N‑kida Jesús xa n‑ka xaxi oʼon mil seyɨɨ
6
Na n‑yaʼa xaʼa,
te juaʼan Jesús nde ɨnka lado ndute nani Mar Galilea.
Dava ñayiu danani ndute jan Mar Tiberias.
2 Ijan n‑ka xe kuitandijun kueʼe ñayiu Jesús,
chi n‑ka xini‑i milagru n‑kida‑ia,
hora n‑ndadavaʼa‑ia ñayiu kuʼu.
Jesús alimenta una multitud (Juan 6.1-15)
3 Ɨnka lado Mar Galilea,
n‑xe xee Jesús dɨkɨ tnduu ijan.
Ijan nukoo‑ia,
xiʼin se dakuaʼa‑ia.
4 Te vax kuyatni ɨɨn viko ñayiu Israel,
viko nani Paxcua.
5 N‑xini Jesús kueʼe xa kueʼe ñayiu vaxi nuu tuu‑ia.
N‑jaʼan‑ia nuu Slipe:
—¿Ndexu jueen‑ro tila xa kax koio ñayiu yaʼa?
—Juini itaʼu itaʼu tila na tnɨɨ ɨɨn ɨɨn‑i,
ko ma kendita uu cientu denario xa kax koio‑i.
8 N‑jaʼan Ndrixi,
ɨɨn se dakuaʼa Jesús.
Ñani Simón Spedru kuu‑s.
N‑jaʼan‑s:
9 —Yaʼa io ɨɨn seluchi neʼe oʼon tila cebada xiʼin uu chaka.
¿Ko nax ku kendita xaʼa ni xa kax koio kueʼe ñayiu yaʼa?
10 N‑jaʼan Jesús:
—Juñaʼa nuu ñayiu xa na nkoo koio‑i.
Ijan io kueʼe ite.
Nuu ite n‑ka nukoo se xyuku ijan.
Vaa na oʼon mil seyɨɨ.
11 N‑tnɨɨ Jesús oʼon tila neʼe seluchi jan.
Na n‑xiaʼan‑ia xa n‑kutaʼu‑ia nuu Ianyuux,
te n‑xiaʼan‑ia nuu se dakuaʼa‑ia,
xa na dakexio koio‑s nuu ñayiu ka nukoo ijan.
Dɨuni n‑dakexio‑s chaka,
ndenda n‑ka juini‑i xa kaxi‑i.
12 Na n‑yaʼa xa n‑ka xax vaʼa‑i,
te n‑jaʼan‑ia nuu se dakuaʼa‑ia:
—Najeʼen koio xa ndoo,
xa maxku tɨu ni itaʼu.
13 Te ijan n‑ka najeʼen‑s tila ndoo.
Uxi uu yɨka n‑ka dachitu‑s pedazu tila cebada n‑ndoo,
na n‑yaʼa xa n‑ka xaxi ñayiu.
14 Na n‑ka xini ñayiu xa n‑kida Jesús milagru yaʼa,
n‑ka jaʼan‑i:
—Xandaa xa se yaʼa kuu se juña tnuʼu tnuʼu Ianyuux nuu ñayiu.
Xá n‑kixee‑s ñuñayiu yaʼa vitna.
15 N‑xinitnuni Jesús xa ka juini ñayiu jan xa kandeka juexa ñaʼa koio‑i jɨʼɨn,
xa ku kuu‑ia se kunxaʼnu ka nuu‑i.
Xijan kuu xa n‑kee‑ia.
Juan xee ka‑ia,
meni mee‑ia,
yuku ijan.
N‑xika ndodo Jesús nuu ndute mar
16 Vax kunee,
te n‑ka nuu se dakuaʼa Jesús nde yundute mar.
Jesús camina sobre el agua (Juan 6.16-22)
17 Ijan n‑ka keé‑s ɨɨn barcu,
te n‑ka kixeʼe‑s xa dakaka‑s barcu,
xa nuʼu‑s ñuu nani Capernaum.
Xá vax kuaa ka,
ko dani ta naxee ka Jesús.
18 Kane tachi ndeʼe,
te n‑kixeʼe ndute nakuido tnaʼa‑té.
19 Na n‑ka dakaka‑s barcu oʼon iñu kilómetro,
n‑ka xini‑s Jesús,
xika ndodo‑ia nuu ndute.
N‑kuyatni‑ia barcu,
te n‑ka yuʼu‑s.
20 Ko n‑jaʼan‑ia:
—Mee‑r vaxi.
Maxku yuʼu koio‑n.
21 Xijan kuu xa n‑ka tna ini‑s xa keé‑ia barcu.
Na n‑keé‑ia barcu,
te danaa ni n‑xee barcu nde yundute mar,
nuu ka juini‑s xa jɨʼɨn‑s.
N‑ka xe nunduku ñayiu Jesús
22 Kɨu kuu uu,
xyuku kueʼe xa kueʼe ñayiu,
nuu n‑ka xaxi‑i tila n‑xiaʼan Jesús.
N‑ka xini‑i xa n‑xio idini barcu ijan,
te n‑ka kutnuni ini‑i xa ña n‑keé Jesús barcu xiʼin se dakuaʼa‑ia.
N‑ka xini‑i xa meni se dakuaʼa‑ia n‑ka keé barcu,
juaʼan‑s nde ɨnka lado ndute mar.
El pan de vida (Juan 6.22-71)
23 N‑ka kee kueʼe barcu ñuu nani Tiberias.
N‑ka xee‑tnu yatni nuu n‑ka xaxi ñayiu tila,
na n‑yaʼa xa n‑xiaʼan Xtoʼo‑ro xa n‑kutaʼu‑ia nuu Ianyuux.
24 Xijan kuu xa,
na n‑ka xini ñayiu xa ña yoo Jesús,
ni se dakuaʼa‑ia,
n‑ka keé mee‑i barcu tuku.
N‑ka xee‑i ñuu nani Capernaum,
n‑ka nanduku‑i Jesús.
N‑jaʼan Jesús: “Mee‑r kuu tila kida xa tuu vaʼa ñayiu.”
25 Na n‑ka nanitnaʼa ñayiu xiʼin Jesús,
ɨnka xio ndute mar,
n‑ka jaʼan‑i:
—Maestru,
¿nahora n‑kixee‑n yaʼa?
26 N‑jaʼan Jesús:
—Xandaa kuu xa jaʼan‑r.
Ña nanduku ñaʼa‑n xaxeʼe xa n‑ka xini‑n milagru n‑kida‑r.
Nanduku ñaʼa‑n,
xaxeʼe xa n‑ka xaxi‑n tila nde vaʼa n‑ka chitu xiti‑n.
27 Tila xaa‑n vitna vax ndɨʼɨ.
Io xa kadatniu koio‑n xa niʼi koio‑n tila ma jɨn ndɨʼɨ.
Se kuu ñani tnaʼa ñayiu,
taxi‑s tila ma jɨn ndɨʼɨ nuu mee‑n,
xa kutuu vaʼa koio‑n xiʼin Ianyuux kuia ma jɨn ndɨʼɨ.
Chi n‑kaxí ñaʼa Taa‑r xa duʼa kada‑r.
28 N‑ka jaʼan‑i:
—¿Nax kada‑ro xa tna ini Ianyuux?
29 N‑jaʼan Jesús:
—Xa tna ini Ianyuux,
kuu xa jandixa koio‑n se n‑tundaʼa‑ia.
30 Xijan kuu xa n‑ka jaʼan‑i:
—¿Na milagru kada‑n,
xa kundeʼa koio‑r,
xa jandixa ñaʼa‑r?
¿Nax kada‑n?
31 Taxaʼnu tnetnu‑ro,
n‑ka xaxi‑s xa nani maná,
hora n‑ka xikonuu‑s yuku nuu ñayo ñayiu io.
Jaʼan tnuʼu Ianyuux xa n‑xiaʼan‑ia tila andɨu xa n‑ka xaxi‑s.
32 N‑jaʼan Jesús:
—Xandaa kuu xa jaʼan‑r.
Moisés ña n‑taxi tila andɨu.
Taxi Taa‑r tila vaxi nde andɨu,
tila ndaa kuu.
33 Tila Ianyuux kuu xa vaxi nde andɨu.
Kida mee‑s xa kutuu vaʼa koio ñayiu.
34 N‑ka jaʼan‑i:
—Dito,
taa‑n tila jan,
taa‑n kɨu xiʼin kɨu.
35 N‑jaʼan Jesús:
—Mee‑r kuu tila kida xa tuu vaʼa ñayiu.
Nux kunduu ɨɨn ñayiu xiʼin mee‑r,
nuncas ma kojon ka‑i.
Nux jandixa ñaʼa ɨɨn ñayiu mee‑r,
nuncas ma yichi ka‑i.
36 Ko xá n‑jaʼan‑r nuu‑n,
xa juini xa n‑ka xini ñaʼa‑n,
ko ña jandixa ñaʼa‑n.
37 Ntdaa ñayiu taxi Taa‑r,
kunduu koio‑i xiʼin mee‑r.
Te ɨɨn ɨɨn ñayiu kunduu xiʼin mee‑r,
kueka vaʼa‑r‑yɨ,
nuncas ma dangondita‑r‑yɨ.
38 Chi ñatu vaa‑r nde andɨu xa kada‑r xa juini mee‑r.
Vaa‑r xa kada‑r xa juini Ia n‑tundaʼa ñaʼa mee‑r vaxi.
39 Xa juini Ia n‑tundaʼa ñaʼa,
kuu xa ma dajɨʼɨn‑r ni ɨɨn ñayiu n‑taxi‑ia.
Juini‑ia xa kada‑r xa nandoto koio‑i,
ntdaa‑i,
kɨu jɨn ndɨʼɨ ntdaa xa io.
40 Xa juini Taa‑r,
kuu xa ntdaa ñayiu ka xini Daʼya‑ia te ka jandixa‑i‑ia,
te mee‑i kutuu vaʼa koio‑i xiʼin Ianyuux kuia ma jɨn ndɨʼɨ.
Kada‑r xa nandoto koio‑i,
kɨu jɨn ndɨʼɨ ntdaa xa io.
41 Xijan kuu xa n‑ka jan kuechi se Israel Jesús,
xaxeʼe xa n‑jaʼan‑ia:
“Mee‑r kuu tila vaxi nde andɨu.”
42 N‑ka jaʼan‑s:
—¿Ña dɨu mee‑s kuu Jesús,
daʼya yɨɨ José a?
Mee‑ro ka xini tadɨʼɨ‑s.
¿Nax kuu xa jaʼan‑s xa vaxi‑s nde andɨu?
43 N‑jaʼan Jesús:
—Maxku jan kuechi koio‑n,
ɨɨn‑n xiʼin ɨnka‑n.
44 Ni ɨɨn ñayiu,
ña kuaʼa xa kunduu‑i xiʼin mee‑r,
nux ma kada Taa‑r xa duʼa koo.
N‑tundaʼa ñaʼa Taa‑r mee‑r,
te kɨu jɨn ndɨʼɨ ntdaa xa io,
te kada mee‑r xa nandoto koio ñayiu kunduu xiʼin mee‑r.
45 Se xian tnuʼu tnuʼu Ianyuux nuu ñayiu,
n‑ka chidotnuni‑s:
“Dakuaʼa Ianyuux mee‑i,
ntdaa‑i.”
Ntdaa ñayiu n‑ka teku tnuʼu Ianyuux,
te n‑ka dakuaʼa‑i tnuʼu‑ia,
kunduu koio mee‑i xiʼin mee‑r.
46 ʼNi ɨɨn ñayiu,
nuncas ña n‑xini‑i Taa‑r.
Se vaxi nde nuu tuu Ianyuux,
mee‑s xini Taa‑s.
47 Xandaa kuu xa jaʼan‑r.
Nux jandixa ñaʼa ɨɨn ñayiu mee‑r,
kutuu vaʼa‑i xiʼin Ianyuux kuia ma jɨn ndɨʼɨ.
48 Mee‑r kuu tila kida xa tuu vaʼa ñayiu.
49 Taxaʼnu tnetnu mee‑n,
n‑ka xikonuu‑s nuu ñayo ñayiu io,
te n‑ka xaxi‑s maná,
ko n‑ka xiʼí‑s.
50 Mee‑r kuu tila vaxi nde andɨu.
Davaʼa nga ñayiu kaxi tila yaʼa,
te ma kuú‑i.
51 Mee‑r kuu tila kida xa tuu vaʼa ñayiu.
Tila vaxi nde andɨu.
Davaʼa nga ñayiu kaxi tila yaʼa,
kutuu vaʼa‑i kuia ma jɨn ndɨʼɨ.
Tila taxi mee‑r,
kuu yɨkɨ kuñu mee‑r.
Juñaʼa‑r,
xa kutuu vaʼa koio ñayiu ñuñayiu.
52 Xijan kuu xa n‑ka jantnaʼa tnuʼu se Israel.
N‑ka xijan tnuʼu‑s:
—¿Nanda kuaʼa se yaʼa xa taxi‑s yɨkɨ kuñu‑s xa kaxi‑ro?
53 N‑jaʼan Jesús:
—Xandaa kuu xa jaʼan‑r.
Nux ma kaxi koio‑n kuñu Se kuu ñani tnaʼa ñayiu,
te ma koʼo koio‑n nɨñɨ‑s,
ma kuaʼa koio‑n xa kutuu vaʼa‑n.
54 Ñayiu ka xaxi kuñu mee‑r,
te ka xiʼi‑i nɨñɨ mee‑r,
xtuu vaʼa‑i vitna xiʼin kuia ma jɨn ndɨʼɨ.
Te kada‑r xa nandoto koio‑i,
kɨu jɨn ndɨʼɨ ntdaa xa io.
55 Chi kuñu mee‑r,
kuu xandaa xa kaa‑ro kuu,
te nɨñɨ mee‑r,
kuu xandaa xa koʼo‑ro kuu.
56 Ñayiu ka xaxi kuñu mee‑r,
te ka xiʼi‑i nɨñɨ mee‑r,
kunduu‑i xiʼin mee‑r,
te kunduu mee‑r xiʼin mee‑i.
57 N‑tundaʼa ñaʼa Taa‑r.
Ia Ndito kuu‑ia.
Ndito mee‑ia,
te kida‑ia xa ndito mee‑r.
Nani kida mee‑ia xa ndito mee‑r,
dani kida mee‑r xa ñayiu ka xaxi ñaʼa mee‑r,
kundito koio mee‑i.
58 Tila vaʼa kuu tila vaxi nde andɨu.
Taxaʼnu tnetnu‑n n‑ka xaxi maná,
ko n‑ka xiʼí‑s.
Ñayiu xaxi tila yaʼa,
kutuu vaʼa‑i xiʼin Ianyuux kuia ma jɨn ndɨʼɨ.
59 Duʼa n‑jaʼan Jesús,
hora dakuaʼa‑ia ñayiu veñuʼu luchi ñuu nani Capernaum.
Tnuʼu n‑jaʼan Jesús kida xa xtuu vaʼa ñayiu vitna xiʼin kuia ma jɨn ndɨʼɨ
60 Na n‑ka teku se dakuaʼa‑ia nax n‑jaʼan‑ia,
kueʼe‑s n‑ka jaʼan:
—Yo uʼu tnuʼu‑ia.
¿Jundu kuaʼa xa kueka vaʼa‑s tnuʼu jaʼan‑ia?
61 Naʼa anu Jesús xa ka jan kuechi se dakuaʼa‑ia xaxeʼe tnuʼu‑ia.
N‑jaʼan‑ia:
—¿Ka kiti ini‑n xaxeʼe tnuʼu‑r a?
62 ¿Nax kani ini koio‑n,
nux kundeʼa koio‑n Se kuu ñani tnaʼa ñayiu,
hora ndaa‑s nde nuu n‑xo tuu‑s kiʼna nuu?
63 Anu‑ro kuu xa kida xa xndito‑ro.
Meni kuñu‑ro ñatu xiniñuʼu ni ɨɨn.
Ná kuu anu‑ro kuu tnuʼu mee‑r.
Kida tnuʼu mee‑r xa xtuu vaʼa ñayiu.
64 Ko ña ka jandixa ñaʼa‑n.
Dava‑n,
joon,
ko dava‑n,
ñaʼa.
Chi nde xa kiʼna nuu,
n‑xo naʼa Jesús jundu ña jandixa ñaʼa,
te jundu diko ñaʼa nuu se kaʼni ñaʼa.
65 N‑jaʼan‑ia:
—Xijan kuu xa n‑jaʼan‑r xa ni ɨɨn ñayiu,
ma kuaʼa xa kunduu‑i xiʼin mee‑r,
nux ña kida Taa‑r xa duʼa koo.
66 Kɨu ijan,
n‑ka dandoo kueʼe se xndijun Jesús mee‑ia.
Ñatuka n‑ka xikonuu‑s xiʼin‑ia.
67 Xijan kuu xa n‑xijan tnuʼu Jesús nuu n‑uxi uu se dakuaʼa‑ia:
—Ndoʼo,
¿ñatu ka juini‑n xa jɨʼɨn koio mee‑n tuku a?
68 N‑jaʼan Simón Spedru:
—Xtoʼo‑ro,
¿jundu nuu jɨʼɨn koio‑da u?
Tnuʼu mee‑n kida xa xtuu vaʼa‑da,
vitna xiʼin kuia ma jɨn ndɨʼɨ.
69 Ka jandixa ñaʼa‑da.
Xá n‑ka xini‑da xa mee‑n kuu Cristu,
Ia n‑tundaʼa ñaʼa Ianyuux.
Daʼya Yɨɨ Ianyuux Ndito kuu‑n.
70 N‑xiaʼan Jesús:
—¿Ña ndaa xa n‑kaxí ñaʼa‑r uxi uu tnaʼa‑n,
ko ɨɨn mee‑n kuu‑s kuiʼna u?
71 Te kakuneʼe‑ia Judas Iscariote,
daʼya yɨɨ Simón.
Se ijan diko Jesús nuu se kaʼni ñaʼa.
Ɨɨn se tnaʼa nuu n‑uxi uu se dakuaʼa Jesús kuu‑s.