Agisana a kuvishangu icuꞋu
4
Kanna ko yoku Yesu u gita̱i kuyotsongusu a̱ ka̱kina̱ ka mala.
Uma a na a banai wa̱ ni i ta̱ n a̱bunda̱i,
ali ɗa u uwai a kpantsu,
u da̱sa̱ngi punu a ku ɗa.
Uma a na a banai wa̱ ni,
ɗa a shamgbai a̱ ka̱kina̱ ka mala ka.
Marukusu 4:1-20
3 “Panai,
vuma vi yoku ɗa u banai kuvishangu icuꞋu a kashina ka̱ ni.
4 A̱yi a kuvishangu icuꞋu ya,
ɗa icuꞋu i yoku i yikpa̱i a uye.
Ɗa nnu n yawai,
ɗa a̱ ka̱ɗa̱i i ɗa.
5 IcuꞋu i yoku i yikpa̱i a kagbata.
IcuꞋu ya yu uta̱i gogo lo,
adama a na ubuta̱ wa wi n kayala ka̱u ba.
6 Amma ana kanna ku uta̱i,
ɗa ko songi i ɗa,
adama a na ka̱ta̱ abinya a a zuwa aralu a utsura kpamu ba,
ɗa e ɗekpei gogo lo.
7 IcuꞋu i yoku i yikpa̱i a̱ ubuta̱ wa awana.
Ana i gbonguroi,
ɗa awana a̱ kpa̱Ꞌi le ɗa a̱ ka̱na̱i kara le.
8 IcuꞋu i yoku i yikpa̱i a iɗika i singai,
ɗa i gbonguroi ɗa a matsai arata a gbagbaꞋin.
A̱ ma̱ca̱Ꞌa̱tsu dem ma na kacimbi ka ka vishangi,
i yoku i matsai arata ali amangatawun,
i yoku amangatatsu,
i yoku kpamu kamankupa.”
9 Ɗa u danai,
“Vuza na baci de dem wi n atsuvu a kupana,
u pana.”
Ili i na i zuwai Yesu u dansai n agisana
10 Ayin a na u da̱sa̱ngi endeꞋen ni,
aza o yoku a na i lo n Kupanazere a a banai wa̱ ni ɗa e ecei ni agisana a na u yaꞋankai le va.
11 Ɗa wu ushuki,
“A zagba ɗa̱ ta̱ adama a na i yeve ukuna wi ili i na yi usokongi i tsugono tsu gaɗi,
amma aza o yoku e kuyeve ili yi usokongi i nam pa ya ba,
sai n agisana.
12 Adama a na
‘I ta̱ a kufuɗa e kene n a̱shi,
amma e kuyeve ili i na e enei ba,
i ta̱ kpamu a kufuɗa kupana kadanshi ka̱ va̱,
amma a kufuɗa e yeve ka ba.
Adama a na ka̱ta̱ o bono u Ka̱shile ka cinukpaka le n unushi u le ba.’ ”◊
Yesu u danai le agisana a kuvishangu a
13 Ɗa Yesu u danai le,
“A̱ɗa̱ i yeve agisana a kadanshi a ba?
Nini ɗai i kuyeve agisana a kadanshi o yoku?
14 Vuza vu kuvishangu va kadanshi ka̱ Ka̱shile kaꞋa wi a kuvishangu.
15 IcuꞋu i na i yikpa̱i a uye,
yi ta̱ ci iyoci ya a aza a na a vishangi kadanshi ka̱ Ka̱shile a̱ a̱ɗu e le.
N kupana ku le,
ka̱ta̱ MalyaꞋi ma yawa ma ɗika kadanshi ka̱ Ka̱shile ka na a vishangi a̱ a̱ɗu e le.
16 Aza o yoku i ta̱ ci icuꞋu i na i yikpa̱i a kagbata.
Ele ɗa aza a na a ci isa kadanshi ka gogoꞋo m ma̱za̱nga̱.
17 Amma adama a na a zuwa aralu ba,
kaꞋa ke geshe a̱ɗu e le ba.
Ayin a na baci atakaci n kagbani-gbani ka yawai adama a kadanshi ka̱ Ka̱shile,
a̱ tsu kpa̱ɗa̱ ta̱ uye.
18 Aza o yoku i ta̱ adanshi icuꞋu i na i yikpa̱i a̱ ubuta̱ wa awana.
Ele a pana ta̱ kadanshi ka,
19 amma adama a atakaci a aduniyan a nam pa,
n a̱shawuya a̱ uciyi,
n kucikala ki ili i na i buwai.
Ku yawai ɗa ku ɗikai ma̱riki me le,
a fuɗa a matsa ili ba.
20 Aza o yoku a na a̱ yikpa̱i a̱ ubuta̱ u singai,
ele ɗa aza a na a panai kadanshi.
A isai kaꞋa,
ɗa a matsai ili n a̱bunda̱i.
Ɗa aza o yoku e nekei arata amangatawun a tawun,
aza o yoku amangatatsu,
aza o yoku kamankupa.”
Tsu na u gaꞋin a zuwa ma̱kuni
21 Ɗa Yesu u danai le,
“Vi ta̱ a kudyaɓa ma̱kuni,
ka̱ta̱ vi kimba̱ maꞋa n kasasu,
ko vu zuwa ɗaka vu kakuba?
A̱Ꞌa̱,
sai vu zuwa maꞋa gaɗi vu kashamkpatsu ka̱ ni.
Marukusu 4:21-41
22 Ili i na yi lo ufoɓi dem,
i ɗa yi ta̱ a̱ kuta̱ e keteshe,
ili i na yi usokongi feu i ta̱ a̱ kuɓa̱yuwa̱ i ɗa.
23 Vuza na baci de dem wi n atsuvu a kupana,
u pana.”
24 Ɗa u danai le,
“Indanai mayin,
ka̱ta̱ i zuwa atsuvu a̱ ɗa̱ i pana.
N ili i na vu kunzuki i ɗaɗa a̱ kukunzuku ali i laꞋa ili i nan lo.
25 Vuza na baci wi n i ɗa i ta̱ o kudoku e neke yi,
vuza na wi n i ɗa ba,
ko kenu na wi n i ɗa,
i ta̱ a kisa yi i ɗa.”
Agisana a icuꞋu i na i gbonguroi
26 Ɗa Yesu u doku u danai le kpamu,
“Ta tsugono tsu Ka̱shile ci nannai,
uteku u na vuza u ca̱Ꞌi icuꞋu a iɗika.
27 Kanna n kayin,
ko u lata ko u ɗenga̱,
icuꞋu ya yi ta̱ a̱ kuta̱,
ka̱ta̱ i gbonguro.
Amma a̱yi u yeve uteku u na i ɗa yi a kuyaꞋan ba.
28 Iɗika i tsu zuwa ta̱ ili i na a̱ ca̱Ꞌi i gbonguro,
i gita̱ kuyaꞋan akungu ka̱ta̱ i matsa arata a singai.
29 Ayin a na baci ilya ya i geꞋwei,
ka̱ta̱ u kapa i ɗa adama a na ayin a vikyaꞋa a ɗa a yawai.”
Agisana a icuꞋu i musta
30 Ɗa Yesu u doku u danai,
“Nini ɗai tsa kudana uteku u na Ka̱shile ki a kuyaꞋan tsugono ci ni?
Yi ɗa̱i kpamu tsa kugisanku n tsu ɗa?
31 Tsu ɗa ci ta̱ an icuꞋu i musta.
VicuꞋu vu na vu laꞋi n kenu,
a̱ ka̱tsuma̱ ki icuꞋu yi iɗika.
32 Ko n nannai a̱ ca̱Ꞌi baci ɗa u gbonguroi,
u tsu laꞋa ta̱ ica̱Ꞌa̱shi i na i buwai dem o kugbonguro.
U tsu yaꞋan ta̱ acaka a gbagbaꞋin,
ka̱ta̱ nnu n yikpa̱ punu a acaka a̱ ni o yoku adama a na a̱ ciya̱ kulu.”
33 N agisana n a̱bunda̱i a ɗaɗa Yesu u ka̱na̱i kuyotsongusu uma kadanshi ka̱ Ka̱shile uteku u na e kuyeve.
34 U yaꞋanka le kadanshi babu na u yaꞋankai le agisana ba.
Amma ayin a na baci wi uteku u ni m mukumitoni n ni,
u tsu dana le ta̱ agisana a kadanshi a.
Yesu u shamkpai aɓau
35 A kanna ka nan lo n kulivi,
Yesu m mukumitoni punu a̱ ka̱kina̱ ka mala ka̱ Ga̱lili u danai le,
“Tsu lazai a kubana upashi u nan ɗe.”
36 Ɗa a̱ ka̱sa̱kpa̱i ka̱bunda̱i ka uma ka,
ɗa a lazai a kubana upashi,
n a̱yi punu a kpantsu ka.
Antsu o yoku i ta̱ lo feu a̱ mini ma o kutono le.
37 A bana daꞋin ba,
ɗa wunla̱i u gbangam n aɓau u ɗenga̱i,
u ka̱na̱i kulete m kpantsu ka.
Adanshi wi ta̱ a kuliɓatangu n ku ɗa.
38 A̱yi Yesu tamkpamu ɗe ivaꞋin alavu a̱ ka̱kina̱ ka kpantsu n kaci ka̱ ni u kiyangi a kakuba.
Ɗa a banai a̱ ɗengusa̱i ni a danai,
“Malum!
Ci ta̱ a̱ kukuwa̱,
amma avu ta na adanshi vu keɓece ba.”
39 U ɗenga̱i ɗa u ɓarangi wunla̱i n aɓau a.
U danai,
“Paɗai bini.”
Ɗa aɓau n wunla̱i dem a shamgbai,
shiriri!
40 Ɗa u danai le,
“Yi ɗa̱i i zuwai ɗa i panai wovon nahannai?
Ali n gogo na ka̱ta̱ i neke a̱ɗu a̱ ɗa̱ ubuta̱ u Ka̱shile ba?”
41 Ɗa o doku a panasakai wovon n a̱bunda̱i,
ɗa a̱ ka̱na̱i mecenshenei,
“Vuma vu yi ɗa̱i nannai kpamu,
ali wunla̱i n aɓau a kupanaka yi?”