Yesu u lokoi wunla̱i u gbani-gbani
5
Yesu m mukumitoni n ni a yawai upashi u mala wa,
a ukambu u Garasa.
Marukusu 5:1-20
2 Ele a̱ kuta̱ a kpantsu,
ɗa vuza vu wunla̱i u gbani-gbani wu uta̱i a̱ ubuta̱ wa asaun ɗa u gasai n Yesu.
3 Ubuta̱ wa asaun u ɗa u ci yongo.
Babu vuza na u kudoku wa fuɗa wa shiya yi,
ko n ikani.
4 A ci shiya yi ta̱ ekiye n ene n ikani,
amma u tsu kasa ta̱ i ɗa.
Babu vuza na wi n utsura u na u ka̱na̱ yi.
5 Kanna n kayin ubuta̱ u kuyongo u ni u ɗa a̱ ubuta̱ wa asaun n ubuta̱ wu nsasan,
ka̱ta̱ u yongo ɗe o yoroli,
n u ɓatsai ikyamba i ni n atali.
6 Ana we enei Yesu daꞋin ɗa u sumai u banai u gasai n a̱yi,
u yikpa̱i kelime ka̱ ni.
7-8 Ɗa Yesu u danai wunla̱i u gbani-gbani wa,
“Ka̱sa̱kpa̱ vuma vu nan lo.”
Ɗaɗa wo orukpoi n kacaꞋa,
“Yi ɗa̱i i burai nu,
nu mpa,
Yesu Maku ma̱ Ka̱shile?
Kucina n Ka̱shile va kutakacika mu ba.”
9 Ɗa ta na Yesu we ecei ni,
“Kula ku nu ku ɗa ya?”
Ɗa wu ushuki,
“Kula ku va̱ ku ɗa ‘Kotoro’,
adama a na ci ta̱ n a̱bunda̱i.”
10 Ɗa u ka̱na̱i kufolono Yesu,
ka̱ta̱ u loko le punu a kubana daꞋin a ukambu wa ba.
11 Ubuta̱ wa lo,
ushiga wu ngurusunu wi ta̱ lo a kalina lo a̱ ka̱gida̱la̱u ka masasan.
12 Ɗa wunla̱i u gbani-gbani o folonoi ni a danai,
“Ka̱sa̱kpa̱ tsu tsu bana tsu uwa a̱ ubuta̱ wu ngurusunu u nan ɗe wa.”
13 Ɗa wu ushuki le,
ɗa wunla̱i u gbani-gbani wu uta̱i.
Ɗa u uwai a̱ ubuta̱ wu ngurusunu wa.
Ana a uwai,
ɗa a sumai,
a̱ gida̱la̱i a uwai a mala,
ɗa a̱ kuwa̱i punu.
Ka̱bunda̱i ka̱ ngurusunu ka ka yawa ta̱ a̱kpa̱n e re (2,000).
14 Ɗa aza a̱ ngurusunu a a sumai,
adama a na a bana a dana uma a̱ likuci i gbagbaꞋin n i wawaꞋa.
Ɗa uma a̱ uta̱i a banai,
adama a na e ene ili i na i yaꞋin.
15 Ana a yawai u Yesu,
ɗa e enei vuza na wi ishi n wunla̱i u gbani-gbani kotoro ida̱shi,
a ukai ni ntogu,
a̱yi kpamu a̱ ka̱tsuma̱ ka̱ ma̱riki ka̱ ni.
Ɗa dem vi le a panai wovon.
16 Aza a na e enei ili ya n a̱shi e le,
ɗa a̱ ka̱na̱i kutonuko uma ili i na i ciya̱i vuza vu wunla̱i u gbani-gbani va,
koɓolo nu ngurusunu ma feu.
17 Ɗa a̱ ka̱na̱i kufolono Yesu wu uta̱ punu a ukambu u le.
18 A̱yi Yesu a kuꞋuwa a kpantsu,
ɗa vuza na wi ishi n wunla̱i u gbani-gbani u ka̱na̱i kufolono yi,
wu ushuki adama a na u tono yi.
19 Amma Yesu wu ushuku yi ba,
ɗa u danai ni,
“Wala a kubana a kpaꞋa,
wa aza a̱ nu.
Vu dana le ili i na Vuzavaguɗu u yaꞋankai nu,
n tsu na u panai asuvayali a̱ nu.”
20 Ɗa u lazai,
u ka̱na̱i kudanasa uma a uɓon u Dikafoli,
ili i gbangam i na Yesu u yaꞋankai ni.
Uma dem,
ɗa a̱ ka̱na̱i kuyaꞋan mereve.
Jayiru u banai a̱ ubuta̱ u Yesu
21 Ana Yesu u bonoi a upashi u nan ɗe a kpantsu,
ɗa uma n a̱bunda̱i a kanzai ni.
A̱yi tamkpamu u shamgbai a̱ ka̱kina̱ ka mala.
Marukusu 5:21-43
22 Ɗa vuzagbayin vu kunu ka avasa vi yoku wu uta̱i ɗe,
kula ku ni ku ɗa Jayiru.
Ana we enei Yesu,
ɗa u banai,
ɗa u kuɗa̱ngi e kelime ka̱ ni.
23 Ɗa u folonoi ni n utsura,
u danai,
“Mekere me kenu ma̱ va̱ mi ta̱ ɗe a̱ kukuwa̱.
Vi ishi baci a̱ kushuku vu ta̱wa̱ vu zuwaka yi kukiye,
adama a na u ciya̱ wuma.”
24 Ɗa Yesu u banai koɓolo n a̱yi,
ɗa uma n a̱bunda̱i a̱ ka̱na̱i kutono yi n o oꞋusoi ni.
25 Punu a̱ ka̱tsuma̱ ka̱ ka̱bunda̱i ka uma ka,
vuka vi yoku vi yaꞋan ta̱ a̱ya̱ kupa n e re a̱yi mpasa o kulolo.
26 U soꞋo ta̱ atakaci a̱ kula̱nsa̱ aza a̱ a̱guma̱.
U la̱nga̱sa̱ ta̱ ili i na wi n i ɗa dem,
adama a̱ kula̱nsa̱ aza a̱ a̱guma̱,
ili ya ta na a kulyaꞋa kelime.
27 Ana u panai ukuna u Yesu,
ɗa u yawai lo a̱ kucina̱ ku ni a̱ ubuta̱ u uma a,
ɗa u saꞋwai ni motogu.
28 Adama a na u sheshe ta̱ a̱ ka̱ɗu ka̱ ni,
“Ko kuminya ku ni ku ɗa baci n saꞋwai,
mi ta̱ o kupotso.”
29 Golo lo ɗa kulolo ku mpasa ka ku shamgbai.
A ikyamba i ni kpamu u pana ta̱ o potsokpo yi ta̱ a̱ ka̱tsuma̱ ka atakaci a̱ ni.
30 Gogo lo,
ɗa Yesu u yevei a na utsura wu uta̱i a ikyamba i ni.
Ɗa u kpatalai u la̱na̱i uma a,
ɗa we ecei,
“Yayi u saꞋwai motogu ma̱ va̱?”
31 Ɗa mukumitoni n ni mu ushuki ni,
“Avu e kene uma e kutecengu wu,
ɗa ve kece,
‘Yayi u saꞋwai mu?’ ”
32 Ɗa Yesu u lyaꞋi kelime n kula̱nuku,
adama a na we ene vuza na u yaꞋin nannai va.
33 Ana vuka va vi yevei ili i na u yaꞋin,
ɗa u banai u kuɗa̱ngi kelime ka̱ ni n wovon ikyamba e kujeꞋe.
34 Ɗa u danai ni,
“Mekere ma̱ va̱,
uneki u ka̱ɗu u nu u potsokpo wu ta̱.
Wala m ma̱ta̱na̱,
mbanaki n nu n kotso ta̱.”
Yesu u ɗengusa̱i mekere ma Jayiru
35 A̱yi a̱ ka̱tsuma̱ ka kadanshi,
ɗa uma o yoku a na uta̱i a kpaꞋa ku vuzagbayin vu kunu ka avasa va a danai ni,
“Maku ma̱ nu ma̱ kuwa̱ ta̱ ɗe.
Yi ɗa̱i kpamu vo koꞋuso Malum kuyaꞋanka?”
36 Amma Yesu u keɓece n kadanshi ka na i a kuyaꞋan ba,
ɗa u danai vuzagbayin va,
“Ka̱ta̱ vu pana wovon ba,
neke ka̱ɗu ka̱ nu koci.”
37 U ka̱sa̱kpa̱ vuza u tono yi ba,
sai Biturusu n Yakubu koɓolo n Yahaya,
Yakubu vuza ni.
38 Ana a yawai a kpaꞋa ku vuzagbayin ka,
ɗa u panai uma a kacaꞋa m ma̱shi babu uteku n kula.
39 Ana u uwai,
ɗa we ecei le,
“Yi ɗa̱i i zuwai ɗa yi a kacaꞋa m ma̱shi nannai?
Ka̱ta̱ maku me mekere ma ukpa̱ u ɗa yi ba,
alavu a ɗa yi.”
40 Ɗa a̱ ka̱na̱i kuyaꞋanka yi izoshi i kugoyi,
ɗa u lokoi le.
Ɗa u ɗikai esheku n a̱na̱ku e mekere a,
m mukumitoni n na i koɓolo.
Ɗa a uwai a̱ ubuta̱ u na a vaꞋanki mekere ma.
41 Ɗa u ka̱na̱i kukiye ku ni.
Ɗa u danai ni,
“Talita kumi,”
ili i na u danai ni i ɗaɗa,
“Maku me mekere,
mi ta̱ a kudana wu,
ɗenga̱.”