N‑najini Jesús xeʼe se dakuaʼa‑ia
13
Ɨɨn kɨu nga xa xee viko Paxcua.
Naʼa Jesús xa xá n‑xee kɨu xa kee‑ia ñuñayiu,
xa ndaa‑ia nuu tuu Taa‑ia.
Nɨni n‑xo tuu‑ia ñuñayiu,
n‑xemani‑ia ñayiu ka jandixa ñaʼa.
Te kɨu nga ijan n‑dandeʼa‑ia ñayiu jan xa yo xemani‑ia‑i.
Jesús lava los pies de los discipulos (Juan 13.1-17)
2-4 Te xá n‑kidatniu kuiʼna anu Judas Iscariote,
daʼya yɨɨ Simón,
xa diko‑s Jesús nuu se kaʼni koio‑ia.
Naʼa Jesús xa n‑kixi‑ia nde nuu tuu Taa‑ia,
te naʼa‑ia xa nuʼu‑ia nuu tuu Taa‑ia.
Naʼa‑ia xa n‑kida Taa‑ia xa taxnuni‑ia nuu ntdaa xa io.
Nukoo Jesús xiʼin se dakuaʼa‑ia xa kaxdini‑ia xiʼin‑s.
N‑ndojuiin Jesús nuu n‑xaxdini‑ia,
te n‑dita‑ia daʼma niʼna‑ia.
N‑tnɨɨ‑ia ɨɨ toalla,
te n‑duku niʼna‑ia dujun kaʼa‑ia.
5 N‑dachitu‑ia ɨɨn caxuela ndute,
te n‑kixeʼe‑ia xa najini‑ia xeʼe se dakuaʼa‑ia.
Xiʼin toalla n‑xo duku niʼna dujun kaʼa‑ia,
n‑nadayichi‑ia xeʼe‑s.
6 Na n‑xee‑ia nuu Simón Spedru xa najini‑ia xeʼe‑s,
te n‑jaʼan Spedru:
—Xtoʼo‑ro,
¿xeʼe mee‑da najini‑n a?
7 N‑jaʼan Jesús:
—Ta kutnuni ka ini‑n nax kida‑r vitna,
ko nunuu ka kutnuni ini‑n.
8 N‑jaʼan Spedru:
—¡Nuncas ma najini mee‑n xeʼe mee‑da!
N‑jaʼan Jesús:
—Nux ma najini‑r xeʼe‑n,
te ma kunduu ka‑n xiʼin‑r.
9 Te n‑xiaʼan Simón Spedru nuu Jesús:
—Xtoʼo‑ro,
nux duʼa koo,
te maxku najini‑n diko ni xeʼe‑da.
Najini‑n ndaʼa‑da,
dɨkɨ‑da tuku.
10 N‑jaʼan Jesús nuu‑s:
—Xá n‑dakuchi ñaʼa Taa‑r Ianyuux mee‑n.
Xijan kuu xa meni xeʼe‑n najini mee‑r vitna.
Xá n‑kida Ianyuux xa n‑ndundoo‑n,
ña tuu nax io ka‑n.
Mee‑n,
xá n‑ka ndundoo‑n,
ko ñatu ntdaa‑n ndaxio ndoo.
11 Chi naʼa Jesús jundu diko ñaʼa mee‑ia.
Xijan kuu xa n‑jaʼan‑ia xa ñatu ntdaa‑s ndaxio ndoo.
12 Na n‑yaʼa xa n‑najini‑ia xeʼe‑s ntdaa‑s,
te n‑nukondixi‑ia daʼma‑ia,
te n‑nukoo‑ia ɨnka vuelta,
n‑jaʼan‑ia:
—¿Ka kutnuni ini‑n nax n‑kida ñaʼa‑r a?
13 Danani ñaʼa‑n Maestru,
te ka jaʼan‑n xa Xtoʼo‑n kuu ñaʼa,
te xandaa ka jaʼan‑n,
chi ndaa kuu‑r.
14 Nux kuu‑r Xtoʼo‑n te Maestru te najini mee‑r xeʼe mee‑n,
te io xa najini tnaʼa koio mee‑n xeʼe‑n.
15 Kuu mee‑r ichi ka neʼe ka tnɨɨ koio‑n jɨʼɨn.
Ná n‑kida ñaʼa mee‑r,
da io xa kada tnaʼa koio mee‑n.
16 Xandaa kuu xa jaʼan‑r.
Kunxaʼnu ka se kuu xtoʼo veʼe,
dada se xinokuechi nuu‑s.
Kunxaʼnu ka se taʼu tniu,
dada se tundaʼa‑s.
17 Nux kutnuni ini‑n xaʼa te kada‑n xaʼa,
te kuvete koio‑n.
18 ʼÑa jaʼan‑r xaxeʼe ntdaa‑n.
Xini vaʼa‑r jundu n‑kaxí‑r.
Ɨɨn tnaʼa mee‑n,
kada xa jɨn tnaʼa xa jaʼan tnuʼu Ianyuux,
yodotnuni xá n‑kuu kueʼe kuia:
“Se xax kaʼnu xiʼin‑r xini uʼu ñaʼa.”
Jesús predice la traición (Juan 13.18-38)
19 Vitna,
antecas xa yaʼa,
te jaʼan‑r xa duʼa koo.
Te dada,
hora yaʼa,
te jandixa koio‑n xa kuu‑r jundu kuu‑r.
20 Xandaa kuu xa jaʼan‑r.
Ɨɨn ñayiu,
nux kueka vaʼa‑i se tundaʼa‑r,
duʼa kueka vaʼa ñaʼa‑i mee‑r tuku.
Te nux kueka vaʼa ñaʼa‑i mee‑r,
te kueka vaʼa‑i Ia n‑tundaʼa ñaʼa mee‑r vaxi.
N‑jaʼan Jesús xa diko ñaʼa Judas nuu se kaʼni ñaʼa
21 Na n‑jaʼan Jesús tnuʼu yaʼa,
te yo n‑tnau ini‑ia.
N‑jaʼan kaxi‑ia:
—Xandaa kuu xa jaʼan‑r.
Ɨɨn tnaʼa mee‑n diko ñaʼa mee‑r nuu se kaʼni ñaʼa koio.
22 N‑ka nukondeʼa tnaʼa se dakuaʼa‑ia.
Ñayo‑s n‑ka kutnuni ini nuu ndeda ɨɨn‑s n‑jaʼan‑ia.
23 Nuu n‑ka xaxdini‑s,
ijan,
yatni Jesús,
nukoo ɨɨ se dakuaʼa‑ia.
Yo n‑xemani Jesús se ijan.
24 N‑kida Simón Spedru ɨɨn seña ndaʼa‑s nuu se ijan,
xa kajan tnuʼu‑s‑ia nuu jundu kuu se diko‑ia.
25 N‑nundee se ijan Jesús,
te n‑jaʼan niʼni‑s doʼo‑ia:
—Xtoʼo‑ro,
¿jundu kuu‑s?
26 N‑jaʼan niʼni Jesús doʼo se ijan:
—Dandoyo‑r itaʼu tila nuu ndeyu,
te juñaʼa‑r‑sɨ.
Mee‑s kuu‑s.
N‑dandoyo‑ia itaʼu tila,
te n‑xiaʼan‑ia nuu Judas Iscariote,
daʼya yɨɨ Simón.
27 N‑tnɨɨ Judas tila jan,
te dada n‑kɨu kuiʼna anu‑s.
N‑jaʼan Jesús:
—Xa kada‑n,
yachi kada‑n.
28 Te ñayo se xtuu ijan n‑ka kutnuni ini nakuenda n‑jaʼan Jesús tnuʼu yaʼa nuu Judas.
29 Dava‑s n‑ka xani ini xa duʼa n‑jaʼan‑ia xaxeʼe xa n‑yɨndaʼa Judas tvini‑s ntdaa‑s.
N‑ka xani ini‑s xa juini‑ia xa jueen‑s xa kax koio‑s viko Paxcua,
a xa juñaʼa‑s tvini nuu ñayiu ka kundaʼu.
30 N‑tnɨɨ Judas tila,
te yachi n‑kee‑s juaʼan‑s.
Te xá n‑kuaa hora ijan.
N‑jaʼan Jesús: “Io xa juemani tnaʼa koio‑n”
31 Na n‑kee Judas juaʼan‑s,
te n‑jaʼan Jesús:
—Vitna koo xa kunxaʼnu ka Se kuu ñani tnaʼa ñayiu,
te xaxeʼe mee‑s,
koo xa kunxaʼnu ka Ianyuux.
32 Nux dandeʼa mee‑s ñayiu xa kunxaʼnu ka Ianyuux,
dada dandeʼa Ianyuux ñayiu xa kunxaʼnu ka mee‑s.
Te ña kueʼe ka ndoñuʼu xa xee xa duʼa koo.
33 Daʼya kuechi‑r,
xaku nga hora kutuu‑r xiʼin‑n.
Nanduku ñaʼa koio‑n,
ko mayo ka‑n naniʼi ñaʼa.
Nani n‑jaʼan‑r nuu se ka taxnuni nuu ñayiu Israel,
dani jaʼan‑r nuu mee‑n vitna:
“Nuu jɨʼɨn mee‑r,
mayo‑n kuaʼa xa kandijun ñaʼa koio‑n.”
34 Vitna taa‑r ɨɨn tnuʼu taʼu tniu xee:
“Io xa juemani tnaʼa koio‑n.”
Nani xemani ñaʼa mee‑r,
dani juini‑r xa juemani tnaʼa koio‑n.
35 Nux juemani tnaʼa koio‑n,
te jini koio ntdaa ñayiu xa se dakuaʼa mee‑r ka kuu mee‑n.
N‑jaʼan Jesús xa jaʼan Spedru xa ña xini‑s‑ia
36 N‑xijan tnuʼu Simón Spedru:
—Xtoʼo‑ro,
¿ndexu jɨʼɨn‑n?
N‑xiaʼan Jesús:
—Nuu jɨʼɨn‑r,
ma kuaʼa‑n xa kandijun ñaʼa‑n jɨʼɨn vitna,
ko ɨnka kɨu,
joon,
kandijun ñaʼa‑n xee.
37 N‑jaʼan Spedru:
—Xtoʼo‑ro,
¿nakuenda xa ña kuaʼa‑da xa kandijun ñaʼa‑da jɨʼɨn vitna?
Io tuʼa‑da xa kuú‑da xaxeʼe‑n.
38 N‑jaʼan Jesús:
—¿Xandaa kuu xa io tuʼa‑n xa kuú‑n xaxeʼe‑r a?
Xandaa kuu xa jaʼan‑r.
Antecas xa kana liʼi xakuaa vitna,
te jaʼan mee‑n uni vuelta xa ña xini ñaʼa‑n mee‑r.