Yesu u ɗenga̱i a kasaun
16
Ana Ashibi a lazai,
ɗa Meri Magadaliya,
m Meri a̱na̱ku a Yakubu,
koɓolo n Solomi,
ɗa a tsulai ili i ma̱gula̱ni,
adama a na a bana a̱ sukuya̱ka̱ ikyamba i Yesu.
Marukusu 16:1-20
2 Kanna ka Aladi m kpasani kafu kanna ku uta̱,
ɗa a banai a̱ ubuta̱ u kasaun wa.
3 Ɗa a̱ ka̱na̱i mecenshenei,
“Yayi u kugida̱la̱kpa̱ka̱ tsu katali ka na a̱ ɓa̱ya̱nki kasaun ka?”
4 Ana a̱ ɗengusa̱i a̱shi,
ɗa e enei katali ka gbayin ka ugida̱la̱kpi,
a kakambu ke te.
5 Ele a na a uwa a kasaun ka,
ɗa e enei kolobo ko yoku lo ida̱shi a uɓon u kukiye ku singai n aminya a̱ a̱ri u ukai.
Ɗaɗa a̱ rikpa̱i.
6 Ɗa u danai le,
“Ka̱ta̱ i rikpa̱ ba.
Yesu vu Nazara ɗa yi a̱ kula̱nsa̱,
vuza na a unai a maɗanga ma atakaci?
U ɗenga̱ ta̱ ɗe,
wi punu ba.
Ta̱wa̱i ye ene,
ubuta̱ u na a zuwai ni.
7 Banai i dana mukumitoni n ni m Biturusu,
wi ta̱ ɗe u lazai a kubana a̱ Ga̱lili ta ɗe i kene yi,
uteku u na u danai ɗa̱.”
8 Ɗa a̱ uta̱i punu n ilaɗi a kasaun ka n wovon n ikyamba i le e kujeꞋe.
A fuɗa kpamu a dana vuza ili ba,
adama a na wovon u ka̱na̱ le ta̱.
Yesu u yotsongi ka̱ci ka̱ ni u Meri Magadaliya
9 [N usana wa Aladi u na Yesu u ɗenga̱i n wuma,
ɗa u gita̱i kuyotsongu ka̱ci ka̱ ni u Meri Magadaliya,
vuka vu na wu uta̱ka̱i wunla̱i u gbani-gbani u cindere wa̱ ni.
10 Ɗa a̱yi tamkpamu u banai u danai mukumitoni n Yesu,
ɗa u yawai u cinai le a̱tsuma̱ una̱mgbi a̱ ma̱shi.
11 Amma ana a panai wi ta̱ n wuma,
ali Meri feu we ene yi ta̱,
ɗa a iwan kushuku.
Yesu u yotsongi ka̱ci ka̱ ni wu mukumitoni n re
12 Ana ka nan lo ko kotsoi ɗa Yesu u doku u yotsongi ka̱ci ka̱ ni wu mukumitoni n ni aza e re n uye u yoku kau.
Ayin a na i a nwalu a kubana a̱ likuci i yoku.
13 Ɗa o bonoi a danai aza a na a buwai,
ele kpamu ɗa a iwain kushuku.
Yesu u yaꞋin kadanshi m mukumitoni
14 M megeshe,
ɗa u yotsongi ka̱ci ka̱ ni a̱ ubuta̱ u mukumitoni n ni kupa n vuza te,
ele a kulyaꞋa ilikulyaꞋa.
Ɗa u dansukai le adama a̱ ukpa̱ɗi u kuneke wa̱ a̱ɗu n ugbamasuvu u le,
adama a na a̱ ushuku n aza a na e enei ni ana u ɗenga̱i n wuma ba.
15 Ɗa u danai le,
“Banai a̱ ubuta̱ dem aduniyan,
i dana uma Arabali a Singai.
16 Vuza na baci ɗe dem u nekei ka̱ɗu ka̱ ni,
ɗa a yaꞋankai ni kusumbu ka akucina,
wi ta̱ a̱ kuciya̱ wuma u babu uteku.
Amma vuza na baci u iwain kuneke ka̱ɗu,
i ta̱ a̱ kilukpa̱ yi.
17 Aza a na e nekei a̱ɗu e le i ta̱ a kuyaꞋan ili i mereve i nam pa.
N kula ku va̱ i ta̱ o kuloko wunla̱i u gbani-gbani,
ka̱ta̱ a yaꞋan kadanshi n elentsu o yoku.
18 I ta̱ a kufuɗa a ɗika oko,
ko o soꞋo baci yaza,
ya kuyaꞋanka le ili ba.
I ta̱ a kufuɗa a saꞋwa aza a mbanaki,
ka̱ta̱ o potso.”
A ɗikai Yesu a kubana gaɗi
19 Ana Vuzagbayin Yesu u kotsoi kuyaꞋanka le kadanshi.
Ɗa a ɗikai ni a kubana gaɗi.
Ɗa u da̱sa̱ngi e kukiye ku singai ku Ka̱shile.
20 Ɗa mukumitoni n ni a banai a̱ ka̱na̱i kudana uma Arabali a Singai a̱ ubuta̱ dem.
Ɗa Vuzavaguɗu u yaꞋin ulinga n ele,
u ka̱na̱i kpamu kuyaꞋan ili i mereve we le,
adama a na uma e yeve kadanshi ka̱ ni mayun ɗa.]
Marukusu -credits