A iwain Yesu a Nazara
6
Yesu u ka̱sa̱kpa̱i ubuta̱ u nan lo,
ɗa u bonoi a̱ likuci i ni a Nazara.
Ɗa mukumitoni n ni n tonoi ni.
Marukusu 6:1-29
2 Ana kanna ka Ashibi ka yawai,
ɗa u ka̱na̱i kuyaꞋan kuyotsongusu a̱ kunu ka avasa ku le.
Uma n a̱bunda̱i a na a panakai ni dem,
ɗa a yaꞋin mereve.
Ɗa a̱ ka̱na̱i mecenshenei,
“Te ɗai tamkpamu vuma vu nam pa u ciya̱i ili i nam pa?
Kuyeve ke ne ku ɗai tamkpamu wi n ku ɗa?
Te ɗai kpamu u ciya̱i utsura u na wi a kuyaꞋansa ili i mereve?
3 A̱yi na ɗa kesheꞋwi ka nɗanga ka ba?
A̱yi ɗa ulobo u Meri wa ba?
Anan Yakubu n Isuhu n Yahuza koɓolo n Sima mokoshi me le?
Ataku a̱ ni a ɗa ci na koɓolo ba?”
Wo okpo ta̱ ili i ma̱ta̱ɗa̱ we le.
Ɗa a iwain ni.
4 Amma ɗa u danai le,
“A ci cikpa ta̱ keneki a̱ ubuta̱ dem,
amma a̱ likuci i ni m kpaꞋa ku ni a ci cikpa yi ba.”
5 Wa kufuɗa kuyaꞋan ili i mereve ba,
sai u zuwaka aza a mbanaki kenu kukiye,
adama a na u potsotongu le.
6 Ɗa u yaꞋin mereve,
adama a na e neke a̱ɗu e le wa̱ ni ba.
Yesu u suki Kupanazere a
Ɗa Yesu u ka̱na̱i kuka̱ra̱Ꞌa̱ a̱ likuci kakau n u yotsongi uma.
7 U ɗekei Kupanazere ɗa u suki le aza e re e re.
Ɗa u nekei le utsura u na o kuloko wunla̱i u gbani-gbani.
8 Ɗa u danai le:
“Ka̱ta̱ i ɗika ili i yoku adama a nwalu n ɗa̱ ba,
kalangu koci kaꞋa i kuɗika.
Ka̱ta̱ i ɗika burodi,
ko ujika,
ko ikebe o nsolo n ɗa̱ ba.
9 Ukai ataka,
amma ka̱ta̱ i ɗika ntogu n yoku ba.
10 KpaꞋa ku na baci a isai ɗa̱ dem,
shamgbai punu,
sai ayin a na i kuta̱ punu a̱ likuci ya.
11 Likuci kpamu i iwan baci kisa ɗa̱ ko kupanaka ɗa̱,
ka̱sa̱kpa̱i ubuta̱ wa,
ka̱ta̱ i ka̱pa̱tsa̱ kubuta̱ ku ene a̱ ɗa̱ punu a̱ likuci ya.
Na lo va,
wo okpo ta̱ urotu we le,
a̱ɗa̱ ili i bura ɗa̱ ba.”
12 Ɗa a̱ uta̱i a banai a̱ ka̱na̱i kudana uma kadanshi ka̱ Ka̱shile,
adama a na a̱ shika̱ unushi u le ka̱ta̱ o bono a̱ ubuta̱ u Ka̱shile.
13 Ɗa a̱ ka̱na̱i kuloko wunla̱i u gbani-gbani n a̱bunda̱i,
a sukumakai aza a mbanaki maniꞋin,
adama a na o potso.
Ukpa̱ u Yahaya vu Kusumbu ka Akucina
14 Ɗa Mogono Hiridu u panai arabali e Yesu,
adama a na uma n a̱bunda̱i i ta̱ a kudansa ukuna u Yesu wa.
Ɗa aza o yoku a danai,
“Yahaya vu Kusumbu ka Akucina ɗa u ɗenga̱i n wuma.
Ɗaɗa u ciya̱i utsura u na wi a kuyaꞋansa ili i mereve.”
15 Aza o yoku a danai,
“Iliya ɗa.”
Aza o yoku a danai,
“A̱yi keneki kaꞋa,
ka na ko yotsoi eneki a cau.”
16 Ana Hiridu u panai nannai,
ɗa u danai,
“Yahaya vu na m gbatyai kaci ka̱ ni n ayin a ɗe,
a̱yi ɗa u ɗenga̱i.”
17 Adama a na Hiridu n ka̱ci ka̱ ni u saꞋwa ta̱ kuzuwa a̱ ka̱na̱ yi.
U zuwai a shiya yi ka̱ta̱ a uka yi ugbashi,
adama a Hiridiya vuka vu vangu ni Filibu,
vu na u zuwai.
18 Adama a na Yahaya u yongo ta̱ a kudana yi,
“U gaꞋan vu ɗika vuka vu ambu ba.”
19 A̱yi Hiridiya ta na,
ɗa u remei Yahaya a̱ ka̱ɗu ka̱ ni,
ali ɗa u cigai kuna yi,
amma u yeve uteku u na u kuyaꞋan ba.
20 Wi ta̱ a kupana wovon u Yahaya,
adama a na u yeve ta̱ vuma vu usuɓi ɗa.
Ayin a na baci Hiridu u panakai Yahaya a kadanshi ka̱ɗu ka̱ ni ka̱ tsu na̱mgba̱ ta̱,
amma n nannai dem u ci ciga ta̱ u panaka yi.
21 Amma a ukocishi,
Hiridiya u ciya̱i uye a kanna ka na Hiridu wi a kuciɓa n kanna ka na a matsai ni.
Ɗa u banuki aza a̱ gba̱ra̱gba̱ra̱ a̱ ni,
koɓolo n azagbagbaꞋin o osoji a̱ ni,
n azagbagbaꞋin a uɓon u Ga̱lili ka̱ɗiva̱.
22 Ana mekere ma Hiridiya ma uwai n kujeꞋe,
ɗa Hiridu u panai uyoꞋo koɓolo n omoci a̱ ni.
Ɗa mogono ma ma danai mekere ma,
“Folono ili i na vi a kuciga dem,
mi ta̱ a kufuɗa me neke wu.”
23 Ɗa u doku u kucinakai ni,
u danai,
“Ili i na baci de dem,
vu folonoi,
mi ta̱ e kuneke wu.
Ko uɓon u tsugono tsu va̱ tsu ɗa baci vu folonoi.”
24 Ɗa wu uta̱i,
ɗa u banai wa̱ a̱na̱ku.
Ɗa we ecei,
“Yi ɗa̱i n kuɗamgba mo folono?”
Ɗa a̱na̱ku a danai,
“Folono kaci ka Yahaya vuza na u ci yaꞋan kusumbu ka akucina.”
25 Gogo lo,
ɗa u uwai u mogono m moloko,
ɗa u folonoi ni,
u danai,
“Gogo na mi ta̱ a kuciga vi neke mu kaci ka Yahaya vuza na u ci yaꞋan kusumbu ka akucina a̱ ma̱ta̱nka̱ɗi.”
26 Ɗa mogono ma̱ na̱mgba̱i ka̱tsuma̱ ka̱u.
Amma adama a akucina a na u yaꞋin e kelime ko omoci a na wi n a ɗa,
u yeve uteku u na u kusa̱nka̱ yi ba.
27 Gogo va lo ɗa u suki kosoji ka̱ ni ka bana ka gbatya kaci ka Yahaya u tuka̱.
Ɗa u banai u gbatyai kaci ka Yahaya punu a̱ kunu ku ugbashi.
28 Ɗa u tuka̱i ni n kaci ka a̱ ma̱ta̱nka̱ɗi,
ɗa u nekei mekere ma.
Ɗa mekere ma ma bankai a̱na̱ku.
29 Ana mukumitoni n Yahaya a panai nannai,
ɗa a banai a ɗikai keven ka̱ ni,
adama a na a̱ ciɗa̱ngu kaꞋa a kasaun.
Yesu u cuwa̱ta̱ngi uma a̱kpa̱n a tawun n ilikulyaꞋa
30 Ɗa azusuki o bonoi u Yesu,
ɗa a danai ni ra̱ka̱ ili i na a yaꞋin n ili i na o yotsongushi.
Marukusu 6:30-56
31 Ɗa Yesu u danai le,
“Ka̱sa̱kpa̱ tsu bana a̱ ubuta̱ u na tsa kuyongo endeꞋen tsu i ciya̱ yu uvuka.”
Adama a na uma n a̱bunda̱i i ta̱ a̱ kuta̱wa̱ n a lazai,
azusuki a̱ ni feu a̱ ciya̱ ayin a na a kulyaꞋa ilikulyaꞋa ba.
32 Ɗa a uwai a kpantsu a kubana a̱ ubuta̱ u na o kuyongo endeꞋen le.
33 Uma n a̱bunda̱i a na e enei le a kulaza,
e yevei le.
Ɗa uma a̱ likuci kakau a sumai a banai upashi u nan ɗe kafu ele a yawa ɗe.
34 Ana Yesu wu uta̱i a kpantsu,
ɗa we enei ka̱bunda̱i ka uma.
Ɗa asuvayali a̱ ka̱na̱i ni n ele,
adama a na we ene le ta̱ adanshi nlala n ɗa n na mi babu maguɓi.
Ɗa u ka̱na̱i kuyotsongusu le ili n a̱bunda̱i.
35 Ana kanna ka̱ gita̱i kukotso,
ɗa mukumitoni n ni m banai wa̱ ni,
a danai,
“Kanna ka na o kukotso,
ubuta̱ u na ci kpamu na wi n uma ba.
36 Dana uma a a wala,
adama a na a bana ashina a na i lo ɗevu ɗevu ko likuci,
adama a na a bana a tsulaka ka̱ci ke le ilikulyaꞋa.”
37 Ɗa wu ushuki le,
“Nekei le ilikulyaꞋa adama a na a lyaꞋa.”
Ɗa e ecei ni,
“Vi ta̱ a kuciga tsu una ikebea i tsu ra̱ka̱ i na i yawai i kuliva̱ i kanna ke te amangatawenre (200) a̱ ubuta̱ wi ilikulyaꞋa,
ka̱ta̱ tsu neke le?”
38 Ɗa Yesu we ecei le,
“Burodi vu yain ɗai yi lo n vu ɗa?”
Ana a banai o kondoi,
ɗa a danai ni,
“Ci ta̱ m burodi vu tawun n adan e re.”
39 Ɗa u danai mukumitoni n ni,
n dana uma a a̱ da̱sa̱ngu ugboku kakau a̱ mita̱ ma̱ ta̱ku ma lo.
40 Ɗa uma a̱ da̱sa̱ngi kakau ugboku amangatawun a tawun,
aza o yoku amangerenkupa n kupa.
41 Ɗa u ɗikai burodi vu tawun n adan e re,
wi indai gaɗi,
ɗa u cikpai Ka̱shile.
Ɗa u wansai burodi va u nekei mukumitoni n ni,
adama a na e peceke uma a.
Ɗa u doku u wansai adan a,
u nekei le.
42 Uma a na i lo dem,
a lyaꞋi,
ɗa a̱ cuwa̱i.
43 Ɗa mukumitoni n ni o ɓolongi alyashi a ilikulyaꞋa a na a buwai,
ali mbana kupa n e re.
44 Ali a na a lyaꞋi ilikulyaꞋa a̱ ka̱tsuma̱ ka uma ka,
ele ɗa a̱kpa̱n a tawun (5,000).
Yesu u yaꞋin nwalu a gaɗi vu mala
45 Gogo lo ɗa Yesu u danai mukumitoni n ni n uwa a kpantsu ka̱ta̱ a laza kelime ka̱ ni a pasa mala ma a kubana Besaida.
A̱yi tamkpamu u shamgbai biꞋi adama a na u pecemgbenei n uma a.
46 Ana u danai uma a laza,
ɗa a̱yi u lazai a kubana a kusan,
adama a na u yaꞋan kavasa.
47 Ana kulivi ku yaꞋin,
kpantsu ɗe e mere ma mala.
Yesu tamkpamu ɗe a̱ ka̱kina̱.
48 Ɗa we enei mukumitoni n ni ɗe e kulete e mere ma mala,
adama a na wunla̱i u ɗa wi a kutakacika le.
A kubana a kayin ka kpasani,
ɗa u banai we le a̱yi nwalu gaɗi vu mini.
U yaꞋan ta̱ adanshi wi ta̱ a kulaza le.
49 Amma ana e enei ni a nwalu a gaɗi vu mini,
a dana ta̱ kafataluwa kaꞋa.
Ɗa o orukpoi n wovon,
50 adama a na ra̱ka̱ vi le e ene yi ta̱ ɗa a panai wovon n a̱bunda̱i.
Ɗa Yesu u danai le gogo lo,
“Gbamai asuvu.
Mpa ɗa,
ka̱ta̱ i pana wovon ba.”
51 Ɗa u uwai a kpantsu n ele.
Ɗa wunla̱i u shamgbai,
ɗa a̱ ka̱na̱i kuyaꞋan mereve,
52 adama a na ka̱ta̱ e yeve uteku u na Yesu u nekei uma a̱kpa̱n a tawun (5,000) ilikulyaꞋa ba,
adama a ugbawansuvu u le.
Yesu u potsokpoi aza a̱ mɓa̱la̱ a Janisara
53 Ana a pasai,
ɗa a yawai a iɗika i Janisara,
ɗa a shiyai kpantsu ku le.
54 N kuta̱ ku le a kpantsu ɗa uma e yevei Yesu va.
55 Ɗa a sumai o tonoi a̱ ubuta̱ ra̱ka̱ a kuɗika aza a mbanaki a ivaꞋin a ajiba e le,
a kubanka a̱ ubuta̱ u na wi.
56 Ubuta̱ u na baci dem u banai,
ko likuci i gbayin ko i kenkeꞋen ko a kakamba,
a tsu zuwaka yi ta̱ aza a mbanaki e kuden.
Ka̱ta̱ o folono yi ko kuminya ku ni a̱ ciya̱ a saꞋwa.
Aza a na a saꞋwai dem ɗa o potsoi.