Ukpa̱ u Yahaya Vuza vu Kusumbu ka Akucina
14
A ayin a nan lo Hiridu Antiba,
mogono ma̱ Ga̱lili,
u panai ukuna u Yesu.
2 Ɗa u danai anan taji a̱ ni,
“Yesu ɗa Yahaya Vuza vu Kusumbu ka Akucina,
vuza na u ɗenga̱i a kasaun.
Ɗaɗa i zuwai ɗa wi a kuyaꞋan ili i mereve i nam pa.”
3 N ayin a ɗe,
Hiridu u ka̱na̱ ta̱ Yahaya,
ɗa u shiyai ni,
ɗa u zuwai ni a̱ kunu ku ugbashi.
Hiridu u yaꞋan ta̱ nahannai adama a vuka vi ni Hiridiya.
Wi isa ta̱ vuka va e ekiye a vangu vi ni Filibu.
4 Yahaya u dansukai Hiridu,
“U gaꞋan vu zuwa Hiridiya vuka vu ambu ba!”
5 Hiridu u cigai kuna Yahaya,
amma ɗa u panai wovon u uma,
adama a na a̱ ushuku ta̱ a na Yahaya keneki kaꞋa.
6 Ana i a kuyaꞋan ka̱ɗiva̱ adama a na a ciɓa n kanna ka na a matsai Hiridu,
ɗa mekere ma Hiridiya me jeꞋekei Hiridu n omoci a̱ ni.
Ɗa ka̱ɗu ko mogono ka panai uyoꞋo ka̱u.
7 Ɗa mogono ma kucinai u kuneke yi ta̱ ili i na u cigai dem.
8 Amma ɗa a̱na̱ku e mekere a zuwai ni u dana,
“Mi ta̱ a kuciga kaci ka Yahaya Vuza vu Kusumbu ka Akucina a̱ ma̱ta̱nka̱ɗi!”
9 Ɗa mogono ma̱ na̱mgba̱i ka̱tsuma̱ n ili i na mekere ma ma dansai.
Amma u ciga kukpa̱ɗa̱ kushatangu uzuwakpani u na u yaꞋin kelime ko omoci a̱ ni ba.
Ɗa u danai osoji a̱ ni
10 a bana a̱ kunu ku ugbashi ka̱ta̱ a gbatya kaci ka Yahaya.
11 Ɗa a̱ tuka̱i n kaci ka a̱ ma̱ta̱nka̱ɗi,
ɗa e nekei mekere ma,
ɗa u ɗikai kaꞋa u bankai a̱na̱ku.
12 Mukumitoni n Yahaya m banai ɗa a ɗikai keven ki ikyamba ka̱ ni ɗa a̱ ciɗa̱ngi.
Ɗa a banai a danai Yesu.
Yesu u cuwa̱ta̱ngi uma a̱kpa̱n a tawun n ilikulyaꞋa
13 GogoꞋo va lo ana Yesu u panai arabali a,
ɗa u lazai u banai u uwai a kpantsu a kubana a kakamba adama a na u yongo ɗe endeꞋen ni.
Amma ɗa ka̱bunda̱i ka uma ka panai,
ɗa ko tonoi ni a̱ ka̱ra̱Ꞌi n tsu ka̱kina̱ ka mala ka.
14 Ana u yawai,
ɗa u cinai ka̱bunda̱i ka uma kaꞋa a kuvana yi.
U panai asuvayali e le,
ɗa u potsotongi aza a mbanaki.
15 Kanna ɗe a kubana kuyikpa̱,
ɗa mukumitoni n ni m banai wa̱ ni ɗa a danai,
“Kayin ka̱ gita̱ ta̱ kuyaꞋan,
ubuta̱ u nam pa kpamu kakamba kaꞋa.
Loko uma a adama a na a bana a̱ likuci kakau a tsulaka ka̱ci ke le ilikulyaꞋa.”
16 Amma ɗa wu ushuki,
“Babu ili i na i kuzuwa le a laza.
A̱ɗa̱ nekei le ilikulyaꞋa.”
17 Ɗa a danai ni,
“Amma a̱tsu ci ta̱ m burodi vu tawun n adan e re koci.”
18 Ɗa u danai,
“Tuka̱i mu m burodi va n adan a.”
19 Ɗa u danai uma a a̱ da̱sa̱ngu a̱ mita̱.
U ɗikai burodi vu tawun va n adan e re a,
ɗa u ɗengusa̱i a̱shi wi indanai gaɗi,
ɗa u cikpai Ka̱shile adama a ilikulyaꞋa ya.
Ɗa u wansasai burodi va ɗa u nekei mukumitoni n ni,
ɗa ele tamkpamu e pecekei uma.
20 Ɗa uma ra̱ka̱ a lyaꞋi ilikulyaꞋa ɗa a̱ cuwa̱i.
Ɗa mukumitoni ma n ta̱ɗa̱i alyashi ali mbana kupa ni n re.
21 Ali a na a lyaꞋi ilikulyaꞋa ya a yawa ta̱ ɗevu n uma a̱kpa̱n a tawun (5,000),
e kece a̱ma̱ci m muku n na n lyaꞋi yi ilikulyaꞋa ya ba.
Yesu u walai a gaɗi vu mala
22 Gogo lo ɗa Yesu u danai mukumitoni n ni n uwa a kpantsu ka̱ta̱ a laza kelime ka̱ ni a pasa mala ma.
A̱yi tamkpamu u shamgbai biꞋi adama a na u pecemgbenei n uma a.
23 Ana e pecemgbenei,
ɗa u lazai u banai gaɗi vu nsasan adama a na u yaꞋan kavasa.
Ali kayin ka yaꞋin a̱yi ɗe endeꞋen.
24 A ayin a nan lo a feu,
kpantsu ku mukumitoni ma ɗe e mere ma mala,
ɗa wunla̱i wu utsura u ɗenga̱i,
ɗa a̱ gita̱i atakaci n aɓau a gbagbaꞋin.
25 N kayin ku usana ka̱lika̱li,
ɗa u banai we ele,
a nwalu gaɗi vu mala.
26 Ana e enei ni a nwalu gaɗi vu mala nannai,
ɗa a panai wovon ka̱u.
Ɗa o orukpoi adama o wovon ɗa a danai,
“Kafataluwa kaꞋa!”
27 Amma ɗa u yaꞋankai le kadanshi gogoꞋo,
“U yawa ta̱,
mpa ɗa!
Ka̱ta̱ i pana wovon ba.”
28 Biturusu u danai,
“Vuzagbayin,
avu ɗa baci mayun,
dana mu n ta̱wa̱ wa̱ nu a mala ma.”
29 Yesu wu ushuki,
“Ta̱wa̱.”
Ɗa Biturusu u cipa̱i a kpantsu ka,
ɗa u walai gaɗi mala ma a kubana wa̱ ni.
30 Amma ana we enei wunla̱i n aɓau a,
ɗa wovon u ka̱na̱i ni ɗa u gita̱i kuliɓa.
Ɗa wo orukpoi,
“Vuzagbayin,
isa mu!”
31 GogoꞋo lo ɗa Yesu u ba̱ra̱kpa̱i kukiye ku ni u ka̱na̱i ni.
Ɗa u danai,
“Uneki u ka̱ɗu u nu u gusa̱ ta̱.
Yi ɗa̱i i zuwai ɗa vi yaꞋin munla̱i?”
32 Ana a uwai a kpantsu ka,
ɗa wunla̱i wa u vaki bini.
33 Ɗa aza a na i punu a kpantsu ka a cikpai Yesu ɗa a danai,
“Mayun avu Maku ma̱ Ka̱shile maꞋa!”
Yesu u potsokpoi uma a̱ mɓa̱la̱ a Janisara
34 A pasai mala ma ɗa yawai a̱ ka̱kina̱ ɗevu n Janisara.
35 Ana uma a̱ likuci a e yevei a na Yesu ɗa wi lo u yawai,
ɗa a danai likuci i na yi lo dem.
Ɗa a̱ tuka̱i ni n aza a mbanaki ra̱ka̱.
36 Ɗa o folonoi ni u ka̱sa̱kpa̱ aza a̱ mɓa̱la̱ a̱ ciya̱ a saꞋwa ka̱ga̱Ꞌin ka kuminya ku ni.
Aza a na a saꞋwai ku ɗa ra̱ka̱ o potsoi.
Jesus Walks on Water (Matiyu 14:22-36)