Kasaun ke Yesu babu ili
20
N usana wa Aladi ka̱lika̱li,
Meri Magadaliya u banai a kasaun,
ɗa we enei katali ugida̱la̱kpi a kakambu ke te a̱ utsutsu wa.
2 Ɗa u sumai a kubana u Sima Biturusu m makumitoni mo yoku ma na Yesu u cigai,
ɗa u danai le,
“A ɗika ta̱ Vuzagbayin va a kasaun,
a̱tsu kpamu ci yeve a̱ ubuta̱ u na a zuwai ni ba!”
3 Biturusu m makumitoni ma a̱ uta̱i a kubana a kasaun ka.
4 Ele ra̱ka̱ vi le alaɗi,
amma makumitoni ma ma laꞋi Biturusu alaɗi,
ɗa u gita̱i kuyawa a kasaun ka.
5 Ɗa u ka̱lika̱i u la̱na̱i punu a asuvu a,
ɗa we enei arikinlai punu koci a kasaun ka,
amma u uwa punu a asuvu ba.
6 Ana Sima Biturusu u yawai,
ɗa u uwai punu a asuvu,
ɗa u cinai arikinlai a na a alakai ni koci.
7 Ɗa kpamu we enei kakashi ka na a palakai Yesu ukambu u a̱shi,
ka kpamu uka̱ta̱li uzuwi kau a̱ ubuta̱ wa.
8 Makumitoni ma na ma̱ gita̱i kuyawa a kasaun ka,
ɗa feu u uwai a kasaun ka.
We enei,
ɗa u nekei ka̱ɗu mayun Yesu u ɗenga̱ ta̱ ukpisa̱.
9 (A ayin a nan lo ele ta na babu biꞋi e yeve a na Katagarda ka Ciɗa ka danai Yesu u kuɗenga̱ a̱ ukpisa̱.)
10 Ɗa mukumitoni ma m bonoi a kpaꞋa.
Meri Magadaliya we enei Yesu
11 Amma ɗa Meri u shamgbai pulai vu kasaun va,
ɗa u ka̱na̱i ma̱shi.
Ɗa u ka̱lika̱i u la̱na̱i punu a kasaun ka.
12 Ɗa we enei punu alingata e re.
Ele u uꞋuki nu ntogu ma̱ a̱ri a̱ da̱sa̱ngi a̱ ubuta̱ u na ikyamba i Yesu yi ishi.
Vuza te ɗevu n kaci vuza te tamkpamu uɓon u ene.
13 Ɗa e ecei ni,
“Yi ɗa̱i i zuwai ɗa vi a̱ ma̱shi?”
Ɗa wu ushuki,
“A ɗika ta̱ Vuzagbayin vu va̱,
mpa n yeve kpamu ubuta̱ u na a zuwai ni ba.”
14 Ana u danai nannai,
ɗa u kpatalai ɗa we enei Yesu a kashani na ɗe,
amma u yeve a na Yesu ɗa ba.
15 Ɗa Yesu we ecei Meri va,
“Yi ɗa̱i i zuwai ɗa vi a̱ ma̱shi?
Yayi vi a̱ kula̱nsa̱?”
A̱yi u dana ta̱ ko a̱yi ɗa wi a kinda kashina ka nɗanga ka,
ɗa u danai,
“Vuzagbayin,
avu ɗa baci vi ɗikai ikyamba i ni,
n folono wu ta̱,
dana mu,
adama a na m bana n ɗika i ɗa.”
16 Ɗa Yesu u danai ni,
“Meri.”
U kpatalai u Yesu ɗa u danai,
“Rabboni!”
(“Rabboni” n Ciyahuda,
ɗaɗa “Malum.”)
17 Ɗa Yesu u danai ni,
“Ka̱ta̱ vu ka̱na̱ mu ba,
adama a na ka̱ta̱ n yawa u Dada ba.
Amma bana u mukumitoni n va̱ ka̱ta̱ vu dana le,
‘Mpa mi ta̱ a kubana u Dada vu va̱ vuza na kpamu wi Esheku a̱ ɗa̱.
A̱yi ɗa Ka̱shile ka̱ va̱,
a̱yi ɗa kpamu Ka̱shile ka̱ ɗa̱.’ ”
18 Ɗa Meri Magadaliya u banai u danai mukumitoni n ni a na we enei Vuzagbayin.
Ɗa u danai le ili i na u danai ni.
Mukumitoni ma me enei Yesu
19 N Aladi a nan lo a n kayin,
ɗa mukumitoni n ni m ɓolongi a̱ ubuta̱ u te ɗa a gbagurai ka̱ci ke le a̱ kunu,
adama a na ele a pana ta̱ wovon wa aza e kelime a Ayahuda.
Ɗa gogo va lo Yesu u ta̱wa̱i u shamgbai lo ɗa u kya̱sa̱i le,
u danai,
“Mpa n vasaka ɗa̱ ta̱ i yongo m ma̱ta̱na̱.”
Jesus appears to the disciples (Yahaya 20:19-31)
20 Ana u danai nannai,
ɗa u yotsongi le usa̱n we ekiye n u kakambu ka̱ ni.
Ɗa mukumitoni n ni n yaꞋin ma̱za̱nga̱ adama a na e ene ta̱ Vuzagbayin.
21 U danai kpamu,
“N vasaka ɗa̱ ta̱ adama a na i ciya̱ ma̱ta̱na̱.
Tsu na Dada u suki mu a aduniyan,
ta feu mpa mi a̱ kusuku ɗa̱ nannai.”
22 Ɗa wu uvula̱ka̱i le u danai,
“Isai Ayinviki a̱ Ka̱shile.
23 I cinukpaka baci uma unushi,
Ka̱shile feu wi ta̱ a kucinukpaka le.
I iwan baci kucinukpaka le,
Ka̱shile feu wi ta̱ a kuꞋiwan kucinukpaka le.”
Yesu koɓolo n Toma
24 Vuza yoku a̱ ka̱tsuma̱ ka Kupanazere a,
Toma (vuza na e ci ɗeke Mepeshe),
wi koɓolo n ele ba,
a ayin a na Yesu u yotsongi ka̱ci ka̱ ni ka.
25 Ana u yawai,
ɗa mukumitoni n na m buwai a̱ ka̱na̱i kudanasa yi,
“Ce ene ta̱ Vuzagbayin!”
Amma ɗa Toma u danai,
“Mi e kuneke ka̱ɗu ba,
sai me ene usa̱n e ekiye a̱ ni ka̱ta̱ kpamu n uka ka̱jivu punu a̱ usa̱n wa a̱ ubuta̱ u na ikusa i uwai,
ka̱ta̱ kpamu n doku n uka kukiye a̱ ubuta̱ u na u ciya̱i usa̱n a kakambu.”
26 Ana kuden ku te ku lazai,
ɗa mukumitoni ma m ɓolongi ka̱ci ke le a̱ kunu ka kpamu,
a̱yi Toma feu koɓolo n ele.
A gbagurai utsutsu wa tsu na a yaꞋin cau va,
amma ɗa Yesu u uwai u shamgbai punu e mere me le.
U kya̱sa̱i le ɗa u danai,
“N vasa ta̱ adama a na i ciya̱ ma̱ta̱na̱.”
27 Ɗaɗa u danai Toma,
“Inda ekiye a̱ va̱,
uka ka̱jivu ka̱ nu a̱ ubuta̱ wu usa̱n wa.
Uka kukiye ku nu na a kakambu ka̱ va̱.
Ka̱sa̱kpa̱ kuꞋiwan kuneke ka̱ɗu,
avu neke ka̱ɗu.”
28 Toma wu ushuki ni,
“Avu ɗa Vuzavaguɗu vu va̱ n Ka̱shile ka̱ va̱.”
29 Ɗa Yesu u danai ni,
“Vi neke ta̱ ka̱ɗu adama a na ve ene mu ta̱.
Aza a na e nekei a̱ɗu babu na e enei mu,
i ta̱ a kuyaꞋan ma̱za̱nga̱ mayun.”
Ukuna u katagarda ka nam pa
30 Mukumitoni n Yesu me ene ta̱ u yaꞋin urotu wi ili i mereve i yoku n a̱bunda̱i i na a̱ kpa̱ɗa̱i kuɗana punu a katagarda ka nam pa.
31 N ɗana ta̱ ili i nam pa ya adama a na yu ushuku Yesu a̱yi ɗa Kirisiti Kishi,
a̱yi ɗa kpamu Maku ma̱ Ka̱shile.
Yi ta̱ a̱ kuciya̱ wuma adama a na i neke ta̱ a̱ɗu n a̱yi.