2 To bairo cʉ̃ ñeegabana quena oco bairo ca-ame ĩiñuparã:

—Boje rʉmʉ ca-ano mani átiquẽna.

Camaja capaarã boje rʉmʉ ca-tʉjʉra ejarã cʉ̃re mairã,

noo na ca-booro manire awaja tutiborãma.

To bairo mani cá-átiere rooye tuuborãma,

ca-ame ĩiñuparã.

3 “Cʉ̃re jã jĩagarã,”

na ca-ame ĩitoye Jesú maca Betaniapʉ Simón ca-ajeri boabatacʉ ya wiipʉ ca-añupʉ.

Jesú cʉ̃ ca-ʉga ruiri paʉna cãromio alabastro ca-wamecʉti rʉʉ weerica rʉʉ ca-jʉti ñuurije pairo ca-wapacʉtie ca-jañari rʉre ca-ne ejayupo.

Ti rʉre neatí,

pãa,

Jesú rupoare ca-pio peoyupo tiere.

4 Jicãarã topʉ ca-ãna to bairo cõ cá-áto tʉjʉrã,

“Rooro majuu áamo,”

ca-ĩi tʉgooñañuparã.

Ĩi tʉgooñari oco bairo ca-ame ĩiñuparã:

—¿Nope ĩo ca-wapa pacarije to ca-anibato quena joco majuuna cõ áti reetí?

5 Aperãre cõ ca-joata jicã cʉma paarique wapa cõo wapa jooboricarãma.

To cõo wapa jee,

ca-bopacoorãre jooboricomo,

ca-ĩiñuparã.

To bairo ame ĩri cõ ca-tutiyuparã.

Jesú maca oco bairo na ca-ĩiñupʉ:

6 —Cõ cá-átigari wame cõ áparo.

¿Nope ĩirã cõre mʉja patowãcootí?

Caroaro yʉre áamo.

7 Ca-bopacoorã mʉja watoapʉ anicõa aninucugarãma.

Noo mʉja ca-boori paʉ nare mʉja átinemo maji.

Yʉ maca mʉja mena yoaro yʉ aniquetigʉ.

8 Caroaro yʉre cõ cá-áti majiri wame áamo.

To bairi atie caroa jʉti ñuurijere yʉre pio peomo,

yʉ ca-bai yajiro bero yʉ rupaʉre na ca-yaaro na ca-pio peoparore bairo iñoo áamo.

9 Cariape mʉjaare yʉ ĩi.

Ati yepa nipetiro yʉ ye quetire ca-buio teñarã yʉre cõ cá-átaje quenare buiogarãma.

Yʉre cõ cá-átajere majicõa aninucugarãma to canacã rʉmʉna,

na ca-ĩiñupʉ Jesú.

10 Cabero Judas Iscariote,

Jesú buerã doce canacãʉ mena ca-ãnacʉ cá-aájupʉ sacerdote maja ʉparã tʉpʉ,

Jesúre na ca-ñeepere na wadajãʉ aácʉ.

11 To bairo cʉ̃ ca-ĩrijere api wariñuuri,

“Niyeru mʉre jã wapayegarã,”

Judare cʉ̃ ca-ĩiñuparã.

To bairo na ca-ĩiro apii Jesúre dope bairo átiri cʉ̃ na ca-ñeepere ca-quenooñupʉ Judas yua.

12 Cabero pascua boje rʉmʉ judío maja pan ca-wauarije ca-ajuya manie na ca-ʉga jʉgori rʉmʉ ca-añupe.

Oveja cawimaʉre boje rʉmʉ na ca-ʉgapaʉre na ca-jĩari paʉ ca-ano Jesú buerã oco bairo cʉ̃ ca-ĩiñuparã:

—¿Noopʉ pascua boje rʉmʉ mani ca-ʉgapa paʉre jã quenoorãatí?

cʉ̃ ca-ĩi jeniñañuparã.

13 To bairo na ca-ĩiro apii cʉ̃ buerã pʉgarãre,

oco bairo na ca-ĩi buioyupʉ:

—Aánaja Jerusalén'pʉ.

Topʉ ejarã jicãʉ cʉ̃ mʉja boca tʉjʉgarã ca-oco jotʉ tu peo aácʉre.

14 Cʉ̃ mena aáti cʉ̃ ca-jãari wiipʉ mʉja ejagarã.

Topʉ eja,

ti wii ʉpaʉre oco bairo cʉ̃ ĩiña:

“Manire cabuei oco bairo mʉ ĩi joomi:

‘¿Noopʉ to ãtí yʉ buerã mena pascua boje rʉmʉ yʉ ca-ʉgapa arʉa?’

mʉ ĩi joomi,”

cʉ̃ ĩi buioya.

15 To bairo mʉja ca-ĩiro ca-bui macá arʉa ca-pairi arʉa,

quenoo yaparorica arʉare mʉja iñoogʉmi.

Topʉ mani ca-ʉgapere quenoo yuuya,

ca-ĩi buioyupʉ Jesú cʉ̃ buerãre.

16 To bairo cʉ̃ ca-ĩiro apirã Jesú buerã pʉgarã cá-aácoajuparã Jerusalén macapʉ.

Ti macapʉ eja,

Jesú cʉ̃ ca-ĩricarore bairona ca-bʉga ejayuparã.

To bairi ti arʉapʉ pascua ca-ano na ca-ʉgapere ca-quenoo yuuyuparã.

17-18 Cabero canaiori paʉ ca-ejaro Jesú cʉ̃ buerã doce canacãʉ mena eja,

ca-ʉga ruiyuparã.

Topʉ na mena ʉga ruiina oco bairo na ca-ĩiñupʉ Jesú:

—Cariapena mʉjaare yʉ ĩi.

Jicãʉ mʉja mena macacʉ yʉ mena ca-ʉgaʉ yʉre ca-tʉjʉteerãre yʉre wadajãgʉmi,

yʉre na ñeato ĩi.

19 To bairo cʉ̃ ca-ĩiro apirã seeto ca-tʉgooñarique paiyuparã.

To bairo tʉgooñarique paibana:

—¿Yʉna yʉ baiquetibacʉatí?

Jesúre cʉ̃ ca-ĩi jeniña peticõañuparã,

na ca-ano cõona.

20 To bairo na ca-ĩiro oco bairo na ca-ĩi yʉʉyupʉ Jesú maca:

—Jicãʉ mʉja mena macacʉ yʉ mena jicã bapapʉna ca-yoje ʉgaʉna ãmi,

ca-ĩiñupʉ.

21 —Yʉ ca-baipe tirʉmʉpʉ macana Dio ye quetire ca-buiorã na ca-ĩi ucaricarore bairona yʉre baigaro.

To bairo yʉ ca-baipe to ca-anibato quena rooro majuu baigaro yʉ ca-tʉjʉteerãre yʉre ca-wadajãʉ macare.

Ati yepapʉ cʉ̃ ca-buiaquẽpata cʉ̃re ñuucõaboricaro,

na ca-ĩiñupʉ Jesú cʉ̃ buerãre.

22 Ĩi yaparo Jesú cʉ̃ buerã mena ʉgaʉ,

pan're nee,

cʉ̃ Pacʉ Diore ca-jeni nʉcʉbʉgoyupʉ.

Jeni nʉcʉbʉgo yaparo tiare pe mʉto,

nare joo,

oco bairo na ca-ĩiñupʉ:

—Ʉgaya.

Atie yʉ rupaʉ ãa,

na ca-ĩiñupʉ.

23 Cabero etirica bapare nee,

Diore ca-jeni nʉcʉbʉgoyupʉ tunu.

Jeni nʉcʉbʉgo yaparo cʉ̃ buerãre na ca-tĩañupʉ.

Nipetirã cʉ̃ buerã ti bapare ca-eti peticõañuparã.

24 Nare tĩaʉna oco bairo na ca-ĩiñupʉ Jesú:

—Atie yʉ rií ãa.

Yʉ rií ree yajigʉ,

camaja capaarã caroorije na cá-átiere wapayebojaʉ.

To bairo yʉ ca-rií ree yaji wapayebojaro camaja caroorije na cá-átajere majiriobojagʉmi Dio cʉ̃re ca-jeni nʉcʉbʉgorãre.

To bairo mʉjaare yʉ ca-ĩi cũuri wamere tʉgooñari etiya.

25 Cariapena mʉjaare yʉ ĩi.

Atie ʉje ocore yucʉacã mani ca-etirore bairo yʉ etinemoquetigʉ.

Cabero yʉ Pacʉ caʉpaʉ yʉre cʉ̃ ca-cũuro beropʉ mʉja mena ape ni yʉ etinemogʉ tunu,

ca-ĩiñupʉ Jesú.

26 Jesú cʉ̃ buerã mena na ca-ʉgaricaro bero Diore ĩi baja yaparo ti wii ca-ãnana ca-buticoajuparã,

Olivo na ca-ĩricʉ ʉ̃taʉpʉ aána.

27 Topʉ na cá-aáto oco bairo na ca-ĩiñupʉ Jesú cʉ̃ buerãre:

—Mʉja nipetirã ati ñami uwibana yʉre mʉja ruti weo peticoagarã.

To bairo mʉja ca-baipere Dio ye queti ucarica pũuropʉ ca-ĩi ucaricarore bairona baigaro.

Oco bairo ĩi ucarique ãa:

“Oveja ʉpaʉre cʉ̃ jĩagarãma.

Cʉ̃ na ca-jĩaro tʉjʉrã,

oveja aá bategarãma,”

ĩi ucarique ãa.^a

To bairo na cá-aá baterore bairona mʉja quena yʉre mʉja ruti aáweogarã,

uwibana.

28 Na ca-jĩa rocaricʉ anibacʉ quena yʉ tunu catígʉ.

Tunu catíri bero Galilea yepapʉ mʉja jʉgoye yʉ aágʉ,

mʉjaare yuʉ aácʉ,

na ca-ĩiñupʉ Jesú.

29 To bairo cʉ̃ ca-ĩiro apii Pedro cʉ̃ ca-ĩiñupʉ:

—Aperã nipetirã uwibana mʉre na ca-ruti aáweorije to ca-anibato quena yʉ maca yʉ aáquetigʉ,

ca-ĩiñupʉ.

30 To bairo cʉ̃ ca-ĩiro:

—Cariapena mʉre yʉ ĩi.

Yucʉ ñamina ca-bujuri paʉ jʉgoye ãbocʉ pʉgani cʉ̃ ca-wadaparo jʉgoye itiani,

“Cʉ̃ mena macacʉ mee yʉ ãa,”

yʉre mʉ ĩitogʉ,

ca-ĩiñupʉ Jesú Pedrore.

31 To bairo cʉ̃ ca-ĩiro apibacʉ quena Pedro ca-ĩinemoñupʉ tunu:

—Mʉ mena yʉre na ca-jĩa rocarije to ca-anibato quena,

“Cʉ̃ mena macacʉ mee yʉ ãa,”

yʉ ĩiqueti majuucõagʉ yʉa,

ca-ĩiñupʉ Pedro.

Aperã cʉ̃ mena macana quena cʉ̃re bairo jeto ca-ĩi peticõañuparã.

32 Olivo ca-wame cʉtiipʉ aána Getsemaní ca-wamecʉtopʉ ca-ejayuparã.

Topʉ ejaʉ Jesú cʉ̃ buerãre oco bairo ca-ĩiñupʉ:

—Atona mʉja ruiwa,

Diore yʉ ca-jeni nʉcʉbʉgoʉ aátoye,

ca-ĩiñupʉ.

33 Topʉ Diore jeni nʉcʉbʉgoʉ aácʉ Pedrore,

Jacobore,

Juan're na ca-pii aájupʉ.

Topʉ aá,

seeto majuu ca-tʉgooñarique pai yapapua jʉgoyupʉ.

34 Tʉgooñarique pai netobacʉ oco bairo na ca-ĩiñupʉ:

—Yʉ bai yajibo,

seeto majuu tʉgooñarique pai netori yapapuabacʉ.

Atona mʉja yuu ruiwa caniquẽnana,

na ca-ĩibajupʉ.

35 To bairo ĩi yaparo na jʉgoyebʉjaacã aá,

yepapʉ mubia roca cumu áti,

oco bairo ca-ĩi jeniñupʉ Diore:

—Caacʉ,

mʉ ca-booata,

yʉ ca-popiye tamuope to baiqueticõato— ca-ĩi jeniñupʉ Diore.

36 —Caacʉ,

nipetirijere mʉ áti maji.

To bairi mʉ ca-booata rooro yʉ ca-tamuope to baiqueticõato.

Yʉ maca yʉ ca-popiye tamuope yʉ ca-booquẽtie to ca-anibato quena mʉ ca-boorore bairo maca to baiato,

ca-ĩiñupʉ.

37 To bairo Diore ĩi jeni yaparo,

cʉ̃ buerã tʉpʉ tunu aá,

nare ca-tʉjʉyupʉ ca-cani cuñarãre.

Ca-cani cuñarãre na tʉjʉ,

oco bairo na ca-ĩiñupʉ Pedrore:

—Simón,

¿canirã mʉja áatí?

¿Petoacã caniquẽnana mʉja cote ocabʉtiquẽetí?

38 Caniquẽnana cotecõaña mʉjaa.

Diore cʉ̃ jeniya,

Sataná cʉ̃ ca-boorije macare jã áti wadajãremi ĩirã.

Mʉja yeripʉre yʉre mʉja ca-aáweogaquẽtie to ca-anibato quena mʉja rupaʉri macare mʉja ocabʉtiquẽe,

na ca-ĩiñupʉ.

39 To bairo ĩi yaparo cʉ̃ Pacʉre cʉ̃ ca-jenirica paʉpʉna aáti to bairona cʉ̃ ca-ĩi jeniñupʉ tunu.

40 Jeni yaparo cʉ̃ buerã tʉ maca aáti ca-canirãrena ca-tʉjʉyupʉ tunu.

Seeto majuu nare ca-wʉgoa ejayupe.

To bairi dope bairo cʉ̃re ca-ĩi yʉ majiquẽjuparã.

41 To bairo bai yaparo cʉ̃ Pacʉre Jesú ca-jeni tʉjayupʉ to bairo cʉ̃ ca-ĩricarore bairona tunu.

Jeni yaparo tunu atí,

cʉ̃ buerãre oco bairo na ca-ĩiñupʉ:

—¿Canirã mʉja áatí mai?

To cõona cániña.

Meere,

yupiya.

Meere,

ejacoapa yʉre na ca-ñeepa paʉ.

Meere,

eja tʉgami yʉre ca-tʉjʉ teerãre ca-ñee rotiricʉ.

42 ¡Wamʉnʉcaña!

¡Jitá!

Meere eja tʉgami yʉ mena ca-anibatacʉna caroorãre yʉre ca-wadajãricʉ.

43 To bairo Jesú cʉ̃ buerãre cʉ̃ ca-wada ani paʉna na mena macacʉ ca-anibatacʉ Judas Iscariote ca-ejayupʉ.

Cʉ̃ mena ca-ejayuparã camaja capaarã jarerica pãiri,

yucʉri ca-cʉgorã.

Sacerdote maja ʉparã,

judío majare cabuerã,

aperã cabʉcʉrã ca-rotirã na ca-jooricarã ca-añuparã.

44 Na ca-ejaparo jʉgoye Judas maca na ca-ĩi buio jʉgoyeyeyupʉ,

Jesúre na tʉjʉ majiato ĩi.

—Jesú cʉ̃ ca-ani paʉpʉ ejaʉ cʉ̃ yʉ pabario jeniñagʉ.

To bairo cʉ̃ yʉ cá-áto tʉjʉrã cʉ̃ mʉja ñeegarã.

Cʉ̃ ñee,

caroaro cʉ̃ jia,

cʉ̃re mʉja ne aágarã,

na ca-ĩi jʉgoyeyeyupʉ Judas.

45 To bairi Judas Jesú tʉpʉ ejaʉ cʉ̃ ca-ĩi jʉgoyeyericarore bairona Jesú tʉpʉ atí,

caroaro cʉ̃ pabariori:

—¡Mʉ anibaparí,

Ʉpaʉ!

Jesúre cʉ̃ ca-ĩiñupʉ.

46 To bairo Judas cʉ̃ cá-áto tʉjʉrã to cõona cʉ̃ ca-ñeecoajuparã Jesúre.

47 Cʉ̃re na ca-ñeeri paʉ jicãʉ Jesú mena macacʉ topʉ ca-tʉjʉnucuricʉ cʉ̃ jarerica pãire tʉ̃ga wee neri sacerdote maja ʉpaʉ paabojari majocʉre cʉ̃ amoorore ca-pa ta rocacõañupʉ.

48 To bairo cʉ̃ cá-áto bero Jesú na ca-ĩiñupʉ cʉ̃re ca-ñeerãre:

—¿Jee rutiri majocʉre ca-ñeerã anáre bairo jarerica pãiri,

yucʉri mena yʉre mʉja ñeerã atítí?

ca-ĩiñupʉ.

49 —To canacã rʉmʉ Dio wiipʉ Dio ye quetire buionucuri mʉja watoapʉ yʉ ca-aninucuwʉ.

To bairo yʉ ca-anibato quena yʉre mʉja ca-ñeequẽpʉ.

Yucʉacã Dio ye queti ucarica pũuropʉ tirʉmʉpʉ macana na ca-ĩi ucaricarore bairona yʉre mʉja áa.

50 Jesúre na ca-ñeero tʉjʉrã cʉ̃ buerã cʉ̃ ca-ruti weo peticoajuparã yua.

51 Jesúre na ca-ñee aáto jicãʉ cawamaʉ cʉ̃ ca-caniri jutiiro mena dʉre turi ca-ʉja aájupʉ.

To bairo cʉ̃ ca-bairo cʉ̃ quenare ca-ñeeñuparã.

52 Cʉ̃re ñeebana cʉ̃ ca-caniri jutiirore cʉ̃ ca-dʉre tubatarore ca-ñee woo rocacõañuparã.

To bairi jutiiro mácʉna ca-atʉ ruticoajupʉ.

53 Jesúre cʉ̃ ñe aá,

sacerdote maja ʉpaʉ tʉpʉ cʉ̃ ca-ne aájuparã.

Topʉ nipetirã sacerdote maja ʉparã,

judío majare ca-rotirã cabʉcʉrã,

judío majare cabuerã quena ca-neñapo yuuyuparã.

54 Pedro maca Jesú bero ca-yoa bʉjaroacãpʉ tʉjʉ ʉja nutua,

sacerdote maja ʉpaʉ majuu ya wii jope tʉ macá yepapʉ ca-ejayupʉ.

Topʉ polisía maja mena ejanumu,

ca-peero jumacõa ruiyupʉ.

55 Nipetirã sacerdote maja ʉparã,

judío majare ca-rotirã nipetirã,

“¿Dope bairo átiri Jesúre mani wadajãrãatí?”

ca-ame ĩiñuparã,

Jesúre na ca-jĩa rotipere.

To bairo átigabana quena,

“Oco bairo cʉ̃ cá-átaje wapa cʉ̃ ca-popiyeyepe ãa,”

ca-ĩri wamere ca-bʉga majiquẽjuparã.

56 Capaarã cʉ̃re ca-ĩi wadajãrã ca-ĩitoyuparã.

To bairo ĩibana quena cariape jicãro mena ca-ĩirã ca-maañuparã.

57 Aperã wamʉnʉcari jocarãna oco bairo ca-ĩitoyuparã:

58 —Oco bairo cʉ̃ ca-ĩrijere jã apiwʉ:

“Ati wii,

Dio wii ca-pairi wiire camaja na cá-áta wiire yʉ rocagʉ.

Itia rʉmʉ bero ape wii camaja na cá-átiqueti wii macare yʉ áti wajoagʉ,”

ca-ĩiwĩ,

ca-ĩiñuparã.

59 To bairo na ca-ĩrije quenare jicãro mena ca-ĩi maji petiquẽjuparã.

60 To bairo na ca-ĩrijere apii sacerdote maja ʉpaʉ majuu na watoapʉ ca-ãnacʉ wamʉnʉcari Jesúre oco bairo ca-ĩi jeniñañupʉ:

—¿To bairo mʉre na ca-ĩrijere mʉ yʉʉgaquẽetí?

¿Dope bairo mʉre ĩirã na ĩití?

61 Jesú maca ca-yʉʉquẽjupʉ to bairo cʉ̃ ca-ĩrijere.

To bairo cʉ̃ ca-yʉʉquẽto tʉjʉʉ sacerdote maja ʉpaʉ ca-jeniñanemoñupʉ tunu:

—Mʉna tirʉmʉpʉ macana,

“Atígʉmi jicãʉ Cristo na ca-ĩi,

Dio cʉ̃ ca-joʉ,”

na ca-ĩricʉ,

¿Dio caroaʉ majuu Macʉna mʉ ãtí?

cʉ̃ ca-ĩiñupʉ.

62 To bairo cʉ̃ ca-ĩiro:

—Cʉ̃na yʉ ãa,

cʉ̃ ca-ĩiñupʉ Jesú.

—Dio cʉ̃ ca-jooricʉ aniri caberopʉ cʉ̃ tʉna ruíri cʉ̃ mena ca-rotii yʉ anigʉ.

Ati yepapʉ rúi acʉ́ bujeri bʉrʉari watoapʉ yʉ ca-rúi ató yʉre mʉja tʉjʉgarã,

cʉ̃ ca-ĩiñupʉ Jesú.

63 To bairo cʉ̃ ca-ĩiro apii sacerdote maja ʉpaʉ majuu,

yʉ ca-punijinirijere na tʉjʉ majiato ĩi cʉ̃ jutiire ca-tʉ̃ga woo reeyupʉ.

Woo ree yaparo:

—Nope ĩirã caroorije cʉ̃ cá-áti buicʉtiere aperã ca-buioparãre na mani jeniñanemoquẽna.

64 Rooro Diore cʉ̃ ca-ĩrijere mʉja apiwʉ,

meere.

¿Dope bairo mʉja tʉgooñatí mʉjaa?

ca-ĩiñupʉ.

To bairo cʉ̃ ca-ĩiro topʉ ca-ãna nipetirã:

—¡Cʉ̃re ca-jĩape ãa!

ca-ĩiñuparã.

65 To bairo ĩri jicãarã to ca-tʉjʉnucurã cʉ̃ ca-ʉco eo bate tuuyuparã Jesúre yua.

Aperã jutiiro ajero mena cʉ̃ capere jia biperi,

cʉ̃ bape:

—¿Ni maca mʉre cʉ̃ baperí?

cʉ̃ ca-ĩi epeyuparã.

Polisía maja quena Jesú riyare ca-payuparã.

66-67 Jesúre na ca-ñee jãaro bero Pedro maca tii wii jope tʉ macá yepapʉ ca-peero juma ruiyupʉ.

To bairo cʉ̃ ca-bairi paʉ jicão cãromio sacerdote maja ʉpaʉre ca-paabojao Pedro tʉpʉ ca-ejayupo.

Cʉ̃ tʉpʉ ejari oco bairo cʉ̃ ca-ĩiñupo:

—Mʉ quena Jesú Nasaré macacʉ mena cá-aáteñaepaʉna mʉ ãcʉ̃,

cʉ̃ ca-ĩiñupo.

68 Pedro maca to bairo cõ ca-ĩiro oco bairo cõ ca-ĩitoyupʉ:

—¡Cʉ̃ mena macacʉ mee yʉ ãa!

Yʉ majiquẽe to bairo mʉ ca-ĩrijere.

To bairo ĩi yaparo wiire na ca-jani jãa amojorerica janiro jopepʉ ca-eja nʉcañupʉ.

Topʉ cʉ̃ ca-tʉjʉnucurona ãbocʉ ca-wadayupʉ.

69 Sacerdote maja ʉpaʉre ca-paabojao apeo tunu cʉ̃ tʉjʉo topʉ ca-ãnare:

—Ani quena na mena macacʉna ãmi,

ca-ĩiñupo.

70 To bairo cõ ca-ĩiro apii cõ quenare ca-ĩitoyupʉ Pedro tunu.

Caberoacãna topʉ ca-ãna Pedrore oco bairo ca-ĩiñuparã:

—Jocarã mee jã ĩi.

Mʉ quena na mena macacʉna mʉ ãa.

Mʉ quena Galilea macacʉ mʉ ãa,

cʉ̃ ca-ĩiñuparã.

71 To bairo na ca-ĩiro apii na ca-ĩitonemoñupʉ tunu:

—¡Jĩi mʉja ca-ĩire yʉ majiqueti majuucõa!

¡Cariape mee yʉ ca-ĩata Dio yʉre cʉ̃ popiyeyeato!

72 To bairo cʉ̃ ca-ĩirona ãbocʉ ca-wadayupʉ tunu.

To cõona Pedro Jesú cʉ̃ ca-ĩriquere ca-tʉgooña bʉgayupʉ.

“Ãbocʉ pʉgani cʉ̃ ca-wadaparo jʉgoye itiani,

‘Jesúre cʉ̃ yʉ majiquẽe,’

na mʉ ĩitogʉ,”

cʉ̃ ca-ĩrique ca-tʉgooña bʉgayupʉ.

Tiere tʉgooñari,

seeto ca-otiyupʉ.