Saⁿꞌā yeⁿꞌe yáⁿꞌāa Gadara chi canéé sá ndúúcū espíritus yeⁿꞌe yááⁿnꞌguiinūuⁿ
5
Jesús ndúúcū discípulos ndaa yā na táámá lado ꞌdiituú nuūⁿnīⁿꞌyáⁿꞌā miiⁿ yeⁿꞌe yáⁿꞌāa chi nguuvi Gadara. 2 Tuuꞌmi ní Jesús nanꞌdaá yā na barco miiⁿ, ní ndaa ꞌáámá saⁿꞌā chi canéé ndúúcū espíritus yeⁿꞌē yááⁿnꞌguiinūuⁿ. Ní ngiicá sa ná vaacu sa chi ꞌáámá yiivi yáává chi canéé nguaaⁿ yaīnyāⁿ ní ndaa sa nanááⁿ Jesús. 3 Saⁿꞌā miiⁿ ní mar ꞌáámá ꞌiiⁿꞌyāⁿ nguɛ́ɛ́ chi cuuví cutaꞌá yā saⁿꞌā ní cachiichí yā saⁿꞌā, ndii nguɛ́ɛ́ ndúúcū cadenas. 4 Nééné nꞌdeēe cuuví ꞌiiⁿꞌyāⁿ sꞌeeⁿ cachiichí yā saⁿꞌā miiⁿ ndúúcū cadenas caꞌa sa ndúúcū taꞌā sa, náátí chꞌiica sa cadenas miiⁿ, ní dicheēyéi sa cadenas miiⁿ. Ní mar ꞌáámá ꞌiiⁿꞌyāⁿ nguɛ́ɛ́ ichɛ́ɛ yā ndúúcu sa. 5 Cuéⁿꞌé daāⁿmaⁿ cachiica sá nꞌgaī sa cuaaⁿ ná yiīcū ndúúcū cuaaⁿ nguaaⁿ yáinyāⁿ ndíí nguuvi ndíí nꞌgaaⁿ, ní ꞌnuu cáꞌai maāⁿ sa sáⁿꞌā ndúúcū tuūu. 6 Ní taachi nꞌdiichi yáⁿꞌáí sa Jesús miiⁿ, cueⁿꞌe sa ngéénu sā nanáaⁿ yā ní chiīntiiꞌya sa nanáaⁿ yā. 7 Ní caⁿꞌa sa chii sa Jesús miiⁿ ní ꞌcáí yiicu sá: ¿Dɛꞌɛ̄ cuuvi chi ndaa nī nanaáⁿ, nꞌdii Jesús, Daiya Dendyuūs chi canee yā na vaꞌai chɛɛti nguuvi? Ngiicá cáávā chi dúúchí Ndyuūs chi nguɛ́ɛ́ tée nī vaadī ꞌcaaꞌva ꞌúú.8 Saⁿꞌā miiⁿ ní caⁿꞌa sa chuū caati Jesús miiⁿ ní caⁿꞌa yā chiī yā espíritus yeⁿꞌe yááⁿnꞌguiinūuⁿ: Ndísꞌtiī, nanꞌdáa nī yeⁿꞌe sáⁿꞌa ꞌcūū.
9 Jesús miiⁿ tiinguuneeⁿ yā saⁿꞌā: ¿Dɛꞌɛ̄ nguuví dí? Ní espíritus yeⁿꞌe yááⁿnꞌguiinūuⁿ chi canéé ndúúcū sáⁿꞌa ꞌcūū nanꞌguɛɛcútaⁿꞌa sa: Legión nguūví, caati neené ꞌyaaⁿ ꞌnū.
10 Ní espíritus neené diꞌcuíítuū ca Jesús miiⁿ chi nguɛ́ɛ́ tunꞌdáa yā espíritus chi caⁿꞌā yaⁿꞌai yeⁿꞌe yáⁿꞌāa miiⁿ. 11 Ní neené nꞌdeēe puercos ngeꞌe tī cuaaⁿ na nííⁿnúⁿ yiīcū miiⁿ. 12 Ní espíritus yeⁿꞌe yááⁿnꞌguiinūuⁿ idiꞌcuiitu Jesús: Nꞌdii, dichoꞌó nī núsꞌuu chi caⁿꞌa ꞌnū chɛɛti puercos miiⁿ.
13 Tuuꞌmi ní Jesús ní caꞌa yā permiso, ní espíritus yeⁿꞌe yááⁿnꞌguiinūuⁿ chínanꞌdáa sa yeⁿꞌe saⁿꞌā miiⁿ chí ndáa sa chɛɛti puercos. Ní vɛ́ɛ́ tanꞌduu ꞌuūvi mil puercos miiⁿ. Ní taachi espíritus yeⁿꞌe yááⁿnꞌguiinūuⁿ sndáa sa chɛɛti puercos tuuꞌmi ní cheenu nducyaaca tī ní chingéé nuúⁿ tī chɛɛti yaāi miiⁿ. Ní chingée tī nguaaⁿ nuuⁿniⁿꞌyáⁿꞌā. Ní chiitu nuūⁿnīⁿ veéⁿ tī duutu tī cheendi tī ní chꞌii tī nguaaⁿ nuūⁿnīⁿ miiⁿ.
14 ꞌIiⁿꞌyāⁿ chi idiiⁿ cuidado puercos cueⁿꞌe yā ngéenu yā chi cuuvi yā ꞌiiⁿꞌyāⁿ ná yáāⁿ miiⁿ ndúúcū ꞌiiⁿꞌyāⁿ chi snéé na cuɛɛ̄tí chí chiī miiⁿ. Ní ꞌiiⁿꞌyāⁿ sꞌeeⁿ canꞌdaa yā nꞌdiichi yā chí chiī. 15 Taachí ndaa yā niiⁿnuúⁿ nanááⁿ Jesús miiⁿ, ní taachí nꞌdiichí yā saⁿꞌā chi canéé sá ndúúcū espíritus yeⁿꞌe yááⁿnꞌguiinūuⁿ chi maaⁿ ní vɛɛ sa ꞌdiīiⁿ ndúúcū catecai sa ní ꞌāā nꞌdaācā sa tuuꞌmi ní díꞌvaꞌa yā. 16 ꞌIiⁿꞌyāⁿ sꞌeeⁿ chi nꞌdiichí yā chi diiⁿ Jesús miiⁿ, ní caⁿꞌa yā chii yā táácā chiī ndúúcū saⁿꞌā miiⁿ chi canéé sá ndúúcū espíritus yeⁿꞌe yááⁿnꞌguiinuūⁿ, ní tanꞌduucā chí chiī ndúúcū puercos. 17 Tuuꞌmi ní ꞌiiⁿꞌyāⁿ sꞌeeⁿ diꞌcuíítu yā Jesús miiⁿ chi cáⁿꞌa yā táámá lado yeⁿꞌe yáāⁿ miiⁿya.
18 Jesús cueⁿꞌe yā. Ní taachi ndaa yā na barco miiⁿ ndaa saⁿꞌā chi vmnaaⁿ canéé sá ndúúcū espíritus yeⁿꞌe yááⁿnꞌguiinūuⁿ. Ní saⁿꞌā miiⁿ chiica sa Jesús chi caⁿꞌa sa ndúúcu yā na barco miiⁿ. 19 Jesús ní nguɛ́ɛ́ ꞌcuuⁿ yā naatí caⁿꞌa yā: Cunaⁿꞌa dí ná vaacu di ndúúcū ꞌiiⁿꞌyāⁿ yeⁿꞌē di, ní cuuvi di ꞌiiⁿꞌyāⁿ chi chꞌɛɛtɛ nꞌdai denduꞌū chi Señor ꞌiivú Ndyuūs miiⁿ diíⁿ yā ndúúcū dii, ní tanꞌdúúcā Señor ꞌiivú Ndyuūs miiⁿ chí nduuvi yaꞌāī ꞌiinú yā dii.
20 Saⁿꞌā miiⁿ ní cunaⁿꞌā sa, ní tucáꞌa sa chii sa ꞌiiⁿꞌyāⁿ nuuⁿmaⁿ yáāⁿ cuaaⁿ ꞌdiituú chi nguuvi Decápolis yeⁿꞌe denduꞌū chí nꞌgɛɛtɛ nꞌdai chi Jesús diíⁿ yā ndúúcu sa. Ní nducyaaca yā cheꞌe yiinú yā.
Táⁿꞌā daiya sáⁿꞌā Jairo, ndúúcū nꞌdaataá chí tuūꞌvi tá catecai Jesús
21 Taachí Jesús miiⁿ nanguɛɛcunée yā ní choꞌó yā táámá lado yeⁿꞌē nuūⁿnūⁿꞌyáⁿꞌā ní ndaa yā na yáⁿꞌāa ꞌdiituú nuūⁿnīⁿꞌyáⁿꞌā, neené nꞌdeēe ꞌiiⁿꞌyāⁿ ndaa yā naachi Jesús canee yā. 22 Ní ndaā ꞌáámá saⁿꞌā chí nguuvi sa Jairo, saⁿꞌa chi ngaⁿꞌa ntiiⁿnyuⁿ sa yeⁿꞌe yáacū sinagoga. Taachí nꞌdiichi sa Jesús miiⁿ candiitinꞌdíi sa na caꞌa yā. 23 Ní neené diꞌcuíítu sa Jesús miiⁿ ní caⁿꞌa sa: Daiyá ní neⁿꞌē ꞌcuūvi tá. Cuchíi nī ní cúnꞌduꞌu táꞌa nī vmnaaⁿ yeⁿꞌē tá, ní cuuví nduūvā yeⁿꞌe tá ní nguɛ́ɛ́ ꞌcuūvi tá.
24 Tuuꞌmi ní Jesús miiⁿ ní cuéⁿꞌe yā ndúúcu sa. Neené ꞌyaaⁿ ꞌiiⁿꞌyāⁿ canꞌdaa yā Jesús ní nééné chiiⁿꞌnu chiichí yā Jesús. 25 Ní nguaaⁿ nducyaaca ꞌiiⁿꞌyāⁿ miiⁿ canéé ꞌáámá nꞌdaataá chí ngíitā tá, chí ꞌāā ndiichúúví nduūyū canee tá ndúúcū caꞌai chí nguuvi nguuvi ngee yuuúⁿ yeⁿꞌe cuerpo yeⁿꞌe tá. 26 Nééné nꞌgeenu tá ngii ndúúcū médicos, ní ꞌāā chꞌiinu diīⁿ tá gastar tanducuéⁿꞌē chi vɛ́ɛ́ yeⁿꞌē tá, naati nguɛ́ɛ́ duꞌū vɛɛ dichiíꞌvɛ̄ yeⁿꞌē tá ti dáyíícándíí cá caꞌai yeⁿꞌē ta cuaaⁿ vmnaaⁿ. 27 ꞌĀā chꞌiindiveeⁿ tá yeⁿꞌe Jesús miiⁿ chi diíⁿ yā chi nduūvā yeⁿꞌe ꞌiiⁿꞌyāⁿ chi ngiitā. Ní cueⁿꞌe tá nguaaⁿ ꞌiiⁿꞌyāⁿ sꞌeeⁿ cuaaⁿ daamí Jesús ní tuūꞌvi tá catecai yā. 28 Caati nadicádíínuuⁿ tá maāⁿ tá ꞌtíícā. Ndúútī chí dámaāⁿ tuūꞌví catecai yā, ní nduūvā yeⁿꞌé. 29 Hora mííⁿ nūuⁿ chi tuūꞌvi tá catecai Jesús miiⁿ ꞌtíícā canéé naaⁿ chí ngɛɛ̄ yuuúⁿ yeⁿꞌē tá. Ní chicadiinuuⁿ tá na cuerpo yeⁿꞌe tá chí ꞌāā nduūvā yeⁿꞌē tá. 30 Tuuꞌmi ní Jesús miiⁿ tuumicádíínuuⁿ yā chí ꞌāā nduūvā yeⁿꞌē ꞌáámá ꞌiiⁿꞌyāⁿ ndúúcū poder yeⁿꞌé yā. Ní nguɛɛcundíi yā ní nꞌdiichi yā náávtaⁿꞌā yeⁿꞌe ꞌiiⁿꞌyāⁿ ní ntiinguuneeⁿ yā: ¿Duꞌu túuꞌvīi catecaí?
31 Tuuꞌmi ní discípulos yeⁿꞌe yā caⁿꞌa yā: Cuinꞌdiichí nī ꞌiiⁿꞌyāⁿ chí iꞌnūuⁿ chiichí yā sꞌuūúⁿ miiⁿ ní maaⁿ ní ntiinguuneeⁿ nī: ¿Duꞌu tuūꞌvīi ꞌúú?
32 Naati Jesús ní nguɛɛcúndii yā nꞌgiinu yā ꞌáámá lado taama lado, ní ꞌiicu cuuvi snaaⁿ yā duꞌū tuuꞌvī ꞌiiⁿꞌyāⁿ. 33 Tuuꞌmi ní nꞌdaataá miiⁿ, ní inꞌduuvi tá chi ꞌvaꞌā tá. Deenū tá dɛꞌɛ̄ chí chiī. Cheⁿꞌe tá ní chiīntiiꞌya tá nanááⁿ Jesús. Ní caⁿꞌa tá chii tá ꞌiiⁿꞌyāⁿ tanducuéⁿꞌē chi nduudu cuaacu. 34 Jesús ngaⁿꞌa yā ngii yā táⁿꞌā: Díí daiyá, nduūvā yeⁿꞌē dí cáávā chi iꞌtéénu di ꞌúú. Díí ꞌdiīíⁿ nūuⁿ cunáⁿꞌa di, ní ndúuvā yeⁿꞌē di yeⁿꞌē caꞌai chi ndii di.
35 Ngaⁿꞌa Jesús miiⁿ ndúúcū táⁿꞌā miiⁿ, taachí ndaa yā ná vaꞌai yeⁿꞌe saⁿꞌā Jairo chi ngaⁿꞌa ntiiⁿnyuⁿ sa yeⁿꞌē ꞌiiⁿꞌyāⁿ na yáacū sinagoga miiⁿ. Ní ꞌiiⁿꞌyāⁿ yeⁿꞌē vaꞌai miiⁿ ní caⁿꞌa yā Jairo: Daiya dí ꞌāā nꞌdiī tá. ¿Dɛ́ꞌɛ̄ cuuví chi idindúꞌū ca di maestro?
36 Naati Jesús miiⁿ, ní chꞌiindiveéⁿ yā chí caⁿꞌá yā yeⁿꞌē saⁿꞌā chí ngaⁿꞌa ntiiⁿnyuⁿ sa. Ní caⁿꞌa yā chii yā saⁿꞌā miiⁿ chi ngaⁿꞌā ntiiⁿnyuⁿ sa yeⁿꞌe ꞌiiⁿꞌyāⁿ na yáacū sinagoga: Nguɛ́ɛ́ ꞌvaꞌa di naati cuꞌtéénu dí.
37 Jesús nguɛ́ɛ́ ꞌcuuⁿ yā nducyaaca ꞌiiⁿꞌyāⁿ chi cueⁿꞌe ca yā cuaaⁿ chɛɛti vaꞌai ndúúcu yā, ti dámaāⁿ Pedro, ndúúcū Jacobo, ndúúcū Juan, saⁿꞌā ꞌdiinū Jacobo. 38 Taachí ndaa yā vaꞌai yeⁿꞌe sáⁿꞌā chi ngaⁿꞌa ntiiⁿnyuⁿ yeⁿꞌe ꞌiiⁿꞌyāⁿ yeⁿꞌe yaācū sinagoga miiⁿ, nꞌdiichí yā ꞌiiⁿꞌyāⁿ. Ní chꞌiindiveéⁿ yā chí nꞌgai yā ní ngɛɛcu yā. 39 Tuuꞌmi ní taachi snꞌdaa yā cuaaⁿ chɛɛti vaꞌāī miiⁿ, caⁿꞌa yā: ¿Dɛꞌɛ̄ tátiī yuudu idiíⁿ nī? ¿Dɛꞌɛ̄ cúúví chí ngɛɛcu nī? Táꞌdíīⁿ nguɛ́ɛ́ nꞌdii tá, tí cyaadu tá.
40 ꞌIiⁿꞌyāⁿ sꞌeeⁿ ní nꞌgíiⁿnyūⁿneeⁿ yā yeⁿꞌe Jesús miiⁿ. Tuuꞌmi ní Jesús miiⁿ diíⁿ yā chi canꞌdaā nducyaaca yā. Ní Jesús canꞌdɛɛ yā chiida tá ndúúcū chɛɛcu tá ndúúcū discípulos chi canéé ndúúcu yā ní sndaa yā naachi candíítí taꞌdííⁿ chí nꞌdii tá ní tináⁿꞌā. 41 Ní staꞌá yā taꞌā tá ní caⁿꞌa yā: Talita cumi, chi neⁿꞌe caāⁿꞌmaⁿ na nduudu yeⁿꞌe yú, díí nꞌdaata ꞌlííⁿ, ꞌúú ngaⁿꞌá ngií dii, ndúúcueeⁿ di.
42 Hora mííⁿ nūuⁿ taꞌdííⁿ miiⁿ ní nduucueēⁿ tá ní cachiīca tá. Nꞌdaata ꞌlííⁿ miiⁿ ní ngii tá ndiichuuvi nduūyū. Tuuꞌmi ní ꞌiiⁿꞌyāⁿ sꞌeeⁿ cueⁿꞌe yiinú yā. 43 Jesús mííⁿ yaaꞌvi yuudú yā ꞌiiⁿꞌyāⁿ chi nguɛ́ɛ́ caaⁿꞌmaⁿ yā cuuvi yā chííⁿ mar ꞌáámá ꞌiiⁿꞌyāⁿ. Ní caⁿꞌa Jesús chi caꞌa yā yuūndū chi cheꞌe nꞌdaata ꞌlííⁿ miiⁿ.