Afada a̱ Ka̱shile
2
U gaꞋan ba vi ta̱ a kudana,
“Kai!
Uma a gbani-gbani a̱ yi ɗa̱i vi a kadanshi ke le!”
Amma avu feu vu na̱mgba̱ ta̱ ci le,
vi kpamu n ili i kudansa ba!
Vu dana baci ele a̱ na̱mgba̱ ta̱ ɗa kpamu u gaꞋin a takacika le,
vi ta̱ a kuyaꞋanka ka̱ci ka̱ nu afada,
adama a na vi ta̱ feu a kuyaꞋan ili i nam pa ya.
2 Ci yeve ta̱ Ka̱shile ka yaꞋan ta̱ derere,
ana u yaꞋankai uma a na a yaꞋansai ili i nam pa afada.
3 I ci yaꞋanka ta̱ aza a na a ci yaꞋan kawuya afada,
amma a̱ɗa a̱ ka̱ci ka̱ ɗa̱ i ci yaꞋan ta̱ kawuya.
I sheshe ta̱ yi ta̱ a kufuɗa ya̱ fa̱ta̱tsa̱ afada a̱ Ka̱shile?
4 I bonoko ili i singai i Ka̱shile ili ba adama a na u tsu takacika vuza gogo lo ba,
ɗa kpamu wi n uremi u ka̱ɗu n a̱ɗa̱.
Mayun i yeve ta̱ ili i na i zuwai ɗa Ka̱shile ko yotsongi ɗa̱ kasingai,
ɗaɗa adama a na u ciga ta̱ i bono wa̱ ni.
5 Amma a̱ɗa yi ta̱ n ugbawansuvu ɗa i iwain kubono u Ka̱shile.
Wi ta̱ a kuzuwa ɗa̱ i takacika ka̱u a kanna ka na u kuyotsongu wupa u ni ka̱ta̱ u yaꞋan afada derere.
6 Wi ta̱ a kucikpa,
ko u takacika yaba dem adama a ili i na u yaꞋin.
7 Ka̱shile ki ta̱ e kuneke wuma u babu uteku wa aza a na a lyaꞋi kelime n kuyaꞋan ili i singai,
n aza a na feu a zamai ni u neke le tsugbayin,
u neke le kucikpa,
n wuma u babu uteku feu.
8 Amma wi ta̱ a̱ kuva̱ma̱ wupa u ni ka̱ta̱ u takacika aza a na i o kuyongo adama a na saꞋa ka̱ci ke le a̱ɗu koci,
aza a na kpamu a iwain kutono ka mayun,
ɗa i a kuyaꞋan kawuya ayin tutu.
9 Ka̱shile ki ta̱ a kuzuwa yaba dem vu na wi a kuyaꞋan unushi ayin tutu u takacika ka̱ta̱ u pana mɓa̱la̱.
Ili i nam pa ya i kuciya̱ ta̱ biꞋi Ayahuda,
ka̱ta̱ i yeve i ciya̱ Aza̱ka̱yimbi.
10 Amma wi ta̱ e kuneke tsugbayin,
n kucikpa,
m ma̱ta̱na̱ u yaba dem vu na u ci yaꞋansa kasingai.
Ili i nam pa ya i kuciya̱ ta̱ biꞋi Ayahuda,
ka̱ta̱ i yeve i ciya̱ Aza̱ka̱yimbi.
11 Ta ki nannai adama a na Ka̱shile ki ta̱ a kuyaꞋanka uma ra̱ka̱ afada uye u te derere.
12 Ka̱shile ki ta̱ a kutakacika Aza̱ka̱yimbi a yaꞋan baci unushi,
ko a na e yevei Wila̱ u na Ka̱shile ke nekei Musa ba.
Wi ta̱ kpamu a kutakacika Ayahuda a yaꞋan baci unushi,
adama a na i ta̱ n Wila̱.
13 Ka̱shile ko bonoko uma aza a̱ usuɓi wa̱ ni adama a na a panai ukuna u Wila̱ ba.
Amma u yaꞋan ta̱ ili i nam pa,
a yaꞋan baci ili na Wila̱ u danai a yaꞋan.
14 Ko Aza̱ka̱yimbi,
aza a na i babu Wila̱,
e sheshekei ka̱ci ke le kutono ili i na Wila̱ u danai.
O yotsongu ta̱ nannai punu a̱ a̱ɗu e le a na e yevei ili i singai n ili i wuya.
15 O yotsongu ta̱ a na Wila̱ wi punu asuvu e le,
adama a na a̱ɗu e le a banka ta̱ nu nsata ko a dana le ta̱ i ta̱ a kuyaꞋan ili i na yi derere.
16 Ili i nam pa ra̱ka̱ yi ta̱ a kuyaꞋan a kanna ka na Ka̱shile u kuyaꞋanka kusheshe ku usokongi ku uma afada a̱ ubuta̱ u Yesu Kishi.
Arabali a Singai a na mi a kudansa,
a ɗa a danai nannai.
Ayahuda n Wila̱
17 Avu,
Kayahuda ka baci vi,
vi ta̱ e kuneke katsura n Wila̱.
Yi ta̱ a̱ kuka̱ga̱ a na a̱ ɗa̱ uma a uzagbi a̱ Ka̱shile a ɗa.
18 Vi yeve ta̱ ili i na u cigai vi yaꞋan,
ɗa vi yevei kpamu ili i na yi derere,
adama a na vu piꞋisa ta̱ ɗe Wila̱.
19 Vi ɗika ta̱ ka̱ci ka̱ nu avu ɗa vuza na u tsu rono ka̱yimba̱ kalangu,
n kutashi ka aza a na i a̱ ka̱yimbi.
20 Vi sheshe ta̱ vi ta̱ o kuyotsongu alau ili i na yi derere,
ka̱ta̱ vi yotsongusu aza a na e yevei ukuna ba.
Vi ta̱ n Wila̱,
ɗa vi sheshei vi yeve ta̱ ili dem ɗa vi m mayun ra̱ka̱.
21 Vi ci yotsongusu ta̱ aza o yoku,
yi ɗa̱i i zuwai ɗa va̱ kukpa̱ɗa̱ kuyotsongusu ka̱ci ka̱ nu?
Vu danai aza o yoku a yaꞋan uboki ba,
amma vi ta̱ a kuyaꞋan uboki.
22 Vu danai u gaꞋan a yaꞋan tsugbani ba,
amma avu vi ta̱ a kuyaꞋan nannai.
Vu danai u gaꞋan a cikpa a̱ma̱li ba,
amma vi ci yaꞋan ta̱ m modoroko a̱ a̱Ꞌisa̱ e le.
23 Vi ta̱ a̱ kuka̱ga̱ a na vi n Wila̱,
amma vi ta̱ a kuzuwa uma o goyo Ka̱shile ana vi iwain kutono u ɗa.
24 Derere ɗa n uteku u na Katagarda ka Ciɗa ka danai,
“Aza a na i Ayahuda ba i ta̱ a kudansa ili yi ishikushi u Ka̱shile adama a̱ ɗa̱.”◊
25 Avu,
Kayahuda ka baci vi,
vi yaꞋan baci ili i na Wila̱ u danai nu vi yaꞋan,
a kiɗa wu baci kavaja,
ukuna u gbani u ɗa ba.
Amma vu tono baci Wila̱ ba,
ili i te i ɗa adanshi ishi a kiɗa wu kavaja ba.
26 A ci kiɗa Aza̱ka̱yimbi avaja ba,
amma a yaꞋan baci ili i na Wila̱ u danai,
Ka̱shile ka ɗika le ta̱ adanshi a kiɗa le ta̱ avaja.
27 Ka̱shile ki ta̱ a kuyaꞋanka a̱ɗa̱ Ayahuda afada,
adama a na Aza̱ka̱yimbi a̱ ka̱ci ke le o tono ta̱ Wila̱.
A̱ɗa̱ yi ta̱ n Wila̱,
ɗa i ciya̱i kpamu ukiɗi wa avaja,
amma ɗa i iwain kutono Wila̱.
Ele Aza̱ka̱yimbi o tono ta̱ Wila̱ ko a na a kiɗai le avaja ba.
28 Adama a na vi yongo ta̱ ali uma a ɗikai nu Kayahuda kaꞋa vi,
ɗa kpamu a kiɗai nu ɗe kavaja,
na lo u bonoko wu Kayahuda mayun ba.
29 Ta nannai ba,
Kayahuda ka mayun a̱yi ɗa vuza na ka̱ɗu ka̱ ni ki derere n Ka̱shile.
Ukiɗi u kavaja u mayun kpamu u ɗaɗa kukiɗa ku ukpan wi ikyamba ba,
amma ɗaɗa usabaꞋi u ka̱ɗu u na wi ulinga wa Ayinviki a̱ Ka̱shile.
Amma usabaꞋi u nan lo,
adama a̱ Wila̱ u na a ɗanai ɗa ba.
Vuma tsu nan lo u ci isa ta̱ ucikpi a̱ ubuta̱ u Ka̱shile,
amma a̱ ubuta̱ uma ba.