu sa chi ꞌāā chóꞌōo ní caⁿꞌa sa chii sa Jesús miiⁿ: Nꞌdii Maestro, cuinꞌdiichí nī. Nꞌguíídīi chi nguɛ́ɛ́ nꞌdaācā caⁿꞌa nī yeⁿꞌē ꞌāā ntíꞌi.
22 Jesús miiⁿ nanꞌguɛɛcútaⁿꞌa yā ní caⁿꞌa yā: Ndísꞌtiī, cuuvi cūnee chi vɛ́ɛ́ confianza yeⁿꞌe nī ndúúcū Ndyuūs. 23 Cuaacu nííⁿnyúⁿ ngaⁿꞌá ngií ndísꞌtiī: ꞌĀā duꞌú nūuⁿ ꞌiiⁿꞌyāⁿ chi caaⁿꞌmáⁿ yā cuuvi yā yiīcū ꞌcúū ꞌtíícā: Dii yiīcū, cuvíi di ꞌmuuⁿ ní cundaā di nguaaⁿ nuūⁿnīⁿꞌyáⁿꞌā. Ní nduuti chi nguɛ́ɛ́ ꞌuūvī vaanicádiīnūuⁿ yeⁿꞌe yā ní iꞌtéénu yā chi chííⁿ chi ngaⁿꞌá yā chí cuuví cuaacu, tuuꞌmi ní cuuvi ꞌtíícā. 24 Chííⁿ chí maaⁿ ngaⁿꞌá ngií ndísꞌtiī: Tanducuéⁿꞌē chi ndísꞌtiī ngiicá nī Ndyuūs taachi ngaⁿꞌanguaꞌá nī, nduuti chi cuꞌtéénu nī chí ndaācā yeⁿꞌe nī, tuuꞌmi ní tanducuéⁿꞌē ní ndaāca nī. 25 Ní taachí ngaⁿꞌanguaꞌá nī, nduuti chi ꞌáámá ꞌiiⁿꞌyāⁿ idinuuⁿndí yā contra yeⁿꞌé nī, nadachꞌɛɛcú nī yeⁿꞌe yā, ꞌtiicá ntúūⁿ Chiida yú chi canée yā na vaꞌai chɛɛti nguuvi nádichꞌɛɛcú yā nuuⁿndi yeⁿꞌé nī. 26 Ndúúti ndísꞌtiī nguɛ́ɛ́ nadichꞌɛɛcú nī nuuⁿndi yeⁿꞌé ꞌiiⁿꞌyāⁿ, ꞌtiicá ntúūⁿ Chiida yú chi canée yā na vaꞌai chɛɛti nguuvi nguɛ́ɛ́ nadichꞌɛɛcú yā nuuⁿndi yeⁿꞌe nī.
Jesús ní ngaⁿꞌa ntiiⁿnyúⁿ yā
27 Tuuꞌmi ní Jesús ndúúcū discípulos nndaa yā na yáāⁿ Jerusalén. Taachí Jesús chiicá yā na yaācū templo, chiiduú nꞌgɛɛtɛ ndúúcū maestros chi ngiꞌcuéeⁿ ley ndúúcū ꞌiiⁿꞌyāⁿ ndiicúū chi ngaⁿꞌa ntiiⁿnyúⁿ yā yeⁿꞌe yaācū miiⁿ chindaá yā nꞌdiichí yā Jesús. 28 Ní ntiinguuneeⁿ yā Jesús: ¿Duꞌú ꞌiiⁿntyeⁿꞌē diīⁿ nduucú nī chuū? O ¿duꞌū tee poder dii chí idiiⁿ nī chuū?
29 Jesús nanꞌguɛɛcútaⁿꞌa yā: ꞌÚú ntúūⁿ ní tiinguuneéⁿ ndísꞌtiī, ní ndúúti chi cuuví nꞌguɛɛcútaⁿꞌa nī yeⁿꞌé, tuuꞌmi ní cuuví ndísꞌtiī duꞌú ꞌiiⁿntyeⁿꞌē tee yā poder ꞌúú chi idiíⁿ dendúꞌu ꞌcūū. 30 Chí ngɛɛ̄dínuuⁿnīⁿ Juan miiⁿ ¿tií chiīcā chiī? ¿ꞌÁá yeⁿꞌe sáⁿꞌā iⁿꞌyeeⁿdí ꞌcūū o yeⁿꞌē vaꞌai chɛɛti nguuvi? Nanꞌguɛɛcútaⁿꞌa nī yeⁿꞌé.
31 Tuuꞌmi ní tucáꞌa yā caⁿꞌa yā nguááⁿ maáⁿ yā ní caⁿꞌa yā chii yā viꞌī: ¿Taacá caaⁿꞌmaⁿ yú? Ndúúti chí caaⁿꞌmaⁿ yú chí yeⁿꞌē nanguuvi, ꞌiiⁿꞌyāⁿ miiⁿ ní nanꞌguɛɛcútaⁿꞌa yā yeⁿꞌē yú ꞌtíícā: ¿Dɛꞌɛ̄ cúúví chí nguɛ́ɛ́ iꞌtéénu nī? 32 Ní ndúúti chi caaⁿꞌmaⁿ yú, chí yeⁿꞌē saⁿꞌā iⁿꞌyeeⁿdí ꞌcūū tuuꞌmi ní ꞌvaꞌa yú ꞌiiⁿꞌyāⁿ sꞌeeⁿ caati nducyáácá ꞌiiⁿꞌyāⁿ deenu yā chi Juan chi chɛɛdínuūⁿnīⁿ miiⁿ ní ꞌáámá profeta chí cuaacu. 33 Ní nanꞌguɛɛcútaⁿꞌa yā yeⁿꞌe Jesús miiⁿ ní caⁿꞌa yā: Nguɛ́ɛ́ cuuví nī nꞌdiī. ꞌTíícā caⁿꞌa yā chiī yā Jesús: Nguɛ́ɛ́ deenú ꞌnū. Tuuꞌmi ní Jesús caⁿꞌa yā chii yā ꞌiiⁿꞌyāⁿ sꞌeeⁿ: ꞌTiicá ntúūⁿ ꞌúú nguɛ́ɛ́ cuuví ndísꞌtiī duꞌú ꞌiiⁿntyéⁿꞌē idiiⁿ ndúúcū chuū.