Yesu u potsokpoi ma̱kutu
8
Ana Yesu u cipa̱i a kusan ka,
ɗa ka̱bunda̱i ka uma ka ko tonoi ni.
2 GogoꞋo va lo,
ɗa ma̱kutu ma banai wa̱ ni.
Ɗa u kuɗa̱ngi a̱ ubuta̱ u Yesu,
ɗa u danai,
“Vuzagbayin,
vu ushuku baci,
vi ta̱ a kufuɗa vo potsokpo mu.”
3 A̱yi Yesu u ba̱ra̱kpa̱i kukiye ku ni ɗa u saꞋwai ni ɗa u danai,
“Mu ushuku ta̱.
Potso!”
Gogo lo ɗa ukutu wa u ka̱sa̱kpa̱i ni.
4 Ɗa u danai ni,
“Ka̱ta̱ vu dana vuza kakuna ka nam pa ba.
Amma bana vi yotsongu ka̱ci ka̱ nu u ganu,
ka̱ta̱ vi yaꞋan alyuka a na Musa u danai uma a na o potsotongi a lyuka.
Na va ɗa u kuyotsongu uma vu potso ta̱.”
Yesu u potsokpoi kagbashi ka jagaba
5 Ɗa Yesu u banai Kafarnahum.
Ana u uwai a̱ likuci ya,
ɗa jagaba vi yoku vo osoji o Roma vi cinai ni ɗa u folonoi ni u ɓa̱nka̱ yi.
6 A̱yi jagaba va u danai,
“Vuzagbayin,
mi ta̱ n kagbashi ka na ki nu mbanaki.
Wi ta̱ ɗe a kpaꞋa a ivaꞋin,
wi a kufuɗa kuɗengusa̱ ikyamba i ni ba.
Wi ta̱ a kupana mɓa̱la̱ ka̱u.”
7 Yesu u danai,
“Mi ta̱ a kubana ka̱ta̱ m potsokpo yi.”
8 Ɗa jagaba va wu ushuki,
“Vuzagbayin,
mpa n yawa ali avu vu ta̱wa̱ a kpaꞋa ku va̱ ba.
YaꞋan kadanshi koci,
kagbashi ka̱ va̱ ta na ki ta̱ o kupotso.
9 Mi ta̱ n anan kovonshi,
a tsu dana mu ta̱ ili i na n kuyaꞋan.
Mpa kpamu n tsu dana ta̱ osoji a na i ka̱ca̱pa̱ ka̱ va̱ ili i na a kuyaꞋan.
N tsu dana ta̱ kosoji ko yoku,
‘Wala,’
ka̱ta̱ ta na u laza.
Ka̱ta̱ kpamu n dana kosoji ko yoku,
‘Ta̱wa̱,’
ka̱ta̱ ta na u ta̱wa̱.
N tsu dana ta̱ kagbashi ka̱ va̱,
‘YaꞋan nahannai,’
ka̱ta̱ ta na u yaꞋan.
Adama a nannai,
n yeve ta̱ an kadanshi ka̱ nu feu ki n utsura.”
10 Ana Yesu u panai nahannai,
ɗa u yaꞋin mereve.
Ɗa u danai aza a na i o kutono yi,
“N dana ta̱ mayun,
uneki u ka̱ɗu u nam pa u laꞋa ta̱ uneki u ka̱ɗu u na me enei a iɗika yi Israila ra̱ka̱.
11 Uma n a̱bunda̱i i ta̱ a̱ kuta̱ a kasana n ka̱livi ka̱ta̱ a̱ da̱sa̱ngu a lyaꞋa n Ibrahim,
n Ishaku,
koɓolo n Yakubu o tsugono tsu gaɗi.
12 Amma aza a na ishi o yotsoi a uwa punu o tsugono tsu gaɗi i ta̱ a kuvakangu le ubuta̱ u ka̱yimbi.
Ta ɗe a̱ kushika̱ n a lumamgbanai ngaꞋan n le adama a atakaci.”
13 Ɗa u danai jagaba va,
“Wala a kpaꞋa.
Kagbashi ka̱ nu ki ta̱ o kupotso uteku u na vi nekei ka̱ɗu.”
Ɗa kagbashi ka̱ ni ko potsoi ayin a nan lo a ta na derere.
Yesu u potsokpoi uma n a̱bunda̱i
14 Ana ka nan lo ko kotsoi,
ɗa Yesu u banai a kpaꞋa ku Biturusu,
ɗa u cinai a̱na̱ku a vuka vu Biturusu nu mbanaki wana ɗai a saɓanai n kuta̱nu.
15 Ɗa u saꞋwai ni kukiye,
ɗa mbanaki ma n ka̱sa̱kpa̱i ni,
ali ɗa u ɗenga̱i ɗa u ka̱na̱i kuɓa̱nka̱ le.
16 N kulivi ku nan lo,
uma a̱ tuka̱i Yesu n aza a na i n wunla̱i u gbani-gbani n a̱bunda̱i.
Yesu u yaꞋin kadanshi,
ɗa wunla̱i u gbani-gbani wa wu uta̱i u ka̱sa̱kpa̱i le.
Ɗa kpamu u potsokpoi aza a̱ mbanaki ra̱ka̱.
17 U yaꞋan ta̱ ili i nam pa adama a na u zuwa ili i na keneki Ishaya ka danai yo okpo mayun:
“Ɗa u takpai mɓa̱la̱ n iɓa̱lishi i tsu kpamu.”◊
Uma a cigai kutono Yesu
18 Ana Yesu we enei koɓolo ka uma ka,
ɗa u danai mukumitoni a bana a kapashi ko yoku ka mala ka.
19 A̱ ubuta̱ wa lo ɗa malum ma̱ Wila̱ ma banai wa̱ ni ɗa ma danai,
“Malum,
mi ta̱ o kutono wu ubuta̱ u na vu banai dem.”
20 Ɗa Yesu u danai ni,
“Iranji yi ta̱ n enle a na o ci yongo punu,
nnu kpamu mi ta̱ n cikinda,
amma mpa,
Maku ma Vuma,
mi m kpaꞋa ku ka̱ci ka̱ va̱ ba,
ko n yaꞋan n ubuta̱ u na n kutsubaku ba.”
21 Vuma vi yoku,
vuza na wi a̱ ka̱tsuma̱ ka aza o kutoni u danai,
“Vuzagbayin,
ka̱sa̱kpa̱ biꞋi m bana n ciɗa̱ngu esheku a̱ va̱.”
22 Amma ɗa Yesu u danai ni,
“Tono mu,
ka̱ta̱ vu ka̱sa̱kpa̱ ngasa a̱ ciɗa̱ngu ngasa n le.”
Yesu u shamkpai n aɓau
23 Ɗa Yesu u uwai a kpantsu a kubana upashi u mala m mukumitoni n ni.
24 Ɗa wunla̱i wu utsura u ɗenga̱i ka̱u a mala ma,
ali ɗa aɓau a uwai a kpantsu ka,
amma Yesu punu alavu.
25 Mukumitoni ma m banai wa̱ ni ɗa a jimgbasai ni,
ɗa o orukpoi,
“Vuzagbayin,
isa tsu!
Ci ta̱ a̱ kuniꞋwa̱n!”
26 Ɗa Yesu wu ushuki,
“Yi ɗa̱i ɗa i panai wovon?
Uneki u ka̱ɗu u ɗa̱ u gusa̱ ta̱.”
Ɗa u ɗenga̱i ɗa u ɓarangi wunla̱i n aɓau a,
ɗa a paɗai bini dem.
27 Mukumitoni ma n yaꞋin mereve,
ɗa a danai,
“Vuma vi iya̱n ɗai nahannai?
Ali ɗa wunla̱i n aɓau a panakai ni!”
Yesu u lokoi wunla̱i u gbani-gbani a̱ ubuta̱ uma e re
28 Ana Yesu u yawai a̱ ka̱kina̱ ka mala ɗevu n likuci i Gadara,
ɗa uma e re a na i n wunla̱i u gbani-gbani a gasai n a̱yi.
Uma a nam pa o ci yongo ta̱ a̱ ubuta̱ wa asaun,
i ta̱ n asuvu a usuɗukpi ali ko vuza u tsu fuɗa u tono ukambu u nan lo ba.
29 Ɗa a̱ gita̱i korukpoko Yesu,
“Yi ɗa̱i ɗa vi a kugbandarasa tsu,
Maku ma̱ Ka̱shile?
Vu ta̱wa̱ ta̱ biꞋi kafu ayin a na Ka̱shile ka zuwai a takacika tsu?”
30 Ɗevu n ubuta̱ wa lo ushiga wu ngurusunu wi ta̱ lo a kalina.
31 Wunla̱i u gbani-gbani wa u folonoi Yesu,
“Vu zuwa tsu baci tsu ka̱sa̱kpa̱ uma a nam pa,
zuwa tsu tsu uwa a ushiga wu ngurusunu u nan ɗe wa.”
32 Ɗa u danai le,
“Walai!”
Ɗa wunla̱i u gbani-gbani wa u ka̱sa̱kpa̱i uma a ɗa a uwai wu ngurusunu.
Ɗa ngurusunu ma ra̱ka̱ n sumai ɗa a̱ gida̱la̱i a kusan ka ali sai asuvu a mala,
ɗa a̱ kuwa̱i punu.
33 Aza a na i a kuguɓa ngurusunu ma a sumai a banai a̱ likuci ɗa a danai ili dem i na i cinai uma e re a na ishi n wunla̱i u gbani-gbani wa.
34 Yaba dem a̱ likuci ya wu uta̱i adama a na a gasa n Yesu.
Ana e enei ni,
ɗa o folonoi ni u laza u ka̱sa̱kpa̱ka̱ le uɓon u le.