N‑jaʼan Jesús: “Ná kuu yutnu xavidi nani uva kuu‑r”
15
ʼNá kuu yutnu xa ndaa xa yutnu kuu‑tnu kuu mee‑r.
Yutnu xavidi nani uva.
Ná kuu se ñunuu yutnu uva kuu Taa‑r.
2 Ná kuu daʼnda‑tnu kuu ñayiu ka jandixa ñaʼa mee‑r.
Ntdaa daʼnda‑tnu xa ña ka juun xavidi,
te kaʼnde‑ia‑tnu.
Ntdaa daʼnda‑tnu xa ka juun xavidi,
te dandanduu‑ia‑tnu,
xa nandundoo‑tnu,
xa najuun ka xavidi.
La vid y las ramas (Juan 15.1-17)
3 Mee‑n ka kuu daʼnda yutnu xa n‑dandanduu‑ia‑tnu,
chi n‑ndundoo‑n xaxeʼe xa n‑ka jandixa‑n tnuʼu mee‑r.
4 Io xa kunduu koio ka‑n xiʼin mee‑r,
te kunduu mee‑r xiʼin mee‑n.
Chi meni mee daʼnda yutnu,
ña kuaʼa xa juun xavidi.
Io xa ku netnaʼa daʼnda‑tnu xiʼin nduʼu‑tnu.
Duʼa ka kuu mee‑n tuku.
Meni mee‑n,
ña kuaʼa‑n xa kada koio‑n ni ɨɨn xavaʼa.
Io xa kunduu koio ka‑n,
ɨɨn ɨɨn mee‑n,
xiʼin mee‑r.
5 ʼMee‑r kuu yutnu.
Mee‑n ka kuu daʼnda yutnu.
Ɨɨn ñayiu,
nux kunduu‑i xiʼin mee‑r,
te kunduu mee‑r xiʼin mee‑i,
te juun‑i kueʼe xavidi.
Ko nux ma kunduu‑n xiʼin mee‑r,
ma kuaʼa‑n xa kada‑n ni ɨɨn.
6 Ɨɨn ñayiu,
nux ma kunduu‑i xiʼin mee‑r,
te kineʼe Taa‑r mee‑i.
Ná kuu daʼnda yutnu ñatu xiniñuʼu kuu‑i.
Yichi daʼnda‑tnu jan,
te najeʼen ñayiu,
te dakee‑i‑tnu nuu ñuʼu koko,
te kayu‑tnu.
7 ʼNux kunduu koio ka‑n xiʼin mee‑r te chinuu koio ka‑n tnuʼu mee‑r,
te kajan koio‑n davaʼa nga xa ka juini‑n,
te duʼa koo.
8 Duʼa koo,
xa kutnuni ini koio ñayiu xa Taa‑r kuu Ia kunxaʼnu ka.
Duʼa juun koio mee‑n kueʼe xavidi,
te ndaa xa nduu koio‑n se dakuaʼa mee‑r.
9 Ná xemani ñaʼa Taa‑r mee‑r,
da xemani ñaʼa mee‑r mee‑n.
Kunduu naʼi koio ka‑n xiʼin‑r,
xa juemani ñaʼa naʼi‑r.
10 Nux kada koio‑n xa jaʼan tnuʼu taʼu tniu‑r,
duʼa kunduu naʼi koio ka‑n xiʼin mee‑r,
te juemani ñaʼa naʼi‑r.
Koo ná kuu xa n‑kida mee‑r ntdaa ná io ná juaʼan tnuʼu n‑taʼu tniu Taa‑r,
te kunduu‑r xiʼin mee‑ia,
te xemani ñaʼa‑ia mee‑r.
11 ʼTnuʼu yaʼa n‑jaʼan‑r nuu‑n,
xa nani kuvete mee‑r,
dani kuvete koio mee‑n,
te kuvete koio‑n xa kuvete koio ka‑n.
12 Taʼu tniu ñaʼa‑r xa juemani tnaʼa‑n,
ɨɨn‑n xiʼin ɨnka‑n,
ná xemani ñaʼa mee‑r mee‑n.
13 Ña tuu na ɨɨn xa kaʼnu ka,
dada xa juñaʼa ɨɨn ñayiu mee‑i,
xa ma kuú koio ñayiu mani xiʼin‑i.
14 Ñayiu mani xiʼin mee‑r ka kuu mee‑n,
nux ka kida‑n xa taʼu tniu ñaʼa‑r.
15 Ñatuka danani ñaʼa‑r se xinokuechi nuu‑r,
chi se xinokuechi nuu ɨɨn se kuu xtoʼo veʼe,
ña ka kutnuni ini‑s nax kida xtoʼo‑s.
Xá n‑danani ñaʼa‑r se mani xiʼin‑r,
chi ntdaa xa n‑jaʼan Taa‑r nuu mee‑r,
duʼa n‑jaʼan mee‑r nuu mee‑n.
16 Ñatu n‑ka kaxí ñaʼa mee‑n mee‑r,
ko n‑kaxí ñaʼa mee‑r mee‑n.
N‑kaxí ñaʼa‑r,
xa jɨʼɨn koio‑n,
xa kada koio‑n tniu mee‑r.
Ná kuu yutnu ka juun xavidi vaʼa,
ku kuu koio mee‑n,
te nuncas ma jɨn ndɨʼɨ xavidi jan.
Xaxeʼe xa ka jandixa ñaʼa‑n mee‑r,
kajan koio‑n nuu Taa‑r davaʼa nga xa ka ndoñuʼu‑n,
te taxi‑ia.
17 Tnuʼu yaʼa kuu xa taʼu tniu ñaʼa‑r:
Juemani tnaʼa koio‑n,
ɨɨn‑n xiʼin ɨnka‑n.
Ñayiu ñuñayiu, ka xini uʼu‑i Jesús
18 ʼNux ka xini uʼu ñaʼa ñayiu ñuñayiu mee‑n,
najaʼan koio‑n xa kiʼna nuu mee‑r n‑ka xini uʼu ñaʼa‑i.
Jesús advierte sobre la persecución (Juan 15.18-16.4)
19 Nux ɨɨn nuu n‑ka kuu mee‑n xiʼin ñayiu ñuñayiu n‑kuu,
te juemani ñaʼa koio ñayiu ñuñayiu.
Ko n‑kaxí ñaʼa‑r mee‑n meʼñu ñayiu ñuñayiu,
te ñatuka ka kuu ɨɨn nuu mee‑n xiʼin ñayiu ñuñayiu.
Xijan kuu xa ka xini uʼu ñaʼa ñayiu ñuñayiu mee‑n.
20 Najaʼan koio‑n tnuʼu n‑jaʼan‑r nuu‑n,
xa kunxaʼnu ka se kuu xtoʼo veʼe dada se xinokuechi nuu‑s.
Xijan kuu xa nux n‑ka xini uʼu ñaʼa ñayiu mee‑r,
dani jini uʼu ñaʼa koio‑i mee‑n.
Nux n‑ka chinuu‑i tnuʼu mee‑r,
dani chinuu koio‑i tnuʼu mee‑n.
21 Ntdaa xaʼa kada ñaʼa koio‑i mee‑n,
xaxeʼe xa ka jandixa ñaʼa‑n mee‑r.
Duʼa ka kida‑i,
chi ña ka xini‑i Ia n‑tundaʼa ñaʼa mee‑r vaxi.
22 ʼNux ña n‑kixi‑r te ña n‑jaʼan‑r nuu ñayiu jan n‑kuu,
te ma tekuechi‑i anu mee‑i.
Ko xa n‑kixee‑r,
te vitna ña kuaʼa ka‑i xa dandaʼu ka‑i mee‑i.
23 Ɨɨn ñayiu,
nux xini uʼu ñaʼa‑i mee‑r,
te dani xini uʼu‑i Taa‑r tuku.
24 Nux ña n‑kida‑r milagru ñayo ɨnka ñayiu nuncas ña n‑kida n‑kuu,
ma tekuechi‑i anu mee‑i.
Ko vitna,
xa n‑ka xini ñaʼa‑i mee‑r,
te dani xa n‑ka xini‑i Taa‑r tuku.
Xá n‑ka xini uʼu ñaʼa‑i mee‑r,
te dani xa n‑ka xini uʼu‑i Taa‑r tuku.
25 Duʼa yaʼa,
xa jɨn tnaʼa tnuʼu Ianyuux,
n‑ka chidotnuni seyɨɨ xá n‑kuu kueʼe kuia:
“Meni xavaʼa n‑kida‑r,
ko mee‑i,
n‑ka xini uʼu ñaʼa‑i.”