Katagarda ka Ciɗa akaka a̱ Ka̱shile a ɗa a kubana u uma. A ɗana ta̱ kaꞋa a̱ya̱ n a̱bunda̱i a na a lazai ɗe, uma kakau ɗa feu a ɗanai kaꞋa. Ka̱shile ko tonoi n yaba dem vu na u ɗanai katagarda ka̱ ni, ɗa a ɗanai derere tsu na Ka̱shile ka cigai a ɗana kaꞋa. Nannai ɗa ci yevei a na akaka a Katagarda ka Ciɗa mayun ɗa, ɗaɗa kpamu ili i na i zuwai ɗa e ci ɗeke katagarda ka “Kadanshi ka̱ Ka̱shile.” Uma a nam pa yaba dem wi ta̱ n kelentsu ka̱ ni, ɗa ta na a ɗanai kadanshi ka n elentsu e le. Na lo u yotsongu ta̱ a na Ka̱shile ki a kudansa kelentsu ke te ba, ɗa kpamu wi a kupana uyoꞋo a ɗana akaka a̱ ni n elentsu kakau anana.

Katagarda ka Ciɗa ki ta̱ upeci ali ugboku u re. E ci ɗeke ta̱ ugboku kakau wa Uzuwakpani u Kuku n Uzuwakpani u Savu. Ugboku u re u nam pa u ci yaꞋan ta̱ ulinga koɓolo adama a na u yotsongu tsu ili dem i na Ka̱shile ka cigai kudana tsu, n uteku u na wi, koɓolo n ili i na u cigai uma a yaꞋan.

Uzuwakpani u Kuku u danai tsu uteku u na Ka̱shile ka yaꞋin aduniyan, ɗa kpamu Ka̱shile n vuma o yongoi ɗevu-ɗevu. Vuma va u nusakai Ka̱shile ana u iwain kuyaꞋan ili i na Ka̱shile ka danai ni u yaꞋan. Ɗaɗa Ka̱shile ka zagbai vuma vi te, ɗa ntsukaya n vuma vu nan lo mo okpoi agisana a uteku u na Ka̱shile ka cigai uma o yongo. A̱ ka̱tsuma̱ ka ayin a nan lo, uma i ta̱ upeci n Ka̱shile adama a unushi u na a ci yaꞋan a ayin tutu. Amma Ka̱shile ka̱ gita̱i kufoɓuso uye adama a na u bonoko uma a̱ ubuta̱ u te n a̱yi. Uteku u na Ka̱shile ko foɓusoi aduniyan adama a ulinga u nan lo ta punu arabali a i a Uzuwakpani u Kuku.

Uzuwakpani u Savu u yaꞋan ta̱ kadanshi ke Yesu Kirisiti Kishi. Atagarda a̱ na̱shi punu a Uzuwakpani u Savu a yaꞋan ta̱ kadanshi ke Yesu a ayin a na wi punu a aduniyan. Atagarda a na a buwai a dansai ukuna wi ili i na i ciya̱i azusuki a̱ ni ayin a na u bonoi ɗe gaɗi. Atagarda a Uzuwakpani u Savu a dansa ta̱ hawun uteku u na va kubana a̱ Ka̱shile ka̱ta̱ vi yongo koɓolo n Yesu ɗe ali uteku n uteku. Kusheshe ku Ka̱shile adama a na u yaꞋanka tsu ili i nam pa, u yotsongu tsu ta̱ hawun punu a atagarda a nam pa a. O yotsongu tsu ta̱ kpamu uteku u na vo kuyongo mayin gogo na tsu na Ka̱shile ka kupana uyoꞋo, koɓolo n ida̱shi i singai a kubana u uma dem.

Uzuwakpani u Kuku katagarda ka gbayin kaꞋa, amma a ayin a na a lapai katagarda ka nam pa, babu na o foɓusoi kuzuwa punu abaꞋin ra̱ka̱ a na a ɗanai a Uzuwakpani u Kuku. Ili i na yi punu uɗani i dana ta̱ tsu na Ka̱shile ka yaꞋin aduniyan mayin, n tsu na A̱da̱mu, vuma vi iyain u nusakai Ka̱shile ali ɗa nannai u tuka̱i n upecu u vuma n Ka̱shile. Ili i na yi punu kpamu i dana tsu ta̱ uteku u na Ka̱shile ka zagbai vuma vi te, ali a kubana wu ntsukaya n ni adama a na wo okpo tsa agisana a uteku u na Ka̱shile ka cigai vuma u yongo.

Ubuta̱ u yoku punu a Uzuwakpani u Kuku, a zuwa ta̱ usolongi u na wi n iɗani ushemgberengi. Usolongi kakau u nam pa u dansa ta̱ ukuna u yoku n a̱bunda̱i gbati, u na a dansai punu a Uzuwakpani u Kuku ɗa kpamu u gaꞋin ci yeve arabali a mayin. Vu bana baci a Katagarda ku Ugiti 14:18 vi ta̱ e kene agisana a.

Iɗani i kuku i yoku n a̱bunda̱i i Katagarda ka Ciɗa yi ta̱ lo. Iɗani i kuku i yoku i ta̱ n ushani u kadanshi ko abaꞋin a na aza o yoku i n ele ba. Uma i ta̱ lo a na a tsu fuɗa e yeve ili i na iɗani yu ugiti i danai. Iɗani kakau dem i dakaka ta̱ ciya̱ i fuɗa i vadalakpa mayin uteku u na a kuɗana kadanshi ka ka̱ta̱ uma a fuɗa e kece e yeve kaꞋa. Nannai ɗa u zuwai ɗa ili yu uta̱i kakau n i na yi punu a Katagarda ka Ciɗa ka Agana ka na A̱shingini a kiwanakai, koɓolo n Atagarda a Ciɗa kakau a na i n Tsunasara. Ana wo okpoi aza a na e kukece Katagarda ka Ciɗa ka̱ Cishingini a kiwana ta̱ n kukece Katagarda ka Ciɗa ka Agana, ɗa aza a ulinga e KLP a zagbai o dokusu punu udani u Tsugana punu a iɗani i le, amma ubuta̱ u nan lo dem wi ta̱ n urotu tsu nam pa [ ]. Vu bana baci a katagarda ka Marukusu 16:9-20 vi ta̱ e kene agisana a.

Punu a katagarda ka, vi ta̱ e kene udani u yoku n urotu u ka̱gita̱tsu uɗengushi gaɗi tsu nam pa, a. Ili i na wi a kudana i ɗaɗa vi ta̱ e kene kadanshi n a̱bunda̱i adama a ukuna wa, a ɗaka vu kapashi va. Kadanshi ka na va kucina va, ki punu uɗani a Katagarda ka Ciɗa ka ba. Aza e KLP a ɗa o dokushi ili i nam pa adama a na uma a fuɗa e yeve gogoꞋo ili i na yi punu a Katagarda ka Ciɗa. Vu kondo baci a katagarda ka Luka 9:5 vi ta̱ kene ili i na i a kudansa e keteshe. Agisana a ɗa na:

Vu bana baci a atagarda a Matiyu 8:28 ko Marukusu 5:1-20, vi ta̱ e kene arabali a ukuna u na Yesu u lokoi wunla̱i u gbani-gbani.

Udani u yoku wi ta̱ n tsu na ve kuyeve le a̱ ubuta̱ wi ili i kuyeve na ɗe uɗani a̱ kucina̱ ku Katagarda ka Ciɗa ka. Udani u nam wi ta̱ n urotu u masaɓu uɗengushi: Vu la̱na̱ baci Luka 1:9 vi ta̱ e kene agisana a.

Vu bana baci vu la̱na̱ o “Mololo ma Ciɗa” a̱ Ubuta̱ wi ili i Kuyeve, vi ta̱ e kene kadanshi ka na a dansai adama a̱ ni.