Bilatu u yaꞋankai Yesu keci
15
Ana kayin ka asai n usana,
anan ganu vu gbagbaꞋin,
nu nlum n wila̱,
nu Nkoshi m gba̱ra̱gba̱ra̱ n Yahuda,
n Aza e Kusheshe dem,
a yaꞋin oɓolo.
Ɗa a shiyai Yesu,
a lazai n a̱yi.
Ɗa e nekei ni u Gomuna Bilatu.
Marukusu 15:1-32
2 Ɗa Bilatu we ecei ni,
“Avu ɗa mogono ma Ayahuda ma?”
Ɗa Yesu wu ushuki,
“Ta nannai uteku u na vu danai.”
3 Ɗa anan ganu vu gbagbaꞋin a̱ ka̱na̱i kuyaꞋan nsata n ni adama a ili n a̱bunda̱i.
4 Ɗa Bilatu u doku we ecei ni,
“Vi n kadanshi ko yoku ba?
La̱na̱ nsata n a̱bunda̱i n na i a̱ kutuka̱sa̱ adama a̱ nu.”
5 Ali n gogo na,
Yesu u yaꞋan kadanshi ko yoku ba,
ɗa Bilatu u ka̱na̱i kuyaꞋan mereve.
Bilatu u kiɗakai Yesu afada a̱ ukpa̱
6 Ayin a̱ Ka̱ɗiva̱ ka Kupasamgbanai dem,
Bilatu u ci shikpaka le ta̱ vuza vu ugbashi vi te,
vuza na baci dem o folonoi.
7 Vuza yoku wi ta̱ lo ugbashi koɓolo n aza o yoku,
kula ku ni ku ɗa Barabas.
Wu una ta̱ vuza ayin a̱ vishili.
8 Ɗa ka̱bunda̱i ka uma ka ka banai ko folonoi Bilatu u yaꞋanka le uteku u na u ci yaꞋansa.
9 Ɗa we ecei le,
“Yi ta̱ a kuciga n shikpaka ɗa̱ mogono ma Ayahuda?”
10 Adama a na Bilatu u yeve ta̱ anan ganu vu gbagbaꞋin i ta̱ a kupana wupa u Yesu,
i ɗaɗa i zuwai ɗa e remei ni.
11 Amma anan ganu vu gbagbaꞋin a̱ ka̱na̱i kukushangu uma a dana Bilatu u shikpaka le Barabas.
12 Ɗa Bilatu u doku we ecei le,
“Nini ɗai n kuyaꞋan n vuza na e ci ɗeke mogono ma Ayahuda?”
13 Ɗa o doku o orukpoi,
“A bapa yi a maɗanga ma atakaci!
A bapa yi!”
14 Ɗa Bilatu we ecei le,
“Yi ɗa̱i i zuwai,
unushi we ne u ɗai u yaꞋin?”
Ɗa o doku ɗa a̱ ɗengusa̱i a̱la̱ka̱tsu e le,
“Bapai ni a maɗanga ma atakaci!”
15 Adama a na Bilatu wi ta̱ a kuciga uma a ciga yi,
ɗa u yaꞋanka le kpamu ili i na a cigai,
u shikpakai le Barabas.
Ana u zuwai a fabai Yesu,
ɗa u nekei le a bana a bapa yi a maɗanga ma atakaci.
Osoji a̱ ka̱na̱i kuzoꞋoso Yesu
16 Ɗa osoji a ɗikai ni a bankai a̱ ubuta̱ u kefeku ko mogono.
Ɗa o ɓolongi lo osoji a dem.
17 Ɗa a lapangi ni kuminya ku shili ku tsugono.
Ɗa a caꞋi awana tso oroliko,
ɗa a alakai ni a kaci.
18 Ɗa a̱ ka̱na̱i kukya̱sa̱ yi,
na a danakai ni,
“Mogono ma Ayahuda,
vuza gbayin!”
19 Ɗa a̱ ka̱na̱i kulapa yi n kalangu a kaci,
n a̱ ciꞋikpa̱i ni ntsa̱n.
A yaꞋan baci a̱ kuɗa̱ngu adanshi i ta̱ e kuneke yi tsugbayin.
20 Ana o kotsoi kuzoꞋoso yi,
ɗa a takpai motogu mo tsugono.
Ɗa a ukai ni ntogu n ni kpamu.
Ɗa a ɗikai ni a kubanka a̱ ubuta̱ u na a bapa yi a maɗanga ma atakaci.
A bapai Yesu a maɗanga ma atakaci
21 Vuza yoku lo a kulaza,
kula ku ni ku ɗa Sima,
vuza va aza e Kure ɗa,
esheku a Isakandari n Rufas.
A̱yi a kubana a̱ likuci i na yi lo ɗevu,
ɗa a gutsakai ni u ɗika maɗanga ma atakaci ma.
22 Ɗa a bankai Yesu ubuta̱ u na e ci ɗeke Galgata,
ɗaɗa ubuta̱ wu nkoꞋo ma aci n uma.
23 Ana a yawai ɗe,
ɗa e nekei Yesu ma̱kya̱n u soꞋo usatari n kujini tsa̱ a̱guma̱.
Amma ɗa u iwain kusoꞋo.
24 A̱ ubuta̱ wa lo,
ɗa a bapai ni a maɗanga ma atakaci.
Ɗa a ɗikai ntogu n ni ɗa e pecei uteku u le.
Ɗa a̱ ka̱na̱i kuyaꞋan kazagba adama a na e ene ili i na yaba dem u kuciya̱.
25 Agisana a̱ viyum kuci ɗa vu usana,
ana a bapai Yesu a maɗanga ma atakaci.
26 Ɗa a ɗanai lo icuꞋu yu unushi i ni ɗa a saki gaɗi a uɓon u kaci,
“MOGONO MA AYAHUDA.”
27 Ɗa a bapai lo feu aza a̱ ma̱ga̱la̱ka̱ e re koɓolo n Yesu va,
vuza te e kukiye ku usingai ku ni vuza te tamkpamu a̱ ugula̱.
28 Na va ɗaɗa ushatangi u kadanshi ka na a yaꞋin e kece yi ta̱ koɓolo n aza unushi.
29 Aza a na i a kulazasa lo a̱ gita̱i kufila̱ n aci n a shikai Yesu,
“Avu na vu danai,
vi ta̱ a̱ kufa̱da̱ A̱Ꞌisa̱ a Gbayin a̱ tsu,
ka̱ta̱ vu maꞋa o yoku ayin a tatsu.
30 Isa ka̱ci ka̱ nu ka̱ta̱ vi cipa̱ gaɗi vu maɗanga ma atakaci ma.”
31 Ta kpamu nlum m gbagbaꞋin,
n anan ganu a̱ ka̱na̱i kuzoꞋoso yi,
n a danai,
“Wi isa ta̱ uma n a̱bunda̱i,
amma u fuɗa wi isa ka̱ci ka̱ ni ba.
32 YaꞋan Kirisiti Kishi,
mogono mi Israila u cipa̱ a maɗanga ma atakaci ma gogo na ce ene,
ka̱ta̱ ci yeve tsu ushuku avu ɗa mogono ma Ayahuda.”
Aza a na i usaki gaɗi koɓolo n a̱yi,
ɗa feu a̱ ka̱na̱i kushika yi.
Ukpa̱ u Yesu
33 Ana kanna ka yawai a kaci,
ɗa ka̱yimbi ka̱ kimba̱i ubuta̱ dem,
ali a kubana viyum vu tatsu vu kulivi.
Marukusu 15:33-47
34 Ana viyum vu tatsu vi yaꞋin,
ɗa Yesu u ɗengusa̱i ka̱la̱ka̱tsu ka̱ ni n utsura,
“Eloi,
Eloi,
lama sabatana” Wi ta̱ a kudana,
“Ka̱shile ka̱ va̱.
Ka̱shile ka̱ va̱.
Yi ɗa̱i i zuwai ɗa vu vakangi mu?”
35 Ana aza o yoku a na i lo a kashani,
a panai nannai,
ɗa a danai,
“Panai,
a̱yi ɗa ɗe e kuɗeke Iliya.”
36 Ɗa vuza yoku u sumai u banai u yeki ayangi,
m ma̱kya̱n ma kalam.
Ɗa u shiyai a ɗa a kalangu ɗa u nekei Yesu u soꞋo.
Ɗa a danai,
“YaꞋan ce ene ko Iliya wa̱ kuta̱wa̱,
ka̱ta̱ u cipa̱ka̱ yi.”
37 Ɗa Yesu u ɗengusa̱i ka̱la̱ka̱tsu n utsura.
Ɗa u kuwa̱i.
38 A ayin a nan lo,
kakashi ka na ki a̱ ubuta̱ wa̱ A̱Ꞌisa̱ a Gbayin,
ɗa ka karai.
Ke pecemgbenei ugboku u re,
ka̱ gita̱i gaɗi a̱ kuta̱wa̱ ɗaka.
39 Jagaba vo osoji vu na a zuwai adama a na wi inda Yesu.
Ana we enei uteku u na u kuwa̱i,
ɗa u danai,
“Mayun ɗa.
Vuma vu nam pa va Maku ma̱ Ka̱shile maꞋa.”
40 A̱ma̱ci o yoku i ta̱ lo kashani daꞋin,
ele ɗa Meri Magadaliya,
m Meri a̱na̱ku a Yakubu vuza kenu vu Isuhu,
koɓolo n Solomi.
41 Ele ɗa aza a na o tonoi ni n a̱ ɓa̱nka̱i ni ayin a na u yongoi a̱ Ga̱lili,
koɓolo n a̱ma̱ci n a̱bunda̱i a na o tonoi ni a kubana a Urishelima.
A yaꞋin ka̱ciɗa̱ ke Yesu
42 Ili ya ra̱ka̱ i gita̱ ta̱ a kanna ka Ajima,
kanna ka na a̱ tsu gita̱ ofoɓuso adama a Ashibi.
43 Ɗa Isuhu vu Aramatiya,
a̱yi na wi n tsugbayin a̱ ka̱tsuma̱ ko nkoshi m gba̱ra̱gba̱ra̱ ma.
Vuza na kpamu wi a kuvana tsugono tsu Ka̱shile.
Ɗa u remei ka̱ɗu ɗa u uwai u Bilatu.
Ɗa u folonoi e neke yi keven ki ikyamba ke Yesu.
44 Ɗa Bilatu u yaꞋin mereve a na Yesu u kuwa̱i ɗe.
Ɗa u ɗekei Jagaba vo osoji ɗa we ecei,
“Ko Yesu va u kuwa̱ ta̱ ɗe m megeshe?”
45 Ana we ecei a̱ ubuta̱ u Jagaba vo osoji ɗa u cinai kaꞋa nannai,
ɗa u nekei Isuhu keven ke Yesu ka.
46 Ɗa Isuhu u tsulai arikinlai a̱ a̱ri.
Ana u cipa̱ka̱i n keven ka,
ɗa wa alai n arikinlai a̱ a̱ri,
ɗa u zuwai a kasaun ka na e sheꞋwei a katali.
Ɗa u gida̱la̱kpa̱i katali ko yoku ɗa u ɓa̱ya̱ngi utsutsu wa.
47 Meri Magadaliya m Meri a̱na̱ku a̱ Isuhu e ene ta̱ ubuta̱ u na a̱ ciɗa̱ngi ni.