Xijan taʼu Jesús xaxeʼe se dakuaʼa‑ia
17
Tnuʼu yaʼa n‑jaʼan Jesús,
te n‑nukondeʼa‑ia andɨu,
te n‑xijan taʼu‑ia:
—Taa‑da,
vitna xee hora xa kueʼe vida yaʼa‑da.
Ndadakaʼnu ñaʼa mee‑n mee‑da,
xa ndadakaʼnu ñaʼa mee‑da mee‑n.
2 Xá n‑kida‑n xa taxnuni‑da nuu ntdaa ñayiu,
xa kada‑da xa kutuu vaʼa koio ntdaa ñayiu n‑taa‑n.
Kada‑da xa kutuu vaʼa koio mee‑i,
xiʼin mee‑n kuia ma jɨn ndɨʼɨ.
Jesús ora por sus seguidores (Juan 17.1-26)
3 Xa kutuu vaʼa koio‑i,
kuu xa jini ñaʼa koio‑i mee‑n,
te jini ñaʼa koio‑i mee‑da.
Mee‑n kuu idini Ianyuux ndaa,
te mee‑da kuu Jesucristu n‑tundaʼa ñaʼa‑n.
4 ʼN‑ndadakaʼnu ñaʼa‑da mee‑n ñuñayiu,
xá n‑daxinokava‑da tniu n‑taa‑n xa kada‑da.
5 Taa‑da,
vitna ndadakaʼnu ñaʼa‑n mee‑da.
Kada‑n xa kutuu‑da xiʼin mee‑n,
te kunxaʼnu‑da xiʼin mee‑n ɨnka vuelta,
ná n‑kuu‑ro nde xa kiʼna nuu,
hora ta kuaʼa ka ntdaa xa io ñuñayiu.
6 ʼXá n‑kida‑da xa jini ñaʼa koio se n‑taa‑n.
Meʼñu ñayiu ñuñayiu n‑kaxí‑n‑sɨ,
te kuenda mee‑n ka kuu‑s.
N‑taa‑n‑sɨ,
te n‑ka jandixa‑s tnuʼu‑n.
7 Vitna ka kutnuni ini‑s xa ntdaa xa taa‑n kuu kuenda mee‑n.
8 Tnuʼu n‑taxi mee‑n,
n‑jaʼan mee‑da nuu mee‑s.
N‑ka xeka vaʼa‑s tnuʼu‑n,
te ka kutnuni ini‑s xa vaa‑da nde nuu tuu mee‑n,
ka jandixa‑s xa n‑tundaʼa ñaʼa mee‑n mee‑da.
9 ʼXijan‑da xaxeʼe se n‑taa‑n.
Ñatu xijan‑da xaxeʼe ñayiu ñuñayiu.
Xijan‑da xaxeʼe se n‑taa‑n,
chi kuenda mee‑n ka kuu‑s.
10 Ntdantuʼu xa kuu kuenda mee‑da kuu kuenda mee‑n,
te ntdantuʼu xa kuu kuenda mee‑n kuu kuenda mee‑da.
Xa ka jandixa ñaʼa mee‑s mee‑da,
kuu xa n‑ndadakaʼnu ñaʼa mee‑n mee‑da.
11 ʼMee‑da,
ma kutuu ka‑da ñuñayiu,
ko mee‑s,
kutuu naʼi koio ka‑s ñuñayiu,
te naxee mee‑da nuu tuu mee‑n.
Taa‑da,
Ia Ii kuu mee‑n.
Se n‑taa‑n ka kuu mee‑s.
Xiʼin xa taxnuni‑n,
junuu vaʼa‑n‑sɨ.
Junuu‑n‑sɨ,
xa kunduu koio‑s,
ɨɨn‑s xiʼin ɨnka‑s,
ná kunduu mee‑n xiʼin mee‑da te mee‑da xiʼin mee‑n.
12 Nɨni tuu‑da xiʼin‑s ñuñayiu,
ñunuu mee‑da mee‑s,
xiʼin xa taxnuni n‑taa‑n.
Ni ɨɨn‑s ña n‑dakuita‑da.
Ɨɨn‑s,
joon,
daʼya andea kuu‑s,
se kida xa juini kuiʼna kuu‑s.
Duʼa jɨn tnaʼa tnuʼu mee‑n n‑ka chidotnuni seyɨɨ xá n‑kuu kueʼe kuia.
13 ʼVitna naxee‑da nuu tuu mee‑n.
Tnuʼu yaʼa jaʼan‑da,
nɨni tuu‑da ñuñayiu,
xa na kuvete koio se n‑taa‑n,
ná kuvete mee‑da.
14 N‑xiaʼan‑da tnuʼu mee‑n nuu se n‑taa‑n,
te n‑ka xini uʼu ñayiu ñuñayiu se ijan,
xaxeʼe xa ñatuka ka kuu‑s ná ka kuu ñayiu ñuñayiu.
Mee‑da,
ña kuu‑da ná ka kuu ñayiu ñuñayiu,
te se n‑taa‑n,
ñatuka ka kuu mee‑s ná ka kuu ñayiu ñuñayiu.
15 Ñatu xijan‑da xa kineʼe‑n‑sɨ ñuñayiu.
Xijan‑da xa junuu vaʼa‑n‑sɨ,
xa maxku dandaʼu ñaʼa kuiʼna mee‑s.
16 Nani kuu mee‑da,
xa ñatu kuu‑da ná ka kuu ñayiu ñuñayiu,
dani ñatu ka kuu mee‑s ná ka kuu ñayiu ñuñayiu.
17 ʼTnuʼu mee‑n,
tnuʼu ndaa kuu.
Xiʼin xandaa,
kada‑n xa se n‑taa‑n ku kuu dɨɨn koio‑s,
xa kada koio‑s xa juini mee‑n.
18 Ná n‑tundaʼa ñaʼa mee‑n mee‑da ñuñayiu,
da n‑tundaʼa mee‑da mee‑s,
jɨʼɨn‑s nituʼu ñuñayiu.
19 Vitna xaxeʼe mee‑s,
kida‑da xa kuu dɨɨn mee‑da,
xa daxinokava‑da ntdaa xa juini mee‑n.
Te duʼa kada‑da xa ku kuu dɨɨn koio mee‑s,
xa daxinokava koio mee‑s ntdaa xa juini mee‑n.
20 ʼXijan‑da xaxeʼe mee‑s,
te dɨuni xijan‑da xaxeʼe ñayiu jandixa ñaʼa koio mee‑da,
hora na teku koio‑i tnuʼu jaʼan koio mee‑s.
21 Xijan‑da xa kunduu koio‑i ɨɨn‑i xiʼin ɨnka‑i.
Taa‑da,
kunduu mee‑n xiʼin mee‑da,
te mee‑da xiʼin mee‑n,
te xijan‑da xa duʼa na kunduu koio ñayiu jandixa ñaʼa mee‑da,
ɨɨn‑i xiʼin ɨnka‑i.
Xijan‑da xa kunduu koio ñayiu jan xiʼin mee‑ro,
xa na jandixa koio ñayiu ñuñayiu xa mee‑n n‑tundaʼa ñaʼa mee‑da.
22 Nani n‑kida mee‑n xa taxnuni mee‑da,
dani xá n‑kida mee‑da xa taxnuni koio mee‑i,
xa kunduu koio‑i ɨɨn‑i xiʼin ɨnka‑i,
ná kunduu mee‑n xiʼin mee‑da te mee‑da xiʼin mee‑n.
23 Mee‑da xiʼin mee‑i,
te mee‑n xiʼin mee‑da,
xa idini xa kuu‑ro.
Duʼa jini koio ñayiu ñuñayiu xa n‑tundaʼa ñaʼa mee‑n mee‑da,
te nani xemani ñaʼa‑n mee‑da,
dani xemani‑n ñayiu ka jandixa ñaʼa mee‑da.
24 ʼTaa‑da,
juini‑da xa ñayiu n‑taa‑n,
kutuu koio‑i xiʼin‑da nuu kutuu‑da.
Juini‑da xa kundeʼa koio‑i xa taxnuni‑da.
Chi nde na ta kuaʼa ka ñuñayiu,
xemani ñaʼa‑n mee‑da.
Xaxeʼe xa xemani ñaʼa‑n,
n‑kida‑n xa taxnuni‑da.
25 Taa‑da,
Ia kida meni xavaʼa kuu‑n.
Juini ña n‑ka xini ñaʼa ñayiu ñuñayiu mee‑n,
ko xini ñaʼa mee‑da mee‑n,
te se n‑taa‑n,
n‑ka kutnuni ini‑s xa n‑tundaʼa ñaʼa mee‑n mee‑da.
26 Xá n‑kida‑da xa ka xini ñaʼa‑s mee‑n,
te kada naʼi ka‑da xa vaʼa ka jini ñaʼa koio‑s.
Duʼa kida‑da,
xa juemani‑n mee‑s,
ná xemani ñaʼa‑n mee‑da,
te duʼa kunduu naʼi ka mee‑da xiʼin mee‑s.