Yesu u ɗenga̱i a kasaun
28
N usana wa Aladi ka̱lika̱li,
Meri Magadaliya m Meri vi te va a banai kene kasaun ka.
2 A ayin a nan lo,
iɗika i gba̱ɗa̱sa̱i n utsura.
Kalingata ka Vuzavaguɗu ka̱ cipa̱i,
ka banai a kasaun ka,
ɗa ka̱ gida̱la̱kpa̱i katali ka a utsutsu wa.
Ɗa u da̱sa̱ngi gaɗi kaꞋa.
3 Kalingata ka ki ta̱ a kutasa langu-langu an kulaɗa,
ntogu n ni kpamu mi ta̱ wa̱ri pushe-pushe.
4 Osoji a na i a kinda kasaun ka e jeꞋekei ikyamba n wovon adama a kalingata ka,
ɗa ikyamba i kuwa̱i le an aza a na a̱ kuwa̱i.
5 Kalingata ka ka danai a̱ma̱ci a,
“Ka̱ta̱ i pana wovon ba.
N yeve ta̱ yi ta̱ a̱ kula̱nsa̱ Yesu,
vuza na a bapai a maɗanga ma atakaci.
6 Wi punu na ba.
U ɗenga̱ ta̱ ɗe a kasaun tsu na u danai ɗa̱.
Ta̱wa̱i ye ene ubuta̱ u na ishi a zuwai keven ki ikyamba ka̱ ni.
7 Banai gogoꞋo i dana mukumitoni n ni,
‘Yesu u ɗenga̱ ta̱ a kasaun.
Wi ta̱ ɗe a kubana a̱ Ga̱lili kelime ka̱ ɗa̱,
yi ta̱ ta na e kene yi ɗe.’
I ɗaɗa n ta̱wa̱i kudana ɗa̱.”
8 A̱ma̱ci a a̱ ka̱sa̱kpa̱i kasaun ka gogoꞋo.
A panai wovon,
amma i ta̱ feu a̱ ma̱za̱nga̱.
A sumai adama a na a bana a dana mukumitoni ma i na i yaꞋin.
9 Kafu a zuka ɗa Yesu u cinai le ɗa u kya̱sa̱i le.
Ɗa a banai ɗevu n a̱yi,
ɗa a̱ ka̱na̱i ni e ene,
ɗa a cikpai ni.
10 Ɗa u danai,
“Ka̱ta̱ i pana wovon ba!
Danai mukumitoni n va̱ a bana a̱ Ga̱lili.
Ta ɗe e kene mu.”
Osoji a kindi a e sheshei kuyaꞋan aꞋuwa
11 A ayin a na a̱ma̱ci a a̱ ka̱na̱i uye u le a kulaza,
osoji o yoku a̱ ka̱tsuma̱ ke le a na i a kinda kasaun ka o bonoi asuvu a̱ ubirini,
ɗa a danai anan ganu vu gbagbaꞋin i na i yaꞋin dem.
12 Anan ganu vu gbagbaꞋin a a yaꞋin oɓolo nu nkoshi m gba̱ra̱-gba̱ra̱ ɗa e sheshei.
A tsupai osoji a ikebe n a̱bunda̱i,
13 ɗa a danai le,
“Danai uma mukumitoni n Yesu n ta̱wa̱ ta̱ n kayin,
ɗa o bokoi ikyamba ya a ayin a na yi alavu.
14 Gomuna u pana baci nannai,
ci ta̱ a kuyaꞋanka yi kadanshi,
ka̱ta̱ ci isa ɗa̱ a̱ ubuta̱ wa atakaci.”
15 Ɗa osoji a ɗikai ikebe ya,
ɗa a yaꞋin tsu na a danai le.
Uma a Yahuda i ta̱ a kudansa arabali a nam pa a uteku u le ali a̱ kuta̱wa̱ gogo na.
Yesu u yaꞋankai mukumitoni n ni kadanshi
16 Mukumitoni kupa n vuza te a lazai ɗa a banai a̱ Ga̱lili a kusan ku na Yesu u danai le ɗe a bana.
17 Ana a yawai ɗa e enei ni,
ɗa a cikpai ni,
amma ele vi yoku e neke a̱ɗu ba.
18 Ɗa Yesu u ta̱wa̱i we le ɗa u danai,
“Ka̱shile ke neke mu ta̱ utsura ra̱ka̱ gaɗi n iɗika.
19 Adama a nan lo,
banai i bonoko uma a aduniyan ra̱ka̱ aza o Kutoni a̱ va̱.
I yaꞋanka le kusumbu ka akucina a̱ ka̱tsuma̱ ka kula ka Dada n ka Maku n ka Ayinviki a̱ Ka̱shile.
20 I yotsongusu le a yaꞋan ili dem i na n danai ɗa̱.
Mi ta̱ o kuyongo n a̱ɗa̱ ayin tutu,
ali a kubana uteku wa aduniyan.”