N‑ndadavaʼa Jesús ɨɨn seyɨɨ n‑xiʼí ndaʼa‑s n‑xiʼí xeʼe‑s
5
Na n‑yaʼa xaʼa,
te io ɨɨn viko ñayiu Israel,
te juaʼan Jesús ñuu nani Jerusalén.
2 Ijan,
yatni nuu nani Yeʼe Tkachi,
katuu ɨɨn tanque kaʼnu ñuʼu ndute.
Ñayiu ka jaʼan tnuʼu hebreu danani tanque jan Betesda.
Yundute jan io oʼon portal.
Jesús cura en Sábado (Juan 5.1-15)
3 Ijan n‑ka kaa kueʼe xa kueʼe ñayiu kuʼu.
Ñayiu kuaa,
ñayiu yakua,
ñayiu n‑xiʼí ndaʼa‑i n‑xiʼí xeʼe‑i.
Xndetu‑i nahora na kanda nuu ndute.
4 Danaa,
xo juun ɨɨn ángel,
ia xinokuechi nuu Ianyuux.
Xo juun‑ia tanque,
xa dakanda‑ia ndute.
Na yaʼa xa dakanda‑ia ndute,
te davaʼa nga ñayiu keé kiʼna nuu nuu ndute,
te ndvaʼa‑i davaʼa nga kueʼe tnaʼa‑i.
5 Te ijan n‑xo ndetu ɨɨn seyɨɨ.
Xá n‑kuu oko xaun uni kuia kuʼu‑s.
6 Na n‑xini Jesús se kuʼu kaa ijan,
n‑kutnuni ini‑ia xa da kaa‑s n‑kuu kueʼe kuia.
N‑xijan tnuʼu‑ia nuu‑s:
—¿Juini‑n xa ndvaʼa‑n a?
7 N‑jaʼan se kuʼu:
—Dito,
ñayo ñayiu io xa kandeka ñaʼa‑i jɨʼɨn hora kanda ndute.
Nɨni juaʼan‑da,
te kiʼna ka ɨnka ñayiu keé nuu ndute.
8 N‑jaʼan Jesús:
—Ndokoo.
Ndoneʼe yuu‑n te kaka.
9 Hora ijan ni,
n‑ndvaʼa‑s.
N‑ndoneʼe‑s yuu‑s te n‑xika‑s.
Te kɨu ijan kuu kɨu ndetatu ñayiu Israel.
10 Xijan kuu xa n‑ka jaʼan se fariseu nuu se n‑ndvaʼa:
—Kɨu ndetatu‑ro kuu.
Jaʼan tnuʼu taʼu tniu xa ni ɨɨn ñayiu maxku kaneʼe‑i yuu‑i kɨu ndetatu‑ro.
11 N‑jaʼan‑s:
—Se n‑ndadavaʼa ñaʼa n‑jaʼan xa ndoneʼe‑da yuu‑da te kaka‑da.
12 N‑ka xijan tnuʼu‑s:
—¿Jundu kuu se n‑jaʼan xa ndoneʼe‑n yuu‑n te kaka‑n?
13 Ko se n‑ndvaʼa,
ña xini‑s ndese kuu se n‑ndadavaʼa ñaʼa.
Chi xaxeʼe xa kueʼe ñayiu n‑xio ijan,
te juaʼan ni Jesús.
14 Dada n‑nanitnaʼa Jesús xiʼin se n‑ndvaʼa veñuʼu kaʼnu.
N‑jaʼan‑ia:
—Kundeʼa xa xá n‑ndvaʼa‑n vitna.
Maxku kada ka‑n xa uʼu,
nada kueʼe ka vida yaʼa‑n.
15 Te juaʼan se n‑ndvaʼa nuu se Israel,
te n‑xian tnuʼu‑s xa Jesús kuu se n‑ndadavaʼa ñaʼa.
16 Xijan kuu xa n‑ka xini uʼu se Israel Jesús.
N‑ka juini‑s xa kaʼni‑s‑ia,
xaxeʼe xa tniu yaʼa n‑kida‑ia kɨu ndetatu ñayiu Israel.
Jesús defiende su autoridad (Juan 5.16-47)
—Taa‑r,
kidatniu‑ia nde vitna.
Dɨuni kidatniu mee‑r.
18 Xijan kuu xa yo n‑ka juini se Israel xa kaʼni‑s‑ia.
N‑ka jaʼan‑s xa ña chinuu‑ia kɨu ndetatu ñayiu Israel.
N‑ka jaʼan‑s xa xa uʼu kuu xa n‑jaʼan‑ia xa Ianyuux kuu Taa‑ia,
chi duʼa n‑jaʼan‑ia xa ɨɨn nuu kuu mee‑ia xiʼin Ianyuux.
N‑kida Ianyuux xa ndadandaa Jesús ñayiu ñuñayiu
19 Xijan kuu xa n‑jaʼan Jesús nuu‑s:
—Xandaa kuu xa jaʼan‑r.
Daʼya Yɨɨ Ianyuux,
meni mee‑ia,
ña kuaʼa‑ia xa kada‑ia ni ɨɨn.
Ndeʼa‑ia xa kida Taa‑ia,
te duʼa kida mee‑ia.
Davaʼa nga xa kida Ianyuux,
xaʼa kida Daʼya Yɨɨ‑ia tuku.
20 Chi xemani Ianyuux Daʼya Yɨɨ‑ia.
Ntdaa xa kida‑ia dandeʼa‑ia Daʼya Yɨɨ‑ia.
Te tniu naʼnu ka dada xaʼa dandeʼa‑ia Daʼya Yɨɨ‑ia,
xa jini koio‑n te yuʼu koio‑n.
21 Nani kida Taa‑ia xa nandoto ndɨyɨ xa kutuu vaʼa‑i,
dani kida Daʼya Yɨɨ‑ia xa kutuu vaʼa koio ñayiu juini‑ia xa kutuu vaʼa‑i.
22 Chi Taa‑r,
ña ndadandaa‑ia ni ɨɨn ñayiu.
Xá n‑taxi‑ia xa taxnuni‑ia xa ndadandaa Daʼya Yɨɨ‑ia ntdaa ñayiu.
23 Duʼa koo xa koo koio ntdaa ñayiu xañuʼu nuu Daʼya Yɨɨ‑ia,
nani xndaxio‑i xañuʼu nuu mee‑ia.
Ñayiu ña io xañuʼu nuu Daʼya Yɨɨ‑ia,
dani ña io‑i xañuʼu nuu Ia n‑tundaʼa ñaʼa.
24 ʼXandaa kuu xa jaʼan‑r.
Ɨɨn ñayiu xeka vaʼa tnuʼu mee‑r te jandixa‑i Ia n‑tundaʼa ñaʼa mee‑r,
tuu vaʼa‑i vitna xiʼin kuia ma jɨn ndɨʼɨ.
Ma kada uʼu‑r‑yɨ,
chi xá n‑yaʼa‑i xa ma kuú‑i xiʼin kuechi‑i,
xa kutuu vaʼa‑i xiʼin Ianyuux kuia ma jɨn ndɨʼɨ.
25 Xandaa kuu xa jaʼan‑r.
Vaxi hora,
te vitna xá n‑xee hora,
xa ñayiu ka xiʼí xiʼin kuechi‑i,
teku koio‑i tnuʼu Daʼya Yɨɨ Ianyuux.
Ntdaa ñayiu ka xeka vaʼa tnuʼu‑ia,
kutuu vaʼa koio‑i xiʼin Ianyuux kuia ma jɨn ndɨʼɨ.
26 Nani kida Taa‑r xa kutuu vaʼa koio ñayiu,
dani n‑kida‑ia xa kada Daʼya Yɨɨ‑ia xa kutuu vaʼa koio ñayiu.
27 N‑kida‑ia xa ndadandaa mee‑r ñayiu,
chi Se kuu ñani tnaʼa ñayiu kuu‑r.
28 Maxku yuʼu koio ka‑n xa duʼa jaʼan‑r.
Vaxi hora xa kunini koio ntdaa ndɨyɨ xa jaʼan mee‑r.
29 Ndee koio‑i nuu xyɨnduxi‑i.
Ñayiu n‑ka kida xavaʼa,
nandoto koio‑i xa kutuu vaʼa‑i xiʼin Ianyuux kuia ma jɨn ndɨʼɨ.
Ñayiu n‑ka kida xa uʼu,
nandoto koio‑i xa ndadandaa‑r‑yɨ,
te jɨʼɨn koio‑i andea.
N‑jaʼan Jesús: “Tniu kida‑r jaʼan ndaa xaxeʼe‑r”
30 ʼMeni mee‑r,
ña kuaʼa‑r xa kada‑r ni ɨɨn.
Nani taʼu tniu Taa‑r,
dani ndadandaa‑r ñayiu.
Te vaʼa ndadandaa‑r‑yɨ,
chi ña kida‑r xa juini mee‑r,
ko kida‑r xa juini Taa‑r n‑tundaʼa ñaʼa.
31 Nux n‑jaʼan mee‑r xaxeʼe mee‑r n‑kuu,
te jaʼan koio mee‑n xa ña ndaa.
32 Ko jaʼan ndaa Taa‑r xaxeʼe‑r tuku,
te naʼa‑r xa ndaa jaʼan mee‑ia.
33 Xá n‑ka tundaʼa mee‑n se n‑ka xeʼen nuu tuu Sua,
te n‑jaʼan ndaa Sua xaxeʼe xa kuu xandaa.
34 Ko ña ndoñuʼu‑r xa jaʼan ndaa ɨɨn seyɨɨ xaxeʼe‑r.
Kakuneʼe‑r xa n‑jaʼan Sua,
xa teku koio mee‑n,
xa ma kuú koio‑n xiʼin kuechi‑n.
35 Ná kuu iti vaʼa ka koko n‑kuu Sua.
Xaku kɨu n‑ka tna ini‑n xa n‑kida Sua,
te n‑ka kudɨ ini‑n.
36 Ko io ɨnka,
kaʼnu ka dada Sua,
jaʼan ndaa xaxeʼe‑r.
N‑taxi Taa‑r tniu daxinokava‑r.
Tniu kida‑r jaʼan ndaa xaxeʼe‑r xa n‑tundaʼa ñaʼa Taa‑r.
37 N‑tundaʼa ñaʼa Taa‑r,
te n‑jaʼan ndaa‑ia xaxeʼe‑r.
Nuncas ña n‑ka teku mee‑n tnuʼu‑ia,
ni ña ka xini‑n nanda kuu‑ia.
38 Ñatu ka xeka vaʼa‑n tnuʼu‑ia,
chi ña ka jandixa‑n Ia n‑tundaʼa ñaʼa.
39 Ka kaʼu‑n xa ka kaʼu‑n tnuʼu Ianyuux,
chi ka xani ini‑n xa duʼa kutuu vaʼa koio‑n xiʼin Ianyuux kuia ma jɨn ndɨʼɨ.
Ko tnuʼu ka kaʼu‑n jaʼan ndaa xaxeʼe mee‑r.
40 Te ña ka juini‑n xa kunduu‑n xiʼin‑r,
xa kutuu koio‑n xiʼin Ianyuux.
41 ʼÑa ndoñuʼu‑r xa najuen tnuʼu ñaʼa ñayiu.
42 Ko xini ñaʼa‑r mee‑n.
Naʼa‑r xa ñatu xemani koio‑n Ianyuux.
43 Xaxeʼe Taa‑r n‑kixee‑r,
ko ñatu ka xeka vaʼa ñaʼa‑n.
Nux kixi ɨnka seyɨɨ xaxeʼe mee‑s,
te se ijan kuu xa kueka vaʼa koio‑n.
44 Ña ka kuaʼa mee‑n xa jandixa ñaʼa koio‑n.
Ka kida‑n xa juini mee‑n,
te ka najuen tnuʼu tnaʼa mee‑n,
ko ña ka kida‑n xa juini idini Ianyuux,
xa najuen tnuʼu ñaʼa mee‑ia mee‑n.
45 Maxku kani ini koio‑n xa tekuechi ñaʼa mee‑r nuu Taa‑r.
Tekuechi ñaʼa Moisés mee‑n.
Ka jaʼan‑n xa kida‑n nax n‑taʼu tniu Moisés,
ko ña ndaa.
46 Nux n‑ka jandixa‑n Moisés n‑kuu,
te jandixa ñaʼa koio‑n mee‑r.
Chi n‑kakuneʼe ñaʼa Moisés mee‑r,
na n‑chidotnuni‑s tnuʼu Ianyuux.
47 Nux ña ka jandixa‑n tnuʼu n‑chidotnuni Moisés,
¿janda kada koio‑n xa jandixa‑n tnuʼu mee‑r?