16
ʼXaʼa n‑jaʼan‑r xa maxku kada koio‑n kuechi,
n‑jaʼan‑r xa kunduu naʼi koio ka‑n xiʼin mee‑r.
2 Kineʼe ñaʼa koio‑s mee‑n veñuʼu ñayiu Israel.
Vaxi hora xa kaʼni ñaʼa koio‑s mee‑n,
te kani ini‑s xa duʼa kuu xa xiaʼan‑s ɨɨn xa doko‑s nuu Ianyuux.
3 Xaʼa kada koio‑s,
chi ñayo‑s ka xini Taa‑r,
ni ñayo‑s ka xini ñaʼa mee‑r.
4 Xaʼa xá n‑jaʼan‑r,
xa hora duʼa kada ñaʼa koio‑s mee‑n,
te najaʼan koio‑n xa duʼa n‑jaʼan‑r nuu‑n.
Espíritu Ianyuux, ndadandaa‑ia ñayiu ñuñayiu
ʼXaʼa ña n‑jaʼan‑r kiʼna nuu,
chi dani n‑xo tuu‑r xiʼin‑n.
5 Vitna nuʼu‑r nuu tuu Ia n‑tundaʼa ñaʼa mee‑r vaxi.
Te ñayo‑n ka xijan tnuʼu ñaʼa ndexu jɨʼɨn‑r.
Más enseñanza sobre el Espíritu Santo (Juan 16.5-33)
6 Diko ni yo ka tnau ini‑n,
xaxeʼe tnuʼu n‑jaʼan‑r.
7 Xandaa kuu xa jaʼan‑r.
Xaxeʼe mee‑n nuʼu‑r.
Chi nux ma nuʼu‑r,
te ma kixi Espíritu Ianyuux,
Ia chindee ñaʼa mee‑n.
Nux nuʼu‑r,
te tundaʼa‑r‑ia,
xa kunduu mee‑ia xiʼin mee‑n.
8 Na kixi Espíritu Ianyuux,
ndadandaa‑ia ñayiu ñuñayiu.
Kada‑ia xa kutnuni ini koio ñayiu ñuñayiu xa n‑ka kida‑i kuechi.
Kada‑ia xa kutnuni ini koio ñayiu ñuñayiu xa n‑kida mee‑r xavaʼa.
Kada‑ia xa kutnuni ini koio ñayiu ñuñayiu xa ndadandaa Ianyuux kuechi‑i.
9 Kada Espíritu Ianyuux xa kutnuni ini koio‑i xa ka kida‑i kuechi xa ña ka jandixa ñaʼa‑i mee‑r.
10 Kada Espíritu Ianyuux xa kutnuni ini koio‑i xa n‑kida mee‑r xavaʼa,
chi nuʼu‑r nuu tuu Taa‑r,
te mayo‑n jini ñaʼa ka mee‑r.
11 Kada Espíritu Ianyuux xa kutnuni ini koio‑i xa ndadandaa Ianyuux ntdaa xa io,
chi xá n‑ndadandaa‑ia kuiʼna.
Taxnuni kuiʼna ñuñayiu yaʼa,
ko xá n‑ndadandaa Ianyuux kuiʼna.
12 ʼKueʼe ka io xa jaʼan‑r,
ko mayo‑n kuaʼa xa kundee ini ka‑n tnuʼu‑r vitna.
13 Ko na kixi Espíritu Ianyuux,
te kada mee‑ia xa kutnuni ini koio‑n.
Xandaa jaʼan‑ia,
te kada‑ia xa kutnuni ini koio mee‑n ntdaa xandaa.
Ma jaʼan‑ia tnuʼu mee‑ia.
Nani teku‑ia,
dani jaʼan‑ia.
Kachitnuñaʼa‑ia nax koo.
14 Ndadakaʼnu ñaʼa Espíritu Ianyuux mee‑r.
Tnɨɨ‑ia tnuʼu mee‑r,
te jaʼan‑ia tnuʼu mee‑r nuu mee‑n.
15 Ntdaa xa kuu kuenda Taa‑r kuu kuenda mee‑r.
Xijan kuu xa n‑jaʼan‑r xa tnɨɨ Espíritu Ianyuux tnuʼu mee‑r,
xa jaʼan‑ia tnuʼu jan nuu mee‑n.
N‑jaʼan Jesús: “Yo ku tnau ini koio‑n, ko dada nduvete koio‑n”
16 ʼXaku nga hora,
te ma jini ñaʼa koio ka‑n,
te dada xaku ni kɨu,
te jini ñaʼa koio‑n ɨnka vuelta.
Chi nuʼu‑r nuu Taa‑r.
17 Dava se dakuaʼa‑ia,
n‑ka xijan tnuʼu nuu tnaʼa‑s:
—¿Nax juini kachi tnuʼu jaʼan‑ia?
Jaʼan‑ia xa xaku nga hora,
te ma jini ka‑ro‑ia,
te dada xaku ni kɨu,
te jini‑ro‑ia ɨnka vuelta.
Jaʼan‑ia xa duʼa kuu,
xaxeʼe xa nuʼu‑ia nuu tuu Taa‑ia.
18 ¿Nax juini kachi xaku ni kɨu?
Ña kutnuni ini‑ro tnuʼu‑ia.
19 N‑kutnuni ini Jesús xa ka juini‑s xa kajan tnuʼu‑s‑ia.
N‑jaʼan‑ia:
—¿Ka xijan tnuʼu nuu tnaʼa‑n nax juini kachi xa n‑jaʼan‑r xa xaku nga hora,
te ma jini ñaʼa koio ka‑n,
te dada,
xaku ni kɨu,
te jini ñaʼa koio‑n ɨnka vuelta u?
20 Xandaa kuu xa jaʼan‑r.
Ku ndaʼi koio mee‑n,
te yo ku tnau ini koio‑n,
ko kudɨ ini koio ñayiu ñuñayiu.
Yo ku tnau ini koio‑n,
ko dada nduvete koio‑n.
21 Kuu ná kuu hora xajan ɨɨn ñadɨʼɨ daʼya‑ña.
Na xee hora,
te kɨ ini‑ña xa xaxiaʼan kueʼe daʼya‑ña.
Ko na n‑yaʼa xa n‑kaku daʼya‑ña,
hora ijan ni,
ñatuka najaʼan‑ña xa n‑tna uʼu‑ña,
chi kuvete‑ña xa n‑kaku vaʼa ɨɨn seyɨɨ ñuñayiu.
22 Duʼa ka kuu mee‑n.
Vitna ka tnau ini‑n,
ko jini ñaʼa‑r ɨnka vuelta,
te kada‑r xa kuvete koio‑n xa kuvete koio ka‑n.
Kɨu ijan,
ni ɨɨn ñayiu ma kuaʼa xa kada‑i xa tnau ini koio ka‑n.
23 ʼKɨu ijan,
ma kajan tnuʼu ñaʼa koio‑n ni ɨɨn.
Xandaa kuu xa jaʼan‑r.
Davaʼa nga xa kajan koio‑n nuu Taa‑r,
te taxi‑ia,
xaxeʼe mee‑r.
24 Nde vitna,
ñatu ni ɨɨn xa n‑ka xijan‑n nuu Taa‑r xaxeʼe mee‑r.
Kajan koio‑n,
te tnɨɨ koio‑n,
xa kuvete koio‑n xa kuvete koio ka‑n.
Ndaku ka Jesús dada ntdaa xa io ñuñayiu
25 ʼNde vitna,
n‑jaʼan‑r meni tnuʼu xa dakuaʼa ñaʼa‑r.
Xee hora,
te ma jaʼan ka‑r tnuʼu xa dakuaʼa ñaʼa‑r.
Hora ijan,
kaxi kakuneʼe‑r Taa‑r nuu‑n.
26 Kɨu ijan,
kajan koio‑n nuu Taa‑r,
xaxeʼe mee‑r.
Ma ndoñuʼu ka xa kajan mee‑r nuu Taa‑r xaxeʼe‑n.
27 Ma ndoñuʼu ka,
chi xemani ñaʼa Taa‑r mee‑n.
Xaxeʼe xa ka xemani ñaʼa mee‑n mee‑r,
te ka jandixa‑n xa vaa‑r nde nuu tuu Ianyuux,
te duʼa xemani ñaʼa Taa‑r mee‑n.
28 N‑kee‑r nuu tuu Taa‑r,
te n‑kixee‑r ñuñayiu.
Vitna kee‑r ñuñayiu,
xa nuʼu‑r nde nuu tuu Taa‑r.
29 N‑ka jaʼan se dakuaʼa‑ia:
—Vitna kaxi jaʼan‑n,
ñatuka jaʼan‑n meni tnuʼu xa dakuaʼa ñaʼa‑n.
30 Vitna ka xini‑da xa xini mee‑n ntdantuʼu.
Ka xini‑da xa naʼa‑n ntdaa xa kajan tnuʼu ñaʼa koio ñayiu.
Xijan kuu xa ka jandixa‑da xa n‑tundaʼa ñaʼa Ianyuux mee‑n.
31 N‑jaʼan Jesús:
—¿Vitna ka jandixa‑n a?
32 Chinuu koio xa vaxi hora,
te vitna xá n‑xee,
xa nuu dɨɨn nuʼu koio‑n veʼe‑n,
ɨɨn ɨɨn‑n.
Dandoo ñaʼa koio‑n.
Ko ma kutuu medini‑r,
chi kunduu Taa‑r xiʼin‑r.
33 Tnuʼu yaʼa xá n‑jaʼan‑r,
xa kutuu vaʼa koio mee‑n.
Ñuñayiu yaʼa,
kueʼe vida yaʼa koio‑n.
Ko maxku yuʼu koio‑n,
te maxku kuita koio‑n.
Ndaku ka mee‑r dada ntdaa xa io ñuñayiu.