Ɨɨn ñadɨʼɨ ñuu nani Samaria
4
N‑kutnuni ini Jesús xa ka tekutnuʼu se fariseu ntdaa xa kida‑ia.
N‑ka tekutnuʼu‑s xa kueʼe ka ñayiu kunduu xiʼin Jesús dada Sua.
N‑ka teku‑s xa dajuendute Jesús kueʼe ka ñayiu dada Sua.
2 Mee Jesús,
ña n‑xo dajuendute‑ia ñayiu,
ko se dakuaʼa‑ia n‑ka xo dajuendute‑s ñayiu.
Jesús habla con una mujer samaritana (Juan 4.1-42)
4 Te n‑xio xa yaʼa‑ia distrito Samaria.
5 Xijan kuu xa n‑xee‑ia ñuu nani Sicar distrito Samaria.
Katuu ñuu Sicar yatni ñuʼu n‑xiaʼan taxaʼnu tnetnu‑ro Jacob nuu daʼya‑s José.
6 Ijan katuu doko ndute Jacob.
Te n‑xiau Jesús xa n‑xika‑ia ichi.
Xijan kuu xa nukoo‑ia yudoko jan.
Naxa kaa x‑uu kuu.
7 Ijan n‑xee ɨɨn ñadɨʼɨ Samaria xa tava‑ña ndute doko jan.
N‑jaʼan Jesús nuu‑ña:
—Taxi xaku ndute na koʼo‑r,
chi yichi‑r‑té.
8 Chi xá juaʼan se dakuaʼa‑ia xiti ñuu,
xa jueen‑s xa kaxi‑s xiʼin‑ia.
9 Xijan kuu xa n‑jaʼan ñadɨʼɨ Samaria:
—Té Israel kuu mee‑n.
¿Nax kuu xa xijan‑n ndute nuu mee‑da?
Chi kuu‑da ñadɨʼɨ Samaria.
—Nux n‑kutnuni ini‑n xa n‑taxi Ianyuux,
te n‑kutnuni ini‑n jundu xijan ndute n‑kuu,
te kajan mee‑n nuu mee‑r,
te taa‑r ndute vaʼa xa kutuu vaʼa‑n.
11 N‑jaʼan ñadɨʼɨ:
—Dito,
ña tuu nax neʼe‑n xa tava‑n ndute,
te yo kunu doko ndute.
¿Ndexu tava‑n ndute vaʼa jan?
12 Taxaʼnu tnetnu‑da Jacob n‑taxi doko ndute yaʼa.
Mee‑te xiʼin daʼya‑te,
kɨtɨ‑te,
ntdaa‑te n‑ka xiʼi ndute yaʼa.
¿Kunxaʼnu ka mee‑n dada mee‑te a?
13 N‑jaʼan Jesús:
—Ntdaa ñayiu ka xiʼi ndute yaʼa,
nayichi‑i‑té ɨnka vuelta.
14 Ko davaʼa nga ñayiu koʼo ndute juñaʼa mee‑r,
nuncas ma nayichi ka‑i.
Ná kuu doko ndute kane anu ñayiu jan,
da kuu ndute juñaʼa‑r ñayiu jan,
te xijan kutuu vaʼa‑i kuia ma jɨn ndɨʼɨ.
15 N‑jaʼan ñadɨʼɨ:
—Dito,
taa‑n ndute jan,
xa ma yichi ka‑da‑té,
te ma kixi ka‑da yaʼa xa tava‑da‑té.
16 N‑jaʼan Jesús:
—Juaʼan,
juan kueka yɨɨ‑n,
te kandeka‑n‑sɨ ndixi yaʼa.
17 N‑jaʼan ñadɨʼɨ:
—Ñayo yɨɨ‑da io.
N‑jaʼan Jesús:
—Vaʼa jaʼan‑n xa ñayo yɨɨ‑n io.
18 N‑xo tuu‑n xiʼin oʼon seyɨɨ.
Te tuu‑n xiʼin ɨnka seyɨɨ vitna,
ko ña kuu‑s yɨɨ‑n.
Ndaa n‑jaʼan‑n.
19 N‑jaʼan ñadɨʼɨ:
—Dito,
tu ini‑da xa té xian tnuʼu tnuʼu Ianyuux nuu ñayiu kuu mee‑n.
20 Taxaʼnu tnetnu‑da,
n‑ka nakuetu‑te nuu Ianyuux yuku yaʼa.
Ka jaʼan ñayiu mee‑n,
xa io xa nakuetu ñayiu nuu Ianyuux ñuu nani Jerusalén.
21 N‑jaʼan Jesús:
—Ñadɨʼɨ,
io xa jandixa‑n nax jaʼan‑r.
Xee hora,
xa ni yuku yaʼa ni ñuu Jerusalén,
ma nakuetu koio ka ñayiu nuu Taa‑ro Ianyuux.
22 Ka nakuetu mee‑n nuu Ianyuux ta jini koio ka‑n.
Ka nakuetu mee‑r nuu Ianyuux ka xini‑r.
Chi nuu ñayiu Israel,
n‑xiaʼan Ianyuux tnuʼu‑ia,
xa kixi Ia dakaku ñayiu xa ma kuú‑i xiʼin kuechi‑i.
23 Xee kɨu,
te xá n‑xee hora,
ndadakaʼnu ndaa koio ñayiu Taa‑ro Ianyuux.
Ñayiu ndaa jandixa Ianyuux,
niʼi koio‑i tnuʼu ndaa‑ia,
te ndadakaʼnu koio‑i‑ia xiʼin anu‑i.
Nduku Taa‑ro Ianyuux ñayiu jan,
xa ndadakaʼnu koio‑i‑ia.
24 Ná kuu Espíritu Ianyuux,
da kuu Ianyuux.
Chi ña kuaʼa xa jini koio ñayiu Ianyuux xiʼin nuu‑i.
Ñayiu ndadakaʼnu Ianyuux,
io xa ndaa jandixa koio‑i‑ia,
io xa jandixa koio‑i‑ia xiʼin ntdaa anu‑i.
25 N‑jaʼan ñadɨʼɨ:
—Naʼa‑da xa kixi Mesías,
Ia tundaʼa Ianyuux.
Danani ñaʼa ñayiu Cristu.
Na kixi mee‑ia,
te kachitnuñaʼa‑ia ntdaa.
26 N‑jaʼan Jesús:
—Mee‑r kuu‑ia.
Se ndatnuʼu xiʼin‑n kuu‑ia.
27 Nɨni duʼa ndatnuʼu Jesús xiʼin ñadɨʼɨ,
n‑ka naxee se dakuaʼa‑ia.
Ña n‑ka kutnuni ini‑s nax kuu xa ndatnuʼu‑ia xiʼin ɨɨn ñadɨʼɨ.
Ko ni ɨɨn‑s ña n‑ka xijan tnuʼu nax xijan tnuʼu‑ia,
nax kuu xa ndatnuʼu‑ia xiʼin‑ña.
28 Ñadɨʼɨ jan,
n‑dandoo‑ña yoo‑ña te juan nuʼu‑ña xiti ñuu.
N‑xian tnuʼu‑ña nuu se ñuu‑ña:
29 —Neʼe koio‑n,
te jini‑n ɨɨn teyɨɨ n‑jaʼan ndaa ntdaa xa n‑kida‑da.
¿Kuu‑te Cristu,
Ia tundaʼa Ianyuux a?
30 Se ijan,
n‑ka kee‑s ñuu jan,
te juaʼan‑s nuu tuu Jesús.
31 Te nɨni juan nuʼu ñadɨʼɨ jan xiti ñuu,
te n‑ka jaʼan se dakuaʼa Jesús nuu‑ia:
—Maestru,
kaa‑n itaʼu.
32 Ko n‑jaʼan‑ia:
—Io xa xaa‑r xa ña ka kutnuni ini mee‑n.
33 Xijan kuu xa n‑ka ndatnuʼu se dakuaʼa‑ia ɨɨn‑s xiʼin ɨnka‑s:
—¿N‑xiaʼan ɨɨn ñayiu xa n‑xaxi‑ia?
34 N‑jaʼan Jesús:
—Xa xaa‑r kuu xa kida‑r xa juini Ianyuux n‑tundaʼa ñaʼa.
Kuu xa daxinokava‑r tniu n‑taxi‑ia.
35 Ka jaʼan mee‑n xa juini ka‑i koon yoo xa kaʼnde‑ro trɨu.
Ko jaʼan mee‑r xa io xa kundeʼa koio‑n,
te jini koio‑n xa xá n‑yichi trɨu,
te io xa kaʼnde‑ro trɨu jan vitnadii.
36 Ná kuu trɨu n‑yichi,
ka kuu ñayiu xeka vaʼa tnuʼu mee‑r.
Ná kuu se xaʼnde trɨu,
ka kuu se xian tnuʼu tnuʼu mee‑r nuu ñayiu,
te ka tnɨɨ‑s yaʼu‑s.
Ka kida‑s xa kutuu vaʼa koio ñayiu xiʼin Ianyuux kuia ma jɨn ndɨʼɨ.
Se n‑xate trɨu,
xiʼin se xaʼnde trɨu,
nduu‑s kuvete.
37 Ndaa ka jaʼan ñayiu xa ɨɨn seyɨɨ xate trɨu,
te ɨnka seyɨɨ xaʼnde trɨu.
38 N‑tundaʼa ñaʼa‑r mee‑n,
xa kaʼnde koio‑n nuu ña n‑ka kidatniu‑n.
Ɨnka‑s n‑ka kidatniu ijan,
te n‑ka kɨu mee‑n nuu n‑ka kidatniu mee‑s.
39 Te n‑ka kixeʼe kueʼe ñayiu Samaria xa jandixa‑i Jesús.
Xaxeʼe tnuʼu ñadɨʼɨ jan,
n‑ka jandixa‑i‑ia.
N‑jaʼan ndaa‑ña:
“N‑jaʼan ndaa‑te ntdaa xa n‑kida‑da.”
40 Xijan kuu xa na n‑ka xee ñayiu Samaria nuu tuu Jesús,
n‑ka xijan‑i xa ndoo‑ia xiʼin‑i.
Te n‑ndoo‑ia xiʼin‑i uu kɨu.
41 Te kueʼe ka ñayiu n‑ka kixeʼe xa jandixa‑i‑ia xaxeʼe tnuʼu mee‑ia.
42 N‑ka jaʼan‑i nuu ñadɨʼɨ jan:
—Ditna ka,
n‑kixeʼe‑r xa jandixa‑r‑ia,
xaxeʼe tnuʼu mee‑n.
Vitna,
xá n‑ka teku ndaa‑r tnuʼu mee‑ia.
Ka xini‑r xa ndaa xa se yaʼa kuu Ia kida xa ma kuú koio ñayiu xiʼin kuechi‑i.
N‑ndadavaʼa Jesús ɨɨn seluchi
43 Nuu n‑kuu uu kɨu,
n‑kee Jesús ñuu ijan,
te juaʼan‑ia ichi distrito Galilea.
Jesús sana al hijo de un oficial (Juan 4.43-54)
44 Nani n‑jaʼan Jesús,
dani n‑kuu:
“Ɨɨn se xian tnuʼu tnuʼu Ianyuux nuu ñayiu,
te ñayiu ñuu mee‑s ña xndaxio‑i xañuʼu nuu‑s.”
45 Chi na n‑naxee‑ia Galilea,
te n‑ka xeka vaʼa ñaʼa ñayiu Galilea.
Ntdaa xa n‑kida‑ia viko Jerusalén n‑ka xini‑i,
chi n‑ka xeʼen mee‑i viko ijan tuku.
46 N‑xee‑ia ɨnka vuelta ñuu nani Caná distrito Galilea.
Ijan nuu n‑kida‑ia xa n‑nduu ndute vinu.
Ijan n‑xio ɨɨn se netniu nuu se kunxaʼnu ka,
te kuʼu daʼya‑s ñuu nani Capernaum.
47 Se ijan,
n‑tekutnuʼu‑s xa n‑kee Jesús distrito Judea te vaxi‑ia Galilea.
N‑xee‑s nuu tuu‑ia,
te n‑xijan‑s xa na jɨʼɨn‑ia xiʼin‑s ñuu Capernaum,
xa ndadavaʼa‑ia daʼya‑s.
Chi daʼya‑s yo kaʼu kuʼu.
48 Xijan kuu xa n‑jaʼan Jesús:
—Ka juini‑n xa jini koio‑n milagru,
te nux ma jini koio‑n,
nuncas ma jandixa ñaʼa koio‑n.
49 N‑jaʼan se netniu nuu se kunxaʼnu ka:
—Dito,
na jɨʼɨn‑ro,
antecas xa kuú daʼya‑da.
50 N‑jaʼan Jesús:
—Juan nuʼu,
chi xá n‑ndvaʼa daʼya‑n,
dani ndito‑s.
Te se ijan,
n‑jandixa‑s tnuʼu n‑jaʼan Jesús,
te juan nuʼu‑s.
51 Nɨni juan nuʼu‑s ichi,
te n‑ka xe tnaʼa ñaʼa se ka xinokuechi nuu‑s.
N‑ka xian tnuʼu‑s xa xá n‑ndvaʼa daʼya‑s.
52 Xijan kuu xa n‑xijan tnuʼu‑s‑sɨ nahora n‑kixeʼe daʼya‑s xa vax ndvaʼa‑s.
N‑ka jaʼan‑s:
—Iku,
kaa ɨɨn xañini,
n‑ndiko ñaʼa kaʼni.
53 Xijan kuu xa n‑kutnuni ini taa seluchi jan,
xa hora n‑jaʼan Jesús:
“Xá n‑ndvaʼa daʼya‑n,
dani ndito‑s”,
hora ijan ni n‑ndvaʼa‑s.
Te se ijan,
xiʼin ntdaa ñayiu io veʼe‑s,
n‑ka kixeʼe‑s xa jandixa koio‑s Jesús.
54 Duʼa n‑kida Jesús milagru kuu uu distrito Galilea.
Duʼa n‑kida‑ia,
na n‑kee‑ia Judea te n‑naxee‑ia Galilea.