N‑jaʼan Jesús: “Mee‑r kuu ichi”
14
ʼMaxku tnau ini koio ka‑n.
Io xa jandixa naʼi koio ka‑n Ianyuux.
Te io xa jandixa ñaʼa koio ka‑n mee‑r tuku.
2 Nuu tuu Taa‑r,
io kueʼe veʼe vili xndaa.
Nuʼu‑r nuu tuu Taa‑r,
xa kada tuʼa‑r veʼe koio mee‑n nuu kutuu vaʼa koio‑n.
Chi nux ma duʼa koo,
te ma kachitnuñaʼa‑r n‑kuu.
El único camino a Dios (Juan 14.1-14)
3 Nuʼu‑r,
xa kada tuʼa‑r veʼe koio mee‑n,
te ndii‑r,
xa kandeka ñaʼa‑r jɨʼɨn,
xa kutuu vaʼa koio mee‑n nuu kutuu mee‑r.
4 Ka xini‑n nde jɨʼɨn‑r,
te ka xini‑n ichi.
5 N‑jaʼan Tomás:
—Xtoʼo‑ro,
ñayo‑da xini nde jɨʼɨn‑n.
¿Nanda kuaʼa‑da jini koio‑da ichi?
6 N‑jaʼan Jesús:
—Mee‑r kuu ichi.
Te kuu‑r xandaa.
Te kida mee‑r xa kutuu vaʼa koio ñayiu xiʼin Ianyuux.
Ni ɨɨn ñayiu ma kuaʼa xa jɨʼɨn‑i nuu tuu Taa‑r,
nux ña kunduu‑i xiʼin mee‑r.
7 Nux ndaa n‑ka xini ñaʼa‑n mee‑r n‑kuu,
te dɨuni jini koio‑n Taa‑r n‑kuu.
Vitna ka xini‑n mee‑ia,
chi n‑ka xini ñaʼa‑n mee‑r.
8 N‑jaʼan Slipe:
—Dandeʼa ñaʼa‑n Taa‑ro Ianyuux idini vuelta,
te xijan ni ña ndoñuʼu ka‑da.
9 N‑jaʼan Jesús:
—Slipe,
xá n‑kuu uni kuia xtuu‑ro.
¿Te ta jini ñaʼa ka‑n a?
Ɨɨn ñayiu,
nux xini ñaʼa‑i mee‑r,
dani xini‑i Taa‑r tuku.
¿Nax kuu xa xijan‑n xa dandeʼa ñaʼa‑r Taa‑r?
10 ¿Ña ka jandixa‑n xa kunduu mee‑r xiʼin Taa‑r te kunduu Taa‑r xiʼin mee‑r a?
Tnuʼu jaʼan‑r nuu‑n,
ñatu kuu tnuʼu mee‑r.
Kunduu Taa‑r xiʼin‑r,
te kida mee‑ia tniu‑ia.
11 Io xa jandixa koio‑n xa kunduu mee‑r xiʼin Taa‑r te kunduu Taa‑r xiʼin mee‑r.
Io xa jandixa‑n xaxeʼe tnuʼu‑r,
a juini ña kuaʼa‑n xa jandixa‑n xaxeʼe tnuʼu‑r,
ko io xa jandixa‑n xaxeʼe tniu kida‑r.
12 Xandaa kuu xa jaʼan‑r.
Nux jandixa ñaʼa ɨɨn ñayiu mee‑r,
te mee‑i tuku kada‑i tniu ná kida mee‑r.
Te kueʼe ka kada koio mee‑i dada xa kida mee‑r,
chi xaxeʼe xa nuʼu mee‑r nuu tuu Taa‑r.
13 Nux jandixa ñaʼa‑n mee‑r,
kajan‑n davaʼa nga xa kajan‑n,
te kada‑r,
xa jini koio‑n xa Taa‑r kuu Ia kunxaʼnu ka.
14 Davaʼa nga xa kajan‑n xaxeʼe xa jandixa ñaʼa‑n mee‑r,
te kada‑r.
N‑jaʼan Jesús: “Tundaʼa‑r Espíritu Ii”
15 ʼNux ka xemani ñaʼa‑n mee‑r,
io xa kada‑n ná jaʼan tnuʼu taʼu tniu n‑taxi‑r.
Jesús habla del Espíritu Santo (Juan 14.15-31)
16 Kajan‑r nuu Taa‑r xa tundaʼa‑ia Espíritu Ii,
xa kunduu Espíritu Ii xiʼin‑n,
ná n‑kunduu mee‑r xiʼin‑n.
Ia chindee ñaʼa mee‑n kuu‑ia,
te kida‑ia xa kundee ini koio ka‑n,
xa jandixa ñaʼa naʼi ka‑n mee‑r.
Kunduu‑ia xiʼin‑n kuia ma jɨn ndɨʼɨ.
17 Dakuaʼa ñaʼa‑ia mee‑n xa kuu xandaa.
Ñayiu ña jandixa ñaʼa mee‑r,
ña kuaʼa‑i xa kueka‑i Espíritu Ii,
chi ña xini‑i‑ia,
te ña kutnuni ini‑i nax kida‑ia.
Ko mee‑n,
jini koio‑n‑ia,
chi ndoo‑ia xiʼin‑n,
te kunduu‑ia xiʼin‑n.
18 Ma dandoo ñaʼa‑r,
chi ndii‑r.
19 Xaku nga hora,
te dada,
ma jini ñaʼa ka ñayiu ñuñayiu mee‑r,
ko mee‑n,
jini ñaʼa koio‑n.
Xaxeʼe xa ndito mee‑r,
te kundito koio mee‑n tuku.
20 Kɨu ijan,
kutnuni ini koio‑n xa kunduu mee‑r xiʼin Taa‑r,
te kunduu mee‑n xiʼin mee‑r,
te kunduu mee‑r xiʼin mee‑n.
21 Nux jandixa ɨɨn ñayiu tnuʼu taʼu tniu mee‑r,
te kida‑i xa jaʼan tnuʼu jan,
duʼa dandeʼa‑i ñayiu xa xemani ñaʼa‑i mee‑r.
Te ñayiu xemani ñaʼa‑i mee‑r,
te juemani Taa‑r mee‑i,
te juemani mee‑r mee‑i,
te dandeʼa‑r mee‑r nuu mee‑i.
22 N‑jaʼan se nani Judas.
Ko ña dɨu Judas Iscariote,
chi ɨnka‑s.
N‑jaʼan‑s:
—Xtoʼo‑ro,
¿nakuenda xa dandeʼa ñaʼa‑n mee‑n nuu mee‑da,
ko ma dandeʼa‑n mee‑n nuu ñayiu ñuñayiu?
23 N‑jaʼan Jesús:
—Nux xemani ñaʼa ɨɨn ñayiu mee‑r,
kada‑i nax jaʼan tnuʼu mee‑r.
Te juemani Taa‑r ñayiu jan.
Te kixi Taa‑r xiʼin mee‑r,
nduu‑r,
xa kunduu koio‑r xiʼin‑i.
24 Ñayiu ña xemani ñaʼa mee‑r,
ñayo‑i chinuu tnuʼu mee‑r.
Te tnuʼu ka teku mee‑n,
ña kuu tnuʼu mee‑r.
Tnuʼu Taa‑r,
Ia n‑tundaʼa ñaʼa mee‑r vaxi,
kuu tnuʼu ka teku‑n.
25 ʼXá n‑jaʼan‑r tnuʼu yaʼa nɨni tuu‑r xiʼin‑n.
26 Xaxeʼe mee‑r,
tundaʼa Taa‑r Ia chindee ñaʼa mee‑n,
Ia kuu Espíritu Ii.
Dakuaʼa ñaʼa‑ia mee‑n ntdaa xa ndoñuʼu‑n.
Kada‑ia xa najaʼan koio‑n ntdaa xa n‑jaʼan‑r nuu‑n.
27 ʼKida‑r xa kutuu vaʼa koio‑n,
kida‑r xa ma kɨ ini koio ka‑n.
Ka jaʼan ñayiu ñuñayiu:
“Juan nuʼu xandaa xavatu”,
ko ña kuaʼa‑i xa kada‑i xa duʼa koo.
Ko mee‑r,
joon,
kuaʼa‑r,
te duʼa kada‑r.
Maxku tnau ini koio ka‑n,
maxku yuʼu koio ka‑n.
28 Xá n‑ka teku‑n xa jaʼan‑r nuu‑n,
xá n‑ka teku‑n xa nuʼu‑r te ndii‑r.
Nux vaʼa n‑ka xemani ñaʼa‑n n‑kuu,
yo kueʼe kuvete koio‑n,
xaxeʼe xa nuʼu‑r nuu tuu Taa‑r,
chi kunxaʼnu ka Taa‑r dada mee‑r.
29 Vitna xá n‑jaʼan‑r xaʼa,
antecas xa koo,
xa na xee xa duʼa koo,
te jandixa ñaʼa naʼi koio ka‑n.
30 Ma jaʼan kueʼe ka‑r xiʼin‑n vitna,
chi vaxi kuiʼna,
te taxnuni mee‑i nuu ñuñayiu yaʼa.
Juini ñatu taxnuni‑i nuu mee‑r,
ko duʼa koo.
31 Duʼa koo,
xa kutnuni ini koio ñayiu ñuñayiu,
xa xemani‑r Taa‑r te kida‑r tniu n‑taxi‑ia.
Ndojuiin koio vitna.
Na jɨʼɨn‑ro.